Fakaalofa e Atua ki a Koe

KO MARY ko e fifine Kerisiano ne teitei ke limagofulu e tau tau he moui mo e kua matematekelea lahi mahaki foki hana moui. Kakano he mahani faivao e tane hana kua leva e tau vevehe ti kua molea ai e hogofulu he tau tau he nonofo kehekehe a laua. Tali mai he magaaho ia, ne taufetului a Mary ke fakakatoatoa hana matagahua he matua fifine nofo noa ke he fanau tokofa hana. Kakano he nofo noa agaia a ia, kua eke ai e matimati kelea lahi he falu magaaho ke uka lahi ke fua. Ti kua manamanatu ai a Mary, ‘Ko e kakano kia e mena nei ko e nakai fakaalofa mai e Atua ki a au po ke haku fanau nakai fai matua tane?’

Pete ni ko e hoko ki a koe e taha matematekelea pihia po ke nakai, mena maeke moli ia koe ke logona hifo e tau logonaaga he loto a Mary. Kua fakauka a tautolu oti ke he tau tutuaga uka, mo e kua liga manamanatu foki ni a tautolu ko e to taute a fe mo e to taute fefe e Iehova taha mena ke lagomatai aki a tautolu. Ko e falu he tau mena tutupu nei ko e fua mai ni he tapiki a tautolu ke he tau matafakatufono he Atua. (Mataio 10:16-18; Gahua 5:29) Ka ko e falu mena moua ai ha ko e tau tagata nakai mitaki katoatoa a tautolu ne nonofo he lalolagi kua pule a Satani ki ai. (1 Ioane 5:19) Ne tohi he aposetolo ko Paulo: “Kua oi fakalataha mo e mamahi fanau fakalataha e tau mena oti ne eke.”​—Roma 8:22.

Ka e pete ni, ha kua fehagai moli a koe mo e tau mena uka lahi mahaki kua nakai pehe e mena ia kua tiaki e Iehova a koe po kua nakai tuai fiafia ke he tau mena hau. Ti maeke fefe mogoia a koe ke iloa moli e mena nei? Kua fakakite mai he heigoa ko e fakaalofa e Atua ki a koe?

Fakafifitakiaga i Tuai

Kua foaki mai he Tohi Tapu e fakamoliaga maaliali ke he fakaalofa a Iehova ke he tau tagata takitokotaha. Kia manamanatu la ki a Tavita. Kua fiafia pauaki a Iehova ke he leveki mamoe fuata nei, kua kitia a ia ko e “tagata māna ke lata mo e hana finagalo.” (1 Samuela 13:14) Fakamui, he magaaho ne pule a Tavita ko e patuiki, ne mavehe a Iehova ki a ia: “Ti ha i ai au mo koe ke he tau mena oti ne fano a koe ki ai.”​—2 Samuela 7:9.

Ko e kakano kia he mena nei ko e moui a Tavita ko e “mana,” ti tokanoa mai ai he tau mena uka? Nakai, ne fehagai a Tavita mo e tau mena uka lahi mahaki he magaaho fakamua mo e he vaha ne pule a ia. Ke he tau tau loga to eke mo patuiki, ne tatao tumau ni he Patuiki ko Saulo a ia he fia kelipopo. Ko e magahala nei he moui hana, ne tohi e Tavita: “Ko au nai, ha he vaha he tau leona au; . . . ko e tau tagata ni, ko e tau nifo ha lautolu ko e tau tao mo e tau fana ia.”​—Salamo 57:4.

Ka e eke agaia ni a Tavita he vaha matematekelea nei ke tua lahi ko e fakaalofa mai ni a Iehova. “Kua totou ni e koe haku a tau fehola fano,” he tala age e ia he liogi ki a Iehova. E, ki a Tavita kua tuga ai ko e tohia e Iehova e tau matematekelea oti ia. Ne pehe foki a Tavita: “Kia utu haku a tau hihina mata ke he hāu a lupo; nakai kia ha ha he tohi hāu?”a (Salamo 56:8) Mai he fakataiaga nei, kua fakailoa ai e Tavita ko e tua lahi a ia ko e kitia e Iehova nakai ko e tuaga ni hokoia ka e ko e pehiaaga foki he mena ia ke he hana loto.

He maga fakahiku he moui hana, kua maeke ai a Tavita ke tohi mai he hana ni a tau mena tutupu: “Ko Iehova ne kotofa e fanoga he tagata; to fiafia foki a ia ke he hana puhala. Kaeke ke veli a ia, ti nakai takaveli ni; ha kua toto e Iehova hana lima.” (Salamo 37:23, 24) Kua maeke foki a koe ke tua lahi, pete ni ko e hokohoko tumau e tau mena uka mo e ke he vaha loa foki, na kitia e Iehova mo e kua uho hau a fakauka ki a ia. Ne tohi e Paulo: “Ha ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa, kua fekafekau tuai a mutolu ke he tau tagata tapu mo e fekafekau agaia ki ai.”​—Heperu 6:10.

