Tau Huhu Mai he Tau Tagata Totou
Kua fa logona e tautolu he falu magaaho e tau matakainaga ne vagahau po ke liogi ke hoko mai e Kautu he Atua ke he lalolagi. Kua hako nakai e talahauaga nei?
Ke vagahau fakamahao, nakai ko e puhala faka-Tohiaga Tapu ke talahau pihia e tau mena. Ko e mena toka i luga he lagi e Kautu he Atua. Ti kua, maeke ai e aposetolo ko Paulo ke tohi: “To laveaki foki he Iki au mai he tau mena kelea oti, mo e fakamoui au ato hoko ke he hana kautu ha he lagi; kia ha ha ia ia e fakahekeaga tukulagi tukumuitea. Amene.”—2 Timoteo 4:18; Mataio 13:44; 1 Korinito 15:50.
Ne fakatu e Kautu i luga he lagi he tau 1914, mo e to nakai hiki mai ke he lalolagi ne kua liu Parataiso po ke taha mena foki. Ko Iesu Keriso e Patuiki he Kautu. Ha ko e Patuiki, kua ha ha ai ia Iesu e pule malolo ki luga he tau agelu. Ti ko e nofoaga tonu he hana pule mogoia, ko e mena ha ha ai ni ke he fahi matau he Atua i luga he lagi. Ti fakalataha atu ai e tau Kerisiano fakauku ki a ia ko e tau patuiki mo e tau ekepoa i luga he lagi.—Efeso 1:19-21; Fakakiteaga 5:9, 10; 20:6.
Kua kakano kia mogoia e mena nei, kua lata a tautolu ke nakai liu tala age ke he Atua e tau olelalo ne toka ai he vala he Liogi he Iki ne pehe: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi”? (Mataio 6:10) Kua nakai pihia, ha ko e mena hako e liogi ia mo e puke agaia mo e tau kakano loga.
To hoko mai e magaaho ke taute he Kautu he Atua ke he puhala nakai taumaleku ke he lalolagi nei, mo e ko e mena nei ne toka ai he tau loto ha tautolu ka liogi a tautolu mo e fakaaoga e talahauaga ne tuga e tau kupu he Liogi he Iki. Ma e fakatai, ne talahau tuai mai ia Tanielu 2:44 ko e to “hoko mai” e Kautu ke fakaotioti e tau motu oti kana mo e to pule katoa ai ke he lalolagi nei. Kua vagahau a Fakakiteaga 21:2 hagaao ke he Ierusalema Fou kua hifo mai he lagi. Ko e Ierusalema Fou ne tanaki mai he 144,000 e tau Kerisiano fakauku ko lautolu ia ka eke mo kitofaitane a Keriso. Ko e tau hakeaga foki he Kautu a lautolu fakalataha mo Iesu. Ti kua fakamaama ai he Fakakiteaga 21:2 e ha lautolu a onoonoaga lahi ke he lalolagi, fakalataha mo e tau fakamonuinaga lahi mahaki ka moua he tau tagata mahani fakamoli.—Fakakiteaga 21:3, 4.
Ato fakamoli e tau mena nei mo e falu perofetaaga homo ue atu, kua hako agaia ni ke liogi ke he Atua ko Iehova ke fakatauo mo e tau kupu a Iesu, “Kia hoko mai hau a Kautu.” Ka e kua lata ia tautolu ke tokaloto ko e nakai hau e Kautu ke he palaneta Lalolagi ke he kakano he tino. Ko e mena toka i luga he lagi e Kautu fakatufono, nakai he lalolagi.
[Fakatino Credit Line he lau 31]
Lalolagi: Matapatu ke he ata ha NASA