Ko e Koloa Uho ha Tautolu, Ko e Fekafekauaga Lilifu he Vaha Nei
“Ka e ha ha ia mautolu e koloa nai ke he tau kapiniu kelekele, kia ha ha he Atua e lahi ue atu he malolo, ka e nakai mai ia mautolu.”—2 KORINITO 4:7.
1. (a) Ko e heigoa e koloa uho ne ha ha ia tautolu, mo e ko e ha? (e) Fakamama mai fefe he Tohi Tapu e mouaaga he Fakatufono ne age kia Mose?
KO E fekafekauaga ke fakamatala e “tala mitaki nai he kautu” ke he vaha he fakaotiaga, ko e koloa uho moli, ko e tufaaga kua mua atu e aoga. Ha ko Iehova ko e Atua lilifu, ko e gahua ke he Atua ko e fekafekauaga lilifu, ko e koloa uho. (Mataio 24:14; 2 Korinito 3:18–4:1) Ko e hagaaoga lilifu he Fakatufono ne age kia Mose, ne tohia he Esoto 34:29, 30: “Kua hifo mai a Mose he mouga ko Sinai, ha he lima a Mose e na lapa ua he fakatufono he hifo mai a ia he mouga, ti nakai iloa e Mose kua kikila e kili he hana fofoga he vagahau [mo Iehova]. Ka kua kitia e Arona mo e fanau a Isaraela oti kana a Mose, kitiala, ha ne kikila mai e kili he hana fofoga; ti matakutaku ai a lautolu ke fakatata kia ia.”
2. Ko e heigoa ne fakatai mai he Fakatufono ne age kia Mose, mo e ko e ha ne mua e lilifu he fekafekauaga fakamui?
2 Ne matutaki e Esoto 34 tau kupu 32 ke he 34: “Fakamui ne fakatata age kia ia e fanau oti a Isaraela, ti tala age ai a ia kia lautolu e tau kupu oti ne tala mai e Iehova kia ia ke he mouga ko Sinai. Kua oti atu e tau kupu a Mose kia lautolu, ti tuku ai e ia e ufiufi ke he hana fofoga. Ka hu atu a Mose ki mua a Iehova ke vagavagahau a laua mo ia, ti tuku kehe e ia e ufiufi ato liu foki hu mai.” Ko e fekafekauaga ia he Fakatufono ne age ki a Mose ko e mena fakatai ke he fekafekauaga he maveheaga fou he Hulalo, ko Iesu Keriso. Ti ko e mena ia, ka lilifu pihia e fekafekauaga fakamua, ko e mua atu e mena fakamui, ko e “fekafekauaga kua hoko mai ai e Agaga,” ne molea e mua atu e lilifu! (2 Korinito 3:7-11) Ko e mena ne mua atu e lilifu, kakano ha ko e tumau e lilifu ia, ti kua putoia fakalataha e tau tutaki a Iesu Keriso ke he mena ia.—Roma 12:11.
3. (a) Ko e heigoa e mena moli ke he fekafekauaga he tau Fakamoli a Iehova, ka ko e ha e mena nei ne nakai maama ai he tokologa he tau tagata? (e) Ko e heigoa e fakamoliaga kua tu a Mose ki mua he lilifu a Iehova?
3 Ti mui mai mogoia, ko e fekafekauaga he tau Fakamoli a Iehova ko e gahua lilifu. Ko e mena nei, nakai maama ke he tau tagata tokologa ne kua fakapouligia he tau lotu pikopiko. Pete ne tokologa ne fai Tohi Tapu mo e liga totou, ka e nakai ha ha ia lautolu e ‘tau mata maama.’ (2 Peteru 1:5-9) Ke utakehe e ufiufi mai he tau mata ha lautolu, kua lata ia lautolu ke fuluhi ki a Iehova mo e tua, ha ko e magaaho ne fano a Mose ki mua a Iehova, ne utakehe e ia e ufiufi ne fufu hana a fofoga ke he tau Iutaia. (2 Korinito 3:16) Ne matakutaku e tau Isaraela he kitia e lautolu e lilifu he Atua mai he fofoga he ha lautolu a hulalo, mo e ole ke ufiufi mai he tau mata ha lautolu. Ke tuga e tau mena ne toka ai e malolo ke kikila ka hafagi ke he puho he maama, kua puhopuho ai he magaaho pouli, ti ko Mose, ko e ha lautolu a faifano vahaloto, ne kikila mai e lilifu ha Iehova, ko e fakamoliaga ko e hau a ia i mua ha Iehova.
