Kia Fakaaue​—Kua Pule e Kautu Faka-Mesia ha Iehova

“Ko e Iki na e, ko e Atua ha i ai e malolo oti kana, kua fakaaue atu a mautolu kia koe, . . . ha kua toto e koe hau a malolo lahi, kua eke foki a koe mo patuiki.”​—FAKAKITEAGA 11:17.

1. Ko e heigoa he pelesiteni he Watch Tower Society ne talahau he mole atu hana fenoga i Europa he tau 1911?

KO E kamataaga he tau 1911, ne taute he pelesiteni he Watch Tower Society (Kaufakalatahaaga Kolo Toko), ko C. T. Russell e fakaakoaga fakapapahi he Tohi Tapu, ke he tau taone lalahi i Europa. Ko e tau tala ke he fenoga ia, ne tohia e Russell e tau mena nei he Ko e Kolo Toko (Peritania), Me 15, 1911: “Ne ofo lahi a mautolu he kitia e loga he tau fakamailoga monuina he tau matakavi oti . . . Na iloa he tau tagata totou ha mautolu kua fai tau tuai he amaamanaki a mautolu ke fakaoti e Vaha nei mo e magaaho he tau mena vihi kelea, mo e amaamanaki foki a mautolu ke hoko fakaofo mo e malolo lahi, ka mole fakatote e mahina Oketopa, 1914, ha ko e maamaaga haia ha mautolu mai he tau Tohiaga tapu, ko e aho haia he Vaha he tau Motu Kehe​—ko e foakiaga he lalolagi ke he pule he tau Motu Kehe—​ka fakaoti ai; ko e magaaho ia foki kua hoko ke kamata ke fakagahuahua e malolo he kautu he Mesia.” Kua fakamoli nakai e amaamanakiaga nei?

2. Ne malipilipi fefe e mafola he tau 1914, mo e ko e heigoa e tau fakapapahiaga momoko?

² Ha ha i ai he hafa fakamua he tau 1914, tuga e haohao mitaki mo e nakai haofia e lalolagi mai he tau. Ka kua malipilipi fakaofo ai e mafola ha ko e kelipopoaga he hakega ke he nofoaiki a Osetia, mai he lima he tagata Serepia he mahina Iuni 28, 1914. Nakai leva ti ogo tau a Osetia-Hagarii ke fetoko ki a Serepia. Ne kau a Rusia mo Serepia, ti ogo tau a Sihamani kua totoko ki a Rusia he mahina Aokuso 1. Ti ogo tau a Sihamani kua totoko ki a Falani ia Aokuso 3; ko Peritania Lahi kua totoko ki a Sihamani ia Aokuso 4; ko Montenegro kua totoko ki a Osetia-Hagarii ia Ao­kuso 7; ko Sapani kua totoko ki a Sihamani ia Aokuso 23; ko Osetia-Hagarii kua fetoko ki a Peletiuma ia Aokuso 28. Tokologa ne talitonu to mafola vave e tau. Ka e nakai pihia, ha kua holo ki mua ke he tau latau ne mahomo atu e kelea, ato hoko ke he magaaho ia, ko e 19 foki e motu ne kau ke he fekelipopoaki ia he lalolagi, mo e 13,000,000 he tau momoui he tau kautau mo e tau tagata noa ne mamate, molea e 21,000,000 ne matematekelea mo e pakia.

3, 4. Ko e heigoa e mena ne tupu he matapatu Kaufakalatahaaga he magaaho pogipogi he Aho Falaile, Oketopa 2, 1914?

³ Ko e pogipogi he Aho Falaile, Oketopa 2, 1914, ne fakailoa e Russell ke he kau gahua he Watch Tower Society i Brooklyn, New York: “Kua fakaoti e vaha he tau Motu Kehe; kua hoko ke he tau patuiki ha lautolu, ha lautolu a aho.” Kua fakafeleveia mo e fakakiteaga patipati fakaaue ne fiafia lahi, mai he magafaoa i Peteli, “ko e fale he Atua.”

