Veveheaga Hogofulu Ma tolu
Ko e Moto Tagata Tokologa i Mua he Nofoaiki a Iehova
1. (a) Ato maeke e tau fekafekau he Atua he vaha fakamua ato faka-Kerisiano po ke 144,000 ke moua e palepale ha lautolu, ko e heigoa ha lautolu ka logona? (e) Ko e heigoa ka hoko ke he “moto tagata tokologa” kua momoui agaia he magahala nei?
KO E tau fekafekau tua fakamoli he Atua mai ia Apelu ki a Ioane ko e Papatiso ne tuku fakamua e taute he finagalo he Atua ke he tau momoui ha lautolu. Ka e, ne mamate oti a lautolu mo e tatali ke he liu tu mai ke he moui he lalolagi fou he Atua. Ko e 144,000 ka pule fakalataha mo Keriso ke he Kautu he Atua he lagi, to mamate foki mo e maeke ke moua e palepale ha lautolu. Ka e fakakite mai ia Fakakiteaga 7:9 ko e tau aho fakahiku nei, to ha ha ai e “moto tagata tokologa” mai he tau motu oti ka nakai logona e mate ka e amaamanaki ke momoui tukulagi ke he lalolagi. Ko koe nakai taha ia lautolu ia?
Mailoga ko e Moto Tagata Tokologa
2. Ko e heigoa ne tupu fakahaga ke moua e maamaaga mahino ke mailoga ai e moto tagata tokologa he Fakakiteaga 7:9?
2 He 1923, ne maama he tau fekafekau ha Iehova ko e “tau mamoe” he fakataiaga ha Iesu ia Mataio 25:31-46 mo e ‘tau mamoe kehe’ ne hagaao a ia ki ai he Ioane 10:16 ko e tau tagata ka moua e moui tukulagi ke he lalolagi. He 1931 ko lautolu ne fakamaama he Esekielu 9:1-11 ne kua fakamailoga e tau matale ne kitia ko lautolu foki ne ha ha e amaamanakiaga ke he lalolagi. Ti he 1935 ne ako ai ko e moto tagata tokologa ko e vala he vahega he tau mamoe kehe ne tala a Iesu ki ai. He vaha nei, kua totou miliona e moto tagata tokologa nei kua fiafia ki ai.
3. Ko e ha e talahauaga “tutu mai a lautolu ki mua he nofoaiki” ne nakai hagaao ke he vahega he lagi?
3 He Fakakiteaga 7:9, ne nakai kitia e moto tagata tokologa kua ha ha he lagi. He “tutu mai a lautolu ki mua he nofoaiki” he Atua kua nakai pehe ko lautolu ha ha he lagi. Ko lautolu ne kua kitia he Atua. (Salamo 11:4) Ko e moto tagata tokologa, “kua nakai maeke ia taha ke totou,” ne nakai ko e vahega he lagi ha kua kitia he fakatatai e numera ne nakai maeke ia taha ke totou mo e talahauaga ne tohia ia Fakakiteaga 7:4-8 mo e Fakakiteaga 14:1-4. Ko e numera ia ne tamai he lalolagi ke he lagi ne fakakite ko e 144,000.
4. (a) Ko e heigoa e “matematekelea lahi” ne hao mai e moto tagata tokologa i ai? (e) Tuga ne talahau he Fakakiteaga 7:11, 12, ko hai ne kitekite ke he moto tagata tokologa mo e tapuaki fakalataha mo lautolu?
4 Kua talahau e Fakakiteaga 7:14 hagaao ke he moto tagata tokologa: “Ko lautolu na kua o mai mai he matematekelea lahi.” Kua hao a lautolu mai he tau lekua kelea lahi mahaki kua logona tali mai he fakamauaga tuai he tagata. (Mataio 24:21) Ka talahau mo e fakaaue a lautolu ke he fakamouiaga ha lautolu ha ko e Atua mo Keriso, to fakalataha e tau mena momoui tua fakamoli oti he lagi mo lautolu ke talahau: “Amene; kia ha he Atua ha tautolu e fakamonu, mo e fakahekeaga, mo e iloilo, mo e fakaaue, mo e lilifu, mo e mana, mo e malolo tukulagi tukumuitea. Amene.”—Fakakiteaga 7:11, 12.
Fakamoli e Lata Pauaki
5. Maeke fefe ia tautolu ke fifili ko e heigoa ka taute ke eke mo vala he moto tagata tokologa?
5 Ko e fakahaoaga he moto tagata tokologa mai he matematekelea lahi ne lautatai ai mo e tau tutuaga tututonu ha Iehova. Ko e tau aga ne fakakite ko lautolu ka fakahao nukua talahau fakamahino mai he Tohi Tapu. Ti, kua maeke ia lautolu ne ofania e tututonu ke gahuahua mogonei mo e onoono ke fakamoli e lata pauaki ke fakahao. Ko e heigoa ha lautolu nei ka taute?
6. Ko e ha ne fakatai e moto tagata tokologa ke he tau mamoe?
6 Ko e mena aga molu mo e omaoma e tau mamoe. Ti pehe a Iesu kua fai mamoe kehe a ia nakai ko e vahega ke he lagi, kakano a ia ko e tau tagata ne nakai ni manako ke momoui tukulagi ke he lalolagi ka e omaoma foki ke he hana tau fakaakoaga. “Ko e haku a tau mamoe kua fanogonogo mai ke he haku a leo, kua iloa foki e au a lautolu; kua mumui mai foki a lautolu kia au,” he talahau e ia. (Ioane 10:16, 27) Ko e tau tagata anei ne fanogonogo moli mo e omaoma ke he tau talahauaga ha Iesu ti eke ai mo tau tutaki hana.
7. Ko e heigoa e tau aga kua lata ke feaki he tau tutaki ha Iesu?
7 Ko e heigoa falu aga kua lata e tau tutaki nei ha Iesu ke igatia mo e feaki? Tali he Kupu he Atua: “Kia tuku kehe e mutolu e tagata tuai ke he tau mena ne mahani ai a mutolu i tuai, . . . tapulu a mutolu ke he tagata fou kua eke ke lata mo e Atua, ke he tututonu mo e mahani mitaki ke fakamoli ai.” (Efeso 4:22-24) Kua feaki e lautolu e tau aga ne fakatolomaki ki mua e kaufakalataha he tau fekafekau he Atua—ko e “fakaalofa, ko e fiafia, ko e mafola, ko e fakauka, ko e totonu, ko e mahani mitaki, ko e tua, Ko e mahani molu, mo e manako fakalatalata.”—Kalatia 5:22, 23.
8. Ko e heigoa ka fehagai mo e moto tagata tokologa he lalago atu ki a lautolu ne toe?
8 Ko e moto tagata tokologa kua lalago e numera tote ha lautolu ne toe ne amaamanaki ke momoui he lagi, ne taki e gahua fakamatala. (Mataio 24:14; 25:40) Kua lalago atu pihia e tau mamoe kehe pete he iloa e lautolu to fehagai a lautolu mo e totokoaga ha kua tali mai he kamataaga he tau aho fakamui nei, kua liti hifo e Keriso Iesu mo e hana tau agelu a Satani mo e hana tau temoni mai he lagi. Kakano e mena nei “oi fakaalofa kia mutolu kua nonofo ke he fonua, . . . ha kua hifo kia mutolu e tiapolo kua ita lahi, ha kua iloa e ia kua tote hana vaha.” (Fakakiteaga 12:7-12) Ti, kua uhouho e totoko ha Satani ke he tau fekafekau he Atua he tata mai e fakaotiaga he fakatokaaga nei.
9. Kautu fefe e tau fekafekau he Atua he fakamatala e tala mitaki, mo e ko e ha?
9 Pete he kaka e favaleaga, kua matutaki e tupu ki mua he gahua fakamatala. Mai he tau tagata toko afe ne fakamatala e Kautu he matahiku he Felakutaki I he Lalolagi, kua totou miliona he mogonei, ne mavehe a Iehova: “Ko e tau kanavaakau oti kua taute ke tau kia koe, nakai monuina ia.” (Isaia 54:17) Mailoga foki he tagata he hopoaga lahi faka-Iutaia ne nakai maeke e gahua he Atua ke kaumahala. Ne tala age a ia ke he tau Farasaio he senetenari fakamua hagaao ke he tau tutaki: “Fakamamao a mo e tau tagata nai, ti tokai a lautolu; kaeke kua tupu mai he tau tagata e pule ia, mo e gahua ia, ti fakaoti ai; Kaeke kua tupu he Atua, ti nakai maeke ia mutolu ke fakaoti ai; neke moua a mutolu kua tau ke he Atua.”—Gahua 5:38, 39.
10. (a) Ko e heigoa e kakano he “fakamailoga” kua moua e lautolu ko e moto tagata tokologa? (e) Omaoma fefe e tau fekafekau he Atua ke he “leo mai he lagi”?
10 Ko lautolu he moto tagata tokologa ne kitia kua fakamailoga ma e fakahaoaga. (Esekielu 9:4-6) “Ko e fakamailoga” ko e fakamoliaga he tukulele ha lautolu ki a Iehova, papatiso ko e tau tutaki ha Iesu, mo e feaki e aga tuga he Keriso. Kua omaoma a lautolu ke he “leo mai he lagi” ne talahau hagaao ke he kautu he lotu fakavai he lalolagi katoa ha Satani: “Ati o kehe ā mutolu ia ia, neke fakalataha a mutolu mo ia ke he hana tau hala, neke moua foki a mutolu he hana tau malaia.”—Fakakiteaga 18:1-5.
11. Ko e heigoa e puhala aoga kua fakakite he moto tagata tokologa ko e tau fekafekau ha Iehova a lautolu?
11 Pihia foki, ne tala age a Iesu ke he tau tutaki hana: “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:35) Kehe ai, ko e tau tagata he tau lotu he lalolagi nei ne fekeliaki a lautolu he felakutaki, fa mahani ha kua kehekehe e tau motu ha lautolu! Pehe e Kupu he Atua: “Ko e mena ia kua iloa ai e fanau he Atua mo e fanau he tiapolo. Ko lautolu gotoa kua nakai eke e mahani tututonu, nakai mai he Atua a lautolu, katoa mo lautolu kua nakai fakaalofa ke he matakainaga ha lautolu . . . kia feofanaki a tautolu. Nakai tuga a Kaino ne mai ia ia ne mahani kelea, ne kelipopo foki e ia hana matakainaga.”—1 Ioane 3:10-12.
12. He matematekelea lahi, to fehagai fefe a Iehova mo e “tau akau” fakalotu ne fua mai e tau fua kelea?
12 Ne fakapuloa e Iesu: Ko e “tau akau mitaki oti kua takitaha mo e fua mai e tau fua mitaki; ka ko e tau akau kelea kua fua mai e tau fua kelea. Nakai maeke ke fua mai he akau mitaki e tau fua kelea, nakai maeke foki e akau kelea ke fua mai e tau fua mitaki. Ko e tau akau oti kua nakai fua mai e tau fua mitaki, to hio ni mo e tolo ke he afi. Ko e mena foki haia ke iloa ai e mutolu a lautolu ke he tau fua ha lautolu.” (Mataio 7:17-20) Ko e tau fua he tau lotu he lalolagi nei kua fakakite a lautolu ko e “tau akau” kelea, to moumou vave e Iehova he matematekelea lahi.—Fakakiteaga 17:16.
13. Fakatata fefe he moto tagata tokologa ko lautolu kua kaufakalataha he “tutu a lautolu ki mua he nofoaiki” a Iehova?
13 Fakakite mai ia Fakakiteaga 7:9-15 e tau mena ka takitaki ke fakahao e moto tagata tokologa. Kua kitia hane “tutu a lautolu ki mua he nofoaiki” ha Iehova he fakatokoluga hana pule katoatoa ke he lagi mo e lalolagi. Ne “unu foki ha lautolu a tau tapulu, mo e fakahina ha lautolu a tau tapulu ke he toto he Punua mamoe,” he fakakite kua mailoga e lautolu e poa fakafeilo hala ha Iesu. (Ioane 1:29) Ne tukulele a lautolu ke he Atua mo e fakamailoga ai he tanumia ke he vai. Ti kua olioli e lautolu e tuaga mea ki mua he Atua, fakakite ai he tau tapulu hina, mo e “fekafekau kia ia ke he aho mo e po.” Fai puhala nakai kua maeke ke lahi atu e fakalautatai katoatoa he moui hau mo e fakamaamaaga nei?
