FAKAAKOAGA 8
Mitaki e Tau Kapitiga ha Iosia
Uka nakai he manatu e koe ke taute e mena hako?— Tokologa ne manatu na uka. Tala mai e Tohi Tapu ki a tautolu ne uka lahi ma e tama taane ko Iosia ke taute e mena hako. Ka kua mitaki e tau kapitiga haana ne lagomatai a ia. O mai la ke fakaako atu foki hagaao ki a Iosia mo e tau kapitiga haana.
Ko e matua taane ha Iosia ko Amone, ko e patuiki ha Iuta. Ne mahani kelea lahi a Amone ti tapuaki foki a ia ke he tau tupua ta. He mogo ne mate e matua taane ha Iosia, ne eke a Iosia mo patuiki ha Iuta. Ka ko e valu laia e tau haana he moui! Mahani kelea nakai a ia tuga e matua taane haana he manatu e koe?— Nakai, ai mahani kelea a ia!
Hataki e Sefanaia e tau tagata ke ua tapuaki ke he tau tupua ta
He tote a Iosia ne fitā a ia he manako ke omaoma ki a Iehova. Ti fifili e ia ke kapitiga ni mo e tau tagata ne fiafia ki a Iehova. Ne lagomatai e lautolu a Iosia ke taute e mena hako. Ko hai falu kapitiga ha Iosia?
Taha kapitiga haana ko Sefanaia. Ko Sefanaia ko e perofeta ne hataki e tau tagata ha Iuta to fai mena kelea ka tupu ki a lautolu ka tapuaki a lautolu ke he tau tupua ta. Ne fanogonogo a Sefanaia ki a Iosia ti tapuaki ki a Iehova, nakai ke he tau tupua ta.
Taha kapitiga foki ha Iosia ko Ieremia. Ne tatai e tau tau moui haana mo Iosia, ti nonofo fetataaki a laua he mogo ne ikiiki ai. Ko e tau kapitiga mitaki a laua ti ko e magaaho ne mate a Iosia ne fati e Ieremia e lologo pauaki ha kua galo tuai e ia a Iosia. Ne felagomataiaki a Ieremia mo Iosia ke taute e tau mena hako mo e omaoma ki a Iehova.
Ne felagomataiaki a Iosia mo Ieremia ke taute e mena hako
Ko e heigoa haau ka fakaako mai he fakafifitakiaga ha Iosia?— Mogo ne tama tote agaia a Iosia, ne fitā a ia he manako ke taute e tau mena hako. Ne iloa e ia kua lata a ia ke kapitiga mo e tau tagata ne fiafia ki a Iehova. Kia eketaha ke fifili e tau kapitiga kua fiafia ki a Iehova mo e maeke ke lagomatai a koe ke taute e mena hako!