Hokotaki he Tau Tagata Fakapuloa he Kautu

Kua Tumau ke Fakamatala e Kupu Moli he Tohi Tapu i Ailani

KO E tau tau e kua mole ne eke ai ni e motu fulufuluola a Ailani mo matatepu ne mua atu e matematekelea. Ka e he magaaho taha, kua fiafia e tau tagata Ailani ke talia e fekau he amaamanakiaga he Tohi Tapu ne uta he Tau Fakamoli a Iehova ki a lautolu. Ko e tau mena tutupu moli mai i Ailani ne mumui mai ka fakakite tonu e mena nei.

■ I Dublin kua taha e Fakamoli a Iehova mo e hana tama fifine tote ne o fakalataha he gahua fakamatala mai he taha gutuhala ke he taha gutuhala. Ne feleveia a laua mo e fifine ne higoa ko Cathy ne lavelave lahi mo e hana tau fanau loga. Ne ole e Fakamoli tane ko e maeke nakai hana tama fifine, ne fa e fakaako ke fakamatala, ke foaki e fekau fakaku ki a ia. Ne talia e Cathy, mo e foaki ai he tama fifine tote e tala fakaku kua maama mitaki ne fakatokatoka mitaki e tau manatu. Kua nava lahi a Cathy he kitia e aga moli mo e mahani fakalilifu lahi he tamatama, mo e talia ai e ia e tama tuleke Tohi Tapu ne age ki a ia.

Ko e magaaho fakamui ne manamanatu a Cathy ke he tauteuteaga mau tuai mo e mahani mitaki he tama ne ahiahi age ki a ia. “Kua nava lahi au ko e maeke e tama fifine tote ke foaki mai e fekau fulufuluola pihia mo e nakai fia kehe,” he talahau e ia. “Ne fifili ai au ko e magaaho ne toe ka ahi mai e Tau Fakamoli a Iehova, to fanogonogo au ki a lautolu.”

Ka e mole ai ne hiki e nofoaga ha Cathy ke he taone tote he fahi toga ki lalo a Ailani ne tata atu ke he katofia he tau maaga ko Cork mo Kerry. Ko e taha magaaho he mole ai, ne ahi atu e Tau Fakamoli a Iehova ke he gutuhala hana, mo e uiina e ia a lautolu ki fale. Ne talia a ia ke fakaako Tohi Tapu tumau mo e he magaaho nei kua fano ke he tau feleveiaaga he fakapotopotoaga mo e falu fanau hana. Kua fakaaue lahi a Cathy he loto moli e tama fifine tote ke foaki e tala mitaki ki a ia.

■ Ko e fahi a Tullamore, ne fa tutala Tohi Tapu e Tau Fakamoli mo e fifine ne higoa ko Jean ke he vaha ne fitu e tau tau. Ko e falu a magaaho ne fakakite e ia ko e fiafia mo e talia ke uta e tau tohi, ka e he falu magaaho kua tote lahi hana fiafia. Ti taha e aho, ne ahi atu e Fakamoli ne higoa ko ­Frances mo e hana hoa ki a Jean, mo e moua e laua a ia ko e nakai fiafia e loto. “Ko e tau mena oti ne talahau e maua,” he talahau mai he Fakamoli, “ko e au atu ne hogohogomanava hana. Ati eke ai fakamui, kua tala mai e ia ki a maua ke fakaave fuluhi ti o mo e pahu e gutuhala.”

Ne manamanatu ai a Frances ko e to pihia kia e mena ka moua ka liu ahi atu. ‘Liga kua nakai aoga foki ke liliu ki a ia kaeke kua nakai fiafia moli a ia ke he fekau,’ he manamanatu a Frances. Ka e pete ni, ne tutala a ia ki ai mo e hana tane, ko Thomas, mo e laukauka a ­Thomas he fai tama vala tua. Ko e magaaho ne toe he o ai a lautolu ke he fahi ia, ne liu ai foki ahi atu ki a Jean. Kua fiafia a ia mo e talia ke uta e tau lagaki he tau mekasini Kolo Toko mo e Awake! Kua eke ke mitaki pihia foki e falu ahi atu, mo e kamata ai a Thomas mo Frances ke fakaako Tohi Tapu tumau i kaina mo ia.

Kua hiki he ha? Kua fakamaama mai e Jean ko e magaaho ne kelea lahi hana mahani ke he Tau Fakamoli, he nakai la leva he fanau a ia mo e hau laia he fale gagao. Kakano he fakahuhu e tama fanau fou hana mo e fagai sipuni e tama mukemuke lahilahi hana, ne taha mo e hafa ni e tula ne maeke ke mohe he po. “Ti ko e mena fakamui ne manako au ke taute,” he talahau e Jean, “ko e ke tala lotu.”

Ne nakai katoa ai e ua e mahina ti fano a Jean ke he tau feleveiaaga oti he fakapotopotoaga, mo e nakai katoa ai e fa mahina ti gahua fakalataha a ia he fekafekauaga he fonua. Ko e hogofulu ne tau mahina mai he magaaho ne kamata a ia ke fakaako Tohi Tapu ti papatiso a ia. Ko e magaaho nei kua lagomatai ai he mena ne tupu ki a ia a Jean he fekafekauaga. Ne tala mai e ia: “Ka feleveia a au mo e taha tagata ne mahani fakatagata lahi, lali au ke loto maama. Ne matakite tumau au ke he mena ia. Liga to hiki e tutuaga he magaaho ka liu au ahi atu; liga kua mitaki tuai e loto he tagata mo e to fiafia ai ke feleveia mo au.”