Tau Mena Kua Aoga Mogonei
14. Ko e heigoa falu aoga kehe lahi kua moua he tau fekafekau ha Iehova he mogonei?
14 Liga kitia foki e koe e tau aoga kehe lahi pihia he mogonei ne kua moua e lautolu kua fekafekau ki a Iehova. Ke fakatai, he ako a koe hagaao ke he tau finagalo tututonu ha Iehova, kua maama ia koe na fai amaamanakiaga mitaki ma e anoiha. Ti mogonei kua fai kakano moli a koe he moui—ke fekafekau ke he Atua moli mo e amaamanakiaga olioli ke he moui tukulagi ke he parataiso he lalolagi. E, ko e Patuiki ko Iesu Keriso ka “takitaki [e moto tagata tokologa] ke he tau vaipuna he moui.”—Fakakiteaga 7:17.
15. Kua aoga fefe e Tau Fakamoli a Iehova he omaoma ke he tau matapatu fakaakoaga Tohi Tapu hagaao ke he tau mena fakapolitika mo e ke he mahani?
15 Ko e aoga homo atu ne olioli he moto tagata tokologa ko e fakaalofa, kaufakalataha, mo e fetaliaaki ne ha ha he tau fekafekau ha Iehova he lalolagi katoa. Kua tatai e tau mena kai fakaagaga ha tautolu oti, tatai e tau matafakatufono ne omaoma a tautolu oti ki ai mo e tau matapatu fakaakoaga i loto he Kupu he Atua. Kakano haia ati nakai mavehevehe a tautolu fakapolitika po ke tau manatu fakamotu. Pihia foki, kua fakatumau e tautolu e tau tutuaga tokoluga he mahani ne manako e Atua ke he hana tau tagata. (1 Korinito 6:9-11) Ti, he nakai logona e taufetoko, mavehevehe, mo e mahani kelea he lalolagi, kua olioli he tau tagata ha Iehova e mena ne fakahigoa ko e parataiso fakaagaga. Mailoga e puhala ne fakamaama aki e mena nei he Isaia 65:13, 14.
16. Pete he tau lekua ne aga mau mo e moui, ko e heigoa e amaamanakiaga ha lautolu he moto tagata tokologa?
16 Nakai, ko e tau tagata fekafekau ha Iehova ne nakai mitaki katoatoa ai. Ti lauia a lautolu he tau lekua aga mau he moui he lalolagi nei, tuga e fehagai mo e tau magaaho vihi po ke matematekelea noa he tau felakutaki he tau motu. Fehagai foki a lautolu mo e gagao, mamahi, mo e mate. Ka e ha ha ia lautolu e tua ke he lalolagi fou, “to holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea.”—Fakakiteaga 21:4.
17. Pete ka liga tupu ha mena ki a tautolu mogonei, ko e heigoa e vaha homo atu anoiha kua fakatoka mai ma lautolu kua tapuaki e Atua moli?
17 Pete ka mole e moui hau mogonei ha kua motua, gagao, he pakia, po ke favale, to fakaliu tu mai e Iehova a koe ke moui he Parataiso. (Gahua 24:15) To matutaki a koe ke olioli e galue fakaagaga he magahala he Pule Afe Tau he Keriso. To hokulo atu e fakaalofa hau ke he Atua he kitia e koe kua lilifu e fakamoliaga he tau finagalo hana. Ti ko e tau monuina fakatino ka foaki e Iehova he magaaho ia ka fakahokulo atu e fakaalofa hau ki a ia. (Isaia 25:6-9) Ko e homo atu ha ia he vaha anoiha kua fakatoka ma e tau tagata he Atua!
Fakatutala Fakamanatu
• Ko e heigoa e mena kehe lahi ne tupu kua talahau he Tohi Tapu ke he moto tagata tokologa?
• Kaeke manako moli a tautolu ke putoia he moto tagata tokologa ne kua talia fiafia faka-Atua, ko e heigoa ha tautolu ka taute mogonei?
• Aoga fefe ki a koe e tau monuina ne olioli he moto tagata tokologa mogonei mo e ka olioli he lalolagi fou he Atua?
[Fakatino he lau 123]
Totou miliona he moto tagata tokologa kua tapuaki fakalataha ke he Atua moli