Tau Mamatua mo e Fanau: Tuku Fakamua e Atua!
“Kia matakutaku a ke he Atua, mo e omaoma ke he hana tau fakatufono.”—FAKAMATALAAGA 12:13.
1. Ko e heigoa e matakutaku kua lata ke feaki he tau mamatua mo e fanau, mo e ko e heigoa ka tamai ki a lautolu?
KO E perofetaaga hagaao ki a Iesu Keriso kua pehe “to fiafia foki a ia ke he matakutaku kia Iehova.” (Isaia 11:3) Ko e hana a matakutaku kua lata tonu e fakalilifu katoatoa mo e ofoofogia he Atua, ko e matakutaku ke nakai fakaita e Atua ha kua fakaalofa a ia ki a ia. Kua lata e tau mamatua mo e fanau ke feaki pihia e matakutaku tuga a Keriso he Atua, ka tamai ki a lautolu e olioli lahi tuga ne hoko ki a Iesu. Kua lata ke tuku fakamua e lautolu e Atua ke he ha lautolu a tau momoui he omaoma ke he hana tau poakiaga. Hagaao ke he taha tagata tohi Tohi Tapu, “ko e mena ia kua lata ke eke he tau tagata oti kana.”—Fakamatalaaga 12:13.
2. Ko e heigoa e matapatu poakiaga aoga he Matafakatufono, mo e ki a hai kua mua atu e foaki ki ai?
2 Ko e poakiaga ne aoga lahi he Matafakatufono, ko e, kua lata ia tautolu ke ‘fakaalofa kia Iehova mo e ha tautolu a loto katoa, solu, mo e malolo katoa,’ kua foaki mua atu ke he tau mamatua. Kua fakakite e mena nei ha ko e tau kupu fakalaulahi atu he Matafakatufono: “Kia fakaako atu mau [e tau kupu nei hagaao ki a Iehova he fakaalofa] ke he hau a fanau, mo e vagahau ki ai, ka nofo a koe ke he hau a fale, ti pihia foki ka fano a koe ke he puhala, ti pihia foki ka takoto a koe, ti pihia foki ka matike ai a koe.” (Teutaronome 6:4-7; Mareko 12:28-30) Kua poaki ai foki ke he tau mamatua ke tuku fakamua e Atua he taute mua e lautolu e fakaalofa ki a ia mo e fakaako ha lautolu a fanau ke taute pihia.
Ko e Matagahua Kerisiano
3. Fakatata fefe e Iesu e aoga lahi he foaki e taha magaaho ke he fanau?
3 Kua fakatata e Iesu e aoga he foaki foki e magaaho ke he fanau ikiiki. Ke he taha magaaho teitei hoko atu ke he fakaotiaga he fekafekauaga a Iesu he lalolagi, kua kamata e tau tagata ke tamai ha lautolu a tau tama mukemuke ki a ia. Moli ai, he tua kua lavelave lahi a Iesu ke fakalavelave, kua lali e tau tutaki ke taofi e tau tagata. Ka e hataki e Iesu hana a tau tutaki: “Tokai e tau tama ikiiki ke o mai kia au, ti ua hataki e mutolu a lautolu.” “Ti kua nikiti ai e [Iesu] a lautolu he hana tau lima,” ko e fakakiteaga he puhala mafanatia e aoga he foaki taha magaaho ki a lautolu ne ikiiki.—Luka 18:15-17; Mareko 10:13-16.
4. Ko hai a lautolu ne tuku age e poakiaga ke “eke e tau motu oti kana mo tutaki,” mo e ko e heigoa a nei kua manako ki a lautolu ke taute?
