“Kua Fakafua a Mutolu ke he Totogi”

“Kua fakafua a mutolu ke he totogi; ko e mena ia kia fakaheke atu ai a mutolu ke he Atua ke he tau tino ha mutolu.”​—1 KORINITO 6:20.

1, 2. (a) Ko e heigoa ne hafagi aki e “puhala ia mai he mate”? (e) Ko e heigoa e mena kua lata ke taute ke moli ke he matafakatufono e poa ha Keriso, tuga ne fakakiteaga mai he heigoa?

“KO E ha tautolu a Atua ko e Atua he fakamouiaga ia,” he talahau he salamo, “ha ia Iehova e Iki ke fakahao mai he mate.” (Salamo 68:20) Ko e poa a Iesu Keriso ne hafagi aki e puhala ia. Ka e, ma e poa ia ke moli hagaao ke he matafakatufono kua lata ia Keriso ke tu atu a ia ni ki mua he Atua.

² Kua fakaata mai e mena nei he Aho he Palepaleaga he magaaho ka hu atu e ekepoa ne mua ke he mena Tapu Ue atu. (Levitika 16:12-15) Ne tohi ai he aposetolo ko Paulo, “kua haele mai a Keriso, ko e ekepoa ne mua . . . , Lagataha ne hu atu a ia ke he mena tapu, nakai mo e tau toto he tau koti, po ke tau povi, ka ko e hana toto ni, kua moua e ia e fakamouiaga tukulagi ma tautolu. Ha kua nakai haele atu a Keriso ke he tau mena tapu kua eke he tau lima, ko e fakatai haia ke he tau mena moli, ka ko e lagi ni, kua fakakiteaga ainei a ia ki mua he Atua ma tautolu.”​—Heperu 9:11, 12, 24.

Ko e Malolo he Toto

3. (a) Ne onoono fefe e tau tagata ne tapuaki ki a Iehova ke he toto, mo e ko e ha? (e) Ko e heigoa ne fakakiteaga kua ha ha he toto e malolo moli ke he matafakatufono ke palepale aki e tau hala?

³ Ko e heigoa e gahua ne taute he toto ha Keriso ke he fakamouiaga ha tautolu? Tali mai he vaha ia Noa, kua onoono atu e tau tagata tapuaki fakamoli ko e toto ko e mena tapu. (Kenese 9:4-6) Kua taute he toto e vala gahua aoga lahi he gahuahuaaga he moui, ha kua pehe e Tohi Tapu “ko e solu [po ke moui] he tino kua ha ha i loto he toto.” (Levitika 17:11, NW) Ko e mena ia ne poaki ai e Fakatufono ne age ki a Mose kaeke ke taute poa e manu, kia liligi hana toto ki mua a Iehova. Ko e falu a magaaho kua fa mahani foki e toto ke tuku ki luga he tau hoe he fatapoa. Kua maama mitaki ai, ko e malolo he palepaleaki he poa kua haia ni he toto. (Levitika 8:15; 9:9) “Toe tote foki e tau mena oti kana kua fakamea ai ke he toto kua lata mo e fakatufono; kaeke foki kua nakai fakamaligi mai e toto, ti nakai fai fakamagaloaga.”​—Heperu 9:22.

4. (a) Ko e heigoa e finagalo ne lauia he puipui he Atua e fakaaogaaga he toto? (e) Ko e heigoa ne ofoofogia hagaao he he puhala ne mate ai a Iesu?

⁴ Kua nakai ofo ai, ka, i lalo hifo he mata-Fakatufono, ka fakaaoga fakahehe e toto, ko e fakahala ni ko e mate! (Levitika 17:10) Na iloa oti e tautolu kaeke kua fakagahoa e taha mena aoga, po ke puipui kaka hana fakaaogaaga, to tupu lahi hana uho. Kua puipui malu e Iehova hana fakaaogaaga kua taute moli ai ke nakai eke e toto mo mena aoga tote, ka e eke mo mena uho, mo e aoga lahi. (Gahua 15:29; Heperu 10:29) Kua tatai e mena nei mo e kakano he fakatokoluga ne taute he toto a Iesu. Kua felauaki tonu, ha kua mate a ia ke he puhala ke fakamaligi hana toto. Ko e mena ia, kua kitia moli ai, nakai ko e poa ni hokoia e Keriso hana tino tagata ka e liligi mai foki hana solu, kua poa hana ni a moui, ko e tagata mitaki katoatoa! (Isaia 53:12) Ne nakai tiaki e Keriso e tonu ke he matafakatufono he moui ia ha kua nakai pehe ko e nakai mitaki katoatoa, ti ko e hana toto ne fakamaligi ko e mena uho lahi ke tuku ki mua he Atua ma e palepaleaga he tau hala he tagata.

5. (a) Ko e heigoa ne ta hake e Iesu ke he lagi, mo e ko e ha? (e) Fakamoli fefe kua talia he Atua e poa ha Keriso?

⁵ Kua nakai maeke a Keriso ke tahake hana toto ke he lagi. (1 Korinito 15:50) Ka e, tahake e ia e mena ne fakatai ki ai e toto: ko e mena uho ke he matafakatufono ko e poa he hana moui tagata mitaki katoatoa. Ki mua he Atua, kua maeke a ia ke foaki atu e moui ko e lukutoto ke hukui aki e tau tagata hala. Ko e taliaaga he Atua ke he poa ia, kua kitia moli ai he Penetekoso 33 V.N., he magaaho ne hifo ai e agaga tapu ke he tau tutaki toko 120 i Ierusalema. (Gahua 2:1-4) Ko Keriso tuga ke pehe, ne moua ti ko e hana ni e tau tagata ha ko e fakafuaaga. (Kalatia 3:13; 4:5; 2 Peteru 2:1) Ha ko e mena ia, ko e aoga he lukutoto kua maeke ke tafe mai ke he tagata.

Ko e tau Tagata Fakamua ne Moua e Lagomataiaga he Lukutoto

6. Ko e heigoa e tau fakatokatokaaga he Atua ne taute ke fakaaoga aki e aoga he lukutoto ha Keriso?

⁶ Kua nakai pehe e kakano he mena nei, to age fakamafiti e mitaki katoatoa ke he tagata, anemai kua nakai fakakaumahala e mahani agahala he tagata, to nakai maeke ai ke mitaki katoatoa e tino. (Roma 7:18-24) To taute fefe mo e a fe ka fakakaumahala ai e agahala? Ko e fakatokatokaaga fakamua he Atua ma e 144,000 ka o ke he lagi ‘tau ekepoa ke he Atua ke pule tuga e tau patuiki ki luga he lalolagi’ fakalataha mo Keriso. (Fakakiteaga 5:9, 10; 7:4; 14:1-3) Mai ia lautolu na, to fakaaoga fakahaga ai e aoga he lukutoto ke he tagata ke he vaha he taha e afe he tau tau.​—1 Korinito 15:24-26; Fakakiteaga 21:3, 4.

7. (a) Ko e heigoa e maveheaga fou, ko hai e tau matakau ne ha ha i ai, mo e ko e heigoa e kakano ne taute ai e ia? (e) Ko e ha ne hoko ai e mate ke fakaata aki e maveheaga fou, mo e ko e heigoa e gahua ne hukui he toto ha Keriso?

⁷ Ke takitaki atu ke hoko ke he mena ia, ko e 144,000 he tau patuiki ekepoa “ne fakafua mai he tau tagata.” (Fakakiteaga 14:4) Ko e fakaotiaga he mena nei kua puhala mai he “maveheaga fou.” Ko e maveheaga nei ko e fakamauaga he vahaloto he Atua ko Iehova mo Isaraela fakaagaga he Atua, ke eke hana tau tagata mo tau patuiki mo e tau ekepoa. (Ieremia 31:31-34; Kalatia 6:16; Heperu 8:6-13; 1 Peteru 2:9) Ka e taha e mena, ke maeke fefe ke taute e maveheaga he Atua mo e tagata nakai mitaki katoatoa? Kua fakamaama e Paulo: “Ha ko e mena kaeke kua eke e maveheaga [he vahaloto he Atua mo e tagata nakai mitaki katoatoa], nakai aoga e maveheaga ia ato mate a ia ne eke. Ha ko e mena kua mau e maveheaga ka mamate a lautolu ne eke ka kua nakai aoga ka moui a ia hana e maveheaga.”​—Heperu 9:16, 17.

