Tau Mamatua, Kia Moua e Fiafia he ha Mutolu a Fanau
“Kia fiafia hāu a matua tane mo e hāu a matua fifine.”—TAU FAKATAI 23:25.
1. Ko e heigoa ka taute e tau mamatua ke moua e fiafia he ha lautolu a fanau?
KUA mitaki ha he kitia e tama akau tote ne tupu ke eke mo akau lahi mitaki ne foaki e fulufuluola mo e malumalu—mua atu ka to e koe mo e leveki ai! Ke fakatatai, ko e tau mamatua ne leveki e fanau ne tutupu hake ke eke mo tau fekafekau he Atua ne loto motua kua moua e fiafia ki a lautolu, tuga ne talahau mai he Tohi Tapu: “Kua olioli lahi ni e matua tane he tagata tututonu; ko ia kua fanau e tama iloilo kua fiafia a ia kia ia. Kia fiafia hāu a matua tane mo e hāu a matua fifine; kia olioli ni a ia ne fanau ai a koe.”—Tau Fakatai 23:24, 25.
2, 3. (a) Maeke fefe e tau mamatua ke kalo mai he fakamamahi mo e fakahogohogomanava? (e) Ko e heigoa kua lata tokoua he tau tama akau ikiiki mo e fanau ke moua ke eke mo punaaga he fiafia?
2 Ka e, kua nakai amanaki ni e tama ti “tututonu” mo e “iloilo.” Kua lata ke gahua fakalahi ke puipui mai e tau tama neke eke mo punaaga he “fakaatukehe” mo e “fakahogohogomanava,” tuga ni e gahua ke taute e tama akau tote ke eke mo akau lahi mitaki. (Tau Fakatai 17:21, 25) Ke fakatai ki ai, kua maeke e kakau toko hake ke fakamahani e tama akau tote ke tupu hako mo e malolo. Kua aoga lahi ke fuifui tumau, mo e kua lata foki e tama akau tote ke puipui mai he tau gagao. Kua oti ia, kua mitaki lahi ke hiohio kehe e falu la ke moua e akau fulufuluola.
3 Nukua fakakite mai he Kupu he Atua kua lata e fanau mo e tau mena tuga e fakamahani ke he mahani Atua, fakamalu aki e vala vai he kupu moli he Tohi Tapu, puipui mai he tau mahani teteki, mo e akonakiaga fakaalofa ke uta kehe e tau mahani fakalialia. Ke foaki e tau manako nei, kua mua atu e ole ke he tau matua tane ke feaki e fanau ha lautolu “ke he tau kupu akonaki mo e tau kupu fakamafana he Iki.” (Efeso 6:4) Ko e heigoa ne putoia ke he mena nei?
Peehiaga he Tau Kupu ha Iehova
4. Ko e heigoa e matagahua ne ha ha he tau mamatua ke he ha lautolu a fanau, mo e ko e heigoa kua lata ke taute ato maeke ia lautolu ke fakamoli ai?
4 Ko e kakano he “kupu fakamafana he Iki” ke takitaki atu e tau manamanatu ha tautolu ke fakatatai mo e finagalo ha Iehova. Ko e tau mamatua he mogoia, kua lata ke tuku he tau loto he tau tama ikiiki ha lautolu e manamanatuaga ha Iehova ke he mena ia. Mo e kua lata foki ia lautolu ke fifitaki e fakafifitakiaga he Atua he foaki e akonakiaga hohofi, po ke fakamahaniaga hako. (Salamo 103:10, 11; Tau Fakatai 3:11, 12) Ka e to maeke e tau mamatua ke taute e mena nei, kua lata ia lautolu ke hufia e tau kupu ha Iehova, tuga ne tomatoma he perofeta he Atua ko Mose ke he tau Isaraela i tuai: “Kia ha i ai foki ke he hau a loto e tau kupu nai [mai ia Iehova] kua poaki atu ai e au kia koe ke he aho nai.”—Teutaronome 6:6.
5. He magaaho fe mo e ke he puhala fe ne kua lata e tau mamatua Isaraela ke fakaako e fanau ha lautolu, mo e ko e heigoa e kakano ke “fakaako”?
