Fakaakoaga 10

Tau Gahua ne Vihiatia he Atua

Fefe hau a logonaaga ke he tau mena ne pehe e Atua ko e kelea? (1)

Ko e heigoa e tau mahani fakatane mo e fifine ne hepe? (2)

Fefe e talahauaga he Kerisiano ke he mahani pikopiko? (3) pele tupe? (3) kaiha? (3) mahani vale? (4) matutakiaga fakataulatua? (5) konahia? (6)

Mavete kehe mai fefe e tagata mai he tau gahua kelea? (7)

1. Fiafia e tau fekafekau he Atua ke he tau mena mitaki. Ka e lata foki a lautolu ke fakaako ke vihiatia e tau mena kelea. (Salamo 97:10) Ko e kakano he mena ia ke fakamamao he tau mena ne vihiatia he Atua. Ko e heigoa e falu he tau gahua pihia?

2. Mahani Feuaki: Ko e mahani fakatane mo e fifine ka e nakai la fai fakamauaga, faivao, mohe mo e manu, feuaki i loto he magafaoa, mo e mahani fakasotoma ko e tau agahala fakalialia ke he Atua. (Levitika 18:6; Roma 1:26, 27; 1 Korinito 6:9, 10) Kaeke kua nonofo tokoua e hoa ka e nakai fai fakamauaga, kua lata ke mavehevehe po ke taute e fakamauaga ke he fakatufono.—Heperu 13:4.

3. Pikopiko, Pele Tupe, Kaiha: Nakai maeke e Atua ko Iehova ke pikopiko. (Tito 1:2) Ko e tau tagata ne loto ke he hana taliaaga kua lata ni ke fakamamao mo e pikopiko. (Tau Fakatai 6:16-19; Kolose 3:9, 10) Ko e tau pele tupe oti kua ha ha i ai e lotokai. Ti ko e mena haia ne nakai fakalataha e tau Kerisiano ke he tau pele tupe oti, tuga e tau lotari, laga nua, mo e pigiko (bingo). (Efeso 5:3-5) Mo e nakai kaiha e tau Kerisiano. Ne nakai fakatau e lautolu ka e iloa tuai ko e tau koloa kaiha po ke uta pule noa ha mena taha.—Esoto 20:15; Efeso 4:28.

4. Ita Lahi, Favale: Maeke he ita nakai fai taofiaga ke takitaki atu ke he favale. (Kenese 4:5-8) Nakai ko e kapitiga he Atua e tagata favale. (Salamo 11:5; Tau Fakatai 22:24, 25) Ko e mena kelea lahi e taui po ke liuaki e kelea ke he tau mena kelea ne taute he falu mai ki a tautolu.—Tau Fakatai 24:29; Roma 12:17-21.

5. Tau Mana mo e Matutakiaga Fakataulatua: Ne kumi he falu tagata e malolo he tau agaga ha ko e lali ke maulu mai he tau gagao. Ka ko e falu talahau e tau mana ke he ha lautolu a tau fi ke fakagagao po ke kelipopo foki a lautolu. Ko e malolo i tua he tau gahua oti nei ko Satani. Ti kua nakai lata e tau Kerisiano ke taute e ha mena he tau mena pihia. (Teutaronome 18:9-13) Ko e nofo fakatata ki a Iehova ko e puipuiaga haia ne mua mai he tau malolo mana ka liga liti mai ki a tautolu mai he falu.—Tau Fakatai 18:10.

6. Konahia: Kua nakai hepe ke inu fakatote e uaina, pia po ke ha kava. (Salamo 104:15; 1 Timoteo 5:23) Ko e inu lahi mo e konahia e mena ne hepe ki mua he Atua. (1 Korinito 5:11-13; 1 Timoteo 3:8) Maeke he inu lahi ke moumou hau a malolo mo e fakatauhele hau a magafaoa. Maeke foki ke fakamukamuka a koe ke he falu kamatamata.—Tau Fakatai 23:20, 21, 29-35.

7. Ko e tau tagata ne taute e tau mena ne pehe e Atua ko e kelea to “nakai eke ma lautolu e kautu he Atua.” (Kalatia 5:19-21) Kaeke kua fakaalofa moli a koe ke he Atua mo e manako ke fiafia a ia, maeke ia koe ke vevehe kehe mai he tau gahua nei. (1 Ioane 5:3) Fakaako ke vihiatia e tau mena ne talahau he Atua ko e kelea. (Roma 12:9) Lafi fakalataha mo e tau tagata ne aga mahani Atua. (Tau Fakatai 13:20) Ka fakalataha mo e tau Kerisiano motua to eke moli ia mo punaaga he tau lagomatai. (Iakopo 5:14) Ka e mua atu ni, falanaki ke he lagomatai he Atua he puhala atu he liogi.—Filipi 4:6, 7, 13.

[Tau Fakatino he lau 20, 21]

Vihiatia he Atua e konahia, kaiha, pele tupe, mo e tau aga favale