Maeke ia Iehova ke Fakamalolo Lahi a Koe
“To foaki atu e ia e malolo kia lautolu kua lolelole; ka ko lautolu kua nakai fai malolo to fakatupu fakalahi e ia e malolo kia lautolu.”—ISAIA 40:29.
1, 2. Ko e heigoa a falu fakamoliaga ke he ha Iehova a malolo lahi?
KO IEHOVA ko e Atua “kua lahi hana malolo.” Kua maeke ia tautolu ke kitia e fakamoliaga ke he “hana mana haia kua tukulagi, mo e hana a Atua” mai he mahomo ue atu he hana tau tufugatiaaga. Ko lautolu ne nakai talia ke mailoga e tau fakamoliaga ia ke he hana tuaga ko e Tufuga kua nakai fai tala ke kalo ki ai.—Salamo 147:5; Roma 1:19, 20.
2 Kua tupu tolomaki e fakamoliaga ke he malolo a Iehova he kumikumi fakahokulo e tau saienetisi ke he lagi likoliko, fakalataha mo e hana tau fuhifuhi fetu mano kua fofola atu e laulahi ke he tau teau he tau miliona tau, mai he totouaga he mafiti-he-maama. He po pouli ne kikila e lagi, kia onoono hake ke he pulagi mo e kitia ko e logona hifo nakai a koe tuga he salamo: “Ka kitekite atu au ke he lagi hāu, ko e gahua he hāu a tau mata lima, ko e mahina katoa mo e tau fetu ne eke e koe; Ko e heigoa kia e tagata kia manatu mai ai a koe kia ia, mo e tama he tagata kia ahi mai ai e koe a ia?” (Salamo 8:3, 4) Mo e kua mitaki lahi ha e levekiaga a Iehova ke he tagata, ko tautolu haia! Ne foaki age e ia ke he tagata tane uluaki mo e fifine e kaina fulufuluola he lalolagi. Kua malolo foki hana kelekele—ke fakatupu mai e tau lakau, kua foaki mai e tau mena kai kakano mitaki, ne nakai fakakona. Ko e tagata mo e tau manu kua moua mai e tau malolo fakafahitino he fakakiteaga nei he malolo he Atua.—Kenese 1:12; 4:12; 1 Samuela 28:22.
3. Ke lafi ke he tau mena kitia he lagi mo e lalolagi katoatoa, ko e heigoa foki ne fakakite mai e malolo he Atua?
3 Ke lafi atu foki ke he fulufuluola lahi he pulagi mo e tau lakau mo e tau manu he lalolagi ne fakafiafia lahi, kua fakakite mai ia lautolu ki a tautolu e malolo he Atua. Ne tohi he aposetolo ko Paulo: “Ko e hana tau mena kua nakai kitia, tali mai he vaha ne eke e lalolagi, kua kitia ia he manamanatu e tau mena ne eke, ko e hana mana haia kua tukulagi, mo e hana Atua.” (Roma 1:20) Ka e ha ha ai foki e taha fakamoliaga ke he hana malolo kua lata lahi a tautolu ke onoono ki ai mo e loto fakaaue. ‘Ko e heigoa,’ he liga fakaogotau a koe, ‘ne fakakite e malolo he Atua ke mua atu mai he lagi likoliko katoatoa?’ Ko e tali ko Iesu Keriso. Kua moli, mai he omoiaga he agaga tapu ne pehe e aposetolo ko Paulo ko e fakatautau a Keriso ko e “malolo he Atua mo e iloilo he Atua.” (1 Korinito 1:24) ‘Ko e ha e mena ia?’ he liga huhu a koe, ‘Mo e heigoa foki hana hagaaoaga ke he moui haku he magaaho nei?’