⁴ Ko e heigoa e tonu ne moua e C. T. Russell mo e hana a tau kaufakalataha ke fiafia ai he pogipogi ia a Oketopa? Ka e kamata mai i fe e talahauaga ke he “Vaha he tau Motu Kehe”? Ko e heigoa ne fakamoliaki ko e fakaoti e Vaha he tau Motu Kehe ia Oketopa 1914? Mo e haofia fefe a koe he mena ia?

Ierusalema mo e Vaha he tau Motu Kehe

5. Kamata mai i fe e talahauaga ke he “Vaha he tau Motu Kehe”?

⁵ Ko e talahauaga ke he “Vaha he tau Motu Kehe,” poke “vaha kotofa he tau kautu” ne moua mai he perofetaaga lahi a Iesu hagaao ke he moumouaga a Ierusalema. (Luka 21:5-36, King James Version) Ua e aho ato faka-kite e mena ia, ne tuku atu e Iesu a ia ke he tau tagata i Ierusalema, ko e ha lautolu a Mesia. He magaaho taha ne heke atu a ia he punua asini mo e loto fakatokolalo ke he maga, kua tauhea fakahekeheke e moto tagata he tau Iutaia tuga he talahau tuai e Sakaria 9:9. “Kia monuina e Patuiki, kua haele mai ke he higoa [a Iehova, NW]” ne tauhea a lautolu mo e leo lahi.​—Luka 19:28-40.

6, 7. Ko e heigoa e lima toto kelea he tau Iutaia he senetenari fakamua ne hili ki luga ia lautolu, mo e ko e heigoa e tau mena ne tutupu?

⁶ Ne iloa e Iesu ko e tau manatu he tau tagata, kua to nakai leva ti liliu kehe ke totoko ki a ia ha ko e vihiatia kelipopo tagata he tau takitaki lotu i Ierusalema kua mai ni he malolo fakaohooho he matua ha lautolu, ko e Tiapolo. (Kenese 3:15; Ioane 8:44) Nakai leva he mole ai, he mahina Nisani 14, ne tauhea e lanu tagata Iutaia ke kelipopo a Iesu. “Kia toka i luga ia mautolu, mo e tau fanau ha mautolu hana a toto,” he tauhea a lautolu ke he kavana Roma ne uka e loto ke talia ki ai. (Mataio 27:24, 25) Ka e kua kehe ai, he nakai talia ko e Patuiki faka-Mesia a Iesu, ne fakailoa atu he tau takitaki ekepoa: “Nakai fai patuiki a mautolu, ka ko Kaisara hokoia.” (Ioane 19:15) Ne pao fao ai e Mesia moli ke he akau fakatautau ke mate, ha ko e tau hokotaki pikopiko, ko e fakaohooho totoko a ia ki a Roma mo e tagata amuamu a ia ke he Atua he tau Iutaia.​—Mareko 14:61-64; Luka 23:2; Ioane 18:36; 19:7.

⁷ Ko e ita fakaatua to hoko moli ke he tau tagata ne nonofo i Iutaia ha ko e kelea he ha lautolu a lima toto. Ko Ierusalema, mo e hana faituga fulufuluola, kua nakai tuai liu fakahigoa “ko e māga haia he Patuiki to atu,” ko Iehova. (Mataio 5:35; Luka 13:33-35) Ko e falu a aho ato mate a Iesu, ne tutala navanava hana tau tutaki ke he tau fale he faituga he taone. Ne tali talahau tuai e Iesu: “Ko e tau mena na kua kitekite a mutolu ki ai, to hoko mai ni e tau aho, ke nakai tuai toka ai taha maka ki luga he taha maka, ka e ulu oti ki lalo.”​—Luka 21:5, 6.

