Veveheaga Hogofulu
Ko e Kautu ‘To Nakai Fakaoti Tukulagi’
1. Ko e heigoa e mena kua peehi he tau mena tutupu he lalolagi tali mai he fakamauaga tuai he tagata?
KO E tau mena tutupu he lalolagi he tau aho takitaha kua fakamoli e nakai moua he tau tagata e fiafia ka tiaki e pule katoatoa ha Iehova mo e lali ke pule ki a lautolu ni. Nakai fai fakatokaaga fakatufono he tagata ne kua tamai e tau fua mitaki nakai fili tagata ke he tau tagata. Pete kua feaki he tau tagata e tau iloilo fakasaiene ke he tuaga tokoluga lahi mahaki, ne nakaila maeke ia lautolu ke kautu mai he gagao po ke fakaoti e mate, nakai fahia ke taute ke he taha e tagata. Kua nakaila maeke e pule he tagata ke utakehe e felakutaki, favale, mahani kelea, kolokolovao, po ke mativa. Ko e tau fakatufono pule kaka ne pule lahi agaia ke he tau tagata he tau motu loga. (Fakamatalaaga 8:9) Ko e puhala fakasaiene, lotokai, mo e fakateaga ne lafilafi ke takiva e kelekele, vai mo e matagi. Ko e fakatokatoka fakakelea fakatupe he tau takitaki kua fakauka e tokologa ke moua e tau koloa kua lata he moui. Totou afe e tau tau ne pule ai e tagata ti kua fakakite fakamaaliali e moli he mena nei: “Kua nakai ha i ai ke he tagata hana puhala, nakai ha ha he tagata kua fano ke fakatonu e mena ke fano a ia ki ai.”—Ieremia 10:23.
2. Ko e heigoa hokoia e tali ke he tau lekua he tagata?
2 Ko e heigoa e tali? Ko e Kautu he Atua, ne fakaako e Iesu hana tau tutaki ke liogi: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mataio 6:9, 10) Ko e Kautu he Atua he lagi ne fakamaama he 2 Peteru 3:13 ko e “lagi fou,” ka pule ki luga he “lalolagi fou,” ko e fakalatahaaga tagata tututonu haia. Kua uho lahi e Kautu he Atua he lagi ati eke ai e Iesu mo matapatu he hana fakamatala. (Mataio 4:17) Ne fakakite e ia e tuaga kua lata ke ha ha he tau momoui ha tautolu, he fakamalolo: “Kia kumikumi fakamua a mutolu ke he kautu he Atua mo e hana tututonu.”—Mataio 6:33.
3. Ko e ha e ako hagaao ke he Kautu he Atua kua tepetepe lahi mahaki he mogonei?
3 Ko e ako hagaao ke he Kautu he Atua ko e mena tepetepe lahi mahaki he mogonei, he nakai leva to gahua e Kautu ia ke hiki tukulagi e pule he lalolagi nei. Ne talahau tuai he Tanielu 2:44: “Ko e vaha he tau patuiki ia [tau fakatufono hane pule mogonei] to fakatu ai he Atua he lagi e kautu [kautu he lagi] nakai fakaoti tukulagi; ko e kautu foki ia nakai tuku atu ai ke he taha motu [to nakai liu e tau tagata ke pule foki ke he lalolagi], to tuki malipilipi mo e fakaotioti e tau kautu oti ia [ha ha he mogonei], ka ko ia to tumau tukulagi a ia.” Ti fakaoti he Kautu e tau aho fakamui nei he moumou katoatoa e fakatokaaga kelea nei. Ko e pule ke he lalolagi mai he Kautu nei he lagi to nakai fakauaua ai. Kua fiafia ha a tautolu ha ko e fakatotokaaga ka tamai he mena nei kua tata lahi mahaki mai mogonei!
4. He matutaki ke he Kautu, ko e heigoa ne tupu he lagi he 1914, mo e ko e ha kua aoga lahi e mena ia ki a tautolu?
4 He 1914, ne fakatu a Keriso Iesu mo Patuiki mo e kotofa ki a ia ke ‘pule ki mua ha lautolu kua fai fi kia ia.’ (Salamo 110:1, 2) Pihia foki he tau ia, ne kamata “e tau aho fakamui” he fakatokaaga kelea nei. (2 Timoteo 3:1-5, 13) He magaaho taha, ko e tau mena tutupu ne kitia e Tanielu he fakakiteaga fakaperofeta ne tutupu moli ai he lagi. Ko e ‘Mai i Tuai Hana Tau Aho,’ ko Iehova ko e Atua, ne age ke he Tama he tagata, ko Iesu Keriso, e “pule, mo e fakahekeaga, mo e kautu, kia fekafekau kia ia e tau motu oti, mo e tau kautu, mo e tau vagahau kehekehe.” He talahau e fakakiteaga, ne tohia e Tanielu: “Ko e hana pule ko e pule tukulagi haia, nakai mole atu ia, ko e hana kautu foki nakai fakaoti ia.” (Tanielu 7:13, 14) To puhala mai he Kautu nei he lagi he tau lima ha Keriso Iesu ka fakaata he Atua a lautolu ne manako ke he tututonu ke olioli e tau mena mitaki loga ne finagalo e ia he magaaho ne tuku e ia e tau mamatua fakamua ha tautolu he Parataiso.
5. Ko e heigoa e tau fakamaamaaga hagaao ke he Kautu nukua fiafia lahi a tautolu ki ai, mo e ko e ha?
5 Ko e manako nakai hau ke eke mo tagata mahani fakamoli he Kautu? Kaeke pihia, to fiafia lahi a koe ke he fakatokatokaaga mo e gahuahuaaga he fakatufono nei he lagi. To manako a koe ke iloa ko e heigoa he mena ia hane taute mogonei, ko e heigoa he mena ia ka taute anoiha, mo e ko e heigoa he mena ia kua manako mai ia koe. He kumikumi fakamatafeiga e koe e Kautu, kua lata ke tupu e loto fakaaue hau ki ai. Kaeke talia e koe hana pule, to mau tauteute mitaki a koe ke talahau ke he falu hagaao ke he tau gahua homo ue atu ka taute he Kautu he Atua ma e tau tagata omaoma.—Salamo 48:12, 13.
Ko e Tau Pule he Kautu he Atua
6. (a) Talahau fefe he tau Tohiaga Tapu ko e ha hai e pule katoatoa kua fakakite mai puhala he Kautu faka-Mesia? (e) Lata ia tautolu ke lauia fefe he tau mena ne ako e tautolu hagaao ke he Kautu?
6 Taha he tau mena fakamua ne fakakite he kumikumiaga pihia ko e Kautu faka-Mesia nei nukua kitia e pule katoatoa hokoia ha Iehova. Ko Iehova ne age e “pule, mo e fakahekeaga, mo e kautu” ke he hana Tama. He mole e age e malolo ke he Tama he Atua ke kamata pule ko e Patuiki, ne felauaki tonu mo e tau leo he lagi ne fakapuloa: “Ko e kautu he lalolagi kua eke ma e Iki [Iehova ko e Atua] ha tautolu mo e hana Keriso, to eke foki a ia [Iehova] mo patuiki tukulagi tukumuitea.” (Fakakiteaga 11:15) Ti ko e tau mena oti ne kitekite a tautolu ki ai hagaao ke he Kautu nei mo e tau mena ne fita he taute kua maeke ke fakatata fakalahi atu a tautolu ki a Iehova. Ko e mena ne ako e tautolu kua lata ke feaki ia tautolu e manako ke omaoma ke he hana pule katoatoa tukulagi.
7. Ko e ha kua fiafia pauaki a tautolu ko Iesu Keriso ko e Hagai Pule ha Iehova?
7 Manamanatu foki, kua tuku e Iehova a Iesu Keriso he nofoaiki ko e hana Hagai Pule. Ha ko e Iki Gahua ne fakaaoga he Atua ke taute e lalolagi mo e tau tagata, ne iloa mitaki e Iesu e tau manako ha tautolu ke mua hake he iloa he taha ia tautolu. Lafi ki ai, tali mai he kamataaga he fakamauaga tuai he tagata, ne fakatata e ia hana ‘fiafia ke he fanau he tau tagata.’ (Tau Fakatai 8:30, 31; Kolose 1:15-17) Kua lahi mahaki hana fakaalofa ma e tau tagata ati hifo mai fakatagata a ia ke he lalolagi mo e foaki hana moui mo lukutoto ha tautolu. (Ioane 3:16) Ti fakaata e ia ma tautolu e puhala ke fakatoka mai he agahala mo e mate mo e moua e magaaho ma e moui tukulagi.—Mataio 20:28.
8. (a) He fakatatai mo e tau pule he tagata, ko e ha to mauniva tukulagi e fakatufono he Atua? (e) Ko e heigoa e fakafetuiaga he “fekafekau fakamoli mo e loto matala” mo e fakatufono he lagi?
8 Ko e Kautu he Atua ko e fakatufono mauniva tukulagi. Ko e mauniva tukulagi hana kua fakamoli ha kua nakai maeke a Iehova ke mate. (Salamo 146:3-5, 10) Ke fakatatai mo e tau patuiki, ko Iesu Keriso, ko ia nukua kotofa he Atua e tuaga patuiki, kua nakai pule foki he mate. (Roma 6:9; 1 Timoteo 6:15, 16) Fakalataha ai mo Keriso he tau nofoaiki he lagi a lautolu toko 144,000 ko e tau fekafekau mahani fakamoli he Atua mai he “tau magafaoa oti, mo e tau vagahau kehekehe, mo e tau motu, katoa mo e atu motu.” Ko lautolu nei foki kua age e moui nakai maeke ke mate. (Fakakiteaga 5:9, 10; 14:1-4; 1 Korinito 15:42-44, 53) Ko e laulahi ia lautolu kua fita i luga he lagi, mo lautolu kua toe agaia he lalolagi kua eke mo “fekafekau fakamoli mo e loto matala” he vaha nei, kua hane fakalahi atu e tau mena he Kautu ia hinei.—Mataio 24:45-47.
9, 10. (a) Ko e heigoa e tau fakaohoohoaga fakamavehevehe mo e matahavala ka utakehe he Kautu? (e) Kaeke nakai manako a tautolu ke eke mo tau fi he Kautu he Atua, ko e heigoa e tau liliaga kua lata ia tautolu ke kalo mai ai?
9 Nakai leva mogonei, he magaaho kotofa hana, to fakaaoga e Iehova e matakau hana ka tamai e fakahala ke fakamea e lalolagi. To moumou tukulagi e lautolu e tau tagata ne fifili pauaki ke fakatikai ke mailoga e pule katoatoa hana mo e fakavihia e tau foakiaga fakaalofa ne taute e ia puhala ia Iesu Keriso. (2 Tesalonia 1:6-9) Ko e aho ha Iehova haia, ko e magaaho ne leva tigahau e fakatali ke fakatokoluga hana Pule Katoatoa he Lagi mo e Lalolagi. “Kitiala, ko e aho a Iehova ha ne hau, kua vela ai ke he ita mo e ita lahi; . . . ke fakaoti foki e tau tagata hala ha ha i ai.” (Isaia 13:9) “To eke e aho ia mo aho he ita, ko e aho ke matematekelea ai mo e mamahi, ko e aho pouli mo e pouli kikio, ko e aho ha i ai e tau aolagi mo e pouli.”—Sefanaia 1:15.
10 Ko e tau lotu fakavai oti mo e tau fakatufono he tau tagata mo e ha lautolu a tau kautau, ne hane fakaohooho he pule kelea nakai kitia he lalolagi nei, to fakaoti tukulagi. Ko lautolu oti ne fakamailoga e lautolu a lautolu mo e lalolagi nei he tutuli e moui pule he loto, nakai mahani fakamoli, tau puhala mahani kelea to fakaotioti ke he mate. Ko Satani mo e hana tau temoni to utakehe mai he fakalatahaaga he tau tagata ka nonofo he lalolagi, ti lili mauniva ke he afe tau. To ha ha he Kautu he Atua e pule katoatoa ke he tau gahua oti kana he lalolagi. Ko e fakatotoka ha ia ma lautolu oti ne ofania e tututonu!—Fakakiteaga 18:21, 24; 19:11-16, 19-21; 20:1, 2.
Ko e Tau Foliaga he Kautu—Puhala Ka Moua Ai
11. (a) To fakamoli fefe he Kautu faka-Mesia e finagalo ha Iehova ma e lalolagi? (e) Ko e heigoa e kakano he pule he Kautu ma e tau tagata ka nonofo he lalolagi he magahala ia?
11 Ko e Kautu faka-Mesia to taute katoatoa e finagalo fakamua he Atua ma e lalolagi. (Kenese 1:28; 2:8, 9, 15) Ke hoko mai ke he aho nei, kua kaumahala e tagata ke lalago e finagalo ia. Pete ia, ‘ko e lalolagi nofo tagata nakaila hoko mai’ to pule ki ai e Tama he tagata, ko Iesu Keriso. Ko lautolu oti ka hao mai he moumouaga he fakafiliaga ha Iehova ke he fakatokaaga tuai nei to gahua fakalataha ki lalo hifo he Keriso ko e Patuiki, he omaoma fiafia ke taute ha mena kua tala age e ia, ti to eke e lalolagi mo parataiso katoatoa. (Heperu 2:5-9) To olioli he tau tagata oti e tau gahua he tau lima ha lautolu mo e fakaaoga katoatoa e tau fua loga lahi mahaki he lalolagi.—Salamo 72:1, 7, 8, 16-19; Isaia 65:21, 22.
12. To tamai fefe e mitaki katoatoa he loto mo e tino ke he tau tagata i lalo he Kautu?
12 Magaaho ne tufugatia a Atamu mo Eva, ne mitaki katoatoa a laua, ti ko e finagalo he Atua ke fakapuke e lalolagi aki e tau hologa ha laua, he olioli oti e mitaki katoatoa he loto mo e tino. Ko e finagalo ia to fakalilifu moli i lalo hifo he pule he Kautu. Kua lata e mena nei ke utakehe e tau lauiaaga oti kana he agahala, ti ke fakaoti, to nakai ni gahua e Keriso ko e Patuiki ka e pihia foki ko e Ekepoa ne Mua. He fakauka, to lagomatai e ia e tau tagata omaoma hana ke aoga mai he kakano he poa fakafeilo he poa hana moui ko e tagata.
13. Ko e heigoa e tau mitaki fakatino ka mailoga i lalo hifo he pule Kautu?
13 I lalo hifo he pule he Kautu, ko e tau tagata ne nonofo he lalolagi to mailoga e homo atu he tau mitaki fakatino. “Ti fakaala ai e tau mata he tau tagata mata pouli, to logona foki he tau teliga he tau tagata teliga tuli; Ti hopohopo ai e tagata kulikuli tuga ne aila, to kalaga fiafia foki e alelo he tagata kuhukuhu.” (Isaia 35:5, 6) Ko e tau kili ne mafigofigo he fuakau po ke gagao to fakafou ke mui mai e kili he tama tote, mo e tau lolelole he gagao to mole atu ka e hukui he malolo hakahakau. “Kua liu moui mitaki hana tino ke homo atu ke he tino he tama tote; to liu foki a ia ke he hana vaha fuata.” (Iopu 33:25) To hoko mai e aho ka nakai fai kakano taha ke pehe, “Kua gagao au.” Ko e ha? Ha ko e tau tagata matakutaku Atua to fakatotoka mai he kavega he agahala mo e hana tau lauiaaga mamahi. (Isaia 33:24; Luka 13:11-13) E, “to holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”—Fakakiteaga 21:4.
14. Ko e heigoa kua putoia ke he mouaaga he tagata e mitaki katoatoa?
14 Ko e moua he mitaki katoatoa mogoia, kua lahi atu e mena ne putoia ai mai he mitaki e tino mo e mitaki e loto. Kua putoia e fakaata fakamitaki he tau aga ha Iehova, ha kua eke a tautolu ke he ‘fakatai he Atua, ke tuga a ia.’ (Kenese 1:26) Ke moua ai, kua lata ke lahi e fakaakoaga. He lalolagi fou, to “nofo ai e tututonu.” Ti, tuga ne talahau tuai e Isaia, “ti ako ai e mahani tututonu e lautolu kua nonofo ke he atu motu.” (2 Peteru 3:13; Isaia 26:9) Kua takitaki e aga nei ke he mafola—he vahaloto he tau tagata he tau lanu oti, tau tagata ne mahani lahi, he magafaoa he taha mo e mua atu ki a Iehova hokoia ni. (Salamo 85:10-13; Isaia 32:17) Ko lautolu ne ako e tututonu to fakaako fakahaga ke he finagalo he Atua ma lautolu. He vakavaka hifo ke he tau loto ha lautolu e fakaalofa ma Iehova, to muitua e lautolu hana tau puhala he tau fahi oti he tau momoui ha lautolu. To maeke ia lautolu ke talahau tuga ne talahau e Iesu, ‘Kua eke mau e au e tau mena kua mitaki ke he haku Matua.’ (Ioane 8:29) Ko e olioli mitaki ha ia he moui ka pihia moli e tau tagata oti kana!
Tau Mena kua Fita he Fakamoli
15. Fakaaoga e tau huhu he paratafa nei, fakamaama e tau gahua he Kautu mo e fakakite e tau mena kua lata ia tautolu ke taute mogonei.
15 Ko e tau mena fulufuluola kua fita he taute he Kautu he Atua mo e hana tau tagata kua fakamoli ai. Ko e tau huhu mo e tau kupu tohi ne mumui mai ka fakamanatu ki a koe e falu he tau gahua nei, pihia mo e tau mena he tau tagata oti he Kautu kua maeke mo e lata ke hane taute mogonei.
Totoko fakamua e Kautu ki a hai, mo e ko e heigoa e fua? (Fakakiteaga 12:7-10, 12)
Ko e fakapotopoto maiaga he tau tagata ne toe he matakau fe nukua onoono fakalahi ki ai tali mai he patuiki e Keriso? (Fakakiteaga 14:1-3)
Ko e heigoa e gahua ne talahau tuai e Iesu ka taute e ia ka mole e matematekelea lahi, ne fakamau ia Mataio 25:31-33?
Ko e heigoa e gahua fakamua kua taute he vaha nei? Ko hai hane taute ai? (Salamo 110:3; Mataio 24:14; Fakakiteaga 14:6, 7)
Ko e ha e tau tagata totoko fakapolitika mo e fakalotu ne nakai maeke ke taofi e gahua fakamatala? (Sakaria 4:6; Gahua 5:38, 39)
Ko e heigoa e tau hikihikiaga ne hoko ke he tau momoui ha lautolu ne omaoma ke he pule he Kautu? (Isaia 2:4; 1 Korinito 6:9-11)
Kautu he Afe Tau
16. (a) To fiha e leva ka pule e Keriso? (e) Ko e heigoa e tau mena homo atu ka tutupu he magahala ia mo e ka mole e magaaho ia?
16 He mole e tuku a Satani mo e hana tau temoni ke he pahua, ko Iesu Keriso mo e hana tau hakega 144,000 ka pule fakalataha ko e tau patuiki mo e tau ekepoa ke he afe tau. (Fakakiteaga 20:6) Ke he magahala ia, to hokotia e tau tagata ke he mitaki katoatoa, mo e utakehe tukulagi e agahala mo e mate faka-Atamu. He matahiku he Pule Afe Tau, ke he kautuaga he taute hana matagahua ko e Patuiki Ekepoa faka-Mesia, to “tuku atu e [Iesu] e kautu” ke he hana Matua, “kia pule okooko e Atua ke he tau mena oti kana.” (1 Korinito 15:24-28) He magaaho tonu ia, to fakatoka fakaku mai a Satani ke kamatamata e tau tagata kua fakamagalo ke kitia e lalago ha lautolu ke he pule katoatoa ha Iehova ke he lagi mo e lalolagi. Ka mole e kamatamata fakahiku, to moumou e Iehova a Satani mo lautolu ne kau mo ia. (Fakakiteaga 20:7-10) Ko lautolu ne fakatokoluga e pule katoatoa ha Iehova—hana tonuhia ke pule—to fita e fakatata katoatoa e mahani fakamoli nakai maueue ha lautolu. To tamai mogoia a lautolu ke he fakafetuiaga mitaki mo Iehova, kua talia e ia ko e hana tau fanau tane mo e fifine, kua talia faka-Atua ma e moui tukulagi.—Roma 8:21.
17. (a) Ko e heigoa ka tupu ke he Kautu ka oti e afe tau? (e) Ko e heigoa e kakano ne moli ai ko e Kautu ‘to nakai fakaoti tukulagi’?
17 Ko e mena ia, ko e gahua pauaki ha Iesu mo e 144,000 to hiki ai hagaao ke he lalolagi. Ko e heigoa ha lautolu a gahua anoiha? Ne nakai talahau he Tohi Tapu. Ka e kaeke tua fakamoli a tautolu ke fakatokoluga e pule katoatoa ha Iehova, to momoui a tautolu he magahala ia he fakaotiaga he Pule Afe Tau ke iloa ko e heigoa e finagalo ha Iehova ma lautolu ia pihia mo e lagi mo e lalolagi katoatoa homo ue atu. Taha mena foki, ko e pule he Keriso he afe tau to “tukulagi” mo e hana Kautu to “nakai fakaoti ia.” (Tanielu 7:14) Ke he kakano fe? Taha mena, ko e pule to nakai fakaholo age ke he tau lima he falu ne kehe e tau foliaga, ha ko Iehova ka Pule. Pihia foki, ko e Kautu ‘to nakai fakaoti tukulagi’ ha ko e hana tau gahua to tumau tukulagi. (Tanielu 2:44) Ti ko e Patuiki Ekepoa faka-Mesia mo e hana matakau patuiki ekepoa to fakalilifu tukulagi ai ha ko e ha lautolu a fekafekau tua fakamoli ki a Iehova.
Fakatutala Fakamanatu
• Ko e ha ko e Kautu he Atua hokoia ni e tali ke he tau lekua he tagata? Magaaho fe ne kamata e Patuiki he Kautu he Atua ke pule?
• Ko e heigoa kua fulufuluola pauaki ki a koe hagaao ke he Kautu he Atua mo e ko e heigoa ka taute?
• Ko e heigoa e tau kautuaga he Kautu kua fita e kitia e tautolu, mo e ko e heigoa e vala ha tautolu he tau mena nei?
[Fakatino he lau 92, 93]
I lalo hifo he Kautu he Atua, to ako he tau tagata oti e tututonu