Ko e Heigoa ka Tupu he Mate?

Fehagaaoaki e mate mo e moui. Tatai e mate ke he pulumohea. (Ioane 11:11-14) Nakai maeke e tau tagata mamate ke logona, kitia, vagahau, po ke manamanatu ke he ha mena taha. (Fakamatalaaga 9:5, 10) Kua fakaako he lotu fakavai kua o e tau tagata mamate ke he lalolagi fakaagaga ke nonofo mo e tau tupuna ha lautolu. Nakai pihia e fakaakoaga he Tohi Tapu.

Ko lautolu ne mamate kua nakai maeke ke lagomatai a tautolu, ti nakai maeke a lautolu ke fakamatematekelea a tautolu. Ko e aga mau he tau tagata ke taute e tau mahani tuai mo e tau poa nukua talitonu a lautolu to fiafia a lautolu ne mamate ki ai. Kua nakai fiafia e Atua ke he mena nei ha kua fakave ai ke he taha pikopiko ha Satani. Kua nakai fakafiafia foki e tau tagata mamate, ha kua nakai fai moui a lautolu. Kua nakai lata a tautolu ke matakutaku po ke tapuaki ke he tau tagata mamate. Kua lata ia tautolu ke tapuaki ke he Atua hokoia.—Mataio 4:10.

To liu momoui a lautolu ne mamate. To fafagu e Iehova a lautolu ne mamate ke momoui ke he lalolagi parataiso. Nakai la hoko mai e vaha ia anoiha. (Ioane 5:28, 29; Gahua 24:15) Kua fafagu he Atua a lautolu ne mamate tuga moli ni he fafagu e koe e tagata mai he mohe.—Mareko 5:22, 23, 41, 42.

Ko e manatu kua nakai mamate a tautolu ko e pikopiko a ia ne fakaholofa e Satani ko e Tiapolo. Kua taute e Satani mo e tau temoni hana e tau tagata ke manamanatu ko e tau agaga he tau tagata mamate kua momoui mo e fakatupu e gagao mo e falu mena vihi foki. Kua fakavaia e Satani e tau tagata, falu magaaho ke he tau miti mo e tau fakakiteaga. Kua fakahala e Iehova a lautolu ne lali ke tutala ke he tau tagata mamate.—Teutaronome 18:10-12.