Feakiaga he Matakutaku Mahani Atua
“Kia matakutaku a kia Iehova, kia kalo kehe mo e mahani kelea.”—TAU FAKATAI 3:7.
1. Ko e tohi ma hai e tau Fakatai?
KO E tohi a Fakatai he Tohi Tapu ne toka ai e tau fakatonuaga fakaagaga loga. Ne foaki mai e Iehova e tohi takitakiaga nei ke hataki fakamua aki hana a kautu ko Isaraela. Ko e vaha nei kua foaki mai ai e tau talahauaga pulotu ma e hana a motu tapu Kerisiano, “kua hohoko mai ke he vaha ke fakahiku ai.”—1 Korinito 10:11; Fakatai 1:1-5; 1 Peteru 2:9.
2. Ko e ha e hatakiaga he Fakatai 3:7 ne lata tonu mo e vaha nei?
2 Fuluhi ke he Fakatai 3:7, ne totou e tautolu pehe: “Aua neke [“fia pulotu,” NW] a koe; kia matakutaku a kia Iehova, kia kalo kehe mo e mahani kelea.” Tali mai he vaha he ha tautolu a tau matua uluaki, ke he magaaho ne kamatamata ai he Gata a Eva mo e maveheaga ki a laua ke “iloa ai e mitaki mo e kelea,” ko e pulotu fakatagata kua kaumahala ke taute e tau manako he tau tagata. (Kenese 3:4, 5; 1 Korinito 3:19, 20) Ne nakai fai vaha tali mai he fakamauaga he tau mena tutupu i tuai ne kitia maaliali e mena nei tuga ke he senetenari 20 nei—ko e tau “aho fakahikuhiku” nei ne fua he tau tagata e tau fua he taofiaga nakai fai atua, tau manamanatuaga tupu mai noa, ti malaia ke he tau vihi ha ko e tau lanu kehekehe, mahani vale, mo e tau mahani kelea kehekehe. (2 Timoteo 3:1-5, 13; 2 Peteru 3:3, 4) Ko e ‘fakamavehevehe he lalolagi fou’ ne nakai maeke he UN po ke tau lotu mavehevehe he lalolagi ke utakehe e vihi.
3. Ko e heigoa e tau mena tutupu ne perofeta mai tuai ma e vaha nei?
3 Ne talahau mai he Kupu fakaperofeta he Atua ki a tautolu kua o atu e tau malolo fakatemoni ke he tau “patuiki he lalolagi, mo e lalolagi oti kana, kua fakapotopoto a lautolu ke tau ke he aho lahi he Atua mana . . . ke he mena kua higoa ke he vagahau Heperu ko Amaketo.” (Fakakiteaga 16:14, 16) To hoko mafiti mai e matakutakuina mai ia Iehova ke uufi ai e tau patuiki ia, po ke tau pule. To tuga e matakutakuina ne hoko ke he tau tagata Kanana ke he magaaho ne fakahoko ai e Iosua mo e tau Isaraela e fakafiliaga mate ki a lautolu. (Iosua 2:9-11) Ka ko e vaha nei ko e taha ne fakatai mai e Iosua, ko Keriso Iesu—ko e “Patuiki he tau Patuiki, mo e Iki he tau Iki”—ka ‘ta aki e tau motu mo e leveki a lautolu ke he tokotoko lapatoa’ ko e fakakiteaga he ‘ita lahi he Atua hana e malolo oti kana.’—Fakakiteaga 19:15, 16.
4, 5. Ko hai ka moua e fakamouiaga, mo e ko e ha?
