“Liogi e Taha ma e Taha”

“KO E fanogonogo liogi” a Iehova. (Salamo 65:2) Ne logona tumau e ia e tau liogi ha lautolu ne fakamoli mo e loto katoa ki a ia, mo e maeke ia tautolu ke iloa moli ko e fanogonogo a ia ki a lautolu ka liogi e taha ma e taha.

Ka ko e ha kua liogi e taha ma e taha? Hagaao ke he heigoa kua lata e tau liogi pihia ke tuku atu? Mo e ko e heigoa e tau mahani atua kua holo atu e mitaki ka liogi a tautolu, ke he taha ma e taha?

Ko e ha, ke Liogi e Taha ma e Taha?

Kua fakamalolo mai e Tohiaga Tapu ke he tau tagata ha Iehova ke liogi e taha ma e taha. Ko e tau liogi ma e falu kua ha ha i ai he tau ole fakamakutu he aposetolo ko Paulo ke he Atua. (Kolose 1:3; 2 Tesalonia 1:11) Ke lafi ki ai, ko e tutaki ko Iakopo ne tohia: “Liogi e taha ma e taha.”​—Iakopo 5:16, NW.

Ko e tau liogi ma e falu he tau fekafekau he Atua kua maeke ke gahuahua lahi. Kua fakakite e mena nei he Iakopo 5:13-18 (NW), ne ha ha i ai e omoiaga ne ole atu ke he Kerisiano ne gagao fakaagaga ke fakaata e tau momotua he fakapotopotoaga ke “liogi ki luga ia ia, kua fakatakai aki e lolo a ia ke he higoa ha Iehova.” Ka logona ha lautolu a liogi, to fakamalolo ai e tagata ne momoko e loto mo e iloa tonu e ia ko e to talia foki ni he Atua hana tau liogi. (Salamo 23:5; 34:18) Kehe mai he liogi mo e tagata, kua lali foki e tau momotua ke liuaki mai hana malolo fakaagaga, he talahau e tau manamanatu mai he Tohiaga Tapu, ne tuga e lolo fakamafana.

Ne lafi atu a Iakopo: “Ko e liogi he tagata tua ka taute a ia ne nakai mitaki ke malolo, mo e to lagaki hake e Iehova a ia.” E, ko e tagata ne gagao fakaagaga kua liga lahi ke maeke ai ke lagomatai he “liogi he tagata tua” ko e tau momotua a ia. Ke lafi ki ai, ko e Atua ka “lagaki hake a ia” ke he malolo fakaagaga kaeke kua manako a ia ke lagomatai atu he tau kupu he Tohiaga Tapu. Ka ko e heigoa kaeke ko e tupu mai e gagao fakaagaga he agahala kelea lahi? Kua pehe, kaeke kua tokihala e tagata ia, to fakamagalo e Iehova a ia.

“Ti ka pihia,” he talahau e Iakopo, “kia talahau ha mutolu a tau agahala e taha ki a taha, mo e liogi e taha ma e taha, ke maeke ai a koe ke malolo. Ko e ole fakamakamaka he tagata tututonu, ka gahua ai, kua lahi mahaki e malolo. Ko Elia . . . ne liogi ki ai ke nakai to e uha; mo e kua nakai to e uha ki luga he fonua ke tolu e tau tau mo e ono e tau mahina. Mo e ne liu a ia ke liogi foki, mo e foaki mai he lagi e uha mo e tupu mai he fonua hana tau fua.” (1 Patuiki 17:1-7; 18:1, 42-45) Kua ha ha i ai e malolo, i loto he liogi he tagata tututonu ne kua fakatatai mo e finagalo he Atua.​—1 Ioane 5:14, 15.

Liogi Hagaao ke he Heigoa?

Kua maeke ke taha mai he ha mena, ke tutala ki ai a tautolu ka liogi ma e taha he faoa tali tonu. Ke fakatai ki ai, ne ole atu a Paulo ke he falu ke liogi, ke maeke ia ia ke moua e iloilo ke vagahau ke he tala mitaki. (Efeso 6:17-20) Ti ko e heigoa kaeke kua iloa e tautolu e taha tagata ne fae hoko ki ai e kamatamata? Kua maeke ia tautolu ke liogi ‘ke nakai taute e ia ha mena hehe,’ mo e kia nakai tiaki he Atua a ia ke he kamatamata ka e laveaki mai a ia, ia ia ne kelea, ko Satani ko e Tiapolo. (2 Korinito 13:7; Mataio 6:13) Mo e kaeke kua gagao e tino he taha tagata, kua maeke ia tautolu ke ole ki a Iehova ke foaki age ki a ia e loto malolo kua lata ke fakauka ke he hana gagao.​—Salamo 41:1-3.

Kua tonu tumau ke liogi ma e faoa ne tapuaki fakalataha ki a Iehova, ne moua e tau favale. Ko Paulo mo e hana tau faoa ne feoaki ne moua ai e matematekelea ha ko e favale kelea lahi, mo e talaage a ia ke he tau Kerisiano Korinito: “Ko mutolu foki kua felagomataiaki mai ke he liogi ma mautolu, kia fakaaue atu e tokologa ha ko e fakaalofa noa kua hoko mai kia mautolu ha ko e liogi he tau tagata tokologa.” (2 Korinito 1:8-11; 11:23-27) Pihia foki kaeke kua tuku a tautolu ke he tau fale pouli, maeke ia tautolu ke liogi ma e falu he tau matakainaga ne moua e favale, kia manatu tumau ko e logona e Iehova e tau “liogi he tau tagata tututonu.”​—Fakatai 15:29.