5 Ko e fakatumau ke fakaako e Tohi Tapu, manamanatu fakahokulo, mo e liogi ka taute e tau mamatua ke mautali ke taute e mena ne poaki mai foki e Mose: “Kia fakaako atu mau [e tau kupu ha Iehova] ke he hau a fanau, mo e vagahau ki ai, ka nofo a koe ke he hau a fale, ti pihia foki ka fano a koe ke he puhala, ti pihia foki ka takoto a koe, ti pihia foki ka matike ai a koe.” Ko e kakano he kupu Heperu ne fakaliliu “fakaako” ko e “liu fatiaki,” “ke liu talahau mo e talahau foki,” “ke fakamaama fakamitaki.” Kia mailoga e puhala ne peehi fakalaulahi atu e Mose e lata ke tuku fakamua e tau kupu ha Iehova: “Ti pipi e koe ia ke he hau a lima mo fakamailoga, ti eke ai foki mo fou pāpā ke he vaha he hau a tau mata. Ti tohi ai foki e koe ke he tau pou he hau a fale, katoa foki mo e hau a tau gutuhala.” Kua maali ai e poaki ha Iehova ma e tau mamatua ke foaki tumau ke he ha lautolu a fanau e levekiaga hohofi!—Teutaronome 6:7-9.
6. Ko e heigoa he tau mamatua ke fakaako ke he ha lautolu a fanau, mo e ko e heigoa e aoga?
6 Ko e heigoa e “tau kupu nai” ha Iehova ne kua lata he tau mamatua ke fakaako ke he ha lautolu a fanau? Kua fatiaki laia e Mose e mena ne fa mahani ke ui ko e Tau Poakiaga Hogofulu, fakalataha mo e tau poakiaga ke aua neke kelipopo tagata, aua neke faivao, aua neke kaiha, aua neke fatipiko, mo e aua neke manako lahi. Ko e tau poakiaga mahani mitaki ia, pihia foki mo e poakiaga ke ‘fakaalofa kia Iehova hau a Atua mo e hau a loto katoa, mo e hau a agaga katoa, mo e hau a malolo katoa,’ kua mua atu ke fakaako aki he tau mamatua Isaraela ha lautolu a tau tama ikiiki. (Teutaronome 5:6-21; 6:1-5) Nakai kia talitonu a koe ko e hanei e fakaakoaga ne lata mo e fanau he vaha nei?
7. (a) Kua fakatatai e fanau ke he heigoa i loto he Tohi Tapu? (e) Ko e heigoa ka kumikumi a tautolu he mogonei ki ai?
7 Kua tala age ke he matua tane Isaraela: “Ko e hāu a hoana, to tuga ne vine fua loga a ia ki loto he hāu a fale; ko e hāu a fanau tuga ne tau huli olive ia kua agaagai hāu a laulau.” (Salamo 128:3) Ka e, ma e tau mamatua ke moua e fiafia pauaki he ha lautolu a “tau tama akau ikiiki” ka e nakai moua e fakamamahi, kua lata ia lautolu ke fiafia pauaki ke he ha lautolu a fanau ni ke he tau aho oti. (Tau Fakatai 10:1; 13:24; 29:15, 17) Kia o mai a a tautolu ke kumikumi e puhala ka maeke he tau mamatua ke fakamahani, fuifui fakaagaga, puipui, mo e akonakiaga fakaalofa ke he ha lautolu a fanau ke he tau puhala pihia ke maeke ia lautolu ke hokotia ke moua e fiafia moli ia lautolu.
Fakamahani Mai he Vaha Tote
8. (a) Ko hai ne taute mo tau kakau fakamahani ma Timoteo? (e) Ne fe ne kamata ai e fakamahaniaga, mo e ko e heigoa e fua?
8 Kikite atu ki a Timoteo, ne moua e lagomatai, ke fakataitai ki ai, he tau kakau malolo ua—hana a matua fifine mo e hana a matua fifine tupuna. Ha ko e matua tane Heleni ha Timoteo ti kua kitia moli ai ko e tagata nakai tua, ko e hana a matua fifine Iutaia, ko Eunike, mo e hana a matua fifine, ko Loi, ne fakamahani e tama tane ‘mai he vaha tote ke he Tohi Tapu.’ (2 Timoteo 1:5; 3:15; Gahua 16:1) Ko e ha laua a pulotu he fakaako a Timoteo—pihia ni he tama mukemuke agaia a ia—ko e “tau mena ne eke e [Iehova]” kua lahi e palepale. (Salamo 78:1, 3, 4) Kua eke a Timoteo mo misionare he tau motu mamao, liga ni he magaaho fuata mui agaia a ia, mo e moua e ia e matafekau talahaua ke fakamalolo e tau fakapotopotoaga Kerisiano he vaha fakamua.—Gahua 16:2-5; 1 Korinito 4:17; Filipi 2:19-23.
