Tamaiaga he Tau Tufugatiaaga Fou!

NE PEHE e Patuiki pulotu ko Solomona he taha magaaho: “Kua nakai ni fai mena fou i lalo he lā.” (Fakamatalaaga 1:9) Kua moli e mena ia i loto he lalolagi he tino ne nonofo a tautolu, ka e kua e kautu lahi he tau mena fakaagaga he tufugatiaaga a Iehova? I loto he kautu ia, ko ia ne lahi mahaki mai ia Solomona, moli, ko e tagata lahi mahaki ue atu laia ne moui mai i tuai, kua eke mo tufugatiaaga ne mua atu e mitaki. Ne tupu mai fefe e mena nei?

He tau 29 he Vaha Nei ha tautolu, ko e tagata mitaki katoatoa ko Iesu, ne tamai ne ia a ia ke papatiso e Ioane he Vailele i Ioritana. “Kua papatiso a Iesu, ti hake mai agataha a ia he vai, kitiala, kua maihiua tuai e lagi kia ia, kua kitia foki e ia e Agaga he Atua kua hifo mai tuga ne lupe, kua hoko ki luga ia ia. Kitiala, ko e leo mai he lagi, kua pehe mai, Ko e haku a tama fakahele hanā, kua fiafia na au kia ia.” (Mataio 3:16, 17) Ti ko e tagata tane ko Iesu Keriso e tufugatiaaga fou fakamua, ne fakauku ke taute e finagalo he Atua. He magaaho fakamui, he fakave ke he poa he mateaga hana, kua eke ai a Iesu mo Hulalo he maveheaga fou he vahaloto he Atua mo e matakau he tau tagata ne fifili. Ko lautolu takitokotaha nei kua eke mo “tagata fou,” kua moua mai he agaga he Atua ke he amaamanakiaga i luga he lagi, fakalataha mo e amaamanakiaga ke pule fakalataha mo Iesu i loto he Kautu hana i luga he lagi.​—2 Korinito 5:17; 1 Timoteo 2:5, 6; Heperu 9:15.

Mai he tau senetenari, ko lautolu nei ne fakauku, ko e tau Kerisiano ne moua mai he agaga ne kua fakapotopoto ke fakalataha mo Keriso ke eke mo fakapotopotoaga Kerisiano moli, ti ko e tufugatiaaga fou naia. Ne ui he Atua mai he lalolagi nei, ha ko e finagalo, tuga he talahau he aposetolo ko Peteru: “Ka ko mutolu, ko e hau fifili a mutolu, ko e tau patuiki mo e tau ekepoa, ko e motu tapu, mo e motu kua moua māna, kia fakakite atu e mutolu e mitaki hana ne ui a mautolu ke o mai he pouli ke he hana maama ke ofo lahi ai.” (1 Peteru 2:9) Ke tuga a Iesu Keriso, ko e tufugatiaaga fou fakamua he Atua, kua ha ha he tufugatiaaga fou nei e fakalagoaga fakamua ke fakamatala e tala mitaki. (Luka 4:18, 19) Kua lata hana tau tagata takitokotaha, ne kua 144,000, he numela tokoluga muatua, ke “tapulu a mutolu ke he tagata fou kua eke ke lata mo e Atua, ke he tututonu mo e mahani mitaki ke fakamoli ai.” (Efeso 4:24; Fakakiteaga 14:1, 3) Kua manako e mena nei ke lata a lautolu ke fakagahua e tau “fua he Agaga,” ne fakamaama ia Kalatia 5:22, 23, mo e leveki fakamoli ha lautolu a kotofaaga.​—1 Korinito 4:2; 9:16.

Ko e heigoa e tufugatiaaga fou nei he vaha fou nei? He tau 1914, tuga he fakakite mai he fuafuaaga magaaho he Tohi Tapu, ke he tau kupu ia Fakakiteaga 11:15 ne kua fakamoli: “Ko e tau kautu he lalolagi kua eke ma e Iki ha tautolu mo e hana Keriso, to eke foki a ia mo patuiki tukulagi tukumuitea.” Ko e gahua fakamua a Keriso ha ko e Patuiki ne fakatu fou ke tolo hifo a Satani mo e hana tau agelu temoni mai he lagi ke he matakavi he lalolagi. Kua tamai he mena nei e ‘oi ke he fonua mo e tahi,’ ne fakahoko mai he tauaga fakamua he lalolagi mo e tau mena fakaatukehe hana.​—Fakakiteaga 12:9, 12, 17.

Kua eke foki e mena nei ke fakakite mai ki a lautolu he tufugatiaaga fou ne toe agaia he lalolagi kua lata a lautolu ke kau auloa ke he fakamoliaga he perofeta a Iesu ke: “Fakamatala atu foki e tala mitaki nai he kautu [kua fakatu] ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” Ko e heigoa e “fakaotiaga” ia? Ne fakaholo atu a Iesu ke fakamaama: “Ha ko e vaha ia ke lahi ai e matematekelea, nakai pihia taha mena tali mai he kamataaga he lalolagi, kua hoko ni ke he vaha nai; ti nakai tuai pihia foki. Aua he fakaku e vaha ia, po kua nakai fakamoui taha; ka e fakaku e vaha ia ha ko lautolu kua fifili.”​—Mataio 24:3-14, 21, 22.

Ne omoi he agaga a Iehova a lautolu ne kua fakauku he tufugatiaaga fou hana ke fakalavelave ke he fakamatalaaga lahi mahaki ne kua eke laia ke taute he lalolagi nei. Mai he tau afe gahoa he tau 1919, ne tupu ki mua e numela he tau tagata fakailoa fakamakutu nei he Kautu ke he 50,000 he lotoga he tau 1930. Ke tuga ne perofetaaga ki ai “kua hoko ha lautolu a tau leo ke he tau motu oti, mo e tau kupu foki ha lautolu ke he tau kala he lalolagi.”​—Roma 10:18.

Ko lautolu ni kia ne toe he tufugatiaaga fou ka fakapotopoto ke moua e fakamouiaga? Nakai, ha kua talahau mai he perofetaaga to taofi he tau agelu he Atua e tau matagi he matematekelea lahi mahaki ato oti katoatoa he fakapotopoto, nakai ni ko lautolu hokoia ko e tau Isaraela fakaagaga ka o atu ke he lagi ka e pihia foki e falu, “ko e moto tagata tokologa, kua nakai maeke ia taha ke totou, mai he tau motu oti, mo e tau faoa, mo e tau tagata kehekehe, mo e tau vagahau kehekehe.” Ato nonofo i fe a lautolu? Ko e ha, to o mai a lautolu mo e nakai pakia he “matematekelea lahi” ke moua e olioli he moui tukulagi i loto he lalolagi parataiso!​—Fakakiteaga 7:1-4, 9, 14.

Kua fiafia lahi, ko e moto tagata tokologa nei, ne fakapotopoto mai he 229 e tau motu, kua kolofuta hake ke teitei e 4,500,000 he Tau Fakamoli gahuahua. Kua tokologa foki e falu hane o mai, tuga ne fakakite mai he tau tagata kua 11,431,171 ne fakalataha ke he Fakamanatuaga he mate a Iesu ia Aperila 17 he tau e kua mole. Mai he tau miliona oti nei, kua 8,683, ni hokoia ia lautolu ne talahau ko lautolu ne toe agaia ke he lalolagi mai he tufugatiaaga fou, kua kai e tau mena fakatai he Fakamanatuaga. Ko lautolu he matakau tote nei kua nakai maeke ia lautolu ni hokoia ke fakakatoatoa e gahua fakamatala lahi he vaha nei. Ko e tau miliona ne tanaki hake aki e moto tagata tokologa kua gahua fakalataha mo lautolu ke taute ke oti e gahua. (Sefanaia 3:9) Ko e taha mena foki, ko lautolu ne mitaki e fakamahani gahua mai he moto tagata tokologa ne kua taute he magaaho nei e tau levekiaga takitaki mo e falu he tau matagahua mamafa he tapa he Kau Fakatufono ko lautolu ne fakauku a Isaraela fakaagaga, ke tuga e tau tagata nakai ko e tau Isaraela ka ko e tau Netini ne gahua fakalataha mo e tau ekepoa ke fakafou e tau kaupa a Ierusalema.​—Nehemia 3:22-26.

Tufugatiaaga he “Lagi Fou mo e Lalolagi Fou”

Kua olioli ha, he fakalataha mo e gahua fakapotopoto nei! Tuga ni e mena ne talahau e Iehova: “Kua eke e au e lagi fou mo e lalolagi fou; nakai tuai manatu ke he tau mena fakamua, ti nakai hake ai ke he loto e tau mena ia. Ka e olioli ā mutolu mo e fiafia tukulagi ā mutolu ke he mena kua eke e au; ha kua eke e au a Ierusalema mo mena ke fiafia ai, ti eke e au hana tau tagata mo mena ke olioli ai. To fiafia foki au ki Ierusalema, mo e olioli au ke he haku a motu, to nakai tuai logona foki ia koe e leo he tagi, mo e leo he fakatutuku.” (Isaia 65:17-19) To tanaki hake e lagi fou he tufugatiaaga fou a Iehova mai ia Keriso Iesu mo lautolu he tufugatiaaga fou kua 144,000 ne liu tu mai kua fakafua mai he vahaloto he tau tagata tali mai he tau senetenari 19 i tuai. Kua mua atu, ti mua atu e lilifu ue atu mai he ha fakatufono he lalolagi ne pule i Ierusalema he tino, ti pihia foki he vaha a Solomona. Kua ha ha i ai he mena taha a Ierusalema Fou, ko e taone he lagi, ne fakamaama mai i loto he hana fulufuluola kikila ue atu katoa i loto he Fakakiteaga veveheaga 21 a Fakakiteaga.