4. Fakafifitaki fefe, he tau tagata nakai tua he vaha nei e tau Iutaia he vahaia, ka ko e heigoa he tau tutaki ha Mose Mua ue atu ne nakai matakutaku ki ai?
4 Ne fakatino mai e Mose e Perofeta mua ue atu he Atua, ko Iesu Keriso. Ke tuga ni hana a fakataiaga, ko Mose Mua ue atu nei ne nakai matakutaku ke kitia mata e lilifu he Atua. Ke hoko mai ke he vaha nei, ko e taha e mena, ko e tau tagata nakai tua, ne fakapouligia he Tiapolo mo e hana tau lotu faka Papelonia ne fifitaki atu ke he tau Iutaia he vahaia mo e nakai talia ke kitia, po ke maama e lilifu he Mose Mua ue atu ko Iesu Keriso. (2 Korinito 3:12-15) Ka e taha e mena, ko e hana a tau tutaki moli ne nakai matakutaku ke onoono ke he kikila he lilifu a Iehova, ne kikila mai he fofoga ha Iesu Keriso. Ha kua ataina mai he malolo pekitia ha Papelonia, kua ha ha ia lautolu e fakamaloloaga, ke fakakite e lilifu he Atua. “Hanai,” he tohi e Paulo, “ha kua ha ha ia mautolu e amaamanaki nai, kua vagahau fakatonu ni a mautolu.”—2 Korinito 3:12.
Lautolu ne Fakakikila e Lilifu he Atua
5. Fakakikila fefe e tautolu, e lilifu he Atua ke tuga a Mose i luga he mouga ki mua a Iehova?
5 Kua fita he utakehe e Iesu Keriso e ufiufi, he fakakite mo e fakapuloa e Atua ko Iehova ki a tautolu. (Ioane 1:14, 17, 18) Ti kua lata ia tautolu ke fakakikila, mo e ko e lilifu he Atua kua kikila mai he “maama he vagahau mitaki he lilifu a Keriso, ko ia kua fakatai he Atua,” kua lata ai ia tautolu ke fakapuloa. Ko e hana kikila, ko e “maama ke iloa ai e lilifu he Atua ke he fofoga a Iesu Keriso.” Kua lata ia tautolu ke fakakikila e lilifu nei ka fakapuloa atu e lilifu a Iehova mo e lilifu he hana Kautu ka taute he Tama hana. (2 Korinito 4:4-6) Ke tuga a Mose i luga he mouga i mua ha Iehova, ko e Hana a Tau Fakamoli he lalolagi ne nakai ufiufi ha lautolu a tau loto mai he lilifu a Iehova. Ne nava e lautolu e lilifu ne kikila mai he fofoga he Tama mo e Patuiki ha Iehova, ko Iesu Keriso. Ti ko e mena ia, kua lata ia lautolu ke fakakikila ke he falu e maama ne hagaao ke he lilifu he Atua.
6. Fakamaama fefe e Paulo, e fekafekauaga lilifu ha tautolu he 2 Korinito 3:18, mo e tau puhala fefe ne “fakafaliu” aki a tautolu?
6 Ke he tau fakamoli oti he lilifu a Iehova, ne fakamaama mai ke he tau kupu nei he aposetolo ko Paulo: “Ka ko tautolu oti, kua kitekite ke he fakaata mo e mata nakai ufia ke he lilifu he Iki, kua faliu a tautolu mo e fakatino na, ko e lilifu ke hoko ke he lilifu, tuga he mena mai he Iki ko e Agaga.” (2 Korinito 3:18) Ko e lahi he lilifu he maama nei ka moua e tautolu, ko e lahi ia foki ke fakakikila e tautolu, mo e lahi foki e faliu ha tautolu. Kua liu ke taute fou mo e ati hake fakafou e tau manamanatuaga, pete ne nakai kitia e faliuaga ke he tau tino poke tau mata. Ko e maama he fekau lilifu ne fakakikila e tautolu ne moua aki e keheaga ia tautolu. Kua fakafaliu ha tautolu a tau momoui ke tuga a Keriso, ka fakatoka e tautolu a tautolu ke fekafekau ke he fekafekauaga monuina, ke fofola e maama lilifu nei, ke fakalaulahi atu ke he falu.—Heperu 13:15.
7. Moua mai i fe e lilifu moli, mo e talahau fefe e tautolu e lilifu ia?
7 Ko e tau fakafaliuaga oti ia, ko e mai ni he agaga, po ke malolo he Atua. Ko e tau akoako he Kerisitenetome ne nakai fakakikila e lilifu he Atua ko Iehova ka e taute e tau fakatataaga lalahi ke kitekite mai falu. Ko e lilifu nakai ko e lilifu ha tautolu, ti nakai lata a tautolu ke tauteute ke he tau tapulu tapu fulufuluola silika, auro, mo e tau maka uho kalopalola. Ko e lilifu moli ne moua mai he Agaga he Atua ne talahau ke he fakapuloaga he gahua fakamoli ne hagaao ki a Iehova ko e Agaga.
Monuina Oti e tau Tagata kua Hahamo e Maama
8, 9. Ko e heigoa e fakamaloloaga, ne foaki mai e Paulo kia tautolu he 2 Korinito 4:1, 2, mo e ko e heigoa e fakamakamaka kua lata ke ha ha ia tautolu?
8 He 2 Korinito 4:1, 2 ne totou e tautolu: “Ko e mena ia kua nakai fakalolelole ai a mautolu ha ha ia mautolu e feua nai, ha kua ofania a mautolu. Ka kua tiaki e mautolu e tau mena galo ke ma ai, nakai o fano a mautolu mo e mahani pikopiko, nakai fiofio e mautolu e kupu he Atua; ka kua fakailoa a mautolu ke he tau loto manamanatu he tau tagata oti ki mua he Atua he fakakite atu e mautolu e kupu moli.” Ha ha he Atua e fakaalofa noa ki a tautolu, ke fifili a tautolu ke he fekafekauaga nei. Ko e tomatomaaga a nei ke fakamalolo aki a tautolu ke tumau e malolo, mo e to taute e tautolu e mena nei! Ha kua fifili a tautolu ke ha ha ia tautolu e maama he Kupu he Atua, ti kua fakalago kia tautolu ke fakakikila atu, e maama ke he falu.—Fakatatai mo e Mataio 5:14-16.
9 Ko e tau mena ne ma e tau tagata, tuga e fakavai, ne fufu aki e lautolu e pikopiko mo e tau lagatau. Ka e nakai ha ha ia tautolu ha mena ke ma ai, kakano ha ko e ha tautolu a fekau mo e gahua ne nakai pikopiko, ka ko e tututonu mo e moli. Ti ko e mena ia, kua lata ia tautolu ke fakakikila fakalahi e katoatoa he lilifu he maama. Ne nakai taute e tautolu e Kupu he Atua aki e tau pikopiko. Ka taute pihia, ko e kakano ko e taute mo e lotokai ke monuina ai na koe, ke lilifu, hagahaga mitaki, mo e malolo fakalalolagi mo e hola mai he tau totoko mo e tau eke fakakelea mai he lalolagi. Ko lautolu ne nakai matakutaku, ke o mai ki a Iehova mo e nakai ufiufi e tau mata mo e onoono ke he lilifu he maama he mena moli, to nakai matakutaku pihia ni, ke fefakahagaaoaki mo e ha lautolu a tau kavega. To toka e lautolu e maama ke kikila mai ia lautolu.