9. Maeke fefe e tau tama ke ako ke kalo mai he matahele he velevelemena?
9 Ma tau mamatua, ko e tau kakau fakamahani fefe a mutolu? Ke fakatai ki ai, manako nakai a mutolu ma e fanau ha mutolu ke moua e onoonoaga fakalatalata ke he tau koloa he tino? Ti kua lata ai ia mutolu ke fakatokatoka e fakafifitakiaga hako he nakai tutuli e tau koloa fou oti po ke falu mena ne nakai kua manako moli a mua ki ai. Kaeke ke fifili a mutolu ke tutuli e tau koloa tino, kia aua neke ofo he magaaho ka fifitaki ha mutolu a fanau ki a mutolu. (Mataio 6:24; 1 Timoteo 6:9, 10) Kua moli ni, ka nakai hakotika e tau kakau fakamahani, maeke fefe mogoia e tama akau tote ke tupu hako?
10. Ko e ha hai e hatakiaga kua lata he tau mamatua ke kumi tumau, mo e ko e heigoa e aga kua lata ke ha ha ia lautolu?
10 Ko e tau mamatua ne moua e fiafia pauaki he ha lautolu a fanau to tumau ke kumi e lagomatai faka-Atua ke lagomatai ke fakamahani a lautolu, fakatumau ke manamanatu ko e heigoa e mena mitaki lahi fakaagaga ma e ha lautolu a fanau. Ne talahau mai he matua fifine ne toko fa e tama: “Pihia foki to fanau e fanau ha maua, ne liogi tumau a maua ki a Iehova ke lagomatai a maua ke eke mo tau mamatua mitaki, ke takitaki he Kupu hana, mo e ke fakagahuahua ai ke he tau momoui ha maua.” Ne lafi atu a ia: “‘Ke tuku fakamua a Iehova’ nakai ko e mena totoku noa ka e ko e puhala ne momoui ai a maua.”—Fakafili 13:8.
Fakatumau ke Fuifui Aki e “Vala Vai”
11. Ko e heigoa kua lata ke moua tokoua he tau tama akau ikiiki mo e fanau ke tupu?
11 Kua lata lahi e tau tama akau ikiiki ke fuifui tumau, tuga kua kitia ke he tupu mitaki he tau akau he tapa vailele. (Fakatatai Fakakiteaga 22:1, 2.) To matala fakaagaga pihia foki e tau tama mukemuke kaeke ke fakamalu tumau aki e kupu moli he Tohi Tapu. Ka e kua lata e tau mamatua ke fioia e loa he mahani fanogonogo he ha laua a tama. Liga to lauia mitaki ka fakaku e tau fakaholoaga fakaako mai he tau fakaholoaga loloa. Ka e aua neke fakatote e alito he tau fakaholoaga kuku pihia. Ko e magaaho fakalataha auloa kua aoga lahi ke moua e pipiaga he vahaloto he matua mo e tama, ko e fakafetuiaga kua fa fakamalolo tumau mai i loto he tau Tohiaga Tapu.—Teutaronome 6:6-9; 11:18-21; Tau Fakatai 22:6.
12. Ko e heigoa e aoga he liogi auloa mo e tau tama ikiiki?
12 Ko e taha he tau fakaholoaga mo e tau fanau ikiiki kua maeke ke taute he magaaho afiafi. Taha e fuata ne liu manatu: “Na nonofo haku a tau mamatua he mohega ha mautolu he tau po takitaha mo e fanogonogo ki a mautolu ne liogi.” Ke he aoga he taute e mena nei, kua talahau mai he taha: “Kua taute he mena ia au ke aga tumau ke liogi ki a Iehova he tau po oti ato fano au ke mohe.” He magaaho ka logona he fanau e tau mamatua ha lautolu ne tutala hagaao ki a Iehova mo e liogi ki a ia he tau aho oti, kua eke a ia mo peresona moli ki a lautolu. Taha e tama tane fuata ne talahau: “Kua maeke ia au ke pa e tau mata haku he liogi ki a Iehova mo e kitia e peresona matua tane tupuna moli. Kua lagomatai he tau mamatua haku au ke kitia kua ha ha a Iehova ke he tau mena oti ne taute mo e talahau e tautolu.”