Kua mua atu e lata ha tautolu ke liogi ma e ha tautolu a tau matakainaga tane ne hahamo e kavega lahi mahaki i loto he Fakatokatokaaga ha Iehova. Kua fakalataha ai foki ki a lautolu ne takitaki e fakatokatokaaga mo e taute e tau mena kai fakaagaga ne tufatufa mai he “tupa fakamoli mo e loto matala.” (Mataio 24:45-47, NW) Ke tuga a nei, ko lautolu he Kau Fakatufono he tau Fakamoli ha Iehova, kua lata tonu ma e ha tautolu a tau liogi, mo e maeke ia tautolu ke liogi ke foaki atu he Atua ki a lautolu “e Agaga ha i ai e iloilo.”​—Efeso 1:16, 17.

Ne Holo Atu e Mitaki he tau Mahani Kerisiano

Ka liogi ma e faoa ne tali tonu, kua fakakite e tautolu a tautolu, ko e manamanatu lahi ki ai, nakai loto fulukovi, mo e kua fakaalofa. Ka nakai loto fulukovi, ka manatu lahi atu he fakaalofa, ma e ha tautolu a tau matakainaga tane mo e tau fifine, kua fakatatai mo e mata kupu ha Paulo, ko e fakaalofa ka “nakai kumi e ia hana tau mena.” (1 Korinito 13:4, 5) Ke liogi ma e falu ko e taha puhala ke “aua neke takitokotaha mo e manamanatu ke he tau mena hana, ka e takitokotaha mo e manamanatu ke he tau mena he falu.” (Filipi 2:4) Ka taute e tautolu ke manamanatu ke he tau mena kua lata fakaagaga ke he falu ka liogi, kua kitia foki ni e tautolu a tautolu kua fakatata lahi atu ki a lautolu he fakaalofa fakamatakainaga, ne fakamailoga aki e tau tutaki ha Iesu.​—Ioane 13:34, 35.

Ne tupu e fuaaga mitaki he mahani manamanatu fakaalofa, ki a lautolu ne hagaao e tau liogi ha tautolu ki ai. (1 Peteru 3:8) Kua fakaalofa a tautolu ki a lautolu, kua fua fakalataha ha lautolu a tau fiafia mo e tau magaaho momoko. I loto he tino he tagata, kaeke kua pakia e taha lima, kua leveki he taha a ia mo e lali ke fakatukutuku hifo e mamahi ne tupu mai ha ko e matamotu. (Fakatatai mo e 1 Korinito 12:12, 26.) Kua eke ke tatai foki ni, ka liogi ma e tau matakainaga tane mo e tau fifine ne matematekelea, kua tupu ai ha tautolu a loto fakaalofa ma lautolu mo e lagomatai a tautolu ke toka loto a lautolu. Ko e galoaga ha tautolu kaeke kua tiaki e tautolu e tau faoa Kerisiano fakamoli, i loto he tau liogi ha tautolu, ha ko e nakai tiaki he Atua mo Keriso a lautolu.​—1 Peteru 5:6, 7.

Kehekehe e falu fuafuaaga mitaki he mahani fakaatua ne holo atu kaeke ka liogi a tautolu ma e falu. Kua eke ai a tautolu ke maama lahi, mo e loto fakauka ki a lautolu. Kaeke ke tupu e loto konakona, ne huhuo kehe ai, ti kua ata e taha mena ma e tau manamanatu kua ati hake, kua taute a tautolu ke loto fakaalofa mo e fiafia lahi e loto. Ka liogi ma e falu, kua eke foki ke omoi e mafola mo e kau fakalataha he vaha loto he tau tagata ha Iehova.​—2 Korinito 9:13, 14.

Kia Liogi Tumau e Taha ma e Taha

Ke tuga a Paulo, maeke a tautolu ke ole atu ke he falu ke liogi ma tautolu. Kehe mai he liogi mo tautolu, kua maeke ai ke liogi takitokotaha, e tau kapitiga ha tautolu ke he Atua ma tautolu, talahau e higoa ha tautolu, talahau foki ha tautolu a tau mena vihi, mo e ole atu ke lagomatai mai e ia a tautolu. To hoko mai foki e lagomatai, ha “kua fioia he Iki ke laveaki e tau tagata mahani Atua mai he kamatamata.”​—2 Peteru 2:9.

Ne fai kamatamata foki e tau Fakamoli ha Iehova ne talahau a tautolu i loto he ha lautolu a tau liogi​—liga kua lahi mai e matematekelea ke he ha tautolu. Ka e, kua uta e lautolu ha tautolu a tau manako ki mua he Patuiki Tukulagi Tukumuitea, liga kua taute pihia foki mo e tau hihina mata ma tautolu. (Fakatatai mo e 2 Korinito 2:4; 2 Timoteo 1:3, 4.) Fefe ha tautolu a fakaaue kua lata mo e mena nei! He loto fakaaue, mo e falu kakano kua fita e fakatutala ki ai, kua lata, kia liogi a tautolu, ke he taha ma e taha.