10. Ko e ha ne nakai ko e hepe he tau Fakamoli a Iehova, kaeke kua ufiufi e tala mitaki ke he Kautu mai he fofoga he falu tagata?
10 Ka ha ha i ai taha ne ufiufi e tala mitaki he Kautu mai he he ha lautolu a tau fofoga, nakai ko e hepe he tau Fakamoli a Iehova, ka ko e hepe ni ha lautolu. Ko e tala mitaki he Kautu ne nakai fufu ia. Ne talahaua lahi e gahua fakamatala he tau Fakamoli a Iehova ke he lalolagi oti. Ti ko e mena ia, ne maeke ai ia lautolu ke vagahau tuga ne vagahau he aposetolo ko Paulo: “Ha ko e mena nakai eke fufu e mena ia.” Ko e moli, tuga he tohi e ia, ko e tala mitaki kua “fakamatala atu ke he tau tagata oti ke he lalolagi.”—Gahua 26:26; Kolose 1:23.
11. Ko e ha e tala lilifu mitaki ne ufia ai ke he tokologa he tau tagata.
11 Ko lautolu ne ufiufi e tala mitaki he Kautu ki ai ko e tau tagata totoko, ko lautolu ne fakapouligia he Tiapolo. (Fakatatai mo e Mataio 12:30) Kaeke, ato o kehe mai a lautolu he tau lotu pikopiko mo e tau hele he Tiapolo, kua amaamanaki a lautolu ke lata mo e moumouaga. I lalo hifo he tau hufiaga fakatemoni, ko e tau tagata pihia ne ufiufi ne lautolu ha lautolu a tau mata, ha kua pehe e aposetolo ko Paulo he 2 Korinito 4:3-5: “Kaeke foki kua ufia ha mautolu a vagahau mitaki, kua ufia ia kia lautolu kua malaia. Kua fakapouli he atua he lalolagi nai e tau manatu ha lautolu kua nakai tua, neke kikila atu kia lautolu e maama he vagahau mitaki he lilifu a Keriso, ko ia kua fakatai ke he Atua. Nukua nakai fakamatala atu e mautolu a mautolu, ka ko Keriso Iesu, ko e Iki; ko mautolu nai foki, ko e tau [tupa, NW] ha mutolu ha ko Iesu.”
12. Ko e kehekeheaga mo lautolu ne pouli e tau loto, talia fefe he tau tagata he Atua e tau kupu he 2 Korinito 4:6?
12 Ko lautolu ne pouli e tau loto ne nakai manako ke taofi ke he tua. Ko e ha lautolu a nakai taofi ke he tua ne hafagi ha lautolu a tau loto ke fakahehe he tau temoni. (1 Timoteo 4:1) Ne nakai maeke ia lautolu ke kitia e lilifu a Iehova po ke maama mai he fofoga ha Iesu, ko Mose Mua ue atu. Ne moua he tau tagata ha Iehova e maama lilifu mai he Tohi Tapu mo e fakakikila atu ke he falu. Ti ko e tau tagata hahamo he maama, e tau fekafekau oti he Atua, mo e poaki he Atua e maama ke fakakikila. Ko e maama kua lata ke kikila mai he tau tagata he Atua mo e maama ke he falu ne pouli mo e nonofo hagahaga kelea ke he moumouaga. Ti ko e mena ia ni ne tohia mai he 2 Korinito 4:6: “Ha ko e Atua, ko ia ne tala age kia kikila mai e maama he pouli, kua fakakikila mai a ia ke he tau loto ha mautolu, ko e maama ke iloa ai e lilifu he Atua ke he fofoga a Iesu Keriso.” Ke he kitiaga nei, ne omaoma e tau Fakamoli a Iehova ke he poakiaga tapu mo e fakakikila ha lautolu a maama ke he falu, ke he lilifu he Atua.
Koloa Lilifu i Loto he tau Kapiniu Lolelole
13. Ko e heigoa e fua ne moua, ha kua tuku e fekafekauaga monuina nei he tau tagata hahamo he maama ke he tau tagata momoui he tino?
13 Ko e fekafekauaga lilifu nei kua nakai maeke foki ha kupu ke talahau atu, ko e mena aoga lahi ma lautolu e tau tagata ne hahamo e maama, ke fakakite kua lata a lautolu ke moua e maama, ka tumau e fakamoli ke he Atua. Ke taute e kotofaaga fekafekau nei, ne nakai fakaaoga he Atua e tau agelu tapu, ne manako ke kitekite ke he tau mena nei, ka kua tuku mai e ia e fekafekau monuina nei ke he tau mena momoui he tino. (1 Peteru 1:12) Ko e mena nei kua taute e ia ke he fakahekeaga he hana malolo ke he lolelole he tau tagata. Tuga he talahau mai he 2 Korinito 4:7: “Ka e ha ha ia mautolu e [koloa uho nai, NW] ke he tau kapiniu kelekele, kia ha ha he Atua e lahi ue atu he malolo, ka e nakai mai ia mautolu.”
14. (a) Ko e heigoa e “[koloa uho nai, NW] ke he tau kapiniu kelekele”? (e) Ko e ha a Mose mo Iesu Keriso, ko e tau fakafifitakiaga lotomatala ma tautolu ne hagaao ia ke he koloa uho?
14 Ko e tau kapiniu he tau vaha tuai ko e tau mena fakaaoga ke tuku aki e tau koloa uho fakaeneene. Ko e heigoa e koloa uho lilifu nei ne ha ha he tau Fakamoli a Iehova ke he tau kapiniu kelekele lolelole—ko lautolu ni, ko e tau mena momoui lolelole mai he efuefu he kelekele? Ko e koloa uho nei, nakai ko e maama ni hokoia ne kua maama ti hokotia ke he tau loto ha lautolu. Ka ko e fekafekauga he maama ia, kua fekafekau ai po ke lagomataiaga, kua lata ke taute i loto he ha lautolu a tino fakalalolagi. Ko e fekafekauaga ko e fakafanoaga he maama ne fakakikila he Atua ke he tau loto ha lautolu. Ko e fekafekauaga nei, ko e koloa uho mitaki mua atu, ko e fekafekauaga monuina uho, ne gahua fakalataha he vaha nei, nakai ni mai he tau tagata fakauku ne toe mai he “fuifui mamoe gahoa” ka e pihia foki e “moto tagata tokologa” he tau “mamoe kehe” he Leveki Mamoe Mitaki ko Iesu Keriso. (Luka 12:32; Ioane 10:14-16; Fakakiteaga 7:9) Ko Mose mo e hana a tagata ne fakatino mai, ko Iesu Keriso, ko e ha tautolu a tau fakafifitakiaga lotomatala, ke fakave ki ai ha tautolu a tau loto ke he koloa uho nei he fekafekauaga tapu, “ha ko e mena ha i ai ha mutolu a tau koloa [uho, NW], ha ha i ai foki mo e tau loto ha mutolu.”—Mataio 6:19-21; Heperu 11:26.
15, 16. (a) Kua fakakite fefe e malolo mua ue atu, ko e moua mai he Atua ka e nakai mai ia tautolu ni? (e) Ko e ha e tau totoko oti he lalolagi, to kaumahala ke moumou e tau kapiniu kelekele he Atua?
15 Ko e heigoa e kakano mogoia, he malolo ne kehe mai he mena ne mahani kua fakakite ko e moua mai he Atua ka e nakai mai ia tautolu? Tuga e puhala e: Ko e tau kapiniu kelekele lolelole, tuga a tautolu, ne lago ai e poakiaga mo e fekafekauaga uho nei kua nakai ha ha i ai ha aoga mo e nakai maeke ke hahamo e lilifu nei hoko tautolu ni. Ko e taha mena foki, ko tautolu ko e tau Fakamoli a Iehova ne nonofo ia ki lalo he tau totoko oti he tau fi, ne lali ke lipi a tautolu mo e taute a tautolu ke papa, ke nakai lata mogoia a tautolu, ke hahamo e poakiaga mai he Atua. Ti ko e mena ia, ko e malolo ni mai he Poakiaga fekau Mua ue atu kua lagomatai a tautolu ke tumau ke he tau eke fakakelea he lalolagi nei, mo e taofi mau ke he poakiaga mo e fakamoli, ke lata ke tumau ke he hana a fekafekauaga. Ti ko e mena ia, ko e tau totoko oti he lalolagi to kaumahala, ke moumou e tau kapiniu kelekele he Atua mo e kaiha mai ia lautolu e ha lautolu a koloa uho, ha ko e mena kua tohi he 2 Korinito 4:8-12:
16 “Kua matematekelea a mautolu ke he tau mena oti, ka e nakai fakaatukehe; kua fakahakuhaku a mautolu ka e nakai mahalohalo noa; Kua favale mai kia mautolu, ka e nakai tiaki a mautolu; kua palu hifo a mautolu, ka e nakai mahaikava; Kua uta fano ke he tino nakai noa e keliaga he Iki ko Iesu, kia fakakite foki e moui a Iesu ke he tau tino ha mautolu. Ha ko mautolu kua momoui, kua tuku mau atu a mautolu ke he mate ha ko Iesu, kia fakakite ai e moui a Iesu ke he tau tino mole vave ha mautolu. Hanai, kua gahua e mate ki loto ia mautolu, ka ko e moui [mai he fakamatalaaga he tala mitaki he Kautu] ki loto ia mutolu.”
Fakatau Tokoluga he Moto Tagata Tokologa e “Koloa Uho Nai”
17. Fakafuafua fefe he moto tagata tokologa e “koloa uho nai” he fekafekauaga lilifu?
17 “Kua gahua e mate ki loto ia mautolu, ka ko e moui ki loto ia mutolu.” Hagaao e talahauaga nei ke he tau Kerisiano kua fakauku ke he Agaga. Ka e taha e mena, kua fakalaga he mena nei ke manamanatu a tautolu ke he fakafetuiaga ha lautolu ne toe ne fakauku he Atua mo e moto tagata tokologa he tau mamoe kehe. Ne iloa e lautolu ne fakauku, to hoko e fakaotiaga he ha lautolu a tau momoui ke he lalolagi ke he mate tuga ha Iesu, ka e ha ha ia lautolu e tau kapitiga ke gahua fakalataha mo lautolu ke he fekafekauaga lilifu uho, ke lagomatai a lautolu ke taute e lahi he gahua fakamatala he tala mitaki he Kautu. Tuga a lautolu ne fakauku kua toe, ko e moto tagata tokologa he tau mamoe kehe he vaha nei, kua mailoga ko e taha ne koloa uho ka hao mai he felakutaki kaka i Amaketo mo e matutaki atu mo e nakai vela mo e nakai fakaotioti ke he lalolagi fou, ko e koloa uho nei ko e monuinaaga he fekafekauaga, ko e fekafekauaga ke he Atua ko Iehova mo e hana a Patuiki lilifu, ko Iesu Keriso. To kuku mau niva he moto tagata tokologa, “e fekafekau [ke he Atua] ke he aho mo e po ke he faituga hana.”—Fakakiteaga 7:15.
18. (a) Ko e heigoa e mena ka hoko mafiti ke he lilifu fakavai he lalolagi nei? (e) Ko e heigoa e “lilifu” ne nakai talia e Iesu, mo e ko e heigoa hana ne taute ti moua e ia e lilifu mua ue atu?
18 Ko e magaaho ku i mua, to fakaotioti he Atua e lilifu fakavai he lalolagi kelea nei—ko e “lilifu” ne matutaki tali mai he uta e Satani ko e Tiapolo a Iesu ke he mouga tokoluga mo e fakakite ki a ia e tau kautu oti he lalolagi mo e “lilifu ha lautolu.” (Luka 4:5, 6) Ne nakai talia e Iesu e lilifu ia ka e fakatumau ni ke he puhala he lalolagi ne talia he Atua. Ha kua taute pihia, to fakafoufou a ia ke he lilifu, ne mua atu ke he lilifu hana ko e Tama fuataha he Atua, ne ha ha ia ia ke he lagi ato hifo mai a ia ke he lalolagi ke he kotofaaga ia Iehova.—Ioane 5:36; 17:5; Filipi 2:9-11.
19. Ko e heigoa e fekafekauaga monuina lilifu, ne kua tata lahi hana a fakakatoatoaaga, mo e ko e heigoa ha tautolu a fakamakamaka ke he mena nei?
19 Ko e fakaotiaga talahau tuai he lalolagi kelea nei, ha Satani to nakai hoko fakamua ato fakamatala e Kautu ke he lalolagi oti, ko e fakaotiaga lahi he tau gahua he tau tutaki ha Iesu Keriso, ko e tau Fakamoli a Iehova. (Mataio 24:14) Kua fita e taute e gahua fakamatala he Kautu a e ke he magaaho nei ke he tolu kuata e senetenari, mo e fakakite mai he tau mena tutupu he lalolagi ke he vaha nei ha tautolu, ko e fakaotiaga ne talahau tuai mai, liga kua tata lahi. Ti ko e mena ia, ko e monuina lilifu he gahua fakalataha ke he fekafekauaga he ohi patuiki, ko e fakatufono tapu kua tata lahi ke he fakakatoatoaaga. (Mataio, veveheaga 24, 25; Mareko, veveheaga 13; Luka, veveheaga 21) Ko e ha tautolu a monuina he kau fakalataha ke he gahua fakamatala ke he lalolagi oti ke he Kautu kua fita e fakatu, ko e koloa uho lilifu moli ne fakatokoluga he tau Fakamoli a Iehova, ko e tau tutaki he hana a Tama ko Iesu Keriso kua fakafoufou patuiki. Ne manako lahi moli a lautolu ke kuku mau ki ai, ato fakakatoatoa e gahua fakamatala ke he Kautu, ti fakafoufou he Atua Mua ue atu ko Iehova e lalolagi katoa ke he hana ni a kitekiteaga ke he hana pule mua ue atu ke he lalolagi likoliko katoatoa.—Sefanaia 3:8.
Ko e Heigoa Hau a Tau Tali?
◻ Ko e ha ne lilifu e fekafekauaga, he tau Fakamoli a Iehova?
◻ Ko e ha e tala mitaki, ne ufiufi ai ke he tokologa he vaha nei?
◻ Ko e heigoa e “[koloa uho nai, NW] ke he tau kapiniu kelekele”?
◻ Ko e ha ne fakaaoga he Atua e tau kapiniu kelekele lolelole ma e fekafekauaga uho hana?
◻ Fefe e fakafuafuaaga he tau tagata a Iehova ke he “koloa uho nai,” mo e ko e ha?
[Fakatino he lau 15]
Ne kikila e lilifu he Atua mai he fofoga ha Iesu Keriso, ko Mose Mua ue atu. Monuina e tau Fakamoli a Iehova, he moua e maama lilifu mai he Tohi Tapu mo e fakakikila atu ke he falu