Gahua Fakamoli mo Iehova

“Ko e Atua na e, kua fakaako e koe au tali mai he vaha tote; kua hoko mai foki ke he vaha nai kua fakakite gaia au hāu a tau mana.”​—SALAMO 71:17.

1. Ko e ha ne pehe ai a tautolu ko e gahua, ko e mena fakaalofa mai ia Iehova?

KO E gahua ko e taha he tau mena fakaalofa he Atua ke he tagata. Ke he ha tautolu a tau mamatua uluaki, ko Atamu mo Eva, ne pehe a Iehova: “Kia fakapuke foki e lalolagi, mo e kautu ki ai.” Ko e gahua kotofa lahi a ia, ka ko e taha ni he tau gahua ne fahia a laua ki ai. Ko e malolo fakatino mo e tau manamanatuaga kua lata ke fakaholo aki ki mua ha laua fiafia he momoui, mua atu ke he tau mena ne iloa he tau manu ne nonofo fakalataha mo laua he ha laua a kaina he lalolagi.​—Kenese 1:28.

2, 3. (a) Ko e heigoa e kakano he gahua, ke he tokologa he vaha nei, mo e ko e ha? (e) Ko e heigoa e fifiliaga ke he taha gahua pauaki kua lata ia tautolu ke manamanatu ki ai?

² Ti pihia foki ke he ha tautolu a tuaga nakai mitaki katoatoa, ko e “tau gahua” ke moua ai e “mitaki” ko e “mena kua foaki mai he Atua,” he tohia he tagata pulotu ko Solomona. (Fakamatalaaga 3:13) Ti kua lata agaia ni he tagata ke nofo e malolo he hana loto mo e tino. Ka ai fai gahua ti lahi e tupetupe. Ka e taha e mena, nakai katoatoa po ke aoga e tau gahua oti. Ke he tokologa, uka e gahua, fanau mai ni ke fakaholoaki ki mua e moui.

³ Ko e mena ia, ne ha ha i ai e gahua ne fai palepale moli kua uiina e tau tagata oti ke taute. Ka e tokologa e tau tagata totoko mo e tau mena vihi ke kautu ki ai a lautolu ne gahua fakalataha he mena ia. Ko e ha ne aoga ai ke fai malolo a tautolu ma e gahua nei? Taute e tautolu fefe? To tali e tautolu e tau huhu nei, o mai a tautolu ke manamanatu fakamua:

Gahua a Tautolu Ma Hai?

4. Ko e heigoa e faga gahua ne moua ai e Iesu e fiafia mo e makona?

⁴ Ne pehe mai a Iesu Keriso: “Ko e haku a mena kai hanei, kia eke e au e finagalo hana ne fakafano mai au, mo e fakaoti hana gahua.” (Ioane 4:34) Ko e gahua fakamoli ma Iehova kua moua ai e Iesu lahi e fiafia mo e makona. Ne fakakoloa he mena nei hana finagalo he moui, ti ko e fakaotiaga he tolu mo e lotoga e tau he hana fekafekauaga, kua maeke ia ia ke pehe age fakamoli ke he hana Matua he lagi: “Kua tuku atu e au e fakahekeaga kia koe ke he lalolagi, kua fakaoti e au e gahua ne tuku mai e koe kia au, ke eke e au.” (Ioane 17:4) Tuga ni e lagomatai he tau mena kai he tino, ti pihia ni e gahua, fuafuaaga fakaagaga. Ne fakakite e Iesu e mena nei he taha toloaga he magaaho ne fakatonu e ia: “Ua gahua a mutolu ke he tau mena kai ne popo, ka ko e tau mena kai ne toka mau ke he moui tukulagi.” (Ioane 6:27) Ko e keheaga, ko e gahua fakaagaga ne nakai fai fua kua takitaki ke he kaumahala mo e mate.