8. Ko e magaaho ne tala age e Iesu e “fakamailoga” ke he tau mena ka hoko ke he moumouaga a Ierusalema, ko e heigoa foki falu a mena ne lauia i ai?

⁸ Ne huhu e tau tutaki mo e ofo lahi: “Ko e akoako na e, to hoko mai a fe e tau mena ia? Ko e heigoa foki e fakamailoga ka teitei hoko ai e tau mena ia?” (Luka 21:7) Ko e tali ne talahau tuai fakatonu e Iesu e tau mena ka tutupu ato hoko atu ke he moumouaga a Ierusalema, mo e lafi atu e ia e vala tala ofoofogia nei: “To taholi foki a Ierusalema he tau Motu Kehe, ato fakakatoa ai e tau vaha he tau Motu Kehe.” (Luka 21:8-24, KJ) Ti ko e mena ia ne tuhi atu ki mua a Iesu ke he taha mena mamao atu ki mua he moumouaga a Ierusalema​—ko e taha mena kua eke ai ke fakatali “ato fakakatoa ai e tau vaha he tau Motu Kehe.” He hagaao atu ke he “tau fakamailoga,” ne pehe a Iesu: “Ka kitia e mutolu e tau mena ia kua eke, kia iloa ai e mutolu, kua tata tuai e kautu he Atua.” (Luka 21:31) Ti ko e mena ia, ko e fakamailoga to ua e faka­katoa­toa­aga. Ko e fakamua, poke fafati tote, kua fakakite he fakakatoaaga ia ‘kua tata e moumouaga ha Ierusalema.’ (Luka 21:20) Ke uaaki mo e fakakatoaaga lahi atu, to hoko mai ka fakaoti e Vaha he tau Motu Kehe, mo e to fakakite mai ai “kua tata tuai e kautu he Atua.”​—Fakatatai ki a Mataio 24:3.

Ierusalema he Lalolagi Kua Hukui he Maga ne Mua

9. Galo ne fe, e Ierusalema he lalolagi hana tuaga fifili, mo e ko e heigoa ne hukui aki?

⁹ Ke talahau “to taholi foki a Ierusalema he tau kautu kehe, ato fakakatoatoa ai e tau vaha kotofa he kautu,” ko e pehe kia a Iesu ato liu e taone he lalolagi ke he fiafia he atua? Nakai. Mole e kelipopo he Tama ofania he Atua, ti galo tukulagi ai e tuaga uho ha Ierusalema he lalolagi, mo e kua fita ni he hukui aki e “māga he Atua moui, ko Ierusalema ha he lagi.”​—Heperu 12:22; Mataio 23:37, 38; 27:50, 51.

10. Ko e heigoa e kakano he talahauaga “Ierusalema he lagi”?

¹⁰ Ko e talahauaga “Ierusalema ha he lagi” ne fakaaoga he Tohi Tapu ke fakamaamaaki e Kautu mau tumau he lagi, ne ui ki ai e tau Kerisiano kua fakauku.a (Heperu 11:10; 12:22, 28) Ko e magaaho ne tohia ai he aposetolo ko Paulo e mena nei, ko e nava agaia e tau Iutaia ke he taone he lalolagi mo e hana faituga. Ko e mena ia ne fakamanatu ai e Paulo ke he tau Kerisiano Heperu “ha ko e mena nakai fai māga a tautolu ke tumau i hinei, ka kua kumi e tautolu kia ia ne tatali.”​—Heperu 13:14.