4 Ko hai a lautolu ka moua e fakamouiaga ke he magaaho ia? Ko lautolu ni ka fakahao mai, nakai ko lautolu ne kai he matakutaku, ka ko lautolu oti ne feaki e matakutaku tapu ki a Iehova. Ne nakai pulotu a lautolu ke he ha lautolu ni a tau mata, ka e “kalo kehe mo e mahani kelea.” Ke he mahani fakatokolalo, ne fagai aki e tau mena mitaki e tau loto ha lautolu, ti galo kehe e tau mena kelea ke he ha lautolu a tau manamanatuaga. Ne fakahelehele e lautolu e lilifu mitaki lahi ke he Iki Sapaota ko Iehova, ko e “Fakafili he lalolagi oti,” ne amanaki ke tamate oti a lautolu ne piki ke he mahani kelea, tuga ni ne fakaotioti e ia e tau tagata Sotoma mahani kelea. (Kenese 18:25) Ko e moli, ma e tau tagata he Atua, “ko e matakutaku kia Iehova ko e puna he moui haia, ke kalo kehe ai mo e tau matahele ke mamate ai.”—Fakatai 14:27.
5 Ke he fakafiliaga fakaatua he vaha nei, ko lautolu oti ne fakatapu katoatoa a lautolu ki a Iehova mo e matakutaku ke nakai fakafiafia a ia to mailoga e mena moli ne talahau mai ke he tau kupu fakatai he Fakatai 3:8: “To eke e ia [e matakutaku kia Iehova] mo mena ke malolo ai hāu a pito, mo mena foki ke fakamalū aki hāu a tau huimotua.”
Fakalilifuaga ki a Iehova
6. Ko e heigoa kua lata ke fakalagalaga aki a tautolu ke omaoma ke he Fakatai 3:9?
6 Ko e ha tautolu a matakutaku mo e fakaaue ki a Iehova, fakalataha mo e fakaalofa hofihofi ki a ia, kua lata ke fakamalolo aki a tautolu ke omaoma ke he Fakatai 3:9: “Kia fakalilifu atu a koe kia Iehova mo e hau a tau koloa, mo e tau fua uluaki foki he hāu a tau mena oti ne tutupu mai he kelekele.” Ne nakai fakaohooho a tautolu ke fakalilifu aki e tau poa a Iehova. Kua lata e tau mena nei ke hake he logonaaga mai he loto, tuga ne fakakite mai laga 12 mai he Esoto 35:29 ke he Teutaronome 23:23 hagaao ke he tau poa i Isaraela i tuai. Ko e tau fua uluaki nei ki a Iehova kua lata ia mo tau mena fakaalofa mua atu he mitaki ne maeke ia tautolu ke foaki, ha ko e mailogaaga he tau mitaki mo e fakaalofa-totonu ne fiafia ai a tautolu ke he hana a lima. (Salamo 23:6) Kua lata ke fakakite mai ha tautolu a fifiliaga ke “kumikumi fakamua . . . ke he kautu he Atua mo e hana tututonu.” (Mataio 6:33) Mo e ko e heigoa e tau fua ha ko e ha tautolu a fakalilifuaga ki a Iehova mo e ha tautolu a tau koloa uho? “Ti puke ai hāu a tau fale saito ke he tau mena loga; ti puapua foki hāu a tau huhua vine ke he uaina fou.”—Fakatai 3:10.
7. Ko e heigoa e tau fua uluaki kua lata ia tautolu ke foaki ki a Iehova, mo e ko e heigoa e fua ka moua mai ai?
7 Ko e matapatu puhala ne fakamonuina aki e Iehova a tautolu ko e mahani fakaagaga. (Malaki 3:10) Ti ko e mena ia, ko e tau fua uluaki ka foaki e tautolu ki a ia kua lata ni ke matapatu ke he mahani fakaagaga. Kua lata ia tautolu ke fakaaoga ha tautolu a tau magaaho, malolo mo e fakamakamaka ke taute hana a finagalo. Maeke he mena nei ke fagai a tautolu, ko e puhala taha ia ni he tau gahua pihia ne eke ia mo tau mena “kai” ne fakamalolo aki a Iesu. (Ioane 4:34) Ko e ha tautolu a tau fale koloa fakaagaga to puke ia, mo e ha tautolu a fiafia, ne fakatai aki e uaina fou ka puapua. Ke lafi ki ai, ke he ha tautolu a tau liogi mo e tua ke he tau mena kai ke lata mo e tau aho takitaha, kua maeke ia tautolu ke tumau e foaki mo e lima fakaolo ke lagomatai aki e gahua he Kautu ke he lalolagi oti. (Mataio 6:11) Ko e tau mena oti ne ha ha ia tautolu, fakalataha mo e tau koloa he tino, ne moua e tautolu mai he ha tautolu a Matua fakaalofa he lagi. To liligi hifo fakalahi e ia e tau fakamonuinaaga, ke he puhala kua maeke ia tautolu ke fakaaoga e tau mena uho nei ke he hana a fakahekeaga.—Fakatai 11:4; 1 Korinito 4:7.