13. Ko e heigoa kua maeke ke fakalataha ke he tau magaaho fakaako tumau?
13 Ke lagomatai e tau tama ikiiki ke hufia e vai he kupu moli he Tohi Tapu, kua lata e tau mamatua ke fakaputoia ke he tau magaaho fakaako tumau e tau mena aoga loga. Kua talahau mai he tau mamatua he tau tama toko ua ne nakaila fuata mui ia: “Na kamata e moua he fanau e fakamahani ke nonofo fakatekiteki he Fale he Kautu mai he tau fahi tapu gahoa he moui ha laua.” Ne fakamaama he matua tane e mena ne taute he magafaoa hana: “Ne tohi hifo e mautolu ke he tau laupepa mao ikiiki e tau tohi oti he Tohi Tapu mo e lali ke tuku fakaatuatu a lautolu ke he puhala hako, ne igatia a mautolu mo e magaaho. Kua amaamanaki tumau e fanau ke he mena nei.” Tokologa e tau magafaoa ne taute fakaku e fakaakoaga he magaaho ato kai ai po ke ka oti. Taha e matua tane ne talahau: “Kua eke e kai afiafi mo magaaho mitaki ma mautolu ke fetutalaaki ke he matakupu Tohi Tapu he aho.”
14. (a) Ko e heigoa e tau gahua palepale fakaagaga ka liga taute mo e tau tama ikiiki? (e) Ko e heigoa e iloilo ke ako ne ha ha he fanau?
14 Kua fiafia foki e tau tama ikiiki ke fanogonogo ke he tau talahauaga he Tohi Tapu i loto he My Book of Bible Stories.a “He magaaho ne ikiiki ai e fanau,” he talahau he taha hoa tokoua, “ne fakatutala ai ke he taha valatala i loto he tohi Bible Stories, ti tui he fanau e tau mena tui taute tala mo e fakafifitaki e tau tala. Kua loto lahi a lautolu ke he mena nei mo e fa ole tumau ke fai tala foki ka onoono ki ai he fakaakoaga.” Kia nakai ono hifo ke he loto matala he hau a tama ke ako! Nukua iloa manatu he tau tama fa e tau tau he moui e tau veveheaga oti he tohi Bible Stories mo e kua fakaako ke totou foki e Tohi Tapu! Taha e tama fuata ne liu manatu e magaaho ne tolu mo e hafa e tau tau hana he moui, ne kua tumau a ia ke hepe ke fakaleo fakamitaki e tau kupu “judicial decisions,” ka e fakamalolo he matua tane hana a ia ke fakatumau ke fakamahani ki ai.
15. Ko e heigoa e falu mena kua maeke ke putoia foki he fakatutalaaga mo e fanau, mo e heigoa e fakamoliaga i ai ko e tau fakatutalaaga pihia kua lahi e aoga?
15 He tau fakaholoaga mo e hau a tau tama ikiiki kua maeke ke lagomatai foki ke tauteute a lautolu ke tufatufa e vai he kupu moli mo e falu, tuga he tali hake he tau feleveiaaga. (Heperu 10:24, 25) “He magahala he tau fakaholoaga fakamahani ha mautolu, ne tali ni au he tau kupu haku,” he liu manatu he taha fuata. “Kua nakai fakaata au ke totou holo ka e nakai maama.” Ke lafi ki ai, kua maeke e fanau ke fakamahani ke moua e fakalatahaaga fai kakano he fekafekauaga he fonua. Ko e fifine ne feaki hake he tau mamatua matakutaku Atua ne fakamaama: “Nakai ko e o noa ni a mautolu ke faihoani e tau mamatua ha mautolu ke he ha laua a gahua. Iloa e mautolu na fai vala foki a mautolu, pete ni ko e fakatagi he logo he gutuhala mo e toka hifo e laupepa fakailoa. He tauteute fakamitaki ato hoko e tau gahua he matahiku he fahi tapu, kua iloa e mautolu e mena ke talahau. Nakai fa aala hake a mautolu he pogipogi he Aho Faiumu ke huhu ko e o nakai a mautolu he fekafekauaga. Iloa tuai e mautolu to o a mautolu.”