Ko e Ha ne Ui ai ko Ierusalema he Lagi

11. Ato galo ia Ierusalema he lalolagi e fakaalofa noa a Iehova, ko e heigoa ne hukui aki ai?

¹¹ Ko Ierusalema ko e maga ne mua tuai he motu ko Isaraela, mo e hana tau patuiki ne pehe ke “nofo . . . ke he nofoaiki a Iehova.” (1 Nonofoaga he tau Patuiki 29:23) Ne taute foki e Iehova e maveheaga mo Tavita ko e tuaga fakapatuiki to tumau tukulagi ke he hana magafaoa. Tuga ni e tau maga ne mua he vaha nei, tuga a Washington, Moscow, Canberra, mo Pretoria, ne fakaaoga ke fakamailoga aki e tau fakatufono takitaha ha lautolu, ti fakaaoga he Tohi Tapu a Ierusalema ke hukui aki e kautu faka-Tavita.​—2 Samuela 7:16; Luka 1:32.

12. Fakaaoga fefe e kupu “Vaha he tau Motu Kehe”?

¹² Ko e kautu a Tavita kua fakakaupa ni hana pule, ko e laulahi atu ni ke he tau katofia ha Ierusalema fakamua ne kotofa he Atua. Ko Ierusalema he lalolagi mogoia ko e fakafifitakiaga ke he Kautu faka-Mesia moli ka pule mai he lagi mo e eke ai e lalolagi katoa mo hana kautu. (Salamo 2:2, 7, 8; Tanielu 7:13, 14; 2 Timoteo 4:18) Ti ko e tohi The Time Is At Hand (Kua Tata Mai e Magaaho) ne fakailoa he Watch Tower Society he tau 1889, ne talahau fakamaaliali: “Ko e kupu ‘Vaha he tau Motu Kehe’ ne fakaaoga he Iki ha tautolu ke he magaaho fakamua ia he lalolagi, vaha­loto he utakeheaga he Kautu fakatai he Atua, ko e Kautu Isaraela (Esekielu 21:25-27), mo e kamataaga mo e fakatuaga he hana mena nakai fakafifitaki, ko e Kautu moli he Atua.”

Vaha he tau Motu Kehe​—Loa Fefe?

13. Kamata i ne fe e Vaha he tau Motu Kehe, ti ko e ha ne tali pihia ai e koe?

¹³ Ko e kautu fakafifitaki he Atua ne ulu ki lalo e Nepukanesa ko e patuiki Papelonia he tau 607 F.V.N. Ko e mahina ke fituaki faka-Iutaia, liga ko e lotoga ia Oketopa, ne toka noa ai e kelekele.b (2 Tau Patuiki 25:8, 9, 22, 25, 26) Ke fakamoliaki ko e tupu ni e mena nei mai he fakaataaga fakaatua, ne fakakite he Atua ko Iehova he miti ki a Nepukanesa. Ne ha ha i ai e akau kua hio ki lalo mo e liu tupu hake ka mole “fitu e vaha.” Fai fakamoliaga fakamua e miti, he magaaho ne liu fakatu a Nepukanesa ke he hana nofoaiki he mole atu e heketia fakaku hana.​—Tanielu 4:10-17, 28-36, NW.

14. Ko e heigoa e matapatu ne mua he miti a Nepukanesa?

¹⁴ Ti, ko e matapatu he miti a Nepukanesa kua fakakiteaki hana fakakatoatoa moli he kautu fakafifitaki he Atua, kua fakaata e ia e patuiki Motu Kehe ke ‘hio ki lalo.’ Ne fakaoti e miti mo e talahauaga nei he finagalo moli: “Ke maeke ai he tau tagata momoui ke iloa ko e Iki-pule a ia ne Mua ue atu he kautu he tau tagata, mo e ki a ia ne manako a ia ki ai, to foaki atu e ia mo e fakatu hake foki e ia ki luga e taha ne tokolalo mai he tau tagata.”​—Tani­elu 4:17, NW.