Malolo ne Puhala Mai he Hana Tama
4. Fakakite mai fefe e malolo he Atua kakano ha ko e hana Tama?
4 Kua fakakite fakamua mai e malolo he Atua he magaaho ne tufugatia e ia hana Tama fuataha, kua taute ai ke he hana fakatai. Ne fekafekau e Tama agaga nei ki a Iehova “ko e iki gahua iloilo” he fakaaoga e malolo lahi he Atua ke tufugatia e tau mena oti kana. (Fakatai 8:22, 30, NW) Ne tohi a Paulo ke he hana tau matakainaga Kerisiano i Kolose: “Ha ko e mena ne eke e ia e tau mena oti kana, ko e tau mena ha he lagi, mo e tau mena ha he lalolagi, ko e tau mena kua kitia mo e tau mena nakai kitia, . . . ko ia ne eke e tau mena oti kana, ne eke foki māna.”—Kolose 1:15, 16.
5-7. (a) He vaha kua mole, ne putoia fefe e tau tagata ke he fakatataaga he malolo he Atua? (e) Ko e ha ai ke talitonu ko e maeke e malolo he Atua ke fakakite mai he tau mena tutupu he tau Kerisiano he vaha nei?
5 Ko tautolu ko e maaga ‘he tau mena ne eke ha he lalolagi.’ Ti hoko mai nakai e malolo he Atua ki a tautolu ko e tau tagata? Hanai, mai he tau mena oti ne taute he Atua ke he tau tagata nakai mitaki katoatoa, ne age e Iehova he falu magaaho e malolo lahi ke he hana tau fekafekau ke maeke a lautolu ke fakakatoatoa hana finagalo. Ne iloa e Mose, kua fa mahani e tau tagata nakai mitaki katoatoa ke momoui ke 70 po ke 80 e tau tau. (Salamo 90:10) Ka e kua a Mose? Ne moui a ia ti 120 e tau tau he moui, ka e “nakai pouli hana tau fofoga to nakai mole atu foki hana malolo.” (Teutaronome 34:7) Pete ni ia, nakai pehe e kakano he mena ia ko e taute takitaha he Atua hana tau fekafekau ke moui loa lahi pihia po ke malolo tumau pihia, ka kua fakakite moli ai ko e maeke a Iehova ke fakamalolo e tau tagata.
6 Kua fakakite mai foki e iloilo he Atua ke age e malolo ke he tau tagata tane mo e tau fifine mai he mena ne taute e ia ke he hoana a Aperahamo. “Ne moua ai e Sara e malolo ke fanau ai, ne fanau foki e ia ka kua mole atu e vaha he hana malolo, ha kua manatu a ia kua fakamoli a ia ne talahau mai.” Po ke manamanatu la ko e age fefe he Atua e malolo ke he tau ikifakafili mo e falu i Isaraela: “Kia Kiteona, ko Palako foki, mo Samisoni, mo Iefeta, ko Tavita foki, mo Samuela, mo e tau perofeta. Ko lautolu na . . . ne fakamalolo ai foki ka lolelole.”—Heperu 11:11, 32-34.
7 Kua maeke foki e malolo pihia ke gahuahua ki a tautolu foki. Oi, liga nakai amaamanaki a tautolu he magaaho nei ke fai tama ha ko e malolo mana, po ke liga nakai fakatata e tautolu e malolo lahi mahaki tuga ha Samisoni. Ka e maeke ke malolo lahi a tautolu, tuga ne tala age e Paulo ke he tau lalo tagata i Kolose. E, ne tohi a Paulo ke he tau tagata tane, tau fifine, mo e tau fanau, tuga kua kitia ai e tautolu ke he tau fakapotopotoaga he vaha nei, mo e pehe a ia ko lautolu kua “fakamalolo . . . ke he malolo oti kana.”—Kolose 1:11.
8, 9. He senetenari fakamua aki, ne fakakite moli mai fefe e malolo a Iehova hagaao ke he tau tagata tuga a tautolu?
8 He vaha he fekafekauaga a Iesu ke he lalolagi, kua fakakite fakamaaliali e Iehova ko e gahuahua hana malolo he puhala mai he hana Tama. Ke fakatai ki ai, he magaaho ne tolo atu e moto tagata tokologa ki a Iesu i Kapanaumi, kua “ha ha i ai foki e mana [“ha Iehova,” NW] ke fakamalolo aki a lautolu.”—Luka 5:17.
9 He mole mai hana liu tu mai, ne talahau fakamoli a Iesu ke he hana tau tutaki to eke na lautolu ‘ke moua e malolo, ka haele hifo e Agaga Tapu ki luga ia lautolu.’ (Gahua 1:8) Kua moli ha! Ne hokotaki mai he tagata tohia fakamauaga tala tuai e tau mena ne tutupu he tau aho gahoa he mole ai e Penetekose he tau 33 V.N.: “Kua talahau atu he tau aposetolo mo e mana lahi e liu tu mai he Iki ko Iesu.” (Gahua 4:33) Ko Paulo foki e taha ne kua taute ke malolo lahi ma e gahua ne poaki he Atua ke taute e ia. He mole mai hana liliuina mo e liu aala foki hana tau mata, ne eke a ia ke ‘au atu he fakamalolo; kua fakahakuhaku ai e tau tagata Iutaia ne nonofo i Tamaseko he fakakite fakatonu atu e ia, ko e Keriso ni hanai.’—Gahua 9:22.
10. Lagomatai lahi fefe e malolo mai he Atua ki a Paulo?
10 Kua moli kua lata a Paulo ke moua lahi e malolo, ka manamanatu a tautolu ke he malolo fakaagaga mo e manamanatuaga kua lata ke fakakatoatoa aki e tau fenoga misionare ne tolu ke he tau afe maila. Kua eke foki a ia ke fakauka ke he tau mena uka kehekehe oti, ke fakauka he tuku he fale pouli mo e fehagaaki mo e mate. Kua maeke fefe mogoia? Ne tali e ia: “Ha ha ia au e Iki, mo e fakamalolo mai kia au; kia fakakatoatoa ha ko au e fakamatalaaga.”—2 Timoteo 4:6-8, 17; 2 Korinito 11:23-27.
11. Ke he malolo he Atua, ko e heigoa e amaamanakiaga ne vagahau a Paulo ki ai ma e hana faoa fekafekau i Kolose?
11 Kua nakai fakaofomate mogoia, ha kua eke a Paulo, he magaaho ne tohi ke he hana “tau matakainaga fakamoli foki ha ia Keriso” i Kolose, ke tala age moli ki a lautolu ko e maeke a lautolu ke “fakamalolo . . . ke he malolo oti kana ke lata mo e malolo [he ha Iehova a] lilifu, kia tupu [ai] e fakauka katoatoa, mo e fakamanavalahi katoa mo e fiafia.” (Kolose 1:2, 11) Pete ni ko e hagaao mua e tau kupu ia ke he tau Kerisiano fakauku, ko lautolu oti ne mumuitua ke he tau tuagahui a Keriso kua maeke ke moua lahi mahaki e aoga he tau mena ne tohi e Paulo.
Tuku Age e Malolo Lahi i Kolose
12, 13. Ko e heigoa e tau kalakala he tuaga he tohi ke he tau Kolose, mo e liga ko e heigoa e tali ki ai?
12 Ko e fakapotopotoaga i Kolose, ne toka ai he fahi motu a Roma ko Asia, liga kua kamata mai he fakamatalaaga he Kerisiano mahani fakamoli ne fakahigoa ko Epafara. Kua tuga ko e magaaho ne logona e ia kua tuku a Paulo he fale pouli i Roma liga he tau 58 V.N., kua loto lahi a Epafara ke ahi atu ke he aposetolo mo e fakamalolo a ia ha ko e hokotaki mitaki ke he fakaalofa mo e tumauokafua he hana tau matakainaga i Kolose. Ligaliga kua tala age foki e Epafara e hokotaki fakamoli hagaao ke he falu mena vihi i loto he fakapotopotoaga Kolose ne kua lata ke fakahako. Ko e mena ne moua ai, ne logona e Paulo e manako lahi ke tohi ke he fakapotopotoaga e tohi ke fakamalolo atu mo e tomatoma atu. To maeke foki ia koe ke moua lahi foki e fakamaloloaga mai he Kol veveheaga 1 he tohi ia, ha ko e mena fakakite moli mai ko e taute fefe e Iehova hana tau fekafekau ke malolo lahi.
13 Kia manamanatu la koe ke he logonaaga he tau matakainaga tane mo e tau matakainaga fifine i Kolose he magaaho ne talahau e Paulo ko lautolu ko e “tau matakainaga fakamoli foki ha ia Keriso.” Kua lata tonu ke nava ki a lautolu ma e ha lautolu a ‘fakaalofa ke he tau tagata tapu oti kana’ mo e ‘he fua mai ai e tau fua he vagahau mitaki’ tali mai he magaaho ne eke ai mo tau Kerisiano! Kua maeke nakai ke talahau e tau fakailoaaga nei hagaao ke he ha tautolu a fakapotopotoaga, po ke ki a tautolu takitokotaha?—Kolose 1:2-8.
14. Ko e heigoa e manako a Paulo hagaao ke he tau Kolose?
14 Kua amotia lahi a Paulo mai he hokotaki ne moua e ia ti tala age e ia ke he tau Kolose kua nakai okioki a ia he liogi ma lautolu mo e ole ai ke eke a lautolu ke ‘puke ke he maama mitaki ke he finagalo he [Atua], ke he pulotu oti katoa mo e loto matala kua fakalata ke he Agaga. Kia mahani ke lata mo e Iki.’ Ne liogi a ia ke taute a lautolu ke ‘fua mai ai ia lautolu e tau gahua mitaki oti, kia tupu foki ha lautolu a maama mitaki ke he Atua; Kia fakamalolo e ia a lautolu ke he malolo oti kana ke lata mo e malolo he hana lilifu, kia tupu kia lautolu e fakauka katoatoa, mo e fakamanavalahi katoa mo e fiafia.’—Kolose 1:9-11.
Tuku Age Foki e Malolo he Vaha Nei
15. Maeke fefe ia tautolu ke fakatata e aga taha ia tuga ne ata mai he mena ne tohi e Paulo ke he tau Kolose?
15 Ko e fakafifitakiaga mitaki ha a ia ne fakatoka e Paulo ma tautolu! Kua lata tonu e tau matakainaga ha tautolu he lalolagi oti mo e ha tautolu a tau liogi ke maeke ai a lautolu ke fakauka mo e taofimau ha lautolu a olioli pete ni e tau matematekelea ha lautolu. Ke tuga a Paulo, kua lata a tautolu ke vagahau fakahako e tau mena he tau liogi ha tautolu ka logona e tautolu e tau tala ke he tau matakainaga he taha fakapotopotoaga, po ke he taha motu, ne kua hohoko ki ai e tau mena uka. Kua liga lauia e taha fakapotopotoaga tata he matematekelea fakalutukia po ke falu mena uka fakaagaga. Po kua liga eke ni ke fakauka e tau Kerisiano he motu kua tupu e matematekelea he ha ha i ai e felakutaki fakamatakavi po ke kelipopoaga he vahaloto he tau faoa fakamatakavi. Ke he tau liogi kua lata a tautolu ke ole ke he Atua ke lagomatai ha tautolu a tau matakainaga ke ‘mahani ke lata mo e Iki,’ ke fua mai tumau ia lautolu e tau fua he Kautu he fakauka, mo e ke tupu tolomaki e loto matala. Ke he puhala nei kua moua ai he tau fekafekau he Atua e malolo mai he hana agaga, ‘kua fakamalolo e ia ke he malolo oti kana ke lata mo e malolo.’ Maeke ia koe ke iloa tonu ko e to fanogonogo mai hau a Matua mo e tali mai.—1 Ioane 5:14, 15.
16, 17. (a) Tuga he tohia e Paulo, ma e heigoa kua lata a tautolu ke fakaaue ki ai? (e) Ke he kakano fe ne kua tokanoa ai mo e fakamagalo e tau tagata he Atua?