5. Ko hai ne totoko e gahua mitaki ne taute e Iesu, mo e ko e ha?

⁵ “Kua gahua haku a Matua kua hoko mai ni ke he aho nei, ha ne gahua foki au.” Ne tala age e Iesu e tau kupu nei ke he tau Iutaia ne loma a ia ha kua fakamalolo e ia he aho Sapati e tagata ne gagao, ke he 38 e tau tau. (Ioane 5:5-17) Pete ni ko e taute a Iesu he gahua a Iehova, ka kua fakatikai he tau tagata lotu ne totoko ke fakamoli e mena ia, mo e lali tumau a lautolu ke taofi a ia. Ko e ha? Ko e kakano ha ko lautolu mai he ha lautolu a matua, ko Satani ko e Tiapolo, ko ia ne totoko tumau e gahua a Iehova. (Ioane 8:44) Ha kua maeke ia Satani ke ‘fakafaliu e ia a ia mo agelu he maama,’ mo e fakaaoga e “tau mena fakahehe oti,” ti kua lata ia tautolu ke maama fakaagaga mo e manamanatu fakamitaki ke mailoga hana tau gahua mo e ko e heigoa e moli ha lautolu. Neke moua a tautolu kua gahua ke totoko atu ki a Iehova.​—2 Korinito 11:14; 2 Tesalonia 2:9, 10.

Gahuaaga he tau Tagata Totoko

6. Ko e ha e tau tagata fakahehe, ko e “tau ekegahua fakavai”? Faka­mama la.

⁶ Ko e falu, tuga e tau tagata fakahehe he vaha nei, kua nakai gahua fakamoli, ko e matakau a Satani ne lali ke moumou e tua he tau tagata o mai fou ke he fakapotopotoaga Kerisiano. (2 Korinito 11:13) Kua nakai taute e Tohi Tapu mo fakaveaga he tau fakaakoaga moli, kua hagaao a lautolu mo e lali ke fakakelea e New World Translation of the Holy Scriptures (Liliuaga he Lalolagi Fou ke he tau Tohiaga Tapu), tuga e pehe ko e falanaki katoa ni e tau Fakamoli a Iehova ke he tohi ia mo lagomatai ha lautolu. Ka e nakai moli e mena nei. Ko e lahi e tau magaaho he senetenari nei, ne fakaaoga ni he tau Fakamoli e King James Version (Liliuaga he Patuiki ko James), ko e Douay Version (Liliuaga Douay), he Katolika Roma po ke ha fakaliliuaga ni, ne kua ha ha i ai ha lautolu a tau vagahau, ke fakaakoaki e kupu moli hagaao ki a Iehova mo e hana finagalo. Mo e fakaaoga e lautolu e tau fakaliliuaga tuai nei ke fakailoaaki e kupu moli hagaao ke he tau tagata mamate, ko e fakafetuiaga he Atua mo e hana Tama, mo e ko e ha, ne ko e fuifui mamoe gahoa ni, ka o hake ke he lagi. Iloa foki he tau tagata ne maama kua fakaaoga tumau ni he tau Fakamoli a Iehova e tau fakaliliuaga loga he Tohi Tapu he ha lautolu a gahua fakaevagelia ke he lalolagi katoa. Tali mai he tau 1961, ne lafi ki luga ha lautolu a fiafia ke he fakaaogaaga he New World Translation, mo e hana katoatoa, tonu e fakaliliu, mo e mukamuka ka totou.

7. (a) Ko e ha ne fakatikai ai e Iesu e tokologa ne talahau kua tua ki a ia? (e) Ko e ha kua aoga ai ke fanogonogo ke he tau fakatonuaga he tohi 1 Ioane 4:1?

⁷ Ne pehe a Iesu to tiaki e ia e tokologa ne talahau ko e tua ki a ia. Fakamoli e ia liga to perofeta a lautolu, vega e tau temoni, mo e “eke . . . e tau mana loga” ha ko e hana higoa. Ka e pete ia, kua mailoga agaia ni e ia ko e tau gahua he “mahani kelea.” (Mataio 7:21-23) Ko e ha? Ha kua nakai taute e lautolu e finagalo he hana Matua he lagi mo e nakai aoga ke he kitekiteaga he Atua. Ti kehe moli, tuga e mana, ko e tau gahua he vaha nei na maeke ke kamata mai agaia he tupuna fakahehe, ko Satani. Kua tohia he aposetolo ko Ioane hana tohi fakamua kua molea e 60 e tau tau he mole atu e mate mo e liu tu mai a Iesu, ne fakatonu mai ke he tau Kerisiano ke “aua neke talia e tau [talahauaga fakaagaga, NW] oti kana, ka kia kamatamata e mutolu e tau [talahauaga fakaagaga, NW] po ke mai he Atua a lautolu.” Kua lata a tautolu ke taute pihia foki.​—1 Ioane 4:1.