15. Katoatoa fefe a Iesu Keriso ke eke mo “taha ne tokolalo mai he tau tagata”? (Mataio 11:29)

¹⁵ Taha maka ni e tagata ne katoatoa kua lata ke fakahigoa ko e “taha ne tokolalo mai he tau tagata.” Ko e Tama fuataha he Atua ne fakamoli pihia he manako a ia ke toka hana lilifu he lagi ke eke ke fanau mai mo tagata, a Iesu, ko ia ne mamahi ke he fakama lahi mahaki mo e mateaga favale ke he lima a Satani. (Filipi 2:3, 5-11) Mole atu hana liu tumai ke he lilifu he lagi, kua fakatali a Iesu ato fakaoti e fitu e vaha he pule he tau Motu Kehe ato eke mo Patuiki faka-Mesia ki luga he tau tagata.​—Heperu 10:12, 13.

16. Lagomatai fefe he tohi ha Fakakiteaga e tau Kerisiano ke fuafua ko e fakaoti a fe e fitu e vaha?

¹⁶ Ka e maeke fefe he tau Fakamoli a Iehova ke maama e loa he fitu e vaha? Kua fakakite he Tohi Tapu ko e “vaha mo e tau vaha mo e hafa e vaha,” po ke tolu mo e hafa e vaha, ke moua e 1,260 e tau aho. (Fakakiteaga 12:6, 14, NW) Ti ka pihia, fakalahi ua e numela ia, poke fitu e tau vaha ke moua ai 2,520 e tau aho. Ke he matapatu he takitakiaga fakaperofeta ia ke “fakalata e aho taha ke he tau taha,” ti ko e fitu e vaha ke moua ai 2,520 e tau tau. (Numera 14:34; Esekielu 4:6) Ke he fuafuaaga nei, ko e Vaha he tau Motu Kehe, ne kamata ia Oketopa 607 F.V.N. ti fakaoti ai e 2,520 he tau tau he matahiku ia Oketopa 1914.

17. Ko e heigoa e fakailoaaga fiafia kua taute ke fakailoa he tau 1914?

¹⁷ Ko e mahina Oketopa 1914, ne tuku he Atua ko Iehova hana Tama ne ofania, ko e Iki ko Iesu Keriso, ke he nofoaiki he Kautu i luga he lagi. Kua hoko tuai, ke ha ha i ai e moli he Fakakiteaga ne kitia he aposetolo Kerisiano ko Ioane mo e mena haia ne maeke ai ke taute e fakailoaaga: “Ko e tau kautu he lalolagi kua eke ma e Iki [Iehova] ha tautolu mo e hana Keriso, to eke foki a ia [Iehova] mo patuiki tukulagi tukumuitea.” (Fakakiteaga 1:10; 4:1; 11:15) Ko e fulufuluola ha e tau tala nei mo e ko e heigoa e kakano he fiafia lahi he tau hakeaga fakalataha mo e tau tagata i lalo he pule he Kautu ia!​—Fakakiteaga 11:17.

18. Ko e ha e tau tutuaga momoko ia, ne fakamamahi ai e tau tagata tali mai he tau 1914?

¹⁸ Moli, ma e tokologa he tau tagata, kua nakai moua ha fiafia he lalolagi tali mai he tau 1914. Ka ko e tuaga ooi, he lalolagi kua fakamoli ai ko e pule ha Satani kua teitei fakaoti tuai. Iloa fefe e tautolu e mena nei? Ne fakakite he tohi ha Fakakiteaga ko e fakatuaga he Kautu he Atua to tupu mai ke ha ha i ai e tau he lagi. Ko Satani mo e hana tau temoni ne tolo mai he lagi mo e nonofo fakakaupa ke he matakavi he lalolagi ha tautolu. Mole atu he kitia e kautu nei, he fakakiteaga fakaperofeta ne logona e Ioane e leo lahi pehe: “Kia fiafia ai a koe ko e lagi, mo mutolu kua nonofo ai. Oi fakaalofa kia mutolu kua nonofo ke he fonua mo e tahi, ha kua hifo kia mutolu e tiapolo kua ita lahi, ha kua iloa e ia kua tote hana vaha.”​—Fakakiteaga 12:1-12.