16 Ne tohi e Paulo kua lata e tau Kolose ke ‘fakaaue atu ke he Matua, ko ia kua taute a lautolu ke lata a lautolu mo e tufaaga he mena kua eke he tau tagata tapu ha he maama.’ Kia fakaaue atu foki a tautolu ke he Matua ha tautolu he lagi ma e ha tautolu a tuaga he hana fakatokatokaaga, pete ke he taha matakavi he hana Kautu ha he lagi po ke ke he lalolagi. Taute fefe he Atua e tau tagata nakai mitaki katoatoa ke lata ai ke he hana kitiaaga? Ne tohi a Paulo ke he hana tau matakainaga fakauku: “Ko ia kua laveaki a tautolu mai he pule he pouli, ti ta mai a tautolu ke he kautu he hana Tama fakahele; Ha ia ia kua moua ai e tautolu e lukutoto ke he hana toto, ko e fakamagaloaga he tau hala.”—Kolose 1:12-14.
17 Pete ni ko e heigoa ha tautolu a amaamanakiaga, ke he lagi po ke ke he lalolagi, kua fakaaue a tautolu he tau aho oti ke he Atua he laveaki mai a tautolu he fakatokaaga kelea nei ne pouli kikio, ko e mena kua fakakatoatoa ai he ha tautolu a tua ke he mena uho ne foaki mai he poa lukutoto he Tama fakahele a Iehova. (Mataio 20:28) Kua moua mai ai he tau Kerisiano ne fakauku he agaga tapu e tau mena aoga he lukutoto ne fa e fakagahua ki a lautolu ke he puhala pauaki ke maeke ai a lautolu ke ‘ta atu ke he kautu he hana Tama fakahele.’ (Luka 22:20, 29, 30) Ka e moua foki he tau “mamoe kehe” e aoga he lukutoto ti pihia foki he magaaho nei. (Ioane 10:16) Kua maeke ia lautolu ke moua e fakamagaloaga he Atua ke maeke ai ke ha ha he tuaga tututonu ki mua hana he eke mo hana tau kapitiga. Kua lahi e vala gahua ha lautolu ke he tukuogoaga he “tala mitaki nai he kautu” he vaha fakahiku nei. (Mataio 24:14) Ke lafi ke he mena ia, kua ha ha ia lautolu e amaamanakiaga ne mahomo atu ke eke ke tututonu katoatoa mo e tino mitaki katoatoa, he fakahikuaga he Pule Afetau a Keriso. He totou e koe e fakamaamaaga ia Fakakiteaga 7:13-17, ligaliga to eke na koe ke talia ko e fakamoliaga na nei ke he laveakiaga mo e monuina.
18. Ko e heigoa e fakafeiloaga ne talahau mai ia Kolose ne fa e fakakatoatoa agaia he Atua?
18 Kua lagomatai he tohi a Paulo a tautolu ke iloa ko e lahi mahaki fefe e kaitalofa ha tautolu ke he tagata tane homo lahi mahaki ne kuelaia ke moui. Fakakatoatoa he Atua e heigoa he puhala mai ia Keriso? “Kia fakafeilo foki ia ia e tau mena oti mo ia, ha kua fakatupu ai e ia e mafola ke he toto he hana satauro; ia ia ni po ke tau mena ha he lalolagi, po ke tau mena ha he lagi.” Ko e finagalo he Atua ke liuaki e tau tufugatiaaga oti kana ke felauaki katoatoa mo ia, ke tuga fakamua ato hoko e totokoaga i Etena. Ko Ia ne fakaaoga ke tufugatia e tau mena oti kana ko Ia taha ia he magaaho nei ne fa e fakaaoga ke fakakatoatoa e fakafeiloaga nei.—Kolose 1:20.
Tuku Age e Malolo ma e Heigoa?
19, 20. Kua falanaki ke he heigoa ha tautolu a tuaga tapu mo e nakai fai kelea?
19 Kua lago e matagahua ia ki a lautolu ne ha ha ia tautolu kua fakafeilo ke he Atua. Fakamua ne agahala mo e mamutu kehe a tautolu mai he Atua. Ka ko e magaaho nei, he tuku e tua ke he poa a Iesu mo e nakai toka e tau loto manamanatu ha tautolu he tau gahua kelea, kua tutu ai a tautolu he tutuaga ‘tapu, kua nakai fai kelea, kua nakai fai mena foki ke fakahala ai ki mua he Atua.’ (Kolose 1:21, 22) Kia manamanatu la, ke tuga ni e Atua he nakai ma ha ko e tau fakamoli mahani fakamoli ia he vaha i tuai, ti kua nakai ma a ia ia tautolu, ke ui ki a ia ko e ha tautolu a Atua. (Heperu 11:16) He vaha nei, kua nakai maeke ia taha ke tukumale a tautolu ko e uta hehe hana higoa lilifu ue atu, po ke matakutaku a tautolu ke tukuogo e higoa ia ke he fakatulakiaga he lalolagi!
20 Ka e kia mailoga la e hatakiaga ne lafi mai e Paulo ia Kolose 1:23: “Kaeke ke tumau a mutolu ke he tua, kua fakamau, mo e mauokafua, ka nakai hiki a mutolu mai he amaamanaki ha he vagahau mitaki, ne fanogonogo a mutolu ki ai, ne fakamatala atu ke he tau tagata oti ke he lalolagi.” Ka kua lahi mahaki e mena ne falanaki ke he ha tautolu a fakatumau ke mahani fakamoli ki a Iehova, he muitua ke he tau tuagahui he Tama fakahele hana. Kua lahi mahaki e tau mena ne taute e Iehova mo Iesu ma tautolu! Kia fakakite ai e tautolu ha tautolu a fakaalofa ki a laua he mumuitua ke he fakatonuaga a Paulo.
21. Ko e ha kua fai kakano lahi mahaki ia tautolu he vaha nei ke fiafia lahi?
21 Liga fiafia lahi e tau Kerisiano Kolose he logona ko e ‘tala mitaki, ne fanogonogo a lautolu ki ai,’ kua fita he “fakamatala atu ke he tau tagata oti ke he lalolagi.” He vaha nei kua mua atu foki e fiafia lahi he logona ko e fefe e laulahi he fakamatalaga he tala mitaki he Kautu ne taute he Tau Fakamoli kua molea e fa mo e hafa e miliona ke he tau motu kua molea e 230. Ko e hanai, ke he tau tau takitaha kua teitei ke 300,000 mai he tau motu oti kana kua eke ke fakafeilo ke he Atua!—Mataio 24:14; 28:19, 20.
22. Pete ni foki kua matematekela a tautolu, ko e heigoa kua maeke he Atua ke taute ma tautolu?
22 Pete kua apitia moli a Paulo he fale pouli he magaaho ne tohi e ia e tohi ke he tau Kolose, ne nakai gugu a ia ke he taha mena ne ha ia ia. Kua kehe, he pehe a ia: “Kua fiafia au ainei ke he tau mena kua mamahi ai au ma mutolu.” Ne iloa moli e Paulo e kakano ke “fakauka katoatoa, mo e fakamanavalahi katoa mo e fiafia.” (Kolose 1:11, 24) Ka e iloa e ia nakai ni ko e malolo hana ti maeke ai a ia ke taute e mena nei. Ko Iehova ne taute a ia ke malolo lahi! Kua tatai ni pihia he vaha nei. Ko e tau afe he Tau Fakamoli ne kua tuku he fale pouli mo e favale ki ai, ne kua nakai galo ha lautolu a olioli ke fekafekau ki a Iehova. Kua kehe, kua eke a lautolu ke loto fakaaue lahi ke he kupu moli lahi he tau kupu he Atua ne kitia ia Isaia 40:29-31: “To foaki atu e ia e malolo kia lautolu kua lolelole . . . Ka ko lautolu kua tatali kia Iehova, to fakafou ai ha lautolu a malolo.”
23, 24. Ko e heigoa e kupu tapu galo ne talahau mai ia Kolose 1:26?
23 Ko e fekafekauaga he tala mitaki ne matapatu ki a Keriso ko e mena lahi mahaki ki a Paulo. Ne manako a ia ke loto fakaaue e falu ke he matafekau uho ha Keriso he finagalo he Atua, ti kua fakamaama ai e ia tuga “ko e kupu galo ia ne ufia tali mai he tau tau mo e tau hau kua mole atu.” Ka e nakai to eke tumau ai mo mena galo. Ne lafi mai e Paulo: “Ka ko e vaha nai kua fakakite mai ai ke he hana tau tagata tapu.” (Kolose 1:26) He magaaho ne hoko e totokoaga i Etena, ne age e Iehova e maveheaga ke he tau mena kua mua atu e mitaki ka hoko mai, he talahau tuai ko e ‘tega he fifine, to tatuki e ia e ulu he gata.’ (Kenese 3:15) Ko e heigoa e kakano he mena nei? Ke he tau atuhau, ke he tau senetenari, kua tumau ni mo mena nakai iloa. Ti hau ai a Iesu, mo e “fakamaama mai ke he vagahau mitaki e moui nakai tuai popo.”—2 Timoteo 1:10.
24 E, kua matapatu ki a Iesu mo e Kautu faka-Mesia e “kupu galo.” Ne talahau e Paulo e “tau mena ha he lagi,” ke hagaao ki a lautolu ia ka pule auloa he Kautu fakalataha mo Keriso. Kua aoga lahi a lautolu nai ke tamai e tau monuina loga mahaki ki a lautolu oti kana ko e “tau mena ha he lalolagi,” ko lautolu ka olioli ai he parataiso tukumalagi i hinai. Kua maeke ai a koe ke kitia kua lata tonu lahi ni, mogoia, ma Paulo ke vagahau hagaao ke he “koloa lahi he monuina ha he kupu galo nai.”—Kolose 1:20, 27.
25. Tuga he fakakite mai ia Kolose 1:29, kua lata ke fefe ha tautolu a tau aga he magaaho nei?
25 Ne fakatalitali lahi a Paulo ke he hana nofoaga he Kautu. Ka e iloa e ia nakai ko e mena nofo noa a ia ke leo ki ai. “Ko e mena foki ia kua gahua ai au mo e fakamalolo, ke lata mo e gahua hana kua gahua ai ni ki loto ia au mo e malolo.” (Kolose 1:29) Kitiala ko Iehova, he puhala mai ia Keriso, kua taute a Paulo ke malolo lahi ke fakakatoatoa e fekafekauaga fakahao moui. Kua maeke ai pihia a Iehova ke taute e mena taha ia ma tautolu he vaha nei. Ka kua lata na tautolu ke huhu hifo ki a tautolu ni, ‘Ha ha nakai ia au e agaga evagelia ne ha ha ia au he magaaho fakapa ne iloa e au e kupu moli?’ Ko e heigoa hau a tali? Ko e heigoa kua maeke ke lagomatai aki a tautolu takitokotaha ke fakatumau ke ‘gahua ai a tautolu mo e fakamalolo, ke lata mo e gahua ni he ha Iehova a malolo’? Ko e tala ne mui mai ka tutala ke he mena nei ni.
Mailoga Nakai e Koe?
◻ Maeke he ha a tautolu ke iloa moli ko e maeke a Iehova ke fakakite hana malolo ma e tau tagata?
◻ Ko e heigoa e kalakala he tuaga ati pihia ai e tau kupu a Paulo ia Kolose veveheaga 1?
◻ Fa e fakahoko fefe he Atua e fakafeiloaga ne talahau mai ia Kolose 1:20?
◻ Mai he hana malolo, ko e heigoa kua maeke ia Iehova ke fakakatoatoa he fakaaoga a tautolu?
[Mepe/Fakatino he lau 8]
(Ma e puhala katoa ne tohi aki, kikite e tohi)
KOLOSE