To Tukulele Nakai e Au e Moui Haaku ke he Atua ti Papatiso?

1. Ko e heigoa kua liga manamanatu a koe he mole e fakaako fakahokulo ke he tohi nei?

KUA loga e kupu mooli he Tohi Tapu ne iloa e koe he fakaako ke he tohi nei, tuga e maveheaga he Atua ke he moui tukulagi, tuaga he tagata mate, mo e amaamanakiaga he liu tu mai. (Fakamatalaaga 9:5; Luka 23:43; Ioane 5:28, 29; Fakakiteaga 21:3, 4) Liga kua kamata a koe ke fina atu he tau feleveiaaga he Tau Fakamoli a Iehova ti talitonu kua mooli e puhala ne tapuaki a lautolu. (Ioane 13:35) Liga kua kamata a koe ke feaki e fakafetuiaga kapitiga tata mo Iehova, ti fifili a koe ke fekafekau ki a ia. Liga manamanatu a koe, ‘Ko e heigoa haaku kua lata ke taute mogonei ke fekafekau ke he Atua?’

2. Ko e ha ne manako e tagata Aitiope ke papatiso?

² Pihia e manatu he tagata Aitiope ne moui he magahala ha Iesu. Fai magaaho he mole e liu tu mai ha Iesu, ne fakamatala e tutaki ha Iesu ko Filipo ke he tagata nei. Fakakite e Filipo ke he tagata nei ko Iesu ko e Mesia. Omoomoi lahi e tagata Aitiope ke he tau mena ne iloa e ia ti talahau agataha: “Kitiala, ko e vai; ke lekua he ha ke nakai papatiso ai au?”​—Gahua 8:26-36.

3. (a) Ko e heigoa ne poaki e Iesu ke he tau tutaki haana? (e) Lata ke papatiso fēfē e tagata?

³ Fakaako fakamaaliali he Tohi Tapu ka manako a koe ke fekafekau ki a Iehova, kua lata a koe ke papatiso. Tala age a Iesu ke he haana tau tutaki: “Ke eke e tau motu oti kana mo tutaki, ti papatiso atu a lautolu.” (Mataio 28:19) Fakatoka foki e Iesu e fakafifitakiaga he papatiso a ia. Ne tanumia e tino katoa haana ki loto he vai, nakai ko e fuifui he vala vai ke he ulu haana. (Mataio 3:16) Ka papatiso e Kerisiano he vahā nei, kua lata foki a ia ke tanumia e tino katoa ki loto he vai.

4. Ko e heigoa he papatisoaga haau kua fakakite ke he falu?

⁴ Ka papatiso a koe, kua fakakite ai ke he falu e manako mooli haau ke kapitiga mo e Atua mo e fekafekau ki a ia. (Salamo 40:7, 8) Ti liga manamanatu a koe, ‘Ko e heigoa haaku kua lata ke taute ke papatiso?’

ILOILO MO E TUA

5. (a) Ko e heigoa haau ka taute fakamua ato papatiso a koe? (e) Ko e ha kua aoga e tau feleveiaaga Kerisiano?

⁵ Ato papatiso a koe, lata a koe ke iloa a Iehova mo Iesu. Ti fitā a koe he kamata ke taute e mena nei he fakaako e Tohi Tapu. (Totou Ioane 17:3.) Ka e nakai koenaia. Pehē e Tohi Tapu kua lata a koe ke “puke . . . ke he maama mitaki” he finagalo ha Iehova. (Kolose 1:9) To lagomatai he tau feleveiaaga he Tau Fakamoli a Iehova a koe ke tata lahi e fakafetuiaga mo Iehova. Ko e taha kakano aoga anei ma haau ke fina atu tumau he tau feleveiaaga ia.​—Heperu 10:24, 25.

6. Lata ke lahi fēfē e iloa haau ke he Tohi Tapu ato papatiso a koe?

⁶ Ka e nakai amanaki a Iehova ke iloa e koe e tau mena oti i loto he Tohi Tapu ato papatiso a koe. Nakai amanaki a ia ke he tagata Aitiope ke iloa e tau mena oti ato papatiso. (Gahua 8:30, 31) To matutaki a tautolu ke fakaako tumau hagaao ke he Atua. (Fakamatalaaga 3:11) Ke papatiso, lata a koe ke iloa mo e talia e tau fakaakoaga aoga he Tohi Tapu.​—Heperu 5:12.