19. Ko e ha ne fakaaue ai e tau Kerisiano ke momoui he magaaho nei?

¹⁹ Ko e tau tutuaga kelea lahi he lalolagi tali mai he tau 1914 ko e tau fakamoliaga ke he fakakiteaga a Ioane kua tupu moli mo e ko e fakaotiaga he tau tagata oti ne nakai talia ke he pule he Atua kua hagahaga kelea lahi he tata mai. (Luka 21:10, 11, 25-32) Ko e fiafia lahi ha ke moui he magaaho fulufuluola nei, ka fakatu he Atua Malolo Lahi atu ko Iehova e matakupu fetoko lahi ke he hana pule katoatoa ke he lalolagi oti! To liu fakatu e lalolagi ke he parataiso fulufuluola, mo e lagaki hake e tau tagata tututonu ne hao mai ke he mitaki katoatoa. To liu tutu mai foki e tau tagata ne mamate mo e tuku age e magaaho ke hiki ai ke lata mo e moui tukulagi.​—Fakakiteaga 20:1-3, 12, 13; 21:3-5.

Ko e Manako Fou ma e Hikiaga

20. (a) He lalolagi, ko hai ne kitia moli ko e tau lagomatai moli a Iehova to hoko e tau 1914? (e) Ko e heigoa e tau hikiaga ne talia he tau Kerisiano fakauku ne fakamoli ke taute?

²⁰ Ko e 38 e tau tau ato hoko ke he 1914, ko e tau Tagata Fakaako Tohi Tapu, ne higoa he magahala ia ko e tau Fakamoli a Iehova, kua hagaao atu ke he aho ia ko e tau ka fakaoti ai e Vaha he tau Motu Kehe.c Ko e maali ha ia he fakamoliaga ia, ko lautolu ni ko e tau lagomatai moli a Iehova! Ka e taha e mena, tuga agaia ni e tau lagomatai he Atua he senetenari fakamua, fai amaamanakiaga hepe foki ni a lautolu. Tuga a nei, ne amaamanaki a lautolu ko e numela katoa he tau Kerisiano ne fakauku ka o hake ke he lagi he mahina Oketopa 1914. Manatu foki a lautolu ko e tau ne kamata he tau 1914 ko e hagaao tonu ke he fakaotiaga he lalolagi a Satani.

21. Ko e heigoa e akonakiaga ne moua he tau Kerisiano moli he vaha he Tauaga I he Lalolagi?

²¹ Ka e hoko ai he taha magaaho ne iloa moli ai he tau Kerisiano fakauku kua lahi mahaki e gahua ha lautolu ke taute he lalolagi. Ha ko e ha lautolu a fakamakamaka tumau ke he gahua fakamoli ke he tau tagata he vaha he Tauaga I he Lalolagi, ne moua e lautolu e favale kelea lahi mai he tau pule malolo fakapolitika, ha ko e fakaohooho he tau vahega fekafekau lotu ha Kerisitenitome. (Salamo 2:1-6) Ko e gahua he tau Kerisiano moli ne feleveia ai mo e pa kelea he mahina a Iuni 21, 1918, he magaaho ne fakafili ai e tau takitaki he Watch Tower Society he Tau Fahi Kau Fakalataha ke 20 e tau tau ke he fale puipui ha ko e tau hokotaki pikopiko.

22, 23. (a) Ko e heigoa ne taute he tau Kerisiano fakauku ne fakamoli he mole e tau 1919, mo e ko e heigoa e ua e tali? (e) Ko e heigoa e Ierusalema nakai fakatai ne nakai fakamoli he vaha nei?

²² Ne oti fakalutukia e Tauaga I he Lalolagi ia Novema 1918. Ti ko e mahina a Mati 25, 1919, ne fakatoka mai ai e tau takitaki he Watch Tower Society he fale puipui. Kua fakamea oti e tau hokotaki ki a lautolu he magaaho fakamui. Ko e magaaho mafola nakai amaamanaki ki ai, kua hafagi ma e tau Kerisiano fakauku ne tua, tatai mo e tau magaaho ne tuku age e lautolu a lautolu ke he tau tutaki fakamua a Iesu he mole atu e fakamaloloaga he agaga tapu ki a lautolu he tau 33 V.N.​—Gahua 2:17-21, 41.