16. Ko e ha e fakatumau ke taute e fakaakoaga fakamagafaoa mo e fanau kua lahi e aoga?
16 Ko e manako ke fakatumau ke fuifui e tau tama ikiiki aki e vai he kupu moli he Tohi Tapu kua nakai lata ke molea e peehiaga, ko e kakano ko e fakaakoaga Tohi Tapu fakafahi tapu he magafaoa kua lahi e aoga. Ko e matua tane ne ua e tama ne talahau, ko e “mena ne mua atu e fakahogohogomanava ke he fanau ko e fa hikihiki tumau.” (Efeso 6:4) Ne talahau e ia: “Ne fakatoka e au mo e haku hoana e aho mo e magaaho mo e taute fakamoli ke takitaki e fakaakoaga fakamagafaoa hagaao ke he setulu ia. Kua nakai leva ti iloa ai he fanau ke amanaki ai he magaaho ia ni.” Ko e tau fakamahani pihia kua mai he vaha tote kua lahi e aoga, he fakatauo mo e tau kupu moli, ‘Ko e puhala ne to ai e akau tote, to tupu hake ni pihia e akau.’
17. Ko e heigoa foki kua aoga ke tuga e foaki ke he tau tama ikiiki e tau kupu moli he Tohi Tapu?
17 Ke foaki ke he tau tama ikiiki e tau kupu moli he Tohi Tapu kua aoga lahi, ka e kua pihia foki mo e fakafifitakiaga he matua. Na kitia nakai he fanau hau a mua ka kumikumi, o tumau he tau feleveiaaga, o atu ke he fekafekau he fonua, e, moua e fiafia he taute e finagalo he Atua? (Salamo 40:8) Kua lahi e aoga ke kitia e lautolu. Ke mailoga, ne tala e tama fifine hagaao ke he hana a matua fifine, ko ia ne fakauka ke he totokoaga he hana a tane mo e feaki toko ono e fanau ke eke mo Tau Fakamoli tua fakamoli: “Ko e mena ne nava lahi ki a mautolu ko e fakafifitakiaga ni ha Mama—kua mua atu e fakaohoohoaga mai ke he tau kupu.”
Foaki ke he Tau Tama Ikiiki e Puipuiaga
18. (a) Maeke fefe he tau mamatua ke foaki ke he fanau e puipuiaga ne lata mo lautolu? (e) Ko e heigoa taha fakaakoaga ne moua he tau tama ikiiki i Isaraela hagaao ke he tau vala tino ke moua aki e tama?
18 He fa mahani mau e tau tama akau ikiiki ma e puipuiaga mai he tau gagao kelea, i loto he fakatokaaga kelea he tau mena nei, kua lata e tau tama ikiiki ke moua e puipuiaga mai he “tau tagata mahani kelea.” (2 Timoteo 3:1-5, 13) Maeke fefe e tau mamatua ke tuku age e puipuiaga nei? He lagomatai a lautolu ke moua e pulotu faka-Atua! (Fakamatalaaga 7:12) Ne poaki a Iehova ke he tau Isaraela—fakalataha mo e ha lautolu a “tau tama ikiiki”—ke fanogonogo ke he totouaga he hana a Fakatufono, ne kua putoia ai mo e fakakiteaga he mahani mitaki mo e nakai tonu he mahani fakatane mo e fifine. (Teutaronome 31:12; Levitika 18:6-24) Ko e tau vala tino he moui kua totoku tumau, pihia foki e “tegamisi he tane” mo e “fahi mouiaga he tagata.” (Levitika 15:1-3, 16; 21:20; 22:24; Numera 25:8; Teutaronome 23:10; fakatatai NW.) Ha ko e fakalialia he lalolagi he vaha nei, kua lata e tau tama ikiiki ke iloa e fakaaogaaga hako mo e nakai tonu he tau vala tino pihia ne kua ha ha foki he tufugatiaaga ne ui he Atua “kua mitaki lahi ni.”—Kenese 1:31; 1 Korinito 12:21-24.
19. Ko e heigoa e fakaakoaga kua lata tonu ke moua he tau tama ikiiki hagaao ke he ha lautolu a tau vala fufu he tino?
19 Kua mitaki ke lata tokoua e tau mamatua, po ke tagata leveki, ke fakakite ke he tama hana a tau vala fufu he tino. Kua lata mogoia ia laua ke fakamaama kua nakai lata e taha tagata foki ke fakaata ke aamo e tau vala nei. Ha kua fa mahani e tau tagata ekefakakelea e fanau ke kamatamata e aga he tau tama ikiiki ke he tau fakaohoohoaga he mahani fakatane mo e fifine pihia, kua lata ke fakaako e tama ke totoko fakamalolo mo e ke talahau, “To tala age e au a koe!” Kia fakaako e tau tama ikiiki hau ke talahau tumau e ha tagata ne lali ke aamo a lautolu ke he puhala ne taute a lautolu ke logona e fuafua kelea, pete ni ko e heigoa e mena matakutakuina ne tala age ki a lautolu.