7. Lagomatai fēfē he fakaako haau a koe ke he Tohi Tapu?

⁷ Pehē e Tohi Tapu: “Ka nakai tua, ti nakai maeke ke fakafiafia kia ia [Atua].” (Heperu 11:6) Ti lata a koe ke ha ha ai e tua ato maeke a koe ke papatiso. Tala mai e Tohi Tapu ki a tautolu ko e falu tagata he maaga i Korinito i tuai ne logona e tau fakaakoaga he tau tutaki ha Iesu ati “tua a lautolu, mo e papatiso.” (Gahua 18:8) Pihia foki, ko e fakaako haau ke he Tohi Tapu kua lagomatai a koe ke tua ke he tau maveheaga he Atua mo e malolō he poa ha Iesu kua maeke ke fakahao a tautolu mai he agahala mo e mate.​—Iosua 23:14; Gahua 4:12; 2 Timoteo 3:16, 17.

TALA AGE KE HE FALU E TAU KUPU MOOLI HE TOHI TAPU

8. Ko e heigoa ka omoomoi a koe ke tala age ke he falu e tau mena kua fakaako e koe?

⁸ He lahi e mena ne fakaako e koe mai he Tohi Tapu mo e kitia ai e lagomatai ke he moui haau, to malolō lahi e tua haau. To manako a koe ke tala age ke he falu e tau mena kua fakaako e koe. (Ieremia 20:9; 2 Korinito 4:13) Ka ko hai kua lata ke tala age e koe ki ai?

9, 10. (a) Ko hai ka kamata a koe ke tala age e tau mena kua iloa e koe? (e) Ko e heigoa haau kua lata ke taute ka manako ke fakamatala mo e fakapotopotoaga?

⁹ Liga manako a koe ke tala age ke he magafaoa, tau kapitiga, tau katofia, po ke tau kapitiga gahua haau hagaao ke he tau mena kua fakaako e koe. Mitaki e mena ia, ka e taute tumau he puhala totonu mo e fakaalofa. To hoko e magaaho ti maeke a koe ke kamata ke fakamatala mo e fakapotopotoaga. Ka mau amaamanaki a koe ke taute pihia, maeke a koe ke tutala ke he matakainaga Fakamoli kua fakaako a koe ke he Tohi Tapu ti tala age kua manako a koe ke gahua fakamatala mo e fakapotopotoaga. Ka manatu e matakainaga ia kua mautali a koe ti ka moui fakatatau a koe ke he tau matapatu fakaakoaga he Tohi Tapu, ti ō tokoua mogoia a mua ke fakatutala mo e tokoua e motua he fakapotopotoaga.

¹⁰ Ko e heigoa ka fakahoko he fakatutalaaga ia? To tutala e tau motua mo koe ke kitia kua maama mo e talitonu a koe ke he tau matapatu fakaakoaga he Tohi Tapu, kua omaoma a koe ke he tau mena ne talahau he Tohi Tapu he moui haau he tau aho takitaha, mo e kua manako mooli a koe ke eke mo taha he Tau Fakamoli a Iehova. Manatu ko e tau motua kua leveki e tau matakainaga oti he fakapotopotoaga, putoia a koe, ti ua matakutaku ke tutala ki a lautolu. (Gahua 20:28; 1 Peteru 5:2, 3) Ka oti e fakatutala nei, to fakailoa atu he tau motua ka maeke a koe ke kamata e fakamatala mo e fakapotopotoaga.

11. Ko e ha kua aoga lahi ke taute e tau hikihikiaga ato maeke a koe ke fakamatala mo e fakapotopotoaga?

¹¹ Liga fakamaama atu he tau motua kua lata a koe ke taute falu hikihikiaga foki ato maeke a koe ke kamata ke fakamatala mo e fakapotopotoaga. Ko e ha kua aoga lahi ke taute e tau hikihikiaga ia? Kakano ko e magaaho ka tutala a tautolu ke he falu hagaao ke he Atua, kua eke a tautolu mo hukui ha Iehova ti lata ke momoui he puhala kua fakalilifu a ia.​—1 Korinito 6:9, 10; Kalatia 5:19-21.

TOKIHALA TI MAFOKIFOKI MAI

12. Ko e ha kua lata e tau tagata oti ke fakatokihala?

¹² Fai mena foki a koe kua lata ke taute ato maeke a koe ke papatiso. Pehē e aposetolo ko Peteru: “Kia tokihala a a mutolu, mo e mafokifoki [po ke, liliuina] a mutolu, kia holoholo kehe ai ha mutolu a tau hala.” (Gahua 3:19) Ko e heigoa e kakano ke tokihala? Kua kakano ke logona hifo e momoko ha ko e tau mena kelea ne taute e tautolu. Ma e fakatai, kaeke kua mahani feuaki a koe, lata a koe ke tokihala. Pete foki kua eketaha a koe he moui katoa haau ke taute e tau mena hako, lata agaia a koe ke fakatokihala ha kua agahala a tautolu oti ti lata ke ole ke he Atua ma e fakamagalo.​—Roma 3:23; 5:12.

13. Ko e heigoa e kakano ke “mafokifoki” mai?

¹³ Ko e momoko ni kia ha ko e tau mena ne taute e koe? Nakai. Pehē a Peteru kua lata foki a koe ke “mafokifoki” mai. Kakano e mena nei kua lata a koe ke tiaki e tau mahani kelea he magaaho fakamua ti kamata ke taute e mena hako. Ke fakatai ki ai, manamanatu la ko e fano fakamua laia a koe ke he taha matakavi. Fai magaaho he mole ti mailoga e koe kua hepe e hala haau. Ko e heigoa haau ka taute? Nakai noa to fakamanou a koe ti tū mo e fuluhi ke fano he puhala hako. Pihia foki he fakaako a koe ke he Tohi Tapu, liga iloa e koe e falu aga po ke falu mena he moui haau kua lata ke hikihiki. Kia makai ke “mafokifoki” mai​—kakano ke taute e tau hikihikiaga kua lata​—mo e kamata ke taute e mena hako.

TAUTE E TUKULELE FAKATAGATA

14. Puhala fe kua tukulele e koe e moui haau ke he Atua?

¹⁴ Taha lakaaga aoga foki ka taute e koe ato papatiso ko e tukulele e moui haau ki a Iehova. Ka tukulele e koe e moui haau ki a Iehova, kua talahau e koe he liogi e maveheaga haau ke tapuaki hokoia ni ki a ia, mo e taute e finagalo haana ko e mena kua mua atu e aoga he moui haau.​—Teutaronome 6:14, 15.

15, 16. Ko e heigoa kua omoomoi e tagata ke tukulele e moui ke he Atua?

¹⁵ Ko e maveheaga ke fekafekau hokoia ni ki a Iehova kua tuga e maveheaga ke fakalataha tumau he moui katoa mo e tagata kua fakaalofa a koe ki ai. Manamanatu la ke he tagata taane mo e fifine kua fakatū kapitiga. He iloa mitaki he tagata taane e fifine, kua kamata a ia ke fakaalofa mo e manako ke mau e fifine. Pete ko e fifiliaga uho anei, makai a ia ke talia e matagahua nei ha ko e fakaalofa haana ke he fifine.

¹⁶ He fakaako a koe hagaao ki a Iehova, kua fakaalofa mo e manako a koe ke eketaha ke fekafekau ki a Ia. To omoomoi he mena nei a koe ke talahau he liogi e maveheaga ke fekafekau ki a Iehova. Pehē e Tohi Tapu ko e ha tagata kua manako ke mui ki a Iesu “aua neke oma e ia a ia.” (Mareko 8:34) Ko e heigoa e kakano he mena ia? Kakano kua tuku fakamua e koe e omaoma ki a Iehova he moui haau. Ko e mena ne manako a Iehova kua mua atu e aoga ke he tau manako mo e tau foliaga haau.​—Totou 1 Peteru 4:2.

UA MATAKUTAKU HE KAUMAHALA

17. Ko e ha e falu tagata kua nakai tukulele a lautolu ki a Iehova?

¹⁷ Falu tagata ne nakai tukulele a lautolu ki a Iehova ha kua matakutaku neke nakai fakamooli tumau ke he maveheaga ha lautolu ke fekafekau ki a Ia. Nakai manako a lautolu ke fakaita a Iehova, po ke liga manatu a lautolu ka nakai tukulele ki a Iehova, to nakai fakalaga e Iehova a lautolu ha ko e tau mena kua taute e lautolu.

18. Ko e heigoa ka lagomatai a koe ke kautū mai he ha matakutaku he fakaita a Iehova?

¹⁸ Ko e fakaalofa haau ki a Iehova ka lagomatai a koe ke kautū mai he ha matakutaku he fakaita a ia. Ha kua fakaalofa a koe ki a ia, to eketaha a koe ke fakamooli e maveheaga haau. (Fakamatalaaga 5:4; Kolose 1:10) To nakai manamanatu a koe kua uka lahi ke taute e finagalo ha Iehova. Tohia he aposetolo ko Ioane: “Ha ko e fakaalofa ke he Atua hanai, kia omaoma a tautolu ke he tau poaki hana; nakai mamafa foki hana tau poaki.”​—1 Ioane 5:3.

19. Ko e ha kua nakai lata a koe ke matakutaku ke tukulele e moui haau ki a Iehova?

¹⁹ Nakai lata a koe ke mitaki katoatoa ato tukulele e moui haau ki a Iehova. Nakai amanaki a ia ki a tautolu ke lahi atu e mena ka taute ke he mena kua fahia ki ai. (Salamo 103:14) To lagomatai e ia a koe ke taute e mena hako. (Isaia 41:10) Falanaki ki a Iehova mo e haau a loto katoa, ti “fakahakohako ai e ia hāu a tau puhala.”​—Tau Fakatai 3:5, 6.

TALAHAU KI MUA HE TAU TAGATA MA E FAKAMOUIAGA

20. He mole e tukulele e moui haau ke he Atua, ko e heigoa e taha lakaaga foki?

²⁰ Manatu nakai a koe kua mautali a koe ke tukulele e moui ki a Iehova? Ka mole he tukulele e moui haau ki a Iehova, kua mautali a koe ma e taha lakaaga foki. Kua lata a koe ke papatiso.

21, 22. Puhala fe ka “talahau ai” e koe e tua haau?

²¹ Fakailoa ke he leveki he kau he tau motua he fakapotopotoaga haau kua tukulele e moui haau ki a Iehova ti manako a koe ke papatiso. To fakatoka e ia e falu motua ke liu fakamanatu ki a koe e tau matapatu fakaakoaga he Tohi Tapu. Ka talia e lautolu kua mautali a koe, to tala atu e lautolu kua maeke a koe ke papatiso he takaiaga po ke fonoaga ka hau he Tau Fakamoli a Iehova. He fonoaga, to fai lauga ke fakamaama e kakano he papatisoaga. Ko e tagata lauga mogoia ka hūhū ke he tau tagata ka papatiso ua e hūhū mukamuka. He tali e tau hūhū ia, to “talahau ai” e koe e tua haau.​—Roma 10:10.

²² Ti papatiso mogoia a koe. To tanumia katoa e tino haau ke he vai. To fakakite he papatisoaga ke he tau tagata oti kua tukulele e moui haau ki a Iehova ti ko e taha he Tau Fakamoli a Iehova a koe mogonei.

KAKANO HE PAPATISO HAAU

23. Ko e heigoa e kakano he papatiso “ke he higoa he Matua, mo e Tama, mo e Agaga Tapu”?

²³ Pehē a Iesu to papatiso e tau tutaki haana “ke he higoa he Matua, mo e Tama, mo e Agaga Tapu.” (Totou Mataio 28:19.) Ko e heigoa e kakano he mena ia? Kakano kua mailoga e koe e pule ha Iehova mo e matagahua ha Iesu he finagalo he Atua ti pihia mo e puhala ne fakaaoga he Atua e agaaga tapu haana ke fakamooli haana finagalo.​—Salamo 83:18; Mataio 28:18; Kalatia 5:22, 23; 2 Peteru 1:21.

24, 25. (a) Ko e heigoa e kakano he papatiso? (e) Ko e heigoa ka fakatutala he veveheaga fakahiku?

²⁴ Fakakite he papatiso e taha mena aoga lahi. Ka papatiso a koe he vai, kakano kua mate, po ke tiaki katoatoa haau a puhala moui he magaaho fakamua. Ka hake mai a koe he vai, to kamata e moui foou haau he taute e finagalo he Atua. Fakakite ai to fekafekau a koe ki a Iehova ti kamata he mogonei. Manatu kua nakai tukulele e moui haau ke he tagata, fakatokatokaaga, po ke gahua. Kua tukulele e moui haau ki a Iehova.

²⁵ Ko e tukuleleaga haau ka lagomatai a koe ke feaki e kapitiga tata mo e Atua. (Salamo 25:14) Nakai kakano e mena nei kua fakamoui e tagata ha kua papatiso a ia. Ko e aposetolo ko Paulo ne tohia: “Kia gahua ni a mutolu mo e matakutaku mo e vivivivi, kia momoui ai a mutolu.” (Filipi 2:12) Ko e kamataaga ni e papatisoaga. Ka e fakatata fēfē a koe ki a Iehova? Ko e veveheaga fakahiku he tohi nei ka tali e hūhū ia.