4 Kua fakamahino foki e Iesu kua fai matagahua e tau tutaki hana ke fakaako e falu ne nakai ni ko e ha lautolu a fanau. He mole e mate mo e liu tu mai hana, ne “kitia ai a [Iesu ke he] tau matakainaga kua fakalataha ne tokolima e teau mo e tuma”—fakalataha ai e falu he tau mamatua. (1 Korinito 15:6) Kitia ai kua tupu e mena nei ke he mouga i Kalilaia ne ha ha i ai e tau aposetolo 11 hana kua fakapotopoto ai foki. I ai kua fakamafana e Iesu a lautolu oti: “Hanei, kia o atu a a mutolu ke eke e tau motu oti kana mo tutaki, . . . Ti fakaako atu a mutolu kia lautolu kia omaoma ke he tau mena oti ne tala atu e au kia mutolu.” (Mataio 28:16-20) Nakai fai Kerisiano kua tonu ke tiaki e poakiaga nei! Ma e tau mamatua tane mo e tau mamatua fifine ke taute ai kua lata ke leveki e lautolu ha lautolu a fanau ti pihia he gahua ke fakamatala ke he tau tagata mo e gahua fakaako.
5. (a) Ko e heigoa kua fakakite ko e laulahi, ka nakai ko lautolu oti, he tau aposetolo kua mau mo e liga ke fai fanau? (e) Ko e heigoa e fakatonutonuaga kua lata e tau ulu he magafaoa ke uta fakahokulo?
5 Mua ue atu ai, ti pihia foki e tau aposetolo kua lata ke lagotatai ha lautolu a tau matagahua he magafaoa mo e kotofaaga ke fakamatala ti pihia mo e leveki e fuifui mamoe he Atua. (Ioane 21:1-3, 15-17; Gahua 1:8) Ko e kakano hanei ko e laulahi, ka nakai, mau a lautolu oti. Ka e, fakamaama mai he aposetolo ko Paulo: “Nakai kia pule a mautolu po ke takitaki fano e mahakitaga, ko e hoana, tuga e tau aposetolo oti, mo e tau matakainaga he Iki, mo Kefa?” (1 Korinito 9:5; Mataio 8:14) Ko e falu aposetolo kua liga fai tama foki. Ko e tau tagata tohi tala tuai, tuga a Eusebius, ne talahau kua fai a Peteru. Ko e tau mamatua Kerisiano fakamua oti kua lata ke fanogonogo ke he fakatonutonuaga faka-Tohiaga Tapu: “Kaeke kua nakai leveki e taha hana faoa, ti au atu kia lautolu kua nonofo mo ia, kua fakatikai e ia e tua, kua mua foki hana kelea kia ia kua faliuliu.”—1 Timoteo 5:8.
Ko e Matagahua Mua Atu
6. (a) Ko e heigoa e mena uka ne ha ha i ai he tau motua Kerisiano ne fai magafaoa? (e) Ko e heigoa e matagahua mua atu he motua?
6 Ko e tau motua Kerisiano ne fai magafaoa he vaha nei kua ha ha ke he tuaga pihia ke tuga he tau aposetolo ia. Kua lata ia lautolu ke lagotatai ha lautolu a matagahua ke leveki ma e tau mena fakaagaga mo e fakatino he tau magafaoa ha lautolu mo e ha lautolu a kotofaaga ke fakamatala ke he tau tagata mo e leveki e fuifui mamoe he Atua. Ko e matagahua fe kua lata ke tuku fakamua? Kua fakakite mai he The Watchtower ia Mati 15, 1964: “Ko e kotofaaga fakamua [he matua tane] ko e hana a magafaoa, mo e ti nakai maeke moli a ia ke eke mo motua kaeke ke nakai, leveki fakamitaki e ia e kotofaaga nei.”
7. Tuku fakamua fefe he tau mamatua tane Kerisiano e Atua?
7 Ti ko e tau mamatua tane kua lata ke tuku fakamua e Atua he fanogonogo ke he poakiaga ‘kia leveki ai ke he fanau ha mutolu ke he kupu akonaki mo e tau kupu fakamafana ha Iehova.’ (Efeso 6:4) Ko e matagahua ia nakai maeke ke tuku age ke he taha tagata, pete ni kua fai gahua foki e matua tane ke leveki e tau gahua he fakapotopotoaga Kerisiano. Maeke fefe he tau mamatua tane pihia ke leveki ke he ha lautolu a tau matagahua—leveki fakatino, fakaagaga mo e manamanatuaga he tau tagata he magafaoa—mo e ke he magaaho taha, leveki mo e takitaki e fakapotopotoaga?