Tau Gahua ne Nakai Fai Taui

8. Ti kua lata ke fefe e tau logonaaga ha tautolu ke he tau gahua he tino?

⁸ Kae pete ni he nakai fakalataha a tautolu ke he gahua fakaagaga ne nakai fai fua, kua nakai fai aoga ha tautolu a tau gahua kaeke ko e tau manako taute ni ke lata mo e tau mena popo vave he tino. Pehe mai e aposetolo ko Peteru kua leva lahi tuai he taute e tautolu “e manako he tau motu kehe . . . he tau mahani matahavala, mo e tau manako lahi, mo e inu lahi ke he uaina, mo e tau tafeauhi, mo e tau inuaga he kava, mo e hufeilo ke he tau tupua.” (1 Peteru 4:3, 4) Nakai pehe e kakano he mena nei, ko e tau Kerisiano tukulele oti he magaaho nei ne taute e tau gahua pihia, ka ko e kakano pehe ko e tau manamanatu ha lautolu ne taute pihia kua lata ke hiki fakamafiti ha ko e ha lautolu a tutupuaga kitekite fakaagaga. To eke fakakelea he lalolagi a lautolu ha ko e ha lautolu a liliuaga; ko e mena kua amaamanaki ki ai a ia. Ka kua lata tuai ni ke hiki kaeke kua manako ke eke mo tau tagata gahua fakamoli ke he fekafekauaga a Iehova.​—1 Korinito 6:9-11.

9. Ko e heigoa ha tautolu kua iloa mai he talahauaga he Fakamoli ne kamata fakaako ke eke mo tama fifine uhu lologo ke he tau tala fefeua?

⁹ Ne tuku mai e Iehova e tau mena fakaalofa loga ke fakafiafiaaki a tautolu, ko e leo kofe e taha he tau mena na. Ka e taha e mena, “ko e lalolagi oti ha he pule hana kua mahani kelea,” ko e Tiapolo ko Satani, ti nakai kia lafi atu ki ai e lalolagi fakaleo kofe? (1 Ioane 5:19) E, ko e tau leo kofe ko e taha matahele iloilo, tuga he kitia e Sylvana. Ne fakaako a ia i Falani ke eke mo tama fifine uhu lologo ke he tala fefeua. “Ha ha i ai agaia ia au e manako malolo ke fekafekau ki a Iehova,” he fakamama e ia. “Ne fiafia lahi au ke gahua foafoa lagomatai mo e amaamanaki ke fakatuuta e tau mena ua nei he haku a moui. Ka ko e mena vihi fakamua ne feleveia mo au ha ko e tutuli ke he haku a gahua ko e mahani feuaki. Fa mahani he kamataaga, ke onoono mai haku a matakau gahua, ko e tuga e tama tote a au ha kua nakai fakalataha a au ke he ha lautolu a tau tutala fakafeuaki mo e tau mahani. Ko e magaaho fakamui, ne kamata e agaga kelea ke tupu hake ia au, mo e fakatupu ki a au ke talia e tau mena ne vihiatia e Iehova. Taha he tau faiaoga haku ne fakaohooho lahi ki a au ke taute ko e lotu he haku a uhu lologo, ti fakaako foki au ke aga vale he Tutuaga lologo mo e ke manatu ko e mua na au ke he tau tagata oti. Ko e tau mena oti nei kua fakatokotoko kelea aki au. Hoko ai ke he taha magaaho, ti tauteute ai au ke lata mo e tiviaga pauaki. Ne liogi au ki a Iehova ke fakakite fakamitaki mai ko e puhala fe ke fano ai au. Pete ni he malolo mo e lologo mitaki au, ka e nakai ko au taha ia lautolu kua fifili. Ne iloa e au he magaaho fakamui ko e ha​—kua leva e taute fakagalo e fifiliaga he tau fua to hoko e tiviaga. Ka e maama mitaki e tali ke he haku a liogi mo e manatu haku ke toka e fakakitekiteaga lologo ka e ke fakaako atu e fakaleo lologo i kaina.” Ko e magaaho fakamui, ne mau e matakainaga fifine nei mo e taha motua he fakapotopotoaga Kerisiano, ti kua fekafekau fakamoli tokoua he magaaho nei ke fakaholo ki mua e tau gahua he Kautu.