Ko e fifine kitofaitane fakaagaga a Keriso a Ierusalema Fou, ko e hana tau tutaki fakauku ne 144,000, ne fakalataha mo e ha lautolu a Kito­fai­hoana i luga he lagi he mole atu e mamate ha lautolu mo e liliu tutu mai fakaagaga. Ne kitia a lautolu he fakatino ia Fakakiteaga 21:1-4 he “hifo mai he Atua mai he lagi,” ko e kakano he mena ia, kua fakaaoga e ia a lautolu ke takitaki atu e tau monuina ke he tau tagata i lalo he lalolagi. Ke he puhala nei kua fakamoli ai e perofetaaga: “Kitiala, kua fakalataha mo e tau tagata e fale uta fano he Atua, to nofo a ia mo lautolu; to eke a lautolu mo motu hana, to ha ia lautolu e Atua ni, ko e ha lautolu a Atua haia. To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”

Kua fakaaue lahi ha a tautolu ma e tufugatiaaga he lagi fou he Atua! Ke nakai tuga e pule fakaku kolokolovao ne kua malaia ai e tau tagata ke he vaha leva, to tumau ni e fakatokatokaaga he fakatufono nei he Atua. Kua kalaga e tufugatiaaga fou mo e ha lautolu a tau fanau fakaagaga, ko e moto tagata tokologa, ha ko e taha foki e maveheaga he Atua: “Ha ko e mena tuga ne tumau ki mua haku e lagi fou mo e lalolagi fou kua eke e au, kua pehe mai a Iehova, to tumau pihia ha mutolu a fanau mo e ha mutolu a higoa.”​—Isaia 66:22.

‘Ko e lalolagi fou’ ne kua kamata mai he fanau nei, ko lautolu ne fakauku he tufugatiaaga fou. Ko e kaufakalatahaaga fou he tau tagata ne matakutaku ke he Atua ne ha ha he lalolagi. Ko e mahani vihiatia, moumou matafakatufono, vale, kolokolovao, mo e feuaki he tau tagata he vaha nei kua vavate moli lahi e manako lahi ke lata ke hiki katoatoa ke he kaufakalatahaaga he lalolagi fou, kua nonofo i lalo he takitakiaga he fakamokoi he lagi fou. Ko e finagalo haia a Iehova. Ke tuga he tufugatia e ia e lagi fou, ti kua tufugatia pihia e ia e lalolagi fou he fakalataha mai e moto tagata tokologa mo uholoto he kaufakalatahaaga mafola lahi he lalolagi fou. Ko e kaufakalataha nei ni hokoia ka fakahao ke momoui mai he “matematekelea lahi.”​—Fakakiteaga 7:14.

Ko e heigoa kua maeke a tautolu ke amaamanaki ki ai ka mole atu e matematekelea lahi mahaki? He vagahau ke he hana a tau aposetolo, ko lautolu ia ko e kamataaga mai ia lautolu ka tanaki hake e lagi fou ka pule ke he lalolagi fou, ne mavehe a Iesu: “Ko e moli, ke tala atu e au kia mutolu, ko mutolu kua mumui mai kia au, ka nofo e Tama he tagata ke he hana nofoaiki lilifu ke he fakafouaga, ti nonofo ai foki a mutolu ke he tau nofoaiki he hogofulu ma ua.” (Mataio 19:28) To fakalataha oti e 144,000 a Ierusalema Fou nei ke kau auloa mo Iesu ke fakafili e tau tagata. To tautui mogoia he fakaalofa e fulukovi mo e vihiatia ke eke mo fakaveaga ka talaga aki e kaufakalatahaaga he tagata. Ko e faoa fakamatakavi, lanu tagata, mo e tau mena vihi he papale fakamotu ka holoholo kehe. To liuaki mai fakahaga he liu tu mai e tau fakahelehele. To taute ai e tau piliona tagata fakamoli ke eke mo magafaoa lahi tahamaka ne fefakalatahaaki, ne lagaki hake ke moui tukulagi ke he lalolagi kua fakafou ke he parataiso.

Kua lahi mahaki mai e mena nei he Utopia po ke Sagari La. To eke ai ko e tufugatiaaga tumau​—ko e “lagi fou mo e lalolagi fou, tuga ne hana talahaua mai, ke nofo ai e tututonu”! (2 Peteru 3:13) Kua moli ai, ko e amaamanakiaga mitaki lahi a nei, ko e maveheaga lilifu ue atu hana ne kua pehe mai, “Kitiala, kua fakafou tuai e au tau mena oti,” mo e kua lalafi mai e talahauaga kua fakalagalaga aki ke tua: “Ko e tau kupu nai kua moli mo e fakamoli ia.”​—Fakakiteaga 21:5.