Ko e taha mena foki, maeke ia Iehova ke gahua ma hau he foaki atu ki a koe e malolo ke fakauka pete ni ko e heigoa mo e heigoa e tau mena fakatupetupe kua tuku ki mua he hau a puhala. “Loga e tau mena kelea ke hohoko ke he tagata tututonu,” he tohia e Tavita, “ka e laveaki e Iehova a ia mai he tau mena oti ia.” (Salamo 34:19) Kua moli, kua talahau he Tohi Tapu ki a tautolu ko e tau mata a Iehova “kua o tafeliuaki ai ke he lalolagi oti, ke lagomatai kia lautolu kua katoatoa ha lautolu a tau loto kia ia.”​—2 Nofoaga he Tau Patuiki 16:9.

Futiaki Mai e Iehova a Koe

Kua kitia ai foki e falu fakamoliaga ke he fakaalofa a Iehova mai he tau kupu a Iesu. “Nakai maeke ia taha ke hau kia au,” he talahau e ia, “ka nakai futia mai he Matua ne fakafano mai au.” (Ioane 6:44) E, kua lagomatai e Iehova e tau tagata takitokotaha ke fakaaoga fakamitaki e tau mena aoga he poa a Keriso. Fefe? Kua taute lahi ai, he puhala mai he gahua fakamatala he Kautu. Moli, kua eke ne gahua nai mo “talahau ke he tau atu motu oti,” ti ko e mena hokotia atu ke he tau tagata takitokotaha. Kua moli kakano ha kua fanogonogo mo e talia a koe ke he fekau he tala mitaki ia, ko e fakamoliaga haia ko e manamanatu lahi ni a Iehova ki a koe.​—Mataio 24:14.

Kakano ha ko e agaga tapu, ne futiaki mai e Iehova e tau tagata ke he hana Tama mo e amaamanakiaga he moui tukulagi. Kua taute ai he mena nei a lautolu takitokotaha ke maama mo e fakagahua e tau kupu moli fakaagaga pete ni kua fakataukalau mai he tau kaupaaga mo e nakai mitaki katoatoa he tupuaga he tagata. Kua moli, nakai maeke ia taha ke maama e tau finagalo he Atua ka nakai moua e lagomataiaga he agaga he Atua. (1 Korinito 2:11, 12) Tuga he tohia e Paulo ke he tau Tesalonia, “ha ko e mena nakai ha he tau tagata oti kana e tua.” (2 Tesalonia 3:2) Kua foaki age ni e Iehova hana agaga ki a lautolu ne fakakite ko e manako lahi mahaki ke futiaki mai e ia.

Futiaki mai e Iehova e tau tagata kakano he fakaalofa a ia ki a lautolu takitokotaha mo e manako ke moua e lautolu e fakamouiaga. Ko e fakakiteaga mauokafua moli ko e fakaalofa ni a Iehova! Ne pehe a Iesu: “Pihia foki ha mutolu a Matua ha ha he lagi, kua nakai finagalo a ia kia mate taha ia lautolu nai kua fakateaga.” (Mataio 18:14) E, ke he tau mata he Atua kua aoga oti e tau tagata kehekehe takitokotaha. Ko e mena haia ne maeke ai a Paulo ke tohi: “Ko ia ke ta age ke he tau tagata takitokotaha e taui kua lata mo e ha lautolu a tau gahua.” (Roma 2:6) Mo e pehe e aposetolo ko Peteru: “Nakai fakamailoga tagata e Atua. Ka ko e tau tagata [takitokotaha] he tau motu oti kana ne matakutaku kia ia mo e mahani tututonu, kua talia ai e ia.”​—Gahua 10:34, 35.

Ko e Tau Mana a Iesu

Kua amotia lahi e fiafia pauaki ni he Atua ke he tau tagata ne kua fakakite mai he tau mana ne taute he hana Tama, ko Iesu. Kua taute fakalataha ni e tau fakamauluaga nei mo e logonaaga hokulo. (Mareko 1:40, 41) Ha ko e mena ‘nakai maeke a Iesu ke eke taha mena, ko ia ni hokoia; ka ko e tau mena ne kikite ia ke he Matua ha ne eke,’ ti kua fakakite mai ai he fakaalofa hohofi hana e fakatino amotia lahi ke he manamanatu fakaalofa a Iehova ke he tau fekafekau takitokotaha hana.​—Ioane 5:19.

Kia manamanatu la ke he tala he mana ne taute e Iesu, ne fakamau ia Mareko 7:31-37. I ai ne fakamaulu e Iesu e tagata tane teliga tuli mo e auhia he kuhukuku. Ne “takitaki age e ia e [tagata tane] tokotaha mai he tau tagata,” he tala mai he Tohi Tapu. Ti, “kitekite hake a ia ke he lagi, kua oi; ti tala age a ia kia ia, Efata; ko e hana kakano hanai, kia hafagi.”

Uta kehe he ha e Iesu e tagata tane nei mai he moto tagata tokologa? Liga neke maimaina e tagata teliga tuli ka ha ha i mua he tau tagata kitekite kakano he nakai maeke lahi ke vagahau. Liga kua mailoga e Iesu ko e nakai hagahaga mitaki e loto he tagata tane nei, mo e ko e mena haia ne eke ai a ia ke fifili ke fakamaulu a ia he mena galo. “Ko e tala katoa,” ke he kitekiteaga he taha tagata fakaako tokoluga ke he Tohi Tapu, “ko e mena kua fakakite fakamaaliali lahi mai ki a tautolu ko e nakai manamanatu fakateaga a Iesu ko e tagata tane ke fakaaoga noa; kua onoono a Iesu ki a ia ko e tagata. Ko e tagata tane fai manako pauaki mo e fai lekua pauaki, mo e taute ai e Iesu fakalataha mo e manamanatuaga molu lahi mo ia ke nakai moumou e tau logonaaga he loto he tagata tane mo e ke he puhala kua maeke he tagata tane ke maama.”

Kua fakakite mai ai he tala nei ko e manamanatu lahi ni a Iesu ke he tau tagata. Kua maeke moli ia koe ke kitia ko e fiafia pauaki foki a ia ki a koe. Moli, ko e poa he mate hana, ko e fakakiteaga he fakaalofa ke he lalolagi katoa he tau tagata kua maeke ke laveaki mai. Ka e, maeke foki ia koe ke eke mau ni e mena ia, tuga ne taute e Paulo, ne tohi: ‘Ko e Tama he Atua . . . ne fakaalofa mai kia au, mo e foaki mai e ia a ia ke hukui aki au.’ (Kalatia 2:20) Mo e kakano ha kua tohia e Iesu ‘ko ia kua kitia a ia, kua kitia ai foki e ia e Matua,’ kua maeke ia tautolu ke iloa tonu ko e tatai ni pihia e fiafia pauaki a Iehova ke he tau fekafekau oti hana.​—Ioane 14:9.

Kua Eke a Iehova mo Foaki Palepale

Kua putoia ai he fakaakoaga ke he iloilo he Atua ke lata ke iloa oti e tau aga fakatagata hana tuga ne fakakite mai he Tohi Tapu. Ko e kakano he higoa a Iehova “Ko Ia ne Taute ke Tupu Moli,” ko e mena kua fakahaha mai ko e maeke ia Iehova ke eke mo ha mena ne fifili a ia ki ai ke hokotia ai hana finagalo ke fakamoli. Mai he fakamauaga tala tuai katoa, kua taute e ia e tau matagahua kehekehe, ne ha ha ai foki a lautolu nei, ko e Tufuga, Matua, Iki Pule Katoatoa, Leveki Mamoe, Iehova Sapaota, Fanogonogo Liogi, Fakafili, Faiaoga Homo ue Atu, mo e ko e Liu Fakafua mai.b

Ke moua lahi e fakaaue ke he kakano he higoa he Atua, kua lata foki ia tautolu ke iloa e matagahua Foaki Palepale a Iehova. Ne tohi e Paulo: “Ka nakai tua, ti nakai maeke ke fakafiafia kia ia; ha ko e mena lata ia ia kua fina atu ke he Atua ke talia kua moui a ia, ko ia foki kua taui mai a lautolu kua kumi fakamakutu kia ia.”​—Heperu 11:6.

Kua mavehe a Iehova ke tuku age e moui tukulagi he lalolagi parataiso ki a lautolu he vaha nei ne fifili ke fekafekau mo e loto katoa ki a ia. Nakai ko e mahani lotokai ke amaamanaki ke he fakamoliaga he maveheaga homo ue atu ia, po ke mahani ohooho ke kitia ke he hau a manamanatuaga a koe ne nofo i ai. Ha ko Mose, “manamanatu a ia ke he t[a]ui.” (Heperu 11:26) Ne nofo tauteute pihia foki a Paulo ke he fakamoliaga he maveheaga he Atua ma e tau Kerisiano fakauku ne mahani fakamoli. Ne tohi e ia: “Kua poi mau atu au ke he fakamailoga ke moua ai e palepale ne ui mai ai e Atua mai luga kia au ha ia Keriso Iesu.”​—Filipi 3:14.

Kua maeke foki ia koe ke amaamanaki lahi ke he palepale ne mavehe mai e Iehova ki a lautolu ne fakauka. He nofo tauteute ke moua e palepale ko e vala lahi he hau a iloilo ke he Atua mo e hau a fakaukaaga ke taute hana fekafekauaga. Ti manamanatu fakahokulo ai he tau aho oti ke he tau fakamonuinaaga a Iehova ne fakatalitali mai ki a koe. Ko Mary, ne talahau mai he kamataaga, kua taute pauaki e laliaga ke taute e mena nei. “Ko e e laia he moui haku,” he talahau e ia, “he magaaho ku kua mole ke talia e au ko e hagaao foki e poa lukutoto a Iesu ki a au. Ne kamata tuai au ke logona ko e fakaalofa mai a Iehova ki a au ha ko au ni. Kua molea e 20 he tau tau he eke au ko e Kerisiano, ka e kamata moli laia au he magaaho ku kua mole ke tali tonu ke he mena nei.”

Mai he fakaakoaga mo e manamanatu fakahokulo lahi e loto katoa ke he Tohi Tapu, kua eke ai a Mary, fakalataha mo e tau miliona foki falu ke iloa ko e fakaalofa a Iehova ke he tau tagata hana, nakai ni fakamatakau ka e pihia foki ke he tau tagata takitokotaha. Kua tua lahi e aposetolo ko Peteru ke he mena nei kua tohia e ia: “Kia tuku atu [ke he Atua] e tau mena oti kua fakaatukehe ai a mutolu, ha ko e mena kua manatu e ia a mutolu.” (1 Peteru 5:7) E, kua fakaalofa e Atua ki a koe!

[Tau Matahui Tala]

[Puha he lau 6]

Liu Tu Mai—Ko e Fakamoliaga ko e Fakaalofa e Atua

KUA moua i loto he Tohi Tapu ia Ioane 5:28, 29 e fakamoliaga mauokafua ke he fiafia pauaki he Atua ke he tau tagata takitaha: “Ha ko e mena hoko ke he aho ke logona ai ke he hana [Iesu] leo a lautolu katoa ha he tau tukuaga, mo e o mai ai.”

Kua fakamanamanatu lahi, ha ko e kupu Heleni ne fakaaoga he mena nai ko e mne·meiʹon (tukuaga mau he fakamanatuaga), ka e nakai ko e taʹphos (tukuaga). Kua fakakite mai ni he kupu taʹphos e manatu ke he tanuaga noa. Ka e talahau mai he mne·meiʹon kua manatu e fakamauaga he moui he tagata ne mate.

Hagaao ke he mena nei, kia manamanatu la ke he mena kua lata e Atua ko Iehova ke taute he liu tu mai. Ke liuaki mai e tagata ke moui, kua lata ia Iehova ke iloa e tau mena oti hagaao ke he tagata ia​—­fakalataha mo e tau aga pauaki he tagata tane po ke fifine mai he tupuaga fakalataha mo e manamanatuaga katoatoa. Ko e mena naia ka maeke e tagata ke liu ke tuga ni fakamua.

Kua moli, kua nakai fakaai e mena nei ke he onoonoaga he tagata, ka e “maeke ke he Atua e tau mena oti kana.” (Mareko 10:27) Kua maeke foki he Atua ke iloa e mena ne toka he loto he tagata. Pete ni foki kua loga e tau senetenari ne mate e tagata, kua nakai nimo he Atua a ia; kua nakai galo. (Iopu 14:13-15) Ti ko e magaaho ne tokutoku a Aperahamo, Isaako, mo Iakopo, kua maeke foki a Iesu ke talahau pete ni kua loga e tau senetenari kua mole mai he mamate a lautolu, ko Iehova “nakai ko e Atua a ia ha lautolu kua mamate, ka ko lautolu kua momoui; ha ko e mena kua momoui oti ia ia.”​—Luka 20:38.

Ti ko e tau piliona ne mamate kua ha ha ai he manamanatuaga he Atua ko Iehova ti katoatoa fakamatafeiga ai. Ko e fakamoliaga fulufuluola lahi, ko e fakaalofa e Atua ke he tau tagata takitokotaha!

[Fakatino he lau 7]

Ne manamanatu lahi pauaki ni a Iesu ki a lautolu ne fakamaulu e ia