Foaki e Akonakiaga Hohofi
20. (a) Kua eke fefe e akonakiaga ke tuga e hiohio kehe he tau la akau? (e) Ko e heigoa e lauia fakamua he akonakiaga, ka e ko e heigoa e fua?
20 Kua lagomatai e tau tama ikiiki he akonakiaga hohofi, tuga e akau ne hiohio e falu la. (Tau Fakatai 1:8, 9; 4:13; 13:1) He magaaho ka hio kehe e falu la akau kelea, kua fakamalolo ai he falu la kua tupu. Ti kaeke ke foli e fanau hau ke moua ha koloa tino ni po ke hane fa e lifa atu ke feoaki mo lautolu ne kelea po ke tau fakafiafiaaga nakai lata, ko e tau manako hehe nei kua tuga e tau la akau ne kua lata ke hiohio kehe. Kaeke kua taaki e tau mena ia, to lagomatai ai e fanau hau ke tutupu ke he fahi fakaagaga. Ko e akonakiaga pihia kua liga nakai fiafia ki ai fakamua, tuga ni ka hio kehe e la akau liga to fakaofo ke he akau. Ka e ko e fua mitaki he akonakiaga ko e tuputupu fou ke he puhala ne manako a koe ke tupu hake e tama hau.—Heperu 12:5-11.
21, 22. (a) Kua fakakite he heigoa e nakai fiafia ke foaki po ke moua e akonakiaga? (e) Ko e ha kua nakai lata e tau mamatua ke toka kehe e akonakiaga?
21 Kua talahau moli ai ko e akonakiaga kua nakai fiafia ke foaki po ke moua. “Kua lahi e magaaho ne fakamole he tama tane haku mo e fuata ne hataki mai he tau motua ki a au kua nakai mitaki ke fio fakalataha,” he talahau he taha matua tane. “Kua lata ia au ke fakamafiti lahi ke taute taha mena mai ke he mena ne taute e au. Pete ni kua nakai putoia e tama tane haku ke he ha mahani kelea lahi, ka e kua fai magaaho ke liu hiki ai e manamanatuaga hana.” Ne talahau he tama tane: “He magaaho ne fakaoti mai au he haku a kapitiga uho, kua lahi e tupetupe haku.” Ka e tala mai foki e ia: “Ko e fifiliaga mitaki anei, ha kua nakai leva he mole ti tuku ai a ia ki tua.”
22 “Ko e tau akonakiaga foki ne akonaki ai, ko e puhala he moui haia,” he talahau he Kupu he Atua. Ti pete ni ko e uka fefe e akonakiaga ke foaki, kia nakai toka kehe mai ai he ha mutolu a fanau. (Tau Fakatai 6:23; 23:13; 29:17) Ke he taha vaha ni, to loto fakaaue a lautolu he fakahako e koe a lautolu. “Manatu e au au ne ita lahi ke he haku a tau mamatua he magaaho ne akonaki au,” he liu manatu he fuata. “Mogonei, to mahomo atu e ita foki au ka fakatikai he tau mamatua haku ke akonaki au.”
Kua Mitaki Lahi e Palepale he Laliaga
23. Ko e ha kua mitaki lahi e palepale he tau levekiaga hohofi oti ne feaki ke he tau tama ikiiki?
23 Kua nakai fakauaua hagaao ki ai, ko e fanau ne fiafia e tau mamatua ki ai, ti pihia foki e falu, ko e fua he tau levekiaga hohofi he tau aho takitaha. Ka e, ko e tau laliaga ne feaki ia lautolu—pete ko e fanau he tino po ke fakaagaga—kua mitaki lahi e palepale ne kua maeke ke olioli. Kua fakakite he aposetolo motua ko Ioane e mena nei he magaaho ne tohia e ia: “Nakai fai fiafia au ke mua ke he mena nai, ka fanogonogo au, kua mahani e fanau haku kua lata mo e kupu moli.”—3 Ioane 4.
[Matahui Tala]
a Tohi Fakailoa he Watchtower Bible and Tract Society of New York, Inc.
Manatu Nakai e Koe?
◻ Ko e heigoa kua lata tokