VEVEHEAGA HOGOFULU MA FĀ
Maeke e Magafaoa Haau ke Fiafia
1, 2. Ko e heigoa ha Iehova ne manako ma e tau magafaoa?
KO IEHOVA KO E ATUA ne fakahoko e fakamauaga fakamua. Tala mai e Tohi Tapu ki a tautolu ne tufuga he Atua e fifine fakamua “ti ta mai ai . . . kia Atamu.” Ne fiafia lahi a Atamu ti pehē: “Ko e hui ni hanai he haku hui, mo e kakano he haku kakano.” (Kenese 2:22, 23) Tala mai he mena nei ki a tautolu kua manako a Iehova ke he tau hoa mau ke fiafia.
2 Momoko ai, tokologa e tagata ne nakaila logona e moui fiafia he magafaoa. Pete ia, loga e matapatu fakaakoaga i loto he Tohi Tapu ka lagomatai e tau tagata oti he magafaoa ke taute e moui magafaoa ha lautolu ke kautū mo e fiafia he fakalataha auloa.—Luka 11:28.
MENA KUA AMANAKI E ATUA MAI HE TAU TAANE
3, 4. (a) Lata e taane ke fehagai fēfē ke he hoana haana? (e) Ko e ha kua aoga ai ke fefakamagaloaki e taane mo e hoana?
3 Pehē e Tohi Tapu ko e taane mitaki kua lata ke fakaalofa mo e fakalilifu e hoana haana. Fakamolemole totou Efeso 5:25-29. To fakaalofa hofihofi tumau e taane he fakafetui mo e hoana haana. To puipui, leveki, mo e nakai taute foki he taane ha mena ke fakamamahi e hoana.
4 Ka ko e heigoa he taane kua lata ke taute he mogo ka hepe e hoana haana? Poaki ke he tau taane: “Kia fakaalofa ke he tau hoana ha mutolu, ti ua fakahogohogo kia lautolu.” (Kolose 3:19) Tau taane, manatu na hepe foki a mutolu. Ka manako a koe ke fakamagalo he Atua, lata a koe ke fakamagalo e hoana haau. (Mataio 6:12, 14, 15) Ka makai e taane mo e hoana ke fefakamagaloaki, to lagomatai a laua ke fiafia e fakamauaga.
5. Ko e ha kua lata e taane ke fakalilifu e hoana haana?
5 Amanaki a Iehova ke he taane ke fakalilifu e hoana haana. Lata e taane ke manamanatu fakamitaki ke he tau manako he hoana haana. Aoga lahi mahaki e mena nei. Ka nakai fehagai fakamitaki e taane ke he hoana haana, to liga nakai fanogonogo a Iehova ke he tau liogi he taane. (1 Peteru 3:7) Kua uho e tau tagata ki a Iehova ha ko e fakaalofa ha lautolu ki a Ia. Ti nakai tuku fakamua e Ia e tau tagata taane ke he tau fifine.
6. Ko e heigoa e kakano ma e taane mo e hoana ke “tino taha”?
6 Fakamaama e Iesu ko e taane mo e hoana “kua nakai tuai tokoua, ka kua tino taha na laua.” (Mataio 19:6) Kua fakamooli katoatoa a laua ko e taha ke he taha. (Tau Fakatai 5:15-21; Heperu 13:4) Lata e tau taane mo e tau hoana ke fakakaupā e tau manako fakataane mo e fifine ha laua ki a laua tokoua ni. (1 Korinito 7:3-5) Lata e taane ke manatu “kua nakai fakai taha ke fakavihia hana a tino, ka kua fagai mo e leveki ai e ia.” Ti lata a ia ke fakaalofa mo e fakahelehele he leveki e hoana haana. Mua atu ai, manako e hoana ke totonu mo e fakaalofa age e taane haana ki a ia.—Efeso 5:29.
MENA KUA AMANAKI E ATUA MAI HE TAU HOANA
7. Ko e ha ne lata ke fai ulu e magafaoa?
7 Igatia e magafaoa mo e lata ke fai ulu, ko e tagata ia ke takitaki e magafaoa ke gahua auloa. Pehē e Tohi Tapu he 1 Korinito 11:3: “Ko e ulu he tau tane oti ko Keriso haia, ko e ulu he hoana ko e tane haia, ka ko e ulu a Keriso ko e Atua haia.”
8. Fakakite fēfē he hoana e fakalilifu hokulo ke he taane haana?
8 Kua fa hepe foki e tau taane. Ka e he magaaho ka lalago he hoana e tau fifiliaga he taane mo e makai ke kaufakalataha mo ia, to aoga ke he magafaoa katoa. (1 Peteru 3:1-6) Pehē e Tohi Tapu: “Ka ko e fifine kia fakalilifu [hokulo] a ia ke he hana tane.” (Efeso 5:33) Ka e kua ka nakai talitonu e taane ke he tau taofiaga he hoana haana? Lata agaia e hoana ke fakalilifu hokulo e taane. Pehē e Tohi Tapu: “A mutolu ko e tau fifine, kia omaoma ke he tau tane ha mutolu ni, kaeke foki kua faliuliu falu ke he kupu, kia moua a lautolu he mahani mitaki he tau hoana ha lautolu, ka e nakai vagahau, Ka kitekite age a lautolu kia mutolu kua nonofo fakatekiteki mo e matakutaku,” po ke fakalilifu hokulo. (1 Peteru 3:1, 2) Ko e fakafifitakiaga mitaki he hoana ka lagomatai e taane haana ke maama mo e fakalilifu e tua he hoana.
9. (a) Ko e heigoa kua lata e hoana ke taute ka nakai talia e ia e tau puhala he taane haana? (e) Ko e heigoa e fakatonuaga ma e tau hoana ia Tito 2:4, 5?
9 Ko e heigoa he hoana ka taute ka nakai talia e ia e tau puhala he taane haana? Lata a ia ke tala age e tau manatu haana he puhala fakalilifu. Ma e fakatai, fai mena a Sara ne talahau ti nakai fiafia a Aperahamo, ka e pehē a Iehova ki a Aperahamo: “Kia fanogonogo ai a koe ke he hana tau kupu.” (Kenese 21:9-12) To gahoa e tau fifiliaga fakahiku he taane Kerisiano ke totoko ke he talahauaga he Tohi Tapu, ti lata e hoana haana ke lalago a ia. (Gahua 5:29; Efeso 5:24) Ko e hoana mitaki to leveki e magafaoa. (Totou Tito 2:4, 5.) Ka kitia he taane mo e tau fanau haana a ia ne gahua malolō ma lautolu, to fakaalofa mo e fakalilifu fakalahi e lautolu a ia.—Tau Fakatai 31:10, 28.
Puhala fe ne eke a Sara mo fakafifitakiaga mitaki ma e tau hoana?
10. Ko e heigoa e talahauaga he Tohi Tapu hagaao ke he nonofo kehekehe mo e tau vevehe?
10 Falu magaaho kua mafiti e tau hoa mau ke fifili ke nonofo kehekehe po ke tau vevehe. Ka e pehē mai e Tohi Tapu “aua neke fano kehe e hoana mo e hana tane,” mo e “aua foki neke mavehe e tane mo e hana hoana ni.” (1 Korinito 7:10, 11) To ha ha i ai e tau tutūaga hagahaga kelea lahi mahaki ti liga nonofo kehekehe e tau hoa mau, ka ko e fifiliaga uka lahi anei. Ka e kua e tau vevehe? Fakakite mai he Tohi Tapu e kakano hokoia ni ke tau vevehe, ka mahani faivao e taane po ke hoana mo e taha tagata ne nakai ko e hoa mau haana.—Mataio 19:9.
MENA KUA AMANAKI E ATUA MAI HE TAU MATUA
Ko e fakafifitakiaga mitaki a Iesu ma e tau tagata takitaha he magafaoa
11. Ko e heigoa he tau fanau ne mua atu e manako ki ai?
11 Tau matua, kia fakaaoga fakalahi e magaaho mo e tau fanau ha mutolu. Manako lahi e tau fanau ha mutolu ki a mutolu, ka e mua atu e manako he tau fanau ke fakaako e mutolu a lautolu hagaao ki a Iehova.—Teutaronome 6:4-9.
12. Ko e heigoa he tau matua kua lata ke taute ke puipui e tau fanau ha lautolu?
12 Ko e lalolagi ha Satani kua holo ki mua e kelea, ti ha ha i ai falu tagata ne manako ke fakamamahi e tau fanau ha tautolu, hokotia foki ke fakapilo e tau fanau he puhala feuaki. Kua uka ma e falu matua ke tutala hagaao ke he matakupu nei. Ka e lata e tau matua ke hataki e tau fanau hagaao ke he tau tagata pihia mo e fakaako a lautolu ke kalo kehe he tau tagata ia. Tau matua, kia puipui e tau fanau ha mutolu.a—1 Peteru 5:8.
13. Lata e tau matua ke fakaako fēfē e tau fanau ha lautolu?
13 Ko e matagahua he tau matua ke fakaako e tau fanau ha lautolu ke mahani mitaki. Fakaako fēfē e mutolu e tau fanau ha mutolu? Lata e tau fanau ha mutolu ke feaki, ka e ua vale po ke fakamamahi ka foaki e fakatonu. (Ieremia 30:11) Ti ua akonaki e tau fanau ka ita a mutolu. Nakai manako a mutolu ke he tau kupu ke tuga e “tuina . . . he pelu” ti hukia e tau fanau. (Tau Fakatai 12:18) Fakaako e tau fanau ke maama e kakano kua lata a lautolu ke omaoma.—Efeso 6:4; Heperu 12:9-11; kikite Tala he Matahiku 29.
MENA KUA AMANAKI E ATUA MAI HE TAU FANAU
14, 15. Ko e ha kua lata e tau fanau ke omaoma ke he tau matua ha lautolu?
14 Ne omaoma tumau a Iesu ke he Matua haana, ti pihia foki he tau magaaho uka. (Luka 22:42; Ioane 8:28, 29) Amanaki foki a Iehova ke he tau fanau ke omaoma ke he tau matua ha lautolu.—Efeso 6:1-3.
15 Tau fanau, pete ka logona hifo kua uka ke omaoma ke he tau matua ha mutolu, kia manatu, ka omaoma ai to fiafia a Iehova mo e tau matua ha mutolu ki a mutolu.b—Tau Fakatai 1:8; 6:20; 23:22-25.
Ko e heigoa ka lagomatai e tau fuata ke fakamooli ke he Atua ka kamatamata ke taute e mena hepe?
16. (a) Lali fēfē a Satani ke kamatamata e tau fuata ke taute e mena kelea? (e) Ko e ha kua aoga ke fifili e tau kapitiga ne fakaalofa ki a Iehova?
16 Maeke e Tiapolo ke fakaaoga e tau kapitiga haau mo e falu fuata ke kamatamata a koe ke taute e mena hepe. Iloa e ia to uka lahi ke totoko e fakaohooho nei. Ma e fakatai, ko e tama fifine ha Iakopo ko Tina ne kapitiga mo e tau tagata ne nakai fakaalofa ki a Iehova. Loga lahi e tau lekua ne tupu ki a ia mo e magafaoa haana ha ko e mena nei. (Kenese 34:1, 2) Ka nakai fakaalofa e tau kapitiga haau ki a Iehova, liga lali a lautolu ke kamatamata a koe ke taute taha mena ne vihiatia e Iehova, ti ko e fua to mamahi lahi ki a koe, ke he magafaoa haau, mo e ke he Atua. (Tau Fakatai 17:21, 25) Ko e kakano ia ati aoga lahi ma haau ke kumi e tau kapitiga ne fakaalofa ki a Iehova.—1 Korinito 15:33.
MAEKE E MAGAFAOA HAAU KE FIAFIA
17. Ko e heigoa e matagahua he tau tagata takitaha he magafaoa?
17 Ka muitua he tau tagata he magafaoa e tau takitakiaga he Atua, to kalo kehe mai ai he tau tupetupe mo e tau lekua loga. Kaeke ko e taane a koe, fakaalofa ke he hoana haau mo e ofaofa a ia. Kaeke ko e hoana a koe, fakalilifu mo e omaoma ke he taane haau ti muitua ke he fakafifitakiaga he hoana ne fakamaama he Tau Fakatai 31:10-31. Kaeke ko e matua a koe, fakaako e tau fanau haau ke fakaalofa ke he Atua. (Tau Fakatai 22:6) Kaeke ko e matua taane a koe, takitaki “fakamitaki” e magafaoa haau. (1 Timoteo 3:4, 5; 5:8) Mo e tau fanau, omaoma ke he tau matua ha mutolu. (Kolose 3:20) Manatu, na hepehepe e tau tagata takitaha he magafaoa, ti fakatokolalo mo e ole ke fefakamagaloaki. Ē, ha ha he Tohi Tapu e tau takitakiaga ha Iehova ma e tau tagata takitaha he magafaoa.
a Maeke a koe ke moua falu vala tala foki ke he puhala ke puipui e tau fanau haau he veveheaga 32 he tohi Learn From the Great Teacher, ne taute fakailoa he Tau Fakamoli a Iehova.
b Nakai lata e tama ke omaoma ke he tau matua haana ka manako a laua ke taute e ia taha mena kua totoko ke he fakatufono he Atua.—Gahua 5:29.