²³ Tali mai he tau 1919, ne omaoma fakamakamaka e matakau Kerisiano fakauku tua ia ke he poaki ne lauia he tau kupu a Iesu he Mataio 24:14: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” Ti ko e fua, teitei fa e miliona he tau “mamoe kehe” a Keriso ne tukulele ha lautolu a tau momoui ke fekafekau ki a Iehova fakalataha mo lautolu ne toe kua fakauku. (Ioane 10:16) Ko e Kerisitenitome mo e fakaohooho he hana tau vahega fekafekau lotu ne matutaki ni ke tiaki e fekau he Kautu. Ko e hana kau mo e tau fakaholoaga fakapolitika mo e hana favale ke he tau Fakamoli a Iehova kua tatai mo e ekefakakelea ofomate he tau tagata Iutaia he senetenari fakamua ki a Iesu. Tuga ni he fakahoko e Iehova hana fakafiliaga ki Ierusalema, to taute, pihia ni e ia ki a Ierusalema nakai fakatai ne nakai fakamoli, ne fakahigoa ko Kerisitenitome. Mo e kua momoui agaia e atuhau ne logona e fekau ke he fakafiliaga a Iesu, ke kitia e moumouaga ne talahau mai tuai e ia, ti ko e atuhau nei tali mai he tau 1914, “nakai mole atu” ti hoko mai e “matematekelea lahi.”​—Mataio 24:21, 22, 34, NW.

24. Ke hao atu ke he lalolagi fou he Atua, ko e heigoa ha tautolu kua lata ke taute?

²⁴ Ko e heigoa ha tautolu ka taute ke hao mai he matematekelea lahi mo e momoui ke he lalolagi fou he Atua? Kaeke ke fai amaamanakiaga hepe ne ha ha ia taha ha tautolu, kua lata ke puipui mai neke fia momohe he ha tautolu a tau gahua Kerisiano. (Hapakuka 2:3; 1 Tesalonia 5:1-6) Ko lautolu ne manatu e tau mena mai he 1914 hane tokogahoa fakahaga. Ko e mena, kia mataala a tautolu; nakai fai magaaho fakamole noa. (Mataio 24:42) Ko lautolu oti ne manako ke hao mai he fakaotiaga he lalolagi kelea a Satani, kua lata ke gahua mogo­nei ke he puhala ke fakakite e taliaaga ke he kupu: “Ko e Iki na e, ko e Atua ha i ai e malolo oti kana, kua fakaaue atu a mautolu kia koe, . . . ha kua toto e koe hau a malolo lahi, kua eke foki a koe mo patuiki.”​—Fakakiteaga 11:17.

[Tau Matahui Tala]

Tali Fefe e Koe?

◻ Ko e heigoa ne hukui he Ierusalema fakamua, ka e fakagalo fefe e ia hana a tuaga lilifu?

◻ I ne fe ne kamata mo e fakaoti e Vaha he tau Motu Kehe, mo e ko e heigoa e fua ne talahau mai tuai?

◻ Ko e heigoa ne talahau tuai ke he moumouaga ha Ierusalema ne nakai fakamoli?

◻ Iloa fefe e tautolu kua tata tuai e matematekelea lahi, mo e ko e heigoa ha tautolu kua lata ke taute ke hao mai ai?

[Fakatino he lau 10]

Ne galo e Ierusalema mo e hana faituga, ha laua a tutuaga lilifu, ka e matutaki atu e Atua ke fakamonuina hana Tama, ko e Mesia, ne pihia foki he vagahau fakahako mai he lagi ki a ia