8, 9. Matutaki fefe e lukutoto mo e maveheaga fou?

⁸ Ko e mena ia, ko e poa lukutoto ko e fakaveaga he maveheaga fou, ha Iesu ko e Hulalo. Ne tohi e Paulo: “Ha ko e mena tokotaha ni e Atua, ti tokotaha foki e hulalo ke he Atua mo e tau tagata, ko e tagata ko Keriso Iesu haia; Ko ia ne foaki noa mai e ia a ia ke eke mo lukutoto ma e tau tagata oti kana, ko e fakakiteaga ke he tau vaha kua lata ai.” (1 Timoteo 2:5, 6) Ko e tau kupu ia kua taute pauaki ke lata mo e 144,000, ko lautolu haia ne taute ki ai e maveheaga fou.

⁹ Ko e maveheaga ne taute he Atua mo Isaraela he tino, kua nakai fai moli ke he matafakatufono ato fakamaligi e toto manu mo poa. (Heperu 9:18-21) Kua pihia ni, ka fakagahua e maveheaga fou, ko Keriso ni ka fakamaligi e “toto he maveheaga.” (Mataio 26:28; Luka 22:20) Ha kua gahua ua e Keriso e Ekepoa Mua ue atu mo e “hulalo he maveheaga fou,” kua fakaaoga he Atua e aoga he toto a Keriso ki a lautolu ne fakafua mai ke he maveheaga fou, mo e tuku atu moli ke he matafakatufono e tututonu he tagata ki a lautolu. (Heperu 9:15; Roma 3:24; 8:1, 2) Ti kua maeke ai e Atua ke uta a lautolu ke he maveheaga fou ke eke mo tau patuiki ekepoa he lagi! Ke tuga ni e Hulalo mo e Ekepoa ne Mua ha lautolu, to lagomatai e Iesu a lautolu ke tumau ke he tuaga mea ki mua he Atua.​—Heperu 2:16; 1 Ioane 2:1, 2.

Fakapotopoto he tau Mena he Lalolagi

10, 11. (a) Molea ki mua fefe e lukutoto mai he tau Kerisiano fakauku? (e) Ko hai e “moto tagata tokologa” mo e ko e heigoa ha lautolu a tuaga mo e Atua?

¹⁰ Ko lautolu ni kia ko e tau Kerisiano fakauku ka moua e fakaataaga he lukutoto, ko e fakamagaloaga he tau agahala ha lautolu? Nakai, kua fakafeilo he Atua ki a ia e tau mena oti ha kua taute e ia e mafola mai he toto ne fakamaligi ke he akau fakatautau tuga he fakakiteaga he Kolose 1:14, 20. Kua putoia ai e tau mena he lagi (144,000) katoa mo e tau mena he lalolagi. Ko lautolu fakamui ko lautolu haia he laini ma e moui fakalalolagi, ko e tau tagata ka fiafia ke he moui mitaki katoatoa he Parataiso he lalolagi. Mahomo atu he kamata mai he tau 1935 ko e tau haia ne malolo lahi ai e gahua fakapotopoto ia lautolu ia. Kua fakamaama mai he Fakakiteaga 7:9-17 a lautolu ko e “moto tagata tokologa” ko lautolu haia ne moua e fakamouiaga he Atua mo e Punua mamoe. Ka e lata agaia ni ke momoui mai “he matematekelea lahi” ke ‘takitaki ke he vaipuna he moui,’ ha kua fakakiteaga mai he Fakakiteaga 20:5 ko lautolu ia ka momoui moli, mo e moua e moui mitaki katoatoa, ka oti e Afe Tau ka Pule ai a Keriso. Ko lautolu ka kautu he kamatamata fakahiku he tuaga mitaki katoatoa he tagata, to talahaua tututonu a lautolu ma e moui tukulagi he lalolagi.​—Fakakiteaga 20:7, 8.

¹¹ Pete ni kua fakatoka e puhala nei, ka kua fita e moto tagata tokologa he “unu foki ha lautolu a tau tapulu, mo e fakahina ha lautolu a tau tapulu ke he toto he Punua mamoe.” (Fakakiteaga 7:14) Kua nakai taute e Keriso e feua he Hulalo he maveheaga fou ma lautolu, ka e aoga agaia ni ki a lautolu e maveheaga nei ha ko e gahua he Kautu he Atua. Ka e pete ni, gahua agaia a Keriso ma lautolu, ko e Ekepoa ne Mua ue atu, ha ko ia kua maeke ai ia Iehova ke fakaaoga e lukutoto ke he kaupaaga he ha lautolu a talahaua tututonu ko e tau kapitiga he Atua. (Fakatatai Iakopo 2:23.) He Vaha he Afe Tau, to uta fakahaga a lautolu “ke toka noa ai e tau mena ne eke mai he tupaaga ke he mena popo vave kia hoko atu ai ke he tokanoaaga ha ha he monuina he fanau he Atua.”​—Roma 8:21.

12. Ko e heigoa e fakaveaga ne taute he Atua mo e tau tane tua he tau vaha fakamua ato tau Kerisiano?

¹² Ka e hagaao ke he tutuaga ha lautolu mo e Atua, kua tuga kua kehe fakatote a lautolu he moto tagata tokologa mo e tau tagata tapuaki he vaha fakamua ato hoko e vaha Kerisiano. Ko e mena ia, ne taute ai he Atua mo lautolu fakamui e fakatokaaga he lukutoto ma e vaha i mua. (Roma 3:25, 26) Ne fiafia a lautolu ke he fakamagaloaga he tau hala ha lautolu ha kua taute ke he puhala ni kua fakatoka. (Salamo 32:1, 2) Ha kua nakai fakamea katoa a lautolu mai he “tau hala ke he loto manamanatu,” kua eke e tau poa manu mo “fakamanatu ai e tau hala.”​—Heperu 10:1-3.

13. Ko e heigoa e tau matutakiaga tutu mitaki ne moua e tautolu mai he tau fekafekau Kerisiano fakamua he Atua ato vaha Kerisiano?

¹³ Kua kehe e mena ia mo e tau Kerisiano moli he vaha nei. Ko e ha lautolu a tapuakiaga kua fakave ke he lukutoto kua oti he totogi. Ha kua puhala mai he Ekepoa ne Mua ha tautolu, kua “fakatata atu ai a tautolu mo e fakamalolo ke he nofoaiki he fakaalofa noa.” (Heperu 4:14-16) Ha kua fakafeilo ke he Atua, kua nakai pehe ko e falu a mena fakatu ke amaamanaki ki ai, ka ko e mena kua moli tuai he magaaho nei! (2 Korinito 5:20) He magaaho kua hala a lautolu, kua maeke ia lautolu ke moua e fakamagaloaga moli. (Efeso 1:7) Kua fiafia a lautolu ke he manamanatuaga mea moli. (Heperu 9:9; 10:22; 1 Peteru 3:21) Ko e tau fakamonuina nei ko e kamata fakamua he fakahekeaga ataina he fanau he Atua ka fakafiafiaaki e tau fekafekau a Iehova he vaha i mua!

Ko e Hokulo he Pulotu mo e Fakaalofa he Atua

14, 15. Fakamaama fefe he lukutoto e hokulo he pulotu a Iehova, ti pihia ni ke he hana tututonu mo e fakaalofa?

¹⁴ Ko e mitaki ha a ia he mena fakaalofa ia mai ia Iehova ko e lukutoto! Kua mukamuka ke maama mitaki, ka mole ia ti hokulo lahi ke hoko atu ke ofogia e tau loto iloilo lahi ue atu. Ko e ha tautolu a liu fakamanatu he tau gahua he lukutoto ko e alati noa ni he kili i luga. Ka e taha e mena, kua ofo fakalataha a tautolu mo e aposetolo ko Paulo: “Oi, oi! ko e hokulo he tanakiaga he iloilo mo e fioiaaga he Atua! Kua nakai maeke ni ia taha ke kumi hana tau fakafiliaga; kua nakai maeke foki ke iloa hana tau haeleaga.” (Roma 11:33) Kua fakakiteaga mai e pulotu ha Iehova he mena ia kua maeke ia ia ke taute ua e fakahaoaga he tagata mo e fakatokoluga hana pule katoatoa. Ko e kakano he lukutoto, “kua fakakiteaga mai e tututonu he Atua . . . ne tuku mai i mua he Atua [a Keriso] mo poa ke fakalotomafola ai ke he tua, ke he hana toto.”​—Roma 3:21-26.

¹⁵ Kua nakai fakaai ke fai hokotaki hehe ke tukuaki e Atua ma e fakamagaloaga he tau hala ne taute he tau tagata tapuaki fakamua he tau vaha Kerisiano. Pihia atu foki, kua nakai fakaai ke fai hokotaki hehe ke tukuaki a Iehova he fakailoa kua tututonu e tau fakauku ke eke mo tau tama tane hana poke moto tagata tokologa ko e hana tau kapitiga. (Roma 8:33) Ko e totogi lahi ki a ia, ko e Atua kua mitaki katoatoa ke he matafakatufono, po ke hako tika hana tau tauteaga mena, mo e fakahako katoa e ia e pikopiko ha Satani ne talahau ko Iehova ko e pule kua nakai tonu e fifiliaga! Ko e fakaalofa fakamokoi he Atua ma e tau mena momoui kua fakakiteaga ai kua nakai fakaai ke fai huhu atu ki ai.​—Roma 5:8-11.

16. (a) Ko e heigoa e puhala ne taute he lukutoto ke fakahakoaki e matakupu ke he tau fekafekau mahani hakohako he Atua? (e) Ta mai fefe he lukutoto a fakaveaga ma e tua ke he lalolagi tututonu fou ka hoko mai?

¹⁶ Ko e puhala ne foaki mai aki e lukutoto kua fakahakoaki foki e tau totoko ne lauia ai e mahani hakohako he tau fekafekau he Atua. Ko e omaoma hokoia ha Iesu ne fakaoti aki e mena ia. (Fakatai 27:11; Roma 5:18, 19) Ka e lafi atu ke he mena ia ko e puhala moui he tau Kerisiano 144,000 ko lautolu pete ni ne totoko a Satani, kua tumau ke he tua ato hoko ke he mate! (Fakakiteaga 2:10) Kua taute he lukutoto ke maeke ia lautolu nei ke moua e taui nakai maeke ke​—nakai fai fakaotiaga e moui! (1 Korinito 15:53; Heperu 7:16) Kua taute he mena nei ke fakafiakata e talahauaga ha Satani kua nakai maeke ke falanaki ke he tau fekafekau he Atua! Kua tuku mai foki he lukutoto ki a tautolu e fakaveaga mao ke tua ke he tau maveheaga he Atua. Ne kitia foki e tautolu e fakatino he fakamouiaga ne “fakamau ke he matafakatufono” ha ko e poa lukutoto. (Heperu 8:6, NW) Ko e mena ia ne fakamoli aki e tututonu he lalolagi fou!​—Heperu 6:16-19.

Aua Neke Fakato Noa Hana Finagalo

17. (a) Fakakite fefe he falu kua fakato noa e lautolu e finagalo he lukutoto? (e) Ko e heigoa ne fakalagalaga aki a tautolu ke tumau ke he mahani mea?

¹⁷ Ke fai aoga mai he lukutoto, kua lata ni ke moua e lotomatala, fakagahuahua tua, mo e nonofo mo e tuaga he Tohi Tapu. (Ioane 3:16; 17:3) Fa mahani ke tokofiha ni a lautolu ne talia ke taute pihia. (Mataio 7:13, 14) Pihia foki ke he tau Kerisiano moli, ko e falu kua “talia teao e . . . fakaalofa noa he Atua.” (2 Korinito 6:1) Ka fakatai ki ai ke he tau tau kua mole, ko e tau afe ne fakaoti e fakalataha ha ko e tau mahani hehe feuaki. Ko e fakama ha a ia, ha kua kitia e gahua ne taute e Iehova mo Keriso ma tautolu! Nakai kia ko e fakaaue ke he lukutoto ne omoi aki e tagata ke ua “nimo foki ia ia kua fakamea a ia he hana tau hala tuai”? (2 Peteru 1:9) Kua lata tonu e fakamanatu mai ha Paulo ke he tau Kerisiano: “Ha ko e mena kua fakafua a mutolu ke he totogi; ko e mena ia kia fakaheke atu a mutolu ke he Atua ke he tau tino ha mutolu.” (1 Korinito 6:20) Manatu, kua tamai he mena nei e fakagahuahuaaga malolo ke tumau ke he mahani mea!​—1 Peteru 1:14-19.

18. To maeke fefe he Kerisiano ne to ke he hala kua kelea lahi moli ke aoga agaia e lukutoto ki a ia?

¹⁸ Ka e kua kaeke ko e tagata kua fita he to ke he hala kua lahi moli? Kua lata a ia ke fakaaoga e fakamagaloaga ne taute he lukutoto, ke moua e tau lagomataiaga mai he tau leveki loto fakaalofa. (Iakopo 5:14, 15) Pihia foki kaeke kua lata ke malolo e akonakiaga, ko e Kerisiano ne tokihala kua nakai lata ke fakalolelole ka fakatonu pihia. (Heperu 12:5) Kua moua e tautolu e fakamoliaga faka-Tohi Tapu fulufuluola nei: “Kaeke ke fakakiteaga e tau hala ha tautolu, kua fakamoli a ia mo e mahani tututonu ke fakamagalo ai e tau hala [ha] tautolu, mo e fakamea a tautolu he tau mahani hepehepe oti kana.”​—1 Ioane 1:9.

19. Ko e heigoa e onoonoaga kua maeke ke taute he Kerisiano ha ko e hana mahani hehe ne taute fakamua to iloa e kupu moli?

¹⁹ Ko e tau Kerisiano he falu a magaaho na fa fakalolelole noa, kakano ha ko e tau mena hehe kua mole. “Fakamua to o mai ke he kupu moli,” he tohi he taha matakainaga tane ne loto lolelole, “ne pikitia a au mo e hoana haku ke he gagao motumotu he mouiaga. Ko e falu a magaaho ne logona e maua e nakai mea, tuga e nakai ‘lata’ mo e fakapotopotoaga mea a Iehova.” Kua pihia foki ni, he mole mai he taute mo tau Kerisiano, ko e falu ne helehele e fua mamahi mai he tau hepehepe kua mole. (Kalatia 6:7) Ka kua nakai fai kakano ke manatu kua nakai mea ki mua he fofoga ha Iehova kaeke ko e taha kua tokihala. Ko e “toto a Keriso” kua maeke “ke fakamea ha mutolu a tau loto manamanatu mai he tau gahua ke mamate ai.”​—Heperu 9:14.

20. To maeke fefe he tua ke he lukutoto ke fakamama e Kerisiano he manamanatuaga hala kua hakai lata?

²⁰ E, kua lagomatai he tua ke he lukutoto a tautolu ke fakamama e tau kavega ne nakai aoga he manamanatuaga agahala. Ne talahau he taha matakainaga fifine fuata: “Kua molea e 11 e tau a nei he fakamalolo ai au ke he mahani nakai mea ia ko e mulumo e mouiaga. Ne teitei toka e au e fakapotopotoaga he taha magaaho, ha kua manatu au nakai maeke ia Iehova ke talia e tagata teteki pihia ke fakakelea hana fakapotopotoaga.” Ka e manatu e tautolu, ko Iehova “kua mitaki, . . . ti fakamagalo e tau hala,” kaeke ke manamanatu fakamalolo a tautolu ke totoko e mahani nakai tututonu, mo e nakai kaumahala ki ai!​—Salamo 86:5.

21. To lata fefe e lukutoto ke lauia e onoonoaga ha lautolu ne fakaita a tautolu?

²¹ Kua fai puhala foki e lukutoto, ke he ha tautolu a fakafetuiaga mo e falu. Tuga a nei, fefe a koe kaeke ke fakaita he matakainaga Kerisiano hau a koe? To foaki noa nakai e koe e fakamagaloaga tuga ha Keriso? (Luka 17:3, 4) Ka e pehe nakai a koe, “hofihofi ha mutolu a fakaalofa, mo e fefakamagaloaki [e falu]; tuga e Atua ha ia Keriso ne fakamagalo e ia a mutolu”? (Efeso 4:32) Po ke eke ni a koe ke tukuloto e tau kelea po ke konakona e loto he fakavihia? Kua maeke moli he mena nei ke fakato noa e alito he lukutoto.​—Mataio 6:15.

22, 23. (a) Ko e heigoa e lauiaaga he lukutoto ke he ha tautolu a tau foliaga mo e puhala moui? (e) Ko e heigoa e fifiliaga kua lata ke taute he tau Kerisiano oti hagaao ke he lukutoto?

²² Ke fakaotiaki, ko e fakaaue ke he lukutoto kua ha ha i ai e lauiaaga hokulo ke he ha tautolu a tau foliaga mo e puhala moui. Ne pehe a Paulo: “Kua fakafua a mutolu ke he totogi, aua neke eke a mutolu mo tau tupa ke he tau tagata.” (1 Korinito 7:23) Ko e tau mena kua lata​—tau kaina, gahua, tau mena kai, tau mena tui—​ko e uho tonu agaia he hau a moui? Po kua kumikumi fakamua kia a koe ke he Kautu, ne tuku e tua ke he maveheaga he Atua ke foaki atu mau? (Mataio 6:25-33) Neke ko koe hane fakatupa ke he hau a pule gahua ka e kaumahala ke foaki fakalahi e tau magaaho ma e tau gahua pule he Atua? Manatu, ko Keriso “ne foaki mai e ia a ia ma tautolu . . . mo e fakamea ai e ia māna ke eke mo motu fifili kua fakamakutu ke he tau gahua mitaki.”​—Tito 2:14; 2 Korinito 5:15.

²³ “Kua fakaaue atu au ke he Atua, ha ko Iesu Keriso” ma e mena fakaalofa mua ue atu​—ko e lukutoto! (Roma 7:25) Aua neke fakato noa e alito he lukutoto ka e fakaata ke omoi fakamoli aki ha tautolu a tau momoui. Ke he tau manatu, tau kupu, mo e tau gahua, kia fakalilifu tumau e Atua, ko e tau manamanatuaga fakaaue ha kua fakafua mai a tautolu ke he totogi.

Tau Huhu Famanatu

◻ Ko e ha ne manatu ai kua fakatapu e toto, mo e foaki atu fefe e Keriso hana toto ki mua a Iehova i luga he lagi?

◻ Ko e heigoa e kotofaaga ne taute he toto ha Keriso ke fakamoliaki e maveheaga fou?

◻ Aoga fefe e lukutoto ki a lautolu ne fakauku mo e moto tagata tokologa?

◻ To fakakiteaga fefe e tautolu kua nakai fakato noa e finagalo he lukutoto?

[Fakatino he lau 14]

Ko e malolo he palepale he poa kua ha ha i ai he hana toto moui

[Fakatino he lau 15]

Ko e taha ne fakaaue ke he fakamagaloaga he Atua kua talia ke fakalaulahi atu e fakamagaloaga ke he falu