10. Ko e heigoa hau ne fakakatoatoa mai he tau kupu a Iesu he Ioane 3:19-21?

¹⁰ Ne pehe a Iesu: “Ko lautolu oti kua eke mena kelea, kua vihiatia e lautolu e maama; ti nakai o mai ni ke he maama, neke fakailoa ai ha lautolu a tau mahani.” Ko e taha mena foki, “ko ia kua eke e mahani fakamoli, kua hau ni a ia ke he maama, kia fakailoa hana tau mahani, ha kua lata ia mo e Atua.” (Ioane 3:19-21) Pihia ai e monuina ka gahua fakalataha mo e finagalo a Iehova! Ka ke taute ke kautu, kua lata he tau gahua ha tautolu ke fifili tumau mai he maama he Kupu he Atua. Kua nakai talahaua fuakau lahi a tautolu mo e nakai pehe kua tomui lahi ke hiki ha tautolu a puhala he moui ke talia e uiina, ke taute e fekafekauaga aoga a Iehova.

Taute he “tau Gahua Mitaki” he Vaha Nei

11. Ko e heigoa ne tutuli he tokologa ke eke mo tau “gahua mitaki,” mo e ko e ha kua takitaki atu e tau mena ia ke he tupetupe?

¹¹ Ko e gahua ne aoga lahi he vaha nei kua lata ke fakakite mai e fekau mafiti he vaha ha tautolu. Tokologa e tagata ne loto fakamoli ne talia mo e kua fakalavelave a lautolu ke he tau gahua ne fakahigoa tumau ko e “tau gahua mitaki,” ne taute ke aoga ma e laulahi he tau tagata poke taha mena pauaki he tau tupuaga. Ka e tupetupe agaia ni e tau vahega gahua pehe nai! Ko e hokotaki mai he CAFOD (Catholic Fund for Overseas Development [Tupe Lagomatai he Katolika ma e tau Mena Tutupu he tau Motu Kehe] i Peritania ha ko e hana ati tupe lagomatai hoge pehe: “Tolu e tau kua mole . . . ne moua ai e tau miliona pauna ma e atiaga lagomatai. Ti afe e tau momoui ia ne kua hao. Kua liu foki hagahaga kelea e tau momoui ia he magaaho nei . . . Ka ko e ha? Ko e heigoa ne hepe?” Ke tutaki atu a talahauaga, ne fakamaama pehe he CAFOD Journal nakai ne taute ha mena ke he tau mena vihi leva nei mo e ko e tau “puhala lagomatai, kua lata ke lagomataiaki e tagata, kua fakaaoga tuai ke fakaauatu ki mua e tau taufetoko [tau felakutaki he motu].” Nakai fai fakauaua, kua logona tuai e mutolu e tau manatu ne taogo mogo nai he tau matagahua foaki fakaalofa pehe nai.

12. Ko e heigoa ni e tali ke he tau mena vihi ne feleveia mo e lalolagi he vaha nei?

¹² Ko e hoge ko e mena vihi kua lata ke taute fakamafiti. Ka ko hai ne mailoga e hoge mo e tau he vaha nei, ko e fakamoliaga he perofetaaga a Iesu Keriso hagaao ke he fakaotiaga he fakatokaaga matahavala nei? (Mataio 24:3, 7) Ko hai ne fakailoa e fakamoliaga he tau tutakiaga he tau mena nei mo e tau tagata heke nua tokofa ne fakatino mai he tohi a Fakakiteaga, veveheaga 6 he Tohi Tapu? Kua taute fakamoli tumau pihia he tau Fakamoli a Iehova ke he senolo nei. Ko e ha? Ke fakakite kua nakai fakaai ke hokotia e tagata ke taute ha tuluiaga ke tukulagi. Nakai pehe e kakano nei, kua fakateaga e tau Kerisiano ke he tau mena vihi he lalolagi. Mamao e mena ia. Na fakaalofa hofihofi a lautolu mo e lali ke taute e tau mena oti, kua maeke ia lautolu ke lagomatai ke uta kehe e tau mena fakamatematekelea. Ka to feleveia ni a lautolu mo e moli, ka noa mo e fakatauhele fakaatua, to nakai maulu e tau mena vihi he lalolagi. Tuga e tau tagata mativa, ko e tau mena vihi nei to tumau ni ke he loa he fakaataaga ki a Satani ke pule ke he lalolagi.​—Mareko 14:7; Ioane 12:31.

Ko e Gahua ne Mua atu e Uho

13. Ko e heigoa e gahua ne mua atu e aoga ke fakamafiti he vaha nei, mo e ko hai ne taute e gahua ia?

¹³ Ko e mena kua lata lahi ke mafiti he vaha nei ko e fakamatala he tala mitaki, ko e Kautu he Atua ko Iehova to hukui vave e tau fakatufono oti he lalolagi mo e tamai e lagomatai ne amaamanaki ki ai e tau tagata kua matakutaku ke he Atua. (Tanielu 2:44; Mataio 24:14) Ne taute e Iesu Keriso e fakamatala ke he Kautu he lagi mo matapatu gahua he hana moui, pete he kaupa ni hana fakamatala ke he motu ko Palesetaina. Ka ko e vaha nei, kua fakalahi atu ke he lalolagi katoa e gahua fakamatala tuga ni he talahau e Iesu. (Ioane 14:12; Gahua 1:8) Ke fai lagomatai, ke he gahua he Atua, pete ne tote, ko e monuina nakai fai fakatataiaga. Tatai ni e tau tane mo e tau fifine, fuakau mo e fuata, ne nakai manatu to eke a lautolu mo tau tagata fakamatala he tala mitaki, kua matamua e lautolu e gahua fakaevagelia ne taute fakakatoatoa he tau Fakamoli a Iehova he vaha nei. Tuga a Noa mo e hana magafaoa, ne taute fakamoli e lautolu e gahua he Atua ki lalo he Hana poakiaga, ko e mena ia kua eke ai ke he Hana malolo, mo kamataaga ke he fakaotiaga he fakatokaaga matahavala nei.​—Filipi 4:13; Heperu 11:7.

14. Maeke fefe e fakamatala ke eke mo fakamoui mo e puipui, he magaaho taha?

¹⁴ Ko e gahua fakamatala he tau Fakamoli a Iehova he tau aho fakamui nei ko e fakamouiaga ma lautolu ne fanogonogo mo e gahua ke he tala mitaki ne logona e lautolu. (Roma 10:11-15) Ko e puipuiaga foki ma lautolu ne fakamatala. Kaeke ke fiafia moli ke lagomatai e tau tagata ne lalahi e tau mena vihi kehe ha tautolu, to nakai tupetupe lahi a tautolu ke he tau mena vihi kua ha ha ia tautolu. Ne mailoga e tautolu to lali e lalolagi liu hala tua nei, ke hiki ia tautolu ke he hana tau puhala. Ti ka fakapukeaki e tau manatu he Atua e tau loto ha tautolu he magaaho ka fakamatala, kua mua atu ia ke he fakamaloloaga he tua; ko e mitaki lahi ke he ha tautolu a fiafia lahi haia. Tuga he tuku he taha Fakamoli: “A ne mai nakai lali au ke liliu e tau tagata ne feleveia mo au, ato maeke ke liliu e lautolu au!”​—Fakatatai mo e 2 Peteru 2:7-9.

Gahua Fakalataha mo e Fakapotopotoaga

15. Ko e heigoa e tau kavega ne kua hiki ki luga he tau leveki mamoe he vaha nei, mo e kua lata ke logona hifo fefe e tau tane he fakapotopotoaga ha kua kitia e tohi 1 Timoteo 3:1?

¹⁵ Ka o mai e tau tagata fou ke he fakapotopotoaga, na o mai a lautolu ki lalo he levekiaga he Leveki Mamoe Mua ue atu, ko e Atua ko Iehova, mo e hana Leveki Mamoe Mitaki ko Iesu Keriso. (Salamo 23:1; Ioane 10:11) Ko e tau Leveki Mamoe nei he lagi ne hukui he tau leveki mamoe fakamoli he lalolagi nei ke leveki e tau mamoe, tau tagata ne kotofa i loto he fakapotopotoaga. (1 Peteru 5:2, 3) Ke moua e tau kotofaaga pihia, ko e monuina nakai fai totogi he tau aho fakamui nei. Ko e gahua he tau leveki mamoe ko e gahua mamafa, nakai ko e takitaki he fakaakoaga i loto he fakapotopotoaga mo e gahua fakaevagelia ni hokoia ka e puipui foki he tau mamoe mai he tau mena hehe fakaagaga mo e malolo mai he matagi tuga e afa he lalolagi nei ne nonofo ai a tautolu. Nakai tuai fai gahua mitaki ne toe ke foli ki ai e tau tagata tane he fakapotopotoaga, mai he gahua ke lagomatai ke leveki e moui fakaagaga he tau tagata tokologa he fakapotopotoaga Kerisiano.​—1 Timoteo 3:1; fakatatai mo e Isaia 32:1, 2.

16. Ko e heigoa e tau puhala he tau leveki mamoe Kerisiano, ne featihakeaki e taha ke he taha?

¹⁶ Ko e mena ia, aua neke nimo ia tautolu, ko e tau leveki mamoe pihia ko e tau tagata, mo e kehekehe e tau aga fakatagata mo e lolelole foki tuga ne tau mamoe oti. Kaeke ke mitaki lahi a taha ke he taha mena he gahua leveki mamoe, ko e aoga agaia ni e tau taleni he taha foki kehe taha fahi matagahua ke he fakapotopotoaga. Ko e gahua he tau momotua Kerisiano ke feati hake e taha ke he taha ke fakamaloloaki e fakapotopotoaga. (1 Korinito 12:4, 5) Nakai maeke ke tuku e agaga fetoko ki a lautolu. Gahua auloa a lautolu ke puipui mo e fakaholo ki mua e fiafia he Kautu, “kua nikiti ki luga e tau lima kua nakai hala” mo e liogi ki a Iehova, mo e kumi hana fakamonuina mo e takitakiaga he ha lautolu a fifiliaga he tau manamanatuaga.​—1 Timoteo 2:8.

17. (a) Ko e heigoa e kotofaaga kua moua e tautolu? (e) Ko e heigoa e tau mena kua lata ia tautolu ke kalo kehe mai ai kaeke ke taute katoatoa e tautolu ha tautolu a tau kotofaaga?

¹⁷ Ko e gahua fakamatala he mogonei kua fakalahi ki mua e mafiti ha kua tata lahi e fakaotiaga he kautu a Satani. Ha kua moua e kupu moli ko e Kupu he Atua ko Iehova, ko e hana tau Fakamoli, kua moua e tautolu e kotofaaga ke folafola e tala mitaki he tau magaaho oti. Ko e gahua he magaaho nei kua loga lahi ke fakalavelaveaki a tautolu, ke hoko ke he fakaotiaga. Aua neke fakaata e tautolu a tautolu ke fakahehe ke he foliaga fakafiafia tino hokoia, kumi fiafia he feuaki, po ke fakamamafa he tau koloa he tino. Aua neke hufia he tau manamanatuaga nakai aoga, taufetoko, ha ko e tau mena nei, kua nakai fai aoga mo e moumou magaaho. (2 Timoteo 2:14; Tito 1:10; 3:9) He magaaho ne huhu e tau tutaki ki a Iesu, “Ko e Iki na e, ko e vaha nai kia ke liu fakafou mai ai e koe e kautu kia Isaraela?” Ne fakatonu e Iesu ha lautolu a tau manamanatuaga ke he gahua aoga kua ha ha i ai mo e pehe: “To eke foki a mutolu mo tau talahau haku ki Ierusalema, mo Iutaia oti ni, mo Samaria, ke hoko ni ke he fakaotiaga he lalolagi.” Kua fakalahi e gahua nei ke hoko mai ke he aho nai.​—Gahua 1:6-8.

18. Ko e ha ne taui mitaki ai e gahua mo Iehova?

¹⁸ Gahua mo Iehova, fakamatala mo e hana fakapotopotoaga he lalolagi he vaha nei, to moua e fiafia, loto mafola e tau manako, mo e finagalo moli ke he tau momoui ha tautolu. Ko e magaaho ma e tau tagata takitokotaha ne fakaalofa ki a Iehova ke fakakite e fakaalofa mo e fakamoli ki a ia. To nakai fakahoania ai e gahua nei mo e hana tau lala loga. Ha kua maaliali mai i mua e monuina he moui tukulagi, kia tumau e fakamoli ha tautolu ke “fekafekau ke he Atua mo e matakutaku mo e maimaina,” he hana fakahekeaga mo e fakamouiaga ni ma tautolu.​—Heperu 12:28, NW.

Ko e Heigoa Hau a Tali?

◻ Ko e heigoa e gahua ne moua mai ai e Iesu e fiafia mo e makona?

◻ Ko hai ne totoko ke he gahua a Iehova, mo e ko e ha?

◻ Fefe e tau “gahua mitaki” he lalolagi, mo e fakamatala he tala mitaki ke he Kautu he Atua, ka fakatatai?

[Fakatino he lau 16]

Kua poaki atu e Iesu ke he hana tau tutaki ke o atu ke fakamatala