Akonakiaga he Fakaalofa
8, 9. Kua lata ia tautolu ke fefe e tau logonaaga ke he akonaki mo e fakaakoaga?
8 Ko e Ftai 3 tau kupu 11 mo e 12 he veveheaga 3 ha Fakatai ne liu vagahau mai foki he fakafetuiaga fiafia ne ha ha i ai he tau magafaoa mahani atua, pihia foki ke he vahaloto ha Iehova mo e hana a tau fanau fakaagaga fakahelehele he lalolagi. Ne totou e tautolu: “Haku tama na e aua neke fakateaga a koe ke he akonakiaga a Iehova; ti ua fakaatukehe foki a koe ka akonaki e ia a koe. Ha ko ia kua ofania e Iehova, kua akonaki e ia a ia; tuga he akonaki he matua tane e tama tane kua fiafia ki ai a ia.” Nakai fiafia e tau tagata he lalolagi ka akonaki. Kua lata e tau tagata ha Iehova ke fiafia ki ai. Ne liu fatiaki e Paulo e tau kupu nei mai he tau Fakatai, ne pehe: “Haku tama na e, aua neke fakateaga a koe ke he akonakiaga he Iki, aua foki neke fakalolelole a koe ka akonaki mai e ia a koe. Ha ko ia kua ofania he Iki kua akonaki atu a ia kia ia . . . Ko e tau akonakiaga oti kana kua nakai manatu a tautolu ke he vaha ia ko e mena ke fiafia ki ai, ka ko e mena ke momoko ai; ati oti ka e fua mai e fua he tututonu ke monuina ai a lautolu kua akonaki ai.”—Heperu 12:5, 6, 11.
9 E, ko e akonaki mo e tomatomaaga ko e tau mena kua aoga lahi ke he ha tautolu a feakiaga takitokotaha, ne fa mahani ke puhala mai he ha tautolu a tau matua, fakapotopotoaga Kerisiano, po ke ka manamanatu a tautolu ke he tau Tohiaga Tapu ke he ha tautolu a tau kumikumiaga fakatagata. Ko e fifiliaga he moui mo e mate ha tautolu ke omaoma ke he tomatomaaga, tuga ne talahau mai foki he Fakatai 4:1, 13: “Kia fanogonogo mai a a mutolu ma fanau na e, ke he tau kupu fakaako he matua tane ha mutolu, mo e hahaga mai a mutolu kia fakalotomatala e au a mutolu. Kia taofi e koe ke mau e tau kupu ne fakaako atu ai a koe, aua neke tiaki e koe; kia omaoma a koe ki ai; ha ko e hāu a moui haia.”
Ko e Fiafia Mua Ue Atu
10, 11. Ko e heigoa e falu vala he tau kupu fulufuluola he Fakatai 3:13-18?