Foaki e Lagomatai kua Lata
8. Lagomatai atu fefe he hoana he motua a ia?
8 Maaliali ai, ko e tau motua ne ha ha i ai e tau matagahua he magafaoa to aoga lahi ha ko e lagomatai. Ko e Watchtower ne fatiaki mai luga kua talahau ko e hoana Kerisiano kua eke mo lagomatai ke he hana a tane. Kua pehe ai: “Kua maeke a ia ke taute fakamukamuka lahi ma e tane ke tauteute hana a tau gahua kehekehe, mo e lagomatai ke fakaata e tau magaaho uho ma hana mo ia foki he ha ha i ai e fakatokatokaaga mitaki ke he kaina, mau tuai e tau mena kai, mau tuai ke o ke he tau feleveiaaga he fakapotopotoaga. . . . I lalo hifo he takitakiaga he tane hana, kua lahi foki e mena ke taute he hoana Kerisiano ke fakamahani e fanau ke he puhala kua lata ke o ai ke fakafiafia a Iehova.” (Tau Fakatai 22:6) E, kua tufuga e hoana ke eke mo “lagomatai,” mo e to fakafeleveia mo e pulotu he hana a tane e hana a lagomataiaga. (Kenese 2:18) Ko e hana a lagomataiaga kua maeke ke fakamalolo aki a ia ke leveki fakamitaki lahi tokoua e hana a magafaoa mo e tau matagahua fakapotopotoaga.
9. Ko hai he fakapotopotoaga Tesalonia kua fakamalolo ke lagomatai e falu tagata he fakapotopotoaga?
9 Pete ia, nakai ni ko e tau hoana he tau motua Kerisiano hokoia ka fakalataha ke he gahua ke lagomatai e leveki ne maeke ke ‘leveki e fuifui mamoe he Atua’ mo e leveki ma e hana ni a magafaoa. (1 Peteru 5:2) Ko hai foki kua maeke? Kua fakamafana he aposetolo ko Paulo e tau matakainaga i Tesalonia ke fai fakalilifuaga ma lautolu ne “pule kia mutolu.” Ka e, hoko atu mo e talahau ke he tau matakainaga taha nei—fakatonu ki a lautolu ne nakai pule—ne tohi e Paulo: “Kua ole atu a mautolu kia mutolu, ko e tau matakainaga na e, kia tomatoma age a mutolu kia lautolu kua mahani hemu, kia fakamafana a lautolu kua manava tote, kia lagomatai kia lautolu kua lolelole, kia fakauka ke he tau tagata oti kana.”—1 Tesalonia 5:12-14.
10. Ko e heigoa e fua mitaki he lagomatai fakaalofa he tau matakainaga oti kua ha ha ke he fakapotopotoaga?
10 Ko e mitaki ha ia ka ha ha i ai he tau matakainaga he fakapotopotoaga e fakaalofa ke omoi a lautolu ke fakamafana a lautolu ne maanu, ke lagomatai a lautolu ne lolelole, kia tomatoma a lautolu ne mahani hemu, mo e ke fakauka ke he tau tagata oti kana! Ko e tau matakainaga i Tesalonia, ne nakai la leva e kuku mau e kupu moli he Tohi Tapu pete ni e matematekelea lahi, kua fakagahua e fakatonutonuaga a Paulo ke taute e mena nei. (Gahua 17:1-9; 1 Tesalonia 1:6; 2:14; 5:11) Manamanatu la ke he mena mitaki he ha lautolu a auloaaga ke he fakaalofa ne kua fakamalolo mo e fakalataha e fakapotopotoaga katoa! Tatai ai, he magaaho ke fakamafana, lagomatai, mo e tomatoma e tau matakainaga he vaha nei, kua taute e tau matagahua leveki he tau motua, ne fa fai magafaoa ke leveki ki ai, ke mukamuka lahi ke taute.
11. (a) Ko e ha kua tonu ai ke fakaoti ko e tau fifine kua putoia ke he kupu “tau matakainaga”? (e) Ko e heigoa e lagomatai he tau fifine Kerisiano motua ka taute ke he tau tamafine he vaha nei?
11 Kua putoia foki ke tau fifine he “tau matakainaga” ne kua talahau he aposetolo ko Paulo? E, kua putoia a lautolu, ha kua tokologa e tau fifine ne eke mo tau tagata tua. (Gahua 17:1, 4; 1 Peteru 2:17; 5:9) Ko e heigoa e faga lagomatai ka taute he tau fifine pihia? Kua ha ha i ai e tau tamafine ikiiki ke he tau fakapotopotoaga ne ha ha i ai e mena vihi he taofi ha lautolu a “tau manako fakatane mo e fifine” po ke kua eke ke “manava tote.” (1 Timoteo 5:11-13, fakatatai NW.) Ko e falu fifine he vaha nei kua fai mena vihi pihia. Ko e mena ne liga manako lahi a lautolu ki ai ke fai tagata ke fakateliga ke he ha lautolu a tau mena vihi mo e fakakite e fakaalofa hohofi. Fa mahani ko e fifine Kerisiano motua ko e tagata mitaki lahi ke foaki e lagomatai pihia. Maeke ia ia, ma e fakatai, tutala ke he tau mena vihi fakatagata mo e taha fifine ne nakai maeke he tagata tane Kerisiano tokotaha ke taute e ia. Liu talahau ai e uho he foaki e lagomatai pihia, ne tohi e Paulo: “Kia pihia foki e tau fifine motua, . . . kia eke mo tau akoako ke he tau mena mitaki; Kia fakaako a lautolu ke he tau tamāfine ke fakaalofa ke he tau tane ha lautolu, kia fakaalofa foki ke he tau fanau ha lautolu. Kia mahani fakalatalata a lautolu mo e nakai matagaoi, kia nonofo kaina, kia mahani mitaki, kia omaoma ke he tau tane ha lautolu, neke eke fakakelea e kupu he Atua.”—Tito 2:3-5.
12. Ha hai e hatakiaga kua aoga he fakapotopotoaga ke mumui oti ki ai?
12 Ko e fakamonuinaaga ha e tau matakainaga fifine fakatokolalo he fakapotopotoaga he magaaho ka lagomatai auloa e lautolu e tau tane ha lautolu mo e tau motua! (1 Timoteo 2:11, 12; Heperu 13:17) Ko e tau motua ne fai matagahua he magafaoa kua mua atu e aoga he magaaho ka auloa e tau tagata oti ke lagomatai e taha ke he agaga he fakaalofa mo e he magaaho ka omaoma oti ke he hatakiaga he tau leveki mamoe ne kua kotofa.—1 Peteru 5:1, 2.
Tau Mamatua, Ko e Heigoa Ha Mutolu Ka Tuku Fakamua?
13. Kaumahala fefe e tokologa he tau mamatua tane ke he ha lautolu a tau magafaoa?
13 He tau tau kua mole atu ha ha i ai e tagata fakafiafia talahaua ne kitekite: “Ne kitia e au e tau tagata kua kautu he pule ke he tau kamupani mo e tokoteau he tau tagata; ne iloa e lautolu ke fehagai mo e tau tuaga kehekehe, puhala ke akonaki aki mo e palepale ke he lalolagi fakapisinisi. Ka ko e pisinisi aoga lahi ne fa e taute e lautolu ko e ha lautolu a tau magafaoa mo e kua kaumahala ai a lautolu.” Ko e ha? Nakai kia ha kua tuku fakamua e lautolu e pisinisi mo e falu he tau mena mo e tiaki e fakatonutonuaga he Atua? Kua pehe e Kupu hana: “[Ko e] tau kupu nai kua poaki atu ai e au. . . . Kia fakaako atu mau ia ke he hau a fanau.” Ti ko e mena nei kua lata ke taute tumau ke he tau aho oti. Nakai lata ke foaki temotemoai he tau mamatua e ha lautolu a tau magaaho—mo e mua atu ke he fakaalofa ha lautolu mo e manamanatuaga hokulo.—Teutaronome 6:6-9.
14. (a) Leveki fefe e tau mamatua ke he ha lautolu a fanau? (e) Putoia e heigoa he fakamahani fakamitaki he fanau?
14 Kua fakamanatu mai he Tohi Tapu ki a tautolu ko e fanau mena moua mai ia Iehova. (Salamo 127:3) Kua leveki nakai e koe e fanau hau tuga ko e koloa he Atua, ko e mena fakaalofa ne tuku mai e ia ki a koe? To liga ke fanogonogo e tama hau ka uta e koe a ia ke he hau a tau lima, mo e fakatata ai e koe e fakaalofa lahi mo e magaaho. (Mareko 10:16) Ka e ke ‘fakaako e tama tane ke lata mo e hana puhala’ kua lahi atu e mena ne manako nakai ni ko e foaki he tau kuku mo e tau figita. Ke moua e pulotu ke kalo kehe mai he tau matahele he moui, kua lata foki e tama mo e akonaki fakamitaki. Ko e matua ne fakakite e fakaalofa moli he ‘akonaki tuai e ia hana tama.’—Tau Fakatai 13:1, 24; 22:6.
15. Ko e heigoa kua lata ma e akonaki fakamatua?
15 Ko e fua he akonaki fakamatua kua maeke ke kitia he fakamaamaaga he tagata leveki he aoga he fanau ne o mai ke he hana ofisa: “Kua lahi e fakaatukehe ha lautolu, mo e lolelole. Ne tagi a lautolu he vagahau hagaao ke he tuaga moli he tau mena. Loga—ti loga atu foki e mena ne liga manatu e taha—kua lali ke taupega, nakai he fiafia a lautolu ka e ha kua vihiatia lahi e lautolu ke fehagai ki ai; kua logona lahi e lautolu e momoko, kua nakai leveki, mo e tupetupe ha ko e he tau tau ikiiki pihia ‘kua pule’ na lautolu, mo e kua uka lahi mahaki ke fua.” Ne lafi e ia: “Ko e mena matakutaku ke he tagata tote ke logona kua hane fa e pule a ia ke he tau mena.” Moli, kua lali e fanau ke nakai fakateliga ke he akonakiaga, ka e fakaaue moli a lautolu ke he tau takitakiaga fakamatua mo e tau peehiaga malolo. Kua fiafia a lautolu kua lahi e leveki he ha lautolu tau mamatua ke fakatoka e fakakaupaaga ma lautolu. “Kua uta kehe e kavega mamafa he loto manamanatu haku,” he talahau he taha fuata mui he taute pihia he tau mamatua.
16. (a) Ko e heigoa e mena ne tupu ke he falu fanau ne feaki hake he tau kaina Kerisiano? (e) Ko e ha e puhala liuliu he tama kua nakai kakano ko e nakai mitaki e fakamahani ne foaki he tau mamatua?
