Hokotaki he Tau Tagata Fakapuloa he Kautu

Mua e Malolo a Iehova ke he Hana a Tau Fi

KUA leva tuai e lali he Tiapolo mo e hana tau temoni ke fakalavelave e fakamatalaaga he kupu mitaki, kakano ha ko e tau lotu fakavai mo e tau matutakiaga taulatua. Talahau mai e Tohi Tapu hagaao ke he manatu kelea ha Satani he 2 Korinito 4:4 he tohi i ai “kua fakapouli he atua he lalolagi nai e tau manatu ha lautolu kua nakai tua, neke kikila atu kia lautolu e maama he vahagau mitaki he lilifu a Keriso, ko ia kua fakatai ke he Atua.”

Ka e kua mua e malolo he Atua ko Iehova ke he ha Satani. Nakai fai mena e tau fi a Iehova ke taute ke fakaoti aki e kautuaga he hana finagalo faka-Atua, ke “fakamomoui e tau tagata oti kana, mo e hokotia a lautolu he maama ke he kupu moli.” (1 Timoteo 2:4) Kua fakakite mai he tau hokotaki ne mui mai he tau tagata fakapuloa i Ausetalia e mena nei.

◻ He molea e 20 tau he oti mai mo e lotu, ne liu e taha fifine ke kamata ke totou foki e Tohi Tapu. Kua fakafou he mena nei e fiafia ke he Tohi Tapu ti kua fakatupu a ia ke loga e tau huhu, ne liogi a ia ke he Atua ma e lagomatai ke moua e tau tali. Manako a ia ke kumikumi ke he kupu moli, ka e iloa e ia to nakai fai lagomatai e tau mena vihi hana ka liu atu ke he lotu tuai hana. Ka e, kua kamata e ia e kumikumi hana he aahi atu ke he fale koloa ne fakafua e tau tohi ne kua fita e fakaaoga mo e huhu ko e fai tohi nakai a lautolu hagaao ke he lotu.

Ne manatu he tagata he fale koloa ko e fai tohi fakalotu a ia, nakai he fale koloa, ka e haia i kaina. Ko e matapatu he tohi ko e You Can Live Forever in Paradise on Earth, ne tohi fakailoa he Tau Fakamoli a Iehova. Ne totou fakaave he fifine e tohi mo e moua e tau tali ke he loga he hana a tau huhu faka-Tohi Tapu. He mole e kumikumi he Tau Fakamoli a Iehova i loto he tohi telefoni, ke he mogo fakamui ne moua e ia a lautolu mo e kamata ai e fakaako tumau ke he Tohi Tapu.

◻ Taha fifine fuata ne fakaaoga e ia e tau lagomatai he nusipepa he matakavi ke fakatata e fakafua he amulete. Ko e fakatataaga kua hagaao ki ai ko e ‘amulete he vaha tuai ne kua mua atu e malolo.’ Taha he Tau Fakamoli a Iehova ne kitia e fakatataaga. Ne hea e ia e numela he telefoni ne toka ai mo e tala ke he fifine hagaao ke he punaaga he malolo ia he amulete. Ko e fakatutalaaga ke he onoonoaga he Tohi Tapu ke he tau gahua fakatemoni kua mui mai. Ne talahau he fifine fuata he amulete, ko e ne afi ni ne liogi a ia ke he Atua ma e lagomatai ke he hana tau mena vihi mo e tau temoni. Ti taute he Fakamoli e tau fakatokaaga ke fai tutalaaga foki ke he telefoni.

He magaaho ne hea a ia, nakai nofo e fifine fuata i kaina. Ne tali he matua fifine e telefoni mo e talahau: “Ailoa e au ko e heigoa ne tala age e koe ke he tama fifine haku, ka e ko e mena ne tupu ko e mana!” Ne talahau e ia he mogo fakamui, ne tolo oti he tama fifine hana e tau fakatino mo e tau tohi fakasatani ke he vao mo e kamata ke totou e Tohi Tapu.

Nakai leva he mole, kua taute e tau fakatokaaga ke ahiahi fakatagata atu ke he fifine fuata. Ne talia fakamafiti e ia ke fakaako tumau e Tohi Tapu mo e Tau Fakamoli a Iehova. Ne kamata foki a ia ke fakalataha atu ke he Tau Fakamoli he fina atu ke he tau feleveiaaga Kerisiano ha lautolu. Kua tumau agaia a Iehova ke fakakaumahala e tau temoni he fakakikila atu e iloilo tonu he kupu moli he Tohi Tapu.