Tau Huhu mai he Tau Tagata Totou
◼ Ko e ha ne fakatu ai e Iesu e Fakamanatuaga mo e tau aposetolo ni hokoia, ka e nakai mo e falu he tau tutaki kua ha i ai e uiaga ke he maveheaga fou?
Kua tuga ne fakave e huhu nei i luga he manatu hehe ko e fakalataha a Iesu mo e hana tau aposetolo he afiafi ia ke fakatu e Kaiaga Afiafi he Iki mo e fakapotopotoaga Kerisiano ha lautolu ne fakauku ne kua fita i loto he maveheaga fou. Ka e, he Nisana 14, 33 V.N., ne nakai la taute ai e fakapotopotoaga Kerisiano, mo e tolo auloa a Iesu mo e hana tau aposetolo ma e kaiaga lagataha he tau he Paseka Iutaia.
E moli, ha ha i ai falu tutaki ha Iesu ne kehe mai he toko 12 ne iloa ko e tau aposetolo. He tau fakamua to hoko ke he mate hana, ne fakafano atu e ia 70 e tau tutaki he malaga fakamatala. He mole mai e liu tumai hana, “ti kitia ai a ia he tau matakainaga kua fakalataha ne tokolima e teau mo e tuma.” Mo e ha ha i ai ke liga “tokoteau mo e uafulu” e tau tutaki ne tolo auloa he aho Penetekoso. (1 Korinito 15:6; Gahua 1:15, 16, 23; Luka 10:1-24) Ka e kia lata a tautolu ke manamanatu atu ke he matakau ne fakalataha mo Iesu he magaaho ne fakatu e ia e fakafiafiaaga taute lagataha he tau ne kua iloa ko e Kaiaga Afiafi he Iki.
Kua foaki mai e Luka 22:7, 8 e magaaho, kua pehe mai: “Ati hoko mai ai e aho he tau areto nakai fakaea, kua lata ke keli ai e paseka. Kua fakafano atu e ia a Peteru mo Ioane, kua pehe atu, O a a mua ke taute e paseka ma tautolu, ke kai ai a tautolu.” Ti holo atu e fakamauaga ke pehe: “Ti tala age a mua ke he patu he fale, Kua poaki mai e akoako kia koe, Ko fe e poko ke api ai e tau fenoga ke kai ai e mautolu e paseka mo e haku a tau tutaki?” Ke he afiafi ia kua fakalataha a Iesu mo e toko 12 ma e fakafiafiaaga Iutaia. Ne talaage e ia ki a lautolu: “Ko e haku a manako, ti lahi ni haku manako ke kai fakamua e paseka nai mo mutolu, ka e nakala hoko ke he haku a matematekelea.”—Luka 22:11, 15.
Mai he hana kamataaga i Aikupito, ko e fakafiafiaga he magafaoa e Paseka. He magaaho ne fakatu ai e Paseka, ne talaage e Atua ki a Mose ko e taha e mamoe ka tamate ma e lotokaina takitaha. Kaeke kua tote lahi e magafaoa ke kai oti e mamoe katoa, ne maeke ai ke uiina e magafaoa he tuuta kaina ke kai fakalataha. Ti kua, lata lahi ai ni ma e Paseka he tau 33 V.N., kua tokologa mai he tau tutaki a Iesu kua mahani ke fakalataha mo e ha lautolu ni a tau magafaoa ma e kaiaga nei.
Ka e “lahi ni” e “manako” a Iesu ke taute auloa e Paseka fakahiku moli, mo e po fakahiku ato hoko hana mate, mo lautolu ne muitua mo e tata lahi ki a ia, ne o fenoga mo ia he lahi he vaha he hana fekafekauaga. He magaaho fakamui he kaiaga he Paseka, ne talaage e Iesu ki a lautolu e fakafiafiaaga fou kua lata ke taute he tau tagata ne muitua ki a ia he tau vaha i mua. Ko e uaina he fakafiafiaaga Kerisiano ia he vaha i mua kua eke mo fakatai aki e toto he “maveheaga fou” kua taute ai ke hukui aki e maveheaga he Matafakatufono.—Luka 22:20.
He afiafi ia Nisana 14, 33 V.N., ka e pete ni, ko e maveheaga fou kua nakai la gahuahua ia, ha ko e poa ke fakamoli e matafakatufono—ko Iesu—ne nakai la foaki atu. Ne gahuahua agaia e maveheaga he Matafakatufono. Ne nakai la pao fao ke he akau fakatautau. Ko e taha mena foki, nakai la kitia moli ato hoko mai e aho Penetekoso ko e maveheaga tuai mo e tau Isaraela moli kua fita he hukui aki ai e maveheaga fou mo e Isaraela fakaagaga.—Kalatia 6:16; Kolose 2:14.
Ha kua pihia, ko e tau aposetolo 11 kua fakamoli po ke taha mai he falu tutaki ne nakai ha ha i ai i loto he maveheaga fou he afiafi ia. Mo e nakai fakakite e Iesu e nakai fiafia ke he falu he tau tutaki Iutaia he toka a lautolu ke tolo fakalataha mo e ha lautolu a tau magafaoa ke taute e fakafiafiaaga he Paseka.