10 Ko e fulufuluola ha a ia he talahauaga ne mui mai, ko e moli ko e ‘tau kupu fiafia mo e tonu e kupu moli’! (Fakamatalaaga 12:10) Ko e tau kupu mai he agaga ki a Solomona ke fakamaama aki e fiafia moli. Ko e tau kupu nei kua lata ke tohi e tautolu ke he ha tautolu a tau loto. Ne totou e tautolu:
11 “Uhoaki e tagata kua moua e [“pulotu,” NW] mo e tagata foki kua moua e [“loto manamanatu,” NW] Ha kua mua he mitaki e mena ne fakafua aki a ia ke he mena ne fakafua aki e ario; mo e tau mena ke moua ai kua mua ia ke he auro. Kua mua hana mitaki ke he mitaki he tau penina; mo e hāu a tau mena fulufuluola oti kua nakai ni tatai mo ia. Ha ha he lima matau hana e moui leva; ha he lima hema hana e koloa mo e lilifu. Ko e hana a tau puhala ko e tau puhala fulufuluola; mo e hana tau puhala loto oti ha ha i ai e monuina. Ko ia ko e akau he moui kia lautolu kua toto atu kia ia; uhoaki foki a lautolu kua taofi ai a ia.”—Fakatai 3:13-18.
12. Maeke fefe e pulotu mo e loto manamanatu ke aoga ki a tautolu?
12 Pulotu—ne fatiaki laga loga ha e kupu nei he tohi ha Fakatai, laga 46 he katoa! (NW) “Ko e matakutaku kia Iehova ko e kamataaga he [“pulotu,” NW] haia.” Ko e pulotu gahuahua mahani atua a nei ne fakave aki e iloilo ke he Kupu he Atua ke maeke he hana tau tagata ke o he puhala hagahaga mitaki mai he matagi hagahaga kelea lahi ne fa e vale he lalolagi a Satani. (Fakatai 9:10) Ko e loto manamanatu, fatiaki laga 19 he tau Fakatai (NW), ko e lagomatai he pulotu, ke lagomatai aki a tautolu ke totoko ke he tau lagatau ha Satani. Ne malolo hana a tau lagatau kelea ha ko e mena ha ha he Fi lahi e tau afe tau loga ne gahua ai. Ka e fai mena a tautolu ne mua atu e aoga ke he leva e gahua he tagata fakaako—loto manamanatu he mahani atua, ko e malolo ke kitia e tonu mai he hepe mo e fifili e puhala hako ke fano ai. Ko e mena hanei ne fakaako mai e Iehova ki a tautolu mai he hana a Kupu.—Fakatai 2:10-13; Efeso 6:11.
13. Ko e heigoa ke puipui aki a tautolu he vaha vihi ke he mouaaga he tau koloa, mo e ko e ha?
13 Ne nakai fai maopoopo e tau puhala moua mena he lalolagi he vaha nei ti fakailoa tuai mai e fakamoliaga he perofetaaga ha Esekielu 7:19: “To liti ki fafo e lautolu ha lautolu a tau ario, mo e tau auro ha lautolu to eke ia mo mena kelea; nakai maeke ke he ario ha lautolu mo e auro ha lautolu ke laveaki a lautolu ke he aho he ita ha Iehova.” Ko e tau koloa oti he lalolagi ne nakai fakaai ke tatai mo e malolo he pulotu mo e loto manamanatu ne maeke ke fakamoui. Ne talahau foki he patuiki iloilo ko Solomona: “Ha kua eke e [“pulotu,” NW] mo mena ke malu ai, kua eke foki e tau tupe mo mena ke malu ai; ka ko e aoga he [“pulotu,” NW] kua moua kua moui ai a ia ne toka ai.” (Fakamatalaaga 7:12) Fiafia moli a lautolu oti ne o fano he vaha nei ke he tau puhala mitaki a Iehova mo e pulotu ke fifili e “moui leva,” ko e moui tukulagi ko e mena fakaalofa he Atua ma lautolu oti ne gahuahua e tua ke he poa lukutoto ha Iesu!—Fakatai 3:16; Ioane 3:16; 17:3.
