Taute e Fakamanatuaga mo e Lata

KO E magaaho afiafi he aho Nisana 14, 33 V.N., ne fakatu e Iesu e Fakamanatuaga.a Ko e oti laia he taute e ia e Paseka mo e hana tau aposetolo 12, ti iloa moli ai e tautolu e aho. He mole he toka e afokau ko Iuta ke fano, ne “toto ai e Iesu e areto, mo e fakaaue, ti tofitofi, mo e age ai kia lautolu, kua pehe age, Kia toto a, ti kai; ko e haku a tino a enei. Kua toto foki e ia e kapiniu, mo e fakaaue; ti age ai kia lautolu, ti inu ai a lautolu oti kana. Ne tala age foki a ia kia lautolu, Ko e haku a toto a enei, ko e toto he maveheaga fou, kua fakamaligi mo e tau tagata tokologa.”​—Mareko 14:22-24.

Ne poaki a Iesu ke he hana tau tutaki ke fakamanatu hana mate kakano ha ko e mena aoga lahi. (Luka 22:19; 1 Korinito 11:23-26) Ko e poa ni hana kua maeke ke lukutoto aki e tau tagata mai he malaia ne tupu mai he hala mo e mate. (Roma 5:12; 6:23) Ko e falaoa mo e uaina ne fakaaoga e ia ko e tau mena fakatai ni ke he hana tino mitaki katoatoa mo e hana toto. Kua iloa e aho moli, ti maeke ai a tautolu ke fakamanatu e magaaho ia he aho ne tatai ki ai he tau tau oti, tuga ne fa taute aki e Paseka Iutaia. Ka e kua lata a tautolu ke taute ai mo e lata. Ko e ha?

Kua pehe e aposetolo ko Paulo ko lautolu ne kai mo e inu e tau mena fakatai ia ko e falaoa mo e uaina kua lata ke ‘fakailoa atu e lautolu e matulei he Iki, ato haele mai a ia.’ (1 Korinito 11:26) Kua ono lahi ai e fakamanatuaga ke he matulei a Iesu mo e hana kakano ma e tau tagata. Ti kua lata ke fakalilifu lahi ki ai, ko e magaaho ke manamanatu hifo fakalahi ke he mahani mitaki he Atua mo e ke he fakaaueaga kua lata ke ha ha ia tautolu ki a Iehova mo e hana Tama. (Roma 5:8; Tito 2:14; 1 Ioane 4:9, 10) Ha ko e mena ia, ne hataki mai a Paulo: “Hanai, ko ia kua kai e areto nai, po ke inu e kapiniu he Iki ka e nakai lata, kua lata kia ia e hala ha ko e tino mo e toto he Iki.”​—1 Korinito 11:27.

Lata​—Fefe?

Kua kitia moli, ko e nakai fiafia e Atua ka holimafafo e magaaho ia he taute e tau mena kelea po ke fifitaki ke he tau aga fakamotu pouliuli. (Iakopo 1:27; 4:3, 4) Kua hagaao foki e mena nai ke he tau mena tutupu talahaua he vaha Isita. Ko e muitua ke he hatakiaga a Iesu ke ‘eke e mena nai mo fakamanatuaga ki a ia,’ kua lata a tautolu ke manako ke taute e Fakamanatuaga ke tuga ni e mena ne fakatu e ia. (Luka 22:19; 1 Korinito 11:24, 25) Kua nakai fakaata ai he mena nei e tau mena fakafiafia ne kua lafi ki luga ke he fakamanatuaga ne taute he tau lotu a Kerisitenitome. Kua talahau tonu ai he New Catholic Encyclopedia, ko e “Fakamanatu he vaha nei ko e mena kehe lahi mahaki mai he fakamanatuaga mukamuka lahi ne muitua a Keriso mo e Hana tau Aposetolo ki ai.” Mo e he fa taute mau e Fakamanatu, he tau aho takitaha foki, kua fano kehe ai a Kerisitenitome mai he mena ne manako a Iesu ki ai mo e taute ai mo mena noa ni.

Kua tohia a Paulo ke he tau Kerisiano Korinito hagaao ke he kai mo e inu kua nakai lata kakano ha kua tupu e lekua he fakapotopotoaga hagaao ke he Kaiaga Mena Afiafi he Iki. Kua nakai fakalilifu e falu tagata ko e mena fakatapuina. Kua tamai he falu ha lautolu a tau mena kai afiafi mo lautolu mo e kai mua ai po ke he magaaho ka taute e feleveiaaga. Kua mahani lahi a lautolu ke kai fua mo e inu ti molea. Kua taute ai he mena nai a lautolu ke fia momohe mo e mateafu ha lautolu a tau logonaaga. Kakano he nakai ala e tau manamanatuaga mo e nakai ala fakaagaga, kua ‘nakai mailoga e lautolu e tino,’ mo e kua eke ai ke “hala ha ko e tino mo e toto he Iki.” Ka ko lautolu ne nakai kai to o, kua hoge ati eke mo lavelave. Kua teitei ke nakai fai ia lautolu ia kua tutu mitaki ke inu mo e kai e tau mena fakatai mo e fakaaue mai ai katoatoa he loto ke he kakano uho lahi he magaaho ia​—ko e taute e fakamanatuaga ha ko e matulei he Iki. Kua fua mai ai he mena nei e fakafiliaga ki a lautolu, ha kua fakakite e lautolu e mahani nakai fakalilifu, mo e vihiatia foki, ki ai.​—1 Korinito 11:27-34.

Kua Lata mo e Loto Matala

Kua kai mo e inu he falu e tau mena fakatai he Fakamanatuaga ato eke ai he magaaho fakamui, ke mailoga ko e mena nakai lata a lautolu ke taute pihia. Ka ko lautolu ne kai mo e inu e tau mena fakatai he Fakamanatuaga mo e tonu ha ko e mena fifili he Atua mo e kua fakamoli atu ai e agaga he Atua ke he mena ia. (Roma 8:15-17; 2 Korinito 1:21, 22) Nakai ko e ha lautolu ni a fifiliaga po ke manako lahi ka lata ai a lautolu. Kua fakakaupa he Atua e numela ha lautolu ka pule fakalataha mo Keriso i luga he lagi ke he ­144,000, ko e numela tote lahi ka fakatatai mo lautolu ne moua e aoga he lukutoto a Keriso. (Fakakiteaga 14:1, 3) Kua kamata e fifiliaga he vaha a Iesu, ti ko e mena haia ne kua fiha ai a lautolu ne kai mo e inu he vaha nei. Mo e tuga ni he hoko e mate ke he falu ha lautolu, kua lata ne numela ia ke to hifo.

Liga ko e ha ai kua hepe ai e taha ke kai mo e inu e tau mena fakatai? Liga kakano ha ko e hana onoonoaga fakalotu tuai​—ko e o oti e tau tagata mahani fakamoli ke he lagi. Po ke liga kakano he fia moua tuaga tokoluga po ke lotokai​—he logona hifo ko e lata lahi tuai na ia mai he falu​—mo e he fia tagata lahi foki. Liga ko e fua mai ha ko e tau logonaaga hifo malolo lahi ne tupu mai he tau lekua kelea lahi po ke matematekelea ati eke ai taha ke nakai loto ke nofo he lalolagi. Po kua liga pihia ai he pikimau lahi mo e taha tagata ne kua ha ha i ai e uiaga ke he lagi. Kua lata oti a tautolu ke manatu ko e Atua ni ka fifili, nakai ko tautolu. (Roma 9:16) Ti ka mole he “kumikumi hifo e tagata kia ia ni,” mo e kitia kua lata moli a ia ke nakai kai mo e inu e tau mena fakatai, kua lata na ia he magaaho nei ke oti.​—1 Korinito 11:28.

Ko e amaamanaki ne tuku atu he Atua ke he tau tagata loga ko e moui tukulagi ke he lalolagi parataiso. Ko e monuina lahi mahaki a ia ke amaamanaki ki ai, mo e ko e mena kua mukamuka lahi a tautolu ke loto ki ai. (Kenese 1:28; Salamo 37:9, 11) Ko e lalolagi ka liliu ai a lautolu ne mahani fakamoli ke fakalataha mo e ha lautolu a tau fakahele ne liliu tutu mai mo e to feleveia foki mo lautolu ne tututonu he vaha ia, tuga a Aperahamo, Sara, Mose, Raava, Tavita, mo Ioane Papatiso​—ne mamate mua oti a lautolu to hafagi e Iesu e puhala ke he moui i luga he lagi.​—Mataio 11:11; fakatatai 1 Korinito 15:20-23.

Ko lautolu ne ha ha i ai e amaamanakiaga ke he lalolagi, kua fakamanatu e Kaiaga Mena Afiafi he Iki mo e kua lata ai, he fakalataha mo e fanogonogo fakalilifu ki ai, pete ni kua nakai kai mo e inu e lautolu e falaoa mo e uaina. Ka kua moua foki e lautolu e aoga he poa a Keriso, ko e mena kua maeke ai a lautolu ke moua e tuaga mitaki ki mua he Atua. (Fakakiteaga 7:14, 15) Ko e magaaho ne fanogonogo a lautolu ke he lauga ne taute, kua fakamalolo ai ha lautolu a fakaaueaga ma e tau mena tapu, mo e tupu tolomaki ai ha lautolu a manako ke fefakalatahaaki tumau mo e tau tagata he Atua he tau matakavi oti.

Ka mole he to e la he Aho Ua, ia Apelila 2, he tau nei, to taute ai he tau fakapotopotoaga he Tau Fakamoli a Iehova, ne kua molea e 78,000 ke he lalolagi katoa e Fakamanatuaga. To fakalataha nakai a koe ki ai?

[Matahui Tala]

[Fakatino he lau 8]

Taute lagataha he Tau Fakamoli a Iehova e Fakamanatuaga he tau tau oti