Veveheaga Hogofulu Ma fitu
Fakagahua e Mahani Atua Fakamoli he Kaina
1. Lauia fefe e tau fakamauaga he fakagahua e takitakiaga mai he Kupu he Atua?
KO IEHOVA ko e Kamataaga he fakamauaga, ti foaki mai he Kupu hana e takitakiaga mitaki lahi mahaki ma e tau magafaoa. Ko e fua he fakagahua e takitakiaga ia, tokologa e tagata kua ati e tau fakamauaga kua kautu. Nava ai, kua omoomoi e falu ne nonofo tokoua noa ni ke tohi matafakatufono e tau fakamauaga ha lautolu. Ko e falu kua fakaoti e tau fakafetuiaga i fafo he fakamauaga. Ko e tau tagata tane ne aga vale ke he tau hoana mo e tau fanau ha lautolu ne ako ke fakakite e mahani totonu mo e hofihofi.
2. Ko e heigoa ne putoia ke he moui magafaoa Kerisiano?
2 Loga e tau mena ne putoia ke he moui he magafaoa Kerisiano, tuga e puhala ne onoono a tautolu ke he tumau he fakamauaga, tau mena ha tautolu ka taute ke fakamoli e tau matagahua ha tautolu i loto he magafaoa, mo e puhala ne fakafehagai a tautolu mo lautolu he magafaoa. (Efeso 5:33–6:4) Liga fita e iloa e tautolu e talahauaga he Tohi Tapu hagaao ke he moui magafaoa, ka ko e taha mena ke fakagahua e fakatonuaga he Tohi Tapu. Nakai fai ia tautolu kua manako ke tuga a lautolu ne fakahala e Iesu he kalo hola mai he tau poakiaga he Atua. Ne manatu hehe a lautolu ko e mena ni hokoia kua lata ko e fakamoli fakalotu. (Mataio 15:4-9) Kua nakai manako a tautolu ke ha ha e mahani Atua fakamoli ka e mahala ke fakagahua ai he loto kaina ha tautolu. Ka e, manako a tautolu ke fakakite e moli he mahani Atua fakamoli ko e “koloa lahi ni haia.”—1 Timoteo 5:4; 6:6; 2 Timoteo 3:5.
To Fiha e Leva he Tumau e Fakamauaga?
3. (a) Ko e heigoa kua tupu ke he loga he tau fakamauaga, ka ko e heigoa kua lata ia tautolu ke eketaha ki ai? (e) He fakaaoga e Tohi Tapu hau, tali e tau huhu ne tohi i lalo he paratafa nei.
3 He tupu lahi ai, kua mailoga moli kua tagataga e tau pipiaga he fakamauaga. Ko e falu hoa mau ne loga e tau tau ne mau ka kua fifili ke tau vevehe mo e mau ke he taha tagata kehe. Pihia foki kua nakai matakehe ke logona kua nonofo kehekehe e tau hoa mau fuata ka e nakaila leva e mau. Ko e heigoa ni he falu ne taute, kua lata ia tautolu ke manako ke taute e mena ke fiafia a Iehova. Kia fakatutala a tautolu ke he tau huhu mo e tau kupu tohi ne mumui mai ke kitia e talahauaga he Kupu he Atua hagaao ke he tumau he fakamauaga.
He mau e tagata tane mo e fifine, fiha e leva ne kua amanaki ke nonofo tokoua a laua? (Mareko 10:6-9; Roma 7:2, 3)
Ko e heigoa e fakaveaga hokoia ma e tau vevehe mo e liga maeke ke liu ke mau ne kua lata ki mua he Atua? (Mataio 5:31, 32; 19:3-9)
Fefe e logonaaga ha Iehova hagaao ke he tau vevehe ne nakai fakaata he Kupu hana? (Malaki 2:13-16)
Fakaohooho kia he Tohi Tapu e nonofo kehekehe ko e puhala ke fakamitaki aki e tau lekua he fakamauaga? (1 Korinito 7:10-13)
Ko e heigoa e tau tutuaga ne liga lata e nonofo kehekehe? (Salamo 11:5; Luka 4:8; 1 Timoteo 5:8)
4. Ko e ha ne tumau e falu fakamauaga?
4 Ko e falu fakamauaga kua kautu ai, mo e tumau. Ko e ha? Taha mena aoga ha kua fakatali tokoua a laua ato momotua e tau manamanatuaga to mau, ka e aoga foki ke kumi e hoa ne maeke ke tatai e tau mena ne fiafia ki ai mo e ataina ke tutala e tau mena. Ka ko e mena ne mua atu e aoga, ko e kumi e hoa ne fakaalofa ki a Iehova mo e fakalilifu hana Kupu mo fakaveaga ke taute aki e tau lekua. (Salamo 119:97, 104; 2 Timoteo 3:16, 17) Ko e tagata pihia to moua e agaga tuga ka nakai felauaki mitaki, kua maeke agaia ni ia ia ke nonofo kehekehe po ke tau vevehe. To nakai fakaaoga e ia e tau kuku he hoa hana ke kalo hola mai he tau matagahua hana. Ka e, to fakafehagai a ia ke he tau lekua mo e kumi e tau puhala kua maeke ke taute aki.
5. (a) Lauia fefe e mahani fakamoli ki a Iehova i loto he fakamauaga? (e) Pete he fehagai mo e totokoaga, ko e heigoa e aoga ka moua he tapiki mau ke he tau tutuaga ha Iehova?
5 Kua fakafetoko e Satani ka matematekelea a tautolu, to tiaki e tautolu e tau puhala ha Iehova. (Iopu 2:4, 5; Tau Fakatai 27:11) Ka e laulahi he Tau Fakamoli a Iehova ne matematekelea ha kua totoko e hoa kua nakai tiaki e tau omonuo he fakamauaga. Ne matutaki a lautolu ke mahani fakamoli ki a Iehova mo e hana tau poakiaga. (Mataio 5:37) Ko e falu ne fakauka kua olioli ha kua matutaki atu e tau hoa ha lautolu ke fekafekau ki a Iehova—pete he loga e tau tau ne totoko ai! (1 Peteru 3:1, 2) Ma e tau Kerisiano ne nakai fakakite he tau hoa ha fakamailoga ke hiki po kua tiaki he tau hoa a lautolu ha kua fekafekau ki a Iehova, ne iloa foki e lautolu nei to fakamonuina a lautolu he fakakite e mahani Atua fakamoli he kaina.—Salamo 55:22; 145:16.
Igatia mo e Taute Hana Vala
6. Ke moua e fakamauaga kua kautu, ko e heigoa e fakatokaaga kua latatonu ke fakalilifu?
6 Moli, ke moua e fakamauaga kua kautu kua lata ke mua atu mai he nonofo tokoua noa ni. Ko e matapatu manako kua lata ia laua tokoua ke igatia mo e fakalilifu e fakatokaaga ha Iehova he ulu pule. Kua lafi e mena nei ke he maopoopo mo e logonaaga haohao mitaki he loto kaina. Ia 1 Korinito 11:3, totou e tautolu: “Ko e ulu he tau tane oti ko Keriso haia, ko e ulu he hoana ko e tane haia, ka ko e ulu a Keriso ko e Atua haia.”
7. Kua lata fefe ke fakagahuahua e ulu pule i loto he magafaoa?
7 Mailoga nakai e koe ko e heigoa ne totoku mua he kupu ia? E, ko e tau tane oti kua fai Ulu, ko Keriso, ne lata ke omaoma a ia ki ai. Kakano e mena nei kua lata e tane ke fakagahuahua e ulu pule hana ke he puhala kua fakaata e tau mahani ha Iesu. Ne omaoma e Keriso ki a Iehova, ne hokulo e fakaalofa ke he fakapotopotoaga, mo e leveki ki ai. (1 Timoteo 3:15) Hokotia foki a ia ke ‘foaki mai ke eke mo hukui aki.’ Nakai fakatokoluga a Iesu mo e kua nakai manatu fakateaga, ka e ‘fakatokolalo mo e loto holoilalo.’ Ko lautolu i lalo hifo he ulu pule hana kua ‘moua e okiokiaga ma e tau solu ha lautolu.’ Ka fakafehagai e tane ke he hana magafaoa he puhala nei, kua fakakite e ia kua omaoma a ia ke he Keriso. Kua lata mogoia he hoana Kerisiano ke logona e aoga mo e okiokiaga he kau tokoua mo e tane hana mo e omaoma ke he hana ulu pule.—Efeso 5:25-33; Mataio 11:28, 29; Tau Fakatai 31:10, 28.
8. (a) Ko e ha kua liga hihiga e tau puhala Kerisiano ke nakai moua e tau fua mitaki ne manako ki ai he falu kaina? (e) Ko e heigoa ha tautolu kua lata ke taute kaeke fehagai mo e tuaga pihia?
8 Ka e pete ia, to tutupu agaia e tau lekua. Kua fita a tautolu he hokulo e logonaaga hogohogo manava ka fakatonu mai he falu ato fai he magafaoa ne kamata ke fakagahua e tau matapatu fakaakoaga he Tohi Tapu. Ko e tau ole totonu mo e mahani fakaalofa to liga nakai moua ha fua. Iloa e tautolu na pehe e Tohi Tapu ke tuku kehe e “vale, mo e ita, mo e miha, mo e kupu kelea.” (Efeso 4:31) Ka e ka fai he magafaoa ne nakai iloa ha mena mitaki foki, ko e heigoa kua lata ke taute? Mogoia, ne nakai fifitaki e Iesu a lautolu ne fakamatakutaku mo e vale, ka e falanaki a ia ke he hana Matua. (1 Peteru 2:22, 23) Ti ka tutupu e tau tutuaga kamatamata he loto kaina, fakakite e mahani Atua fakamoli he liogi ki a Iehova ma e hana lagomatai ka e nakai talia e tau puhala he lalolagi.—Tau Fakatai 3:5-7.
9. He nakai kumi e kelea, ko e heigoa ne ako he tokologa he tau tane Kerisiano ke taute?
9 Mena nakai mafiti e tau hikihikiaga, ka e gahuahua moli e tau fakatonuaga he Tohi Tapu ka fakagahua fakauka mo e fakamakamaka. Tokologa e tau tane ne moua kua kamata e fakamauaga ke holo ki mua he magaaho ne loto fakaaue a lautolu ke he tau fehagaiaga he Keriso ke he fakapotopotoaga. Ko e tau tagata nakai mitaki katoatoa a lautolu he fakapotopotoaga. Ka e, fakaalofa a Iesu ke he fakapotopotoaga, fakatoka e fakafifitakiaga hako, mo e fakaaoga e tau Tohiaga Tapu ke lagomatai aki ke tupu tolomaki ki mua. Ne foaki e ia hana moui ke hukui aki e fakapotopotoaga. (1 Peteru 2:21) Ne fakamalolo he fakafifitakiaga hana e tokologa he tau tane Kerisiano ke foaki e ulu pule mitaki mo e foaki e lagomatai fakaalofa ke tupu tolomaki ai ki mua. Kua helehele mai he mena nei e tau fua mitaki ka e nakai kumi kelea po ke fakaheu ke tutala.
10. (a) Ko e heigoa e tau puhala ka liga taute he tane po ke hoana—pihia foki taha kua totoku ko e Kerisiano—ke fakauka aki e moui he falu he kaina? (e) Ko e heigoa ka liga taute ke fakaholo ki mua e tuaga mitaki?
10 Ka e kua ka nakai mataala e tane ke he tau manamanatuaga he magafaoa hana po ke nakai fakamakaukau ke taute e fakatokatokaaga ma e magafaoa ke fakatutala ke he Tohi Tapu mo e falu gahua foki? Po ke ka e kua ka nakai kaufakalataha e hoana mo e fakakite e omaoma mahani Atua? Ko e falu ne moua e tau fua mitaki he taute fakalilifu e tau tutala fakamagafaoa hagaao ke he tau lekua. (Kenese 21:10-12; Tau Fakatai 15:22) Ka e pete he nakai moua oti e tau fua kua amanaki ki ai, igatia a tautolu oti mo e maeke ke lafi ke he tupu tolomaki ki mua e agaga he kaina he fakaata ma e taha fua he agaga he Atua ke he tau momoui ha tautolu, he fakakite e manatu fakaalofa ma e falu tagata i loto he magafaoa. (Kalatia 5:22, 23) To holo ki mua, he nakai fakatali ke he taha tagata ke taute taha mena, ka e he taute e vala ha tautolu, ti fakakite ai kua fakagahua e tautolu e mahani Atua fakamoli.—Kolose 3:18-21.
Mouaaga he Tau Tali
11, 12. Ko e heigoa ne foaki mai e Iehova ke lagomatai aki a tautolu ke kautu e moui magafaoa?
11 Kua loga e tau punaaga ne fulufuluhi e tau tagata ki ai ke moua mai e fakatonuaga ma e tau mena fakamagafaoa ha lautolu. Ka e iloa e tautolu kua ha ha he Kupu he Atua e tomatomaaga kua mua atu e mitaki, ti fakaaue a tautolu he puhala mai he fakatokatokaaga kitia hana, kua lagomatai he Atua a tautolu ke fakagahua ai. Kua aoga katoatoa nakai a koe mai he lagomataiaga ia?—Salamo 119:129, 130; Mika 4:2.
12 He lafi ke he fakalataha ke he tau feleveiaaga fakapotopotoaga, kua fakatoka kehe tumau nakai e koe taha magaaho ma e fakaako Tohi Tapu fakamagafaoa? Ko e tau magafaoa ne taute pihia kua maeke ke gahua ke kaufakalataha ke he ha lautolu a tapuakiaga. Kua monuina e moui magafaoa ha lautolu he fakagahua e Kupu he Atua ke he tau tutuaga ha lautolu ni.—Teutaronome 11:18-21.
13. (a) Kaeke fai huhu a tautolu ke he tau mena fakamagafaoa, fa mahani ke moua e tautolu i fe e lagomatai kua lata? (e) Ko e heigoa kua lata ke fakaata he tau fifiliaga oti ka taute e tautolu?
13 Liga fai huhu a koe ke he tau mena fakamagafaoa. Ma e fakatai, ka e kua e puipui he fanafanau? Kua hako nakai e fakatotama? Ka fiafia tote e tama ke he tau mena fakaagaga, lahi fefe e lata hana ke fakalataha ke he tapuakiaga fakamagafaoa? Loga e tau huhu pihia kua fakatutala ki ai he tau tohi ne lomi fakailoa he Tau Fakamoli a Iehova. Ako ke fakaaoga e tau tohi lagomatai fakaako faka-Tohi Tapu, putoia e tau index, ke kumi aki e tau tali. Ka nakai fai tohi pihia a koe tuga ne hagaao e index ki ai, fakakia ke he fata tohi he Fale he Kautu. Po ke liga moua e koe e tau tohi nei he komopiuta hau. Maeke foki ia koe ke fakatutala e tau huhu hau mo e tau matakainaga Kerisiano kua momotua fakaagaga. Ka kia nakai amanaki tumau ke he tali e po ke nakai ma e tau huhu oti. Fa mahani ke fifili ni e koe, tokotaha po ke tokoua mo e hoa mau. Ti taute ai e tau fifiliaga kua fakakite kua fakagahua e koe e mahani Atua fakamoli nakai ni he toloaga tagata ka e pihia foki he kaina.—Roma 14:19; Efeso 5:10.
Fakatutala Fakamanatu
• Putoia fefe e mahani fakamoli ki a Iehova he fakamoli ke he hoa he taha?
• Ka pehia ha ko e tau lekua fakamagafaoa, ko e heigoa ka lagomatai a tautolu ke taute e mena kua fakafiafia e Atua?
• Pete he kaumahala falu he magafaoa, ko e heigoa ha tautolu ka taute ke fakaholo ki mua e tuaga?
[Fakatino he lau 155]
Kua lata e ulu pule he tane ke fakaata e tau aga ha Iesu
[Fakatino he lau 157]
He fakaako Tohi Tapu tumau ko e magafaoa kua lagomatai ke pipi fakalataha ai