Feakiaga he Pulotu Moli
14. Ko e heigoa e tau puhala ne fakakite aki e Iehova e fakataiaga he pulotu?
14 Kua lata tonu ia tautolu e tau tagata, ne tufuga ia ke he fakatai he Atua, ke fakamakamaka ke feaki e pulotu mo e loto manamanatu ko e tau mahani ne fakakite e Iehova ke he hana a tau gahua mitaki he tufugatiaaga. “Ko e [“pulotu,” NW] ne fakave ai e Iehova e lalolagi; ne fakamau ai e ia e lagi ke he hana [“loto manamanatu,” NW].” (Fakatai 3:19, 20) Ne kamata agataha a ia ke taute e tau mena momoui, nakai ha ko e tupu mai noa ko e mena galo, mo e nakai maeke ke fakamaama atu, ka ko e tau gahua pauaki he tufugatiaaga, “takitaha mo e hana kakano” ke lata mo e amaamanakiaga pulotu. (Kenese 1:25) Ko e magaaho fakamui ne moua e tagata mo e lotomatala mo e tau malolo ne mua hake ke he tau manu, ne liga taogo ti liu taogo e patipati he tau fanau fakaagaga he Atua ke he lagi. (Fakatatai Iopu 38:1, 4, 7.) Ko e loto manamanatu a Iehova ke kitia tuai ki mua, hana pulotu, mo e hana a fakaalofa kua kitia maaliali ke he hana a tau gahua oti ke he lalolagi.—Salamo 104:24.
15. (a) Ko e ha ne nakai koenaia ke feaki e pulotu? (e) Ko e heigoa e malolo kua lata he Fakatai 3:25, 26 ke fakalagalaga aki a tautolu?
15 Kua nakai lata ni a tautolu ke feaki hokoia e tau mahani a Iehova ko e pulotu mo e loto manamanatu ka e kuku mau foki ki ai, mo e nakai fakateaga ke he ha tautolu a fakaako ke he hana a Kupu. Ne tomatoma mai ki a tautolu: “Haku tama na e, aua neke toka kehe e koe e tau mena ia mai mua hāu; kia omaoma mau a koe ke he [pulotu,] mo e manamanatu[aga]; To eke e tau mena ia mo moui ke he hāu a agaga, mo e tau mena fulufuluola foki ke he ua hāu.” (Fakatai 3:21, 22, fakatatai NW.) Ti maeke ia tautolu ke o fano ke he hagahaga mitaki mo e mafola he loto, pete ni he hau po ke tagata kaiha e aho he “fakalutukia ai ha lautolu he mahaikava” ka hoko ia ke he lalolagi ha Satani. (1 Tesalonia 5:2, 3) Ke he aho matematekelea lahi ia, “aua neke matakutaku a koe ke he fakamatakutaku fakalutukia, mo e malaia he tau tagata mahani kelea ka hoko mai ai. Ha ko Iehova ke tua a koe ki ai; to leveki, foki e ia hau a tau hui, neke moua e ia ne fai fi mai.”—Fakatai 3:23-26.
Fakaalofa ma e Gahua Mitaki
16. Ko e heigoa e tau gahua kua lata ke taute he tau Kerisiano ke lafi atu ke he fakamakutu ke he fonua?
16 Ko e tau aho hanei ke fakakite e fakamakutu ke fakamatala e tala mitaki he Kautu ke eke ia mo fakamoli ke he tau motu oti. Ka ko e gahua fakamatala nei kua lata ke lagomatai foki ke he falu gahua Kerisiano, tuga ne fakamaama mai he Fakatai 3:27, 28: “Aua neke lamakai e koe e mena mitaki kia lautolu kua lata ki ai, ka kua maeke kia koe ke eke. Aua neke pehe age a koe ke he tagata ne katofia mo koe, Fano a, ti liu mai a koe, ti ta atu ai e au kia koe, a pogipogi; ka kua toka ai ni e mena kia koe.” (Fakatatai Iakopo 2:14-17.) Ha kua laulahi e lalolagi ne lauia ke he mativa mo e hoge, ne ha ha i ai e tau ui fakatepetepe ki a tautolu ke lagomatai ha tautolu a tau katofia, mua atu ke he ha tautolu a tau matakainaga fakaagaga. Fefe e logonaaga he Tau Fakamoli a Iehova?