16 Ka e, pete ia he fai mamatua ke fakaalofa ki a lautolu mo e he foaki e fakamahani mitaki, ko e falu he tau fanau ikiiki, tuga e tama moumou koloa he fakataitaiaga a Iesu, ne tiaki e takitakiaga fakamatua mo e hehe ai. (Luka 15:11-16) Ke he mena ia ni, ne nakai kakano e mena ia kua nakai fakamoli he tau mamatua ha lautolu a matagahua ke fakamahani e tama ha laua fakamitaki tuga ne tuhi ia Tau Fakatai 22:6. Ko e talahauaga “kia fakaako a e tama ke lata mo e hana puhala; nakai ni fano kehe ai a ia” kua foaki ai mo matafakatufono. Momoko ai, tuga e tama moumou koloa, ko e falu fanau to “vihiatia ke omaoma ke he matua.”—Tau Fakatai 30:17.
17. Ko e heigoa e fakamafanatia ke he tau mamatua he fanau liuliu?
17 Ne talahau he matua tane he tama tane liuliu: “Kua lali mo e lali au ke hoko ke he hana loto. Ne nakai iloa e au e mena ke taute kakano kua lali tuai au ke he loga he tau mena. Nakai fai mena ne kautu.” Amaamanaki ko e fanau liuliu pihia ka, hoko ke he magaaho, ti liu manatu e fakamahani fakaalofa ne moua e lautolu mo e liliu mai tuga e tama moumou koloa. Kua tumau ai e moli, ko e to totoko falu fanau mo e taute e tau mena kelea ke fakamamahi lahi aki e tau mamatua ha lautolu. Kua liga moua he tau mamatua e fakamafanatia he iloa kua pihia foki e faiaoga mua ue atu ne moui ke he lalolagi he kitia e tama fakaako hana kua leva ko Iuta Isakariota kua afo a ia. Ti nakai fakauaua kua momoko foki a Iehova ha ko e tokologa he hana ni a tau peresona agaga kua tiaki e hana a fakatonutonuaga mo e eke mo totoko ke he nakai fai mena hehe he Hana a vala.—Luka 22:47, 48; Fakakiteaga 12:9.
Fanau—Ko Hai ha Mutolu ka Fakafiafia?
18. Fakakite fefe he fanau kua tuku fakamua e lautolu e Atua?
18 Ne fakamafana e Iehova a mutolu ne ikiiki: “Kia omaoma ke he tau matua ha mutolu ke he Iki.” (Efeso 6:1) Kua taute he tau tagata ikiiki e mena nei he tuku fakamua e Atua. Kia aua neke goagoa! “Kua tiaki he tagata goagoa e fakaakoaga he hana matua tane,” he talahau he Kupu he Atua. Nakai lata ia koe foki ke tali manatu mo e fakatokoluga kua nakai lata a koe ke fai akonaki. Ko e mena moli “kua ha ha i ai e atuhau ne kua mea e tau mena ki mua he tau mata ni ha lautolu, ka e nakai fakamea ha lautolu a kelea muikau.” (Tau Fakatai 15:5; 30:12, American Standard Version) Ti kia taute e hatakiaga faka-Atua—“fanogonogo” ki ai, “mo e toka ai,” “aua neke nimo,” “hahaga mai” ke he, “kia omaoma,” mo e “ua tiaki” e tau poakiaga mo e akonaki he tau mamatua.—Tau Fakatai 1:8; 2:1; 3:1; 4:1; 6:20.
19. (a) Ko e heigoa e tau kakano malolo lahi ma e fanau ikiiki he omaoma ki a Iehova? (e) Fakakite fefe e lautolu ne fuata kua fakaaue a lautolu ke he Atua?
19 Kua ha ha ia koe e tau kakano malolo lahi ke omaoma ki a Iehova. Kua fakaalofa a ia ki a koe, ti atu e ia hana a tau matafakatufono, taha ai foki e matafakatufono ma e fanau ke omaoma ke he ha lautolu a tau mamatua, ke puipui a koe mo e ke lagomatai a koe ke olioli e moui fiafia. (Isaia 48:17) Kua foaki foki e ia hana Tama ke mate ma hau ti ke maeke a koe ke fakahao mai he agahala mo e mate mo e olioli e moui tukulagi. (Ioane 3:16) Fakaaue lahi nakai a koe? Hane onoono mai a Iehova he lagi, kumikumi e loto hau ke kitia ko e fakaalofa moli nakai a koe ki a ia mo e fakaaue ke he hana a tau foakiaga. (Salamo 14:2) Hane onoono foki a Satani, ti fakafiufiu e ia e Atua, talahau ai to nakai omaoma a koe ki a Ia. Kua fakafiafia e koe a Satani mo e “fakahukia” a Iehova he magaaho ka liuliu a koe ke he Atua. (Salamo 78:40, 41) Ne ole atu a Iehova ki a koe: “Haku tama na e, kia iloilo ai a koe, kia fiafia ai haku loto [he omaoma ki a au]; kia fai kupu au ke tali age kia ia kua fakafiu mai kia au.” (Tau Fakatai 27:11) E, ko e huhu ko e, Ko hai hau ka fakafiafia, ko Satani po ko Iehova?
20. Tumau fefe e taha fuata ke malolo ke fekafekau ki a Iehova pete ni he magaaho ka matakutaku a ia?
20 Nakai mukamuka ke taute e finagalo he Atua ke he tau kamatamata ne kua pehi e Satani mo e hana a lalolagi ki luga ia koe. Maeke ke fakamatakutaku. Ne talahau he taha fuata: “Ke matakutaku kua tuga e makalili. Kia taute e koe taha mena ki ai.” Ne fakamaama e ia: “Ka makalili a koe, tui e koe e miti mafana. Ka makalili agaia a koe, liu a koe tui foki e taha. Ti fakatumau ni a koe ke tui taha mena ato galo e makalili mo e nakai liu a koe ke makalili foki. Ti ko e liogi ki a Iehova he magaaho ka matakutaku a koe kua tuga e tui he miti mafana ka makalili a koe. He mole e liogi fakamua haku ti matakutaku agaia au, ne liu foki au liogi, liu foki, ti liu foki, ato nakai liu au ke logona e matakutaku. Ti gahua ai. Kua taofi mai au he mena vihi!”
21. Lagomatai fefe e Iehova a tautolu kaeke ke lali moli a tautolu ke tuku fakamua a ia ke he ha tautolu a tau momoui?
21 Ka lali moli a tautolu ke tuku fakamua e Atua ke he ha tautolu a tau momoui, to lagomatai e Iehova a tautolu. To fakamalolo e ia a tautolu, he foaki e lagomatai fakaagelu he magaaho kua lata, tuga he taute foki e ia ke he hana a Tama. (Mataio 18:10; Luka 22:43) Kia fakamalolo a mutolu oti ma tau mamatua mo e fanau. Kia moua e matakutaku tuga a Keriso, mo e to tamai ki a koe e olioli lahi. (Isaia 11:3) E, “kia matakutaku a ke he Atua, mo e omaoma ke he hana tau fakatufono; ha ko e mena ia kua lata ke eke he tau tagata oti kana.”—Fakamatalaaga 12:13.
Maeke Nakai Ia Koe ke Tali?
◻ Ko e heigoa e tau matagahua kua lata he tau tutaki fakamua a Iesu ke lagotatai?
◻ Ko e heigoa e matagahua kua lata e tau mamatua Kerisiano ke fakamoli?
◻ Ko e heigoa e lagomatai kua lata ke he tau motua Kerisiano ne fai magafaoa?
◻ Ko e heigoa e gahua uho ma e tau matakainaga fifine ke taute he fakapotopotoaga?
◻ Ko e heigoa e fakatonutonuaga mo e hatakiaga kua aoga lahi ma e fanau ke taute?
[Fakatino he lau 27]
Fa mahani e fifine motua Kerisiano ke foaki ke he tamafine e lagomatai kua lata
[Fakatino he lau 29]
Ko e heigoa e fakamafanatia ke he tau mamatua mo e fanau liuliu ne moua mai he tau Tohiaga Tapu?