FAKAAKOAGA 7

Hakotika mo e Talitonu

Luka 1:3

MENA KE TAUTE: Fakaaoga e tau fakamooliaga mauokafua ke lagomatai e tau tagata fanogonogo haau ke hokotia ke he fakaotiaga hako.

Fakaaoga e tau vala tala kua mooli. Fakavē e tau manatu haau ke he Kupu he Atua, totou fakahako mai i ai ka maeke. Ka hagaao a koe ke he manatu fakasaiene, hokotakiaga vala tala, mena ne tupu, po ke falu fakamooliaga ne lalago ki ai, fakakia tuai kua mauokafua mo e foou e tupumaiaga he vala tala haau.
Fakaaoga fakamitaki e tupumaiaga he vala tala. Fakamaama e tau kupu Tohi Tapu ne felauaki mo e vala tala, fekau katoa he Tohi Tapu, mo e falu tohi he “fekafekau fakamoli mo e loto matala.” (Mata. 24:45) Fakaaoga e tau tupumaiaga he vala tala ne nakai mai he Tohi Tapu ka e ua hiki e kakano po ke talahauaga fakamua he tagata tohia.

Ua fatiaki tumau mo e fakalaulahi e tau mena mooli mo e tau numera. Fakaeneene ko e talahauaga “falu tagata” kua eke mo “tokologa e tau tagata,” “he falu tuaga” kua eke mo “tupu tumau.”
Fakavē e kakano ke he fakamooliaga. Ka oti he totou e kupu Tohi Tapu po ke talahau e tupumaiaga he vala tala, hūhū e tau hūhū fakailoilo po ke fakatai e manatu ke lagomatai e tau tagata fanogonogo haau ke hokotia ke he fifiliaga hako ni ha lautolu.