17-19. (a) Ko e heigoa e manako fakatepetepe ne moua he 1993, mo e ko e heigoa ne taute ki ai? (e) Ko e heigoa ne fakakite aki ko e ha tautolu a tau matakainaga matematekelea nei ne ‘kautu ke he tau mena oti nai’?
17 Ko e taha fakataiaga a nei: Ke he tau kua mole, ko e ui lagomatai fakatepetepe mai i Iukosalavia tuai. Ne lahi e mitaki he tali he tau matakainaga he tau motu ne katofia. Ke he tau mahina makalili lahi he vaha makalili he tau kua mole, ne maeke he tau fenoga lagomatai ke o atu ke he tau matakavi felakutaki, ke ta atu e tau tohi fakailoa he magahala nei, tau mena tui mafana, tau mena kai, mo e tau vai ekekafo ke he Tau Fakamoli ne manako ki ai. Ke he taha magaaho, ne tohi ole e tau matakainaga ke ta atu e 15 e tane he tau koloa lagomatai, ka ko e magaaho ne moua e pemita, ko e tohi ke lata mo e 30 e tau tane! Ko e Tau Fakamoli a Iehova i Auseturia ne fakamafiti ke fakafano tolu foki e tau tulaki. Ko e katoatoa, 25 e tane ne hoko atu ke he matakavi ne pauaki ki ai. Ne lahi e fiafia he tau matakainaga ha tautolu he moua e tau koloa loga fakaagaga mo e fakatino nei!
18 Fefe e logonaaga ha lautolu ia ne moua e tau koloa? Ke he vala fakamua he tau nei, ne tohi ai he matakainaga motua: “Ko e tau matakainaga tane mo e fifine i Sarajevo ne momoui agaia mo e malolo, ka e mua atu ni e aoga, ko e malolo fakaagaga agaia ni a mautolu ke fakauka ke he felakutaki goagoa nei. Ko e tuaga uka lahi hagaao ke he tau mena kai. Kia fakamonuina mo e taui e Iehova ha mutolu a tau gahua ne fakafita mai ki a mautolu. Ne lahi e fakalilifu he tau pule e Tau Fakamoli a Iehova ha ko e ha lautolu a tau fakataiaga mitaki he puhala he moui mo e ha lautolu a fakalilifu ke he tau pule. Ne lahi foki ha mautolu a fakaaue ke he tau mena kai fakaagaga ne fakafano mai e mutolu ki a mautolu.”—Fakatatai Salamo 145:18.
19 Ko e tau matakainaga nonofo hagahaga kelea nei ne fakakite foki ha lautolu a fakaaue ke he gahua fakamakamaka ke fakamatala ke he fonua. Ne tokologa e tuuta kaina ne o mai ki a lautolu ke ole aoga Tohi Tapu he kaina. Ke he maaga lahi ko Tuzla, ne fakafano ki ai lima e tau tane he tau kai fakaalofa, ne 40 e tagata fakailoa ne hokotaki mai 25 e tau tula takitaha ka fakaevalesi ne gahua fakamatala he mahina ia, ko e lagomatai lahi atu ke he hiva e tau tagata foafoa he fakapotopotoaga. Ne ha ha ia lautolu toko 243 ne fakalataha ke he Fakamanatuaga he mate ha Iesu. Ko e tau matakainaga fakahelehele nei, “ne kautu . . . ke he tau mena oti nai, ha ko ia ne fakaalofa mai kia tautolu.”—Roma 8:37.
