Veveheaga Valu
‘Taufetului ke he Tau Agaga Kelea’
1. Ko e ha e tau gahua he tau agaga kelea kua aoga pauaki ki a tautolu?
TOKOLOGA e tau tagata kua vaiga ke he manatu na fai agaga kelea. Ka e nakai ko e mena fakafeki anei. He talitonu e tau tagata ki ai po ke nakai, kua fai agaga kelea moli, mo e kua lali a lautolu ke fakapehia e tau tagata oti. Ko e tau tagata tapuaki ha Iehova kua nakai hao ai. Ka e moli, ko lautolu ne matapatu e tatao ki ai. Ne fakalaga mai he aposetolo ko Paulo a tautolu ke he mena ia, he pehe: “Ko e mena nakai tau a tautolu ke he tau tagata, ka ko e tau iki lalahi [nakai kitia], mo e tau pule, mo e tau iki he pouli ha he lalolagi nai, katoa mo e tau agaga kelea ke he tau mena ha he lalolagi nai, katoa mo e tau agaga kelea ke he tau mena ha he lagi.” (Efeso 6:12) He vaha ha tautolu kua hoko ke he tapunu e malolo he peehiaga he tau agaga kelea kakano ko Satani kua liti mai he lagi mo e kua ita lahi mahaki, ha kua iloa kua tote hana vaha.—Fakakiteaga 12:12.
2. Maeke fefe a tautolu ke kautu mai he taufetului mo e tau agaga malolo kehe?
2 Na maeke kia ke kautu he taufetului mo e tau agaga malolo kehe? E, ka e maeke ni ka falanaki katoatoa ki a Iehova. Kua latatonu ia tautolu ke fanogonogo ki a ia mo e omaoma ke he hana Kupu. He taute pihia, liga to hao a tautolu mai he loga he tau mamahi fakatino, he mahani, mo e matematekelea e loto manamanatu tuga ne logona e lautolu ne ha ha i lalo hifo he takitakiaga fakasatani.—Iakopo 4:7.
Tau Iki he Lalolagi he Tau Tuaga he Lagi
3. Ko hai ne favale lahi e totoko ha Satani ki ai, mo e fefe?
3 Kua fakamaama fakamaaliali mai e Iehova ki a tautolu e tuaga he lalolagi tuga he kitia e ia mai he hana tuaga tokoluga he lagi. Ne age e ia ke he aposetolo ko Ioane e fakakiteaga ne fakakite a Satani ko e “tarako lahi kua kula.” Ne mautali a ia ke kai, ka maeke, e Kautu faka-Mesia he Atua he mogoia ni ne fanau he lagi he 1914. He kaumahala ai, ne fakatoka mai e Satani e totokoaga favale lahi ke he tau hukui he Kautu ia kua ha ha he lalolagi. (Fakakiteaga 12:3, 4, 13, 17) To fakahoko fefe e Satani e tauaga nei? Puhala mai he hana tau hukui ko e tau tagata.
4. Ko hai e punaaga he malolo he tau fakatufono he tagata, mo e iloa fefe e tautolu e mena ia?
4 Ne unu atu ai ke fakakite ki a Ioane e manu favale ne fitu e ulu mo e hogofulu e hoe, ko e manu ne ha ha ai e pule “ke he tau magafaoa oti, mo e tau vagahau kehekehe, mo e tau motu.” Ko e manu ia kua hukui e fakatokaaga katoatoa fakapolitika he lalolagi. Ne fakailoa ki a Ioane “ne age foki he tarako [Satani ko e Tiapolo] kia ia hana malolo, mo e hana nofoaiki, mo e pule lahi.” (Fakakiteaga 13:1, 2, 7) E, ko Satani e punaaga he malolo mo e pule he tau fakatufono he tagata. Ti, tuga ne tohia he aposetolo ko Paulo, ko e tau “iki he lalolagi” ko e tau “agaga kelea ke he tau mena ha he lagi,” ko lautolu ia ne pule ke he tau fakatufono he tagata. Ko lautolu oti ka tapuaki ki a Iehova kua lata ke maama katoatoa e aoga he mena ia.—Luka 4:5, 6.
5. Ko e heigoa kua hane fakapotopoto e tau pule fakapolitika ki ai he mogonei?
5 Pete kua loga e tau pule fakapolitika ne tokutoku kua mahani fakalotu, nakai fai he tau motu ne omaoma ke he pule ha Iehova po ke Patuiki fifili hana, ko Iesu Keriso. Kua aaka vale ke taofi ni ke he tau pule ha lautolu. He vaha nei, tuga ne fakakite he tala ia Fakakiteaga, “ko e tau agaga ia he tau temoni” kua hane fakapotopoto e tau pule he lalolagi ke “tau ke he aho lahi he Atua [“ko e Mua Ue Atu,” NW]” i Amaketo.—Fakakiteaga 16:13, 14, 16; 19:17-19.
6. Ko e ha kua lata ke fakaeneene ke maeke ke kalo mai he lalago e fakatokaaga fakasatani?
6 He tau aho oti, kua aamotia e tau momoui he tau tagata ha ko e tau fekehekeheaki fakapolitika, fakamatakau, fakatupe, mo e fakalotu ne kua vehe e magafaoa tagata ke he mafoa. He tau fekehekeheaki nei, kua aga mau ma e tau tagata ke tu kau—ke he tau kupu po ke tau gahua—ke he motu, magafaoa, matakau ne taha e vagahau, po ke tau tutuaga fakamatakau ne kua ha ha i ai a lautolu. Pete ni ka nakai putoia fakatonu e tau tagata ke he falu fekehekeheaki, kua fa mahani a lautolu ke kau ke he taha fahi ka e nakai ke he taha fahi. Ka e pete ni ko e tagata fe po ke mena tupu fe ne talia e lautolu, ko hai ha lautolu ne lalago moli? Kua talahau fakamaaliali he Tohi Tapu: “Ko e lalolagi oti ha he pule hana kua mahani kelea.” (1 Ioane 5:19) Maeke fefe mogoia he tagata ke kalo mai he fakaheheina fakalataha mo e tau tagata ne toe? Mai ni he lalago katoatoa e ia e Kautu he Atua mo e fakatumau katoatoa ke tu uho ke he tau fekehekeheaki he lalolagi.—Ioane 17:15, 16.
Tau Lagatau Fakavaia Hana ne Mahani Kelea
7. Kitia fefe e iloilo ha Satani he fakaaoga e ia e lotu fakavai?
7 He tau magahala oti he fakamauaga tuai, ne fakaaoga e Satani e tau kupu mo e favale fakatino ke fuluhi kehe e tau tagata takitokotaha mai he tapuakiaga moli. Ne fakaaoga foki e ia e tau lagatau fakagalogalo—tau gahua halahu mo e fakavaia. Kua taofi fakailoilo e ia e vala lahi he puke tagata ke he pouli puhala he lotu fakavai, he taute a lautolu ke manamanatu kua hane fekafekau a lautolu ke he Atua. He nakai ha ha e iloilo tonu ke he Atua mo e ofania e kupu moli, to liga futiaki kehe a lautolu ha ko e tau mana mo e tau tapuakiaga fakalotu aamotia po ke fiafia ke he tau gahua malolo. (2 Tesalonia 2:9, 10) Ka e ne hataki foki a tautolu he pete ni ko lautolu ne fakalataha ke he tapuakiaga moli he taha vaha, “to o kehe e falu . . . to fanogonogo a lautolu ke he tau agaga ke fakahehe ai, mo e tau kupu he tau temoni.” (1 Timoteo 4:1) Maeke fefe e mena ia ke tupu?
8. Maeke fefe ia Satani ke fakataki a tautolu ke he lotu fakavai pete ka hane tapuaki a tautolu ki a Iehova?
8 He fakavaia, kua fakaaoga he Tiapolo e tau lolelole ha tautolu. Kua lili agaia nakai a tautolu he matakutaku tagata? Kaeke pihia, to liga kaumahala a tautolu ke he peehiaga mai he tau magafaoa po ke tau tuuta kaina ke fakalataha ke he tau gahua ne puna mai he tau lotu fakavai. Kua fakatokoluga nakai a tautolu? Kaeke pihia, to liga totoko a tautolu ka fakatonu po ke ka nakai talia he falu e manatu ne fakatu e tautolu. (Tau Fakatai 15:10; 29:25; 1 Timoteo 6:3, 4) Ka nakai hiki e onoonoaga ha tautolu ke tatai mo e fakafifitakiaga he Keriso, to liga hihiga atu a tautolu ki a lautolu kua ‘fakamagiho e tau teliga ha tautolu’ he talahau ko e totou noa ni he Tohi Tapu mo e moui mahani mitaki e tau mena kua lata. (2 Timoteo 4:3) Pete he fakalataha moli a tautolu ke he taha matakau fakalotu po ke taofi fakamama noa ke he lotu ha tautolu ni ko e mena noa a ia ki a Satani, ko e mena ne mua atu ke nakai tapuaki a tautolu ki a Iehova ke he puhala ne fakatoka mai he Atua he hana Kupu mo e hana fakatokatokaaga.
9. Fakaaoga halahu fefe e Satani e mahani fakatane mo e fifine ke fakakautu aki hana tau foliaga?
9 Kua fakataki halahu foki e Satani e tau tagata ke fakamakona e tau manako pauaki ke he puhala hehe. Kua taute e ia e mena nei ke he manako lahi ke he mahani fakatane mo e fifine. He tiaki e mahani he Tohi Tapu, tokologa he lalolagi ne onoono ke he mahani fakatane mo e fifine he tau tagata ne nakaila fai fakamauaga ko e fiafia kua tonu po ke puhala a ia ke fakamoli aki kua lalahi a lautolu. Ka e kua a lautolu ne kua mau? Tokologa ne mahani faivao. Ti pete ni e mahani fakamoli ki loto he fakamauaga, tokologa kua kumi ke tau vevehe po ke nonofo kehekehe ke maeke ia lautolu ke nonofo mo e taha tagata foki. Ko e puhala fakagalogalo ha Satani kua amanaki ke omoi e tau tagata ke momoui ma e fiafia mogonei, he fakaohooho a lautolu ke fakaheu e tau lauiaaga he vaha loa nakai ki a lautolu ni mo e falu ka e mua atu ke he fakafetuiaga ha lautolu mo Iehova mo e hana Tama.—1 Korinito 6:9, 10; Kalatia 6:7, 8.
10. Ko e heigoa e puhala ne lali a Satani ke liliu kehe e tau aga ha tautolu ke he mahani kelea mo e favale?
10 Taha manako pauaki ko e manako ke fakafiafia. Ka atihake, to maeke ai ke fakahauhau fakatino, manamanatuaga, mo e loto. Ka e tali fefe a tautolu ka fakaaoga fakailoilo e Satani e tau tutuaga okioki ke lali ke toho kehe e tau manamanatuaga ha tautolu mai he Atua? Iloa e tautolu, ma e fakatai, na vihiatia e Iehova e fakalialia he mahani fakatane mo e fifine mo e favale. Ka fakakite mai he tau kifaga, tau fakaholoaga televisoni, po ke tau taute tala he tau fale fakafiafia e tau mena ia, to nonofo tuli kia a tautolu mo e kitekite ke he tau mena oti ia? Tokaloto foki, to taute e Satani e tau mena pihia ke au atu e fakalialia he tata lahi mai e magaaho ke liti a ia ke he pahua, ha ko e “tau tagata mahani kelea mo e tau tagata kua fakavai, to tolomaki atu a lautolu ke au atu he kelea, kua fakahehe atu ti fakaheheina foki a lautolu.” (2 Timoteo 3:13; Fakakiteaga 20:1-3) Ti kua lata ni ia tautolu ke mataala tumau ke he tau lagatau ha Satani.—Kenese 6:13; Salamo 11:5; Roma 1:24-32.
11. Ko e heigoa e tau puhala ka liga hele e tagata pete kua iloa e kupu moli ke he fakataulatua kaeke nakai mataala a ia?
11 Kua mailoga foki e tautolu ko lautolu ne hokulo e putoiaaga ke he ha puhala fakataulatua—taute mana, fakaaoga e tau taulatua, po ke lali ke matutaki mo e tau tagata mamate—kua vihiatia ki a Iehova. (Teutaronome 18:10-12) He tokaloto e mena ia, to nakai manamanatu a tautolu ke kumi ke he tau agaga hulalo, mo e to nakai fakaata moli e tautolu e tau mena ia ke he tau loto kaina ha tautolu ke taute e tau gahua fakatemoni ia ha lautolu. Ka e to fanogonogo nakai a tautolu ke he tau mena ia ka fakakite mai he televisoni ha tautolu po ke he Internet? Pete to nakai talia e tautolu e tuluiaga mai he taulatua, to liga pipi nakai e tautolu e kave filo he polo lima he mukemuke fanau fou, mo e manatu to liga he ha puhala ni ke puipui e tama mai he hagahaga kelea? He iloa na vihiatia he Tohi Tapu e taute mana ke he falu, to fakaata nakai e tautolu e hypnotist ke pule ke he manamanatuaga ha tautolu?—Kalatia 5:19-21.
12. (a) Kua fakaaoga fefe e leo kofe ke taute a tautolu ke manamanatu ke he tau mena kua iloa e tautolu kua hehe? (e) Maeke fefe he tau puhala tauteute, taute ulu, po ke puhala vagahau he tagata ke kitia kua nava ke he tau momoui ha lautolu ne nakai talia e Iehova? (i) Ko e heigoa e vala ha tautolu kua lata ke kalo kehe mai neke kaumahala ke he tau lagatau fakavaia ha Satani?
12 Kua pehe e Tohi Tapu hagaao ke he feuaki mo e tau mena kelea oti kua nakai lata (mo e tau fatuaki kelea) ke talahau ki mua ha tautolu. (Efeso 5:3-5) Ka e kua ka fakatauo e tau matapatu pihia mo e tau leo kofe kua mitaki e fati, tau mitaki, po ke foutu tumau? To kamata nakai a tautolu ke fatiaki e tau kupu lologo kua fakaheke e mahani fakatane mo e fifine ka e nakaila fai fakamauaga, ko e fakaaoga fakafiafia he tau tulaki, mo e falu gahua agahala? Po ke ka fita e iloa e tautolu kua nakai lata ia tautolu ke fifitaki e tau puhala moui he tau tagata ne putoia lahi ke he tau mena pihia, kua hihiga kia a tautolu ke fakamailoga a tautolu mo lautolu he tau puhala tauteute ha lautolu, tau taute ulu ha lautolu, po ke tau puhala vagahau ha lautolu? Kua fakaohooho kelea ha e tau puhala ha Satani ne fakaaoga ke fakataki aki e tau tagata ke talia e tau puhala manamanatu kelea hana! (2 Korinito 4:3, 4) Ke tumau nakai kaumahala ke he tau lagatau fakavaia hana, kua latatonu ia tautolu ke kalo mai he tafea fakalataha mo e lalolagi. Lata ia tautolu ke tokaloto ko hai a lautolu e “tau iki he pouli ha he lalolagi nai” mo e fakamakamaka ke taufetului ke he ha lautolu a tau fakaohoohoaga.—1 Peteru 5:8.
Mautali ke Eke mo Tau Tagata kua Kautu
13. Maeke fefe ia taha ha tautolu, mo e nakai mitaki katoatoa ha tautolu, ke kautu ke he lalolagi ne pule e Satani?
13 Ato mate a ia, ne pehe a Iesu ke he tau aposetolo hana: “Kia fakamanavalahi a mutolu, kua kautu au ke he lalolagi.” (Ioane 16:33) Maeke foki ia lautolu ke kautu. Kavi ke he 60 e tau ki mui, ne tohia he aposetolo ko Ioane: “Ko hai kia kua kautu ke he lalolagi, ka nakai ko ia ni kua talia, ko Iesu ko e Tama he Atua a ia ni?” (1 Ioane 5:5) Kua kitia e tua pihia he omaoma ha tautolu ke he tau poaki ha Iesu mo e falanaki ke he Kupu he Atua, tuga ni ne taute e Iesu. Ko e heigoa foki kua lata? Ke nonofo fakatata a tautolu ke he fakapotopotoaga ne Ulu e ia. Ka kaumahala a tautolu, kia fakatokihala katoatoa mo e kumi e fakamagaloaga he Atua he fakave ke he poa ha Iesu. Ke he puhala nei, pete he tau nakai mitaki katoatoa ha tautolu mo e tau hepehepe, kua maeke foki ia tautolu ke kautu.—Salamo 130:3, 4.
14. Totou Efeso 6:13-17, mo e fakaaoga e tau huhu mo e tau kupu tohi ne tutu he paratafa nei ke fakave aki e fakatutalaaga ke he aoga he tau vala takitaha he tapulu tau fakaagaga.
14 Ke kautu, kua lata ia tautolu ke tui e “tapulu tau katoa he Atua,” nakai tiaki taha vala. Fakamolemole veveu e Tohi Tapu hau ke he Efeso 6:13-17, ti totou ai ke he fakamaamaaga he tapulu tau ia. Ti, he tali e tau huhu i lalo, manamanatu ko e maeke fefe ke aoga a koe mai he puipuiaga ne fakatoka mai he tau vala takitaha he tapulu tau.
‘Tau tokupu kua pipi ke he kupu moli’
Pete he liga iloa e tautolu e kupu moli, maeke fefe he fakaako tumau, manamanatu fakahokulo ke he kupu moli he Tohi Tapu, mo e o tumau he feleveiaaga ke puipui a tautolu? (1 Korinito 10:12, 13; 2 Korinito 13:5; Filipi 4:8, 9)
“Ufi kahokaho ko e tututonu”
Ha hai e tuaga tututonu nei? (Fakakiteaga 15:3)
Fakataitai e fua he kaumahala ke muitua e tau puhala tututonu ha Iehova ka fakatapakupaku e tagata ke he hagahaga kelea fakaagaga. (Teutaronome 7:3, 4; 1 Samuela 15:22, 23)
‘Kia afi e tau aloalohui ke he tauteaga he vagahau mitaki ke mafola ai’
Kua puipui fefe a tautolu ke fakatumau ke fakaaoga e tau hui ha tautolu he o atu ke tutala ke he tau tagata hagaao ke he tau foakiaga he Atua ma e mafola? (Salamo 73:2, 3; Roma 10:15; 1 Timoteo 5:13)
“Akau punuti, ko e tua haia”
Kaeke ha ha ia tautolu e tua kua mauokafua, to fehagai fefe a tautolu ke he tau laliaga ne taute ke fakauaua po ke fakamatakutaku aki a tautolu? (2 Tau Patuiki 6:15-17; 2 Timoteo 1:12)
“Potiki tau ko e fakamouiaga haia”
Lagomatai fefe he amaamanakiaga ke he fakamouiaga e tagata ke kalo mai he matahele he tupetupe lahi ke he tau koloa he tino? (1 Timoteo 6:7-10, 19)
‘Pelu he agaga’
Ko e heigoa kua lata ia tautolu ke falanaki tumau ki ai ka tau atu ke he tau totoko mai ke he moui fakaagaga ha tautolu po ke he falu? (Salamo 119:98; Tau Fakatai 3:5, 6; Mataio 4:3, 4)
Ko e heigoa foki kua aoga ke kautu he tauaga fakaagaga? Lagafiha ka fakaaoga ai? Ma ha hai? (Efeso 6:18, 19)
15. Maeke fefe ia tautolu ke totoko fakalahi he tauaga fakaagaga?
15 Ha ko e tau kautau he Keriso, ko tautolu ko e vala he matakautau lahi ne tau he tauaga fakaagaga. Kaeke mataala tumau a tautolu mo e fakaaoga fakamitaki e tapulu tau katoa mai he Atua, to nakai pakia kelea a tautolu he tauaga nei. Ka e, to eke a tautolu mo fakamaloloaga lagomatai ke he tau matakainaga fekafekau he Atua. To mautali mo e mataala a tautolu ke totoko, folafola e tala mitaki he Kautu faka-Mesia he Atua, ko e fakatufono he lagi ne favale e totoko ha Satani ki ai.
Fakatutala Fakamanatu
• Ko e ha e tau tagata tapuaki ha Iehova kua fakatumau e tu uho ke he tau fekehekeheaki he lalolagi?
• Ko e heigoa falu lagatau fakavaia ne fakaaoga e Satani ke moumou fakaagaga aki e tau Kerisiano?
• Puipui fefe he tapulu tau fakaagaga ne tuku mai he Atua a tautolu he tauaga fakaagaga ha tautolu?
[Tau Fakatino he lau 76]
Kua hane fakapotopoto e tau motu ki Amaketo