20. Ko e heigoa e “fakatataiaga” ne hoko ia i Kautaha Soviete?
20 Ko e fakamokoi ne fakakite ke he tau uta lalahi he tau kai fakaalofa mo e tau mena tui mafana ne ta atu he tau toga ke he Kautaha Soviete ne tatai ni mo e fakamakutu he tau matakainaga i ai. Tuga a nei, i Moscow ko e tokologa ha lautolu he Fakamanatuaga he tau nei ko e 7,549, he fakatatai atu ia mo e 3,500 he tau kua mole. Ke he magahala taha, ko e tau fakapotopotoaga i loto he maaga lahi ia ne tupu hake mai he 12 ke he 16. Ke he Kautaha Soviete katoa (tiaki e tau Fahi Kaufakalataha a Palatiki), ko e tupu hake he tau fakapotopotoaga ko e 14 e pasene, ke he tau tagata fakailoa he Kautu ko e 25 e pasene, mo e tau tagata foafoa ko e 74 e pasene. Ko e agaga fakamakutu mo e poa ni he tagata a ia! Ne fakamanatu mai ki a tautolu he senetenari fakamua ne ha ha i ai e “fakatatai.” Ko e tau Kerisiano ne ha ha i ai e tau koloa fakaagaga mo e tino ne lima fakaolo ke he tau mena fakaalofa ki a lautolu ne nonofo nakai hagahaga mitaki, ka ko e fakamakamaka ha lautolu ia ne matematekelea ke fiafia mo e fakamalolo aki a lautolu ne foaki e tau koloa fakaalofa.—2 Korinito 8:14.
Vihatia e Tau Mena Kelea!
21. Kehe mai fefe e tau tagata pulotu mai he tau tagata goagoa ke he tau kupu fakahiku he Fakatai veveheaga 3?
21 Ko e Ftai veveheaga tolu he tau Fakatai ne foaki e tau tala fakafehagaaoaki, ti fakaoti aki e tomatomaaga nei: “Aua neke mahekeheke a koe ke he tagata favale; ti ua fifili foki e koe taha he hana tau puhala. Ha kua vihatia e Iehova e tagata mahani keukeu; ka kua feofanaki a ia mo lautolu ne mahani hakohako. Ha ha he fale he tagata mahani kelea e malaia mai ia Iehova; ka e fakamonuina e ia e mena kua nonofo ai e tau tagata tututonu. Kua vā e ia ke he tau tagata fa vā; ka e foaki age e ia e fakaalofa noa kia lautolu ne mahani molu. To eke e lilifu mo tufaaga he tau tagata iloilo; ka ko e mena ne fakatokoluga ai e tau tagata goagoa, ko e mena ke mā ai haia.”—Fakatai 3:29-35.
22. (a) Kalo kehe fefe a tautolu ke nakai totou fakalataha mo e tau tagata goagoa? (e) Ko e heigoa ne vihiatia he tau tagata pulotu, mo e ko e heigoa ne feaki e lautolu, mo e ko e heigoa e palepale?
22 Maeke fefe ia tautolu ke nakai totou fakalataha mo e tau tagata goagoa? Kua lata ia tautolu ke vihiatia e tau mena kelea, e, vihiatia fakalahi e tau mena ne vihiatia lahi e Iehova—ko e tau puhala fakavai oti he lalolagi, vale, fakamaligi toto nei. (Kikite foki Fakatai 6:16-19.) Ko e taha fahi, kua lata ia tautolu ke feaki e tau mena mitaki—mahani hakohako, tututonu, mo e mahani molu—ti ko e mahani fakatokolalo mo e matakutaku ki a Iehova ke moua e tautolu e “koloa mo e lilifu mo e moui.” (Fakatai 22:4) Ko e taui e mena nei ki a tautolu oti ne fakamoli ke omaoma ke he tomatomaaga nei: “Kia tua a koe kia Iehova mo e hāu a loto katoa.”
Ko e Heigoa Hau a Talahauaga?
◻ Gahuahua fefe e mataulu he tala nei ke he vaha nei?
◻ Maeke fefe a tautolu ke fakalilifu a Iehova?
◻ Ko e ha a tautolu ne nakai lata ke fakateaga ke he tau akonakiaga?
◻ Moua mai i fe e fiafia mua atu?
◻ Maeke fefe a tautolu ke fiafia ke he mitaki ka e vihiatia ke he kelea?
[Fakatino he lau 16]
Ko lautolu ne foaki e tau mena mitaki ha lautolu mo poa ki a Iehova to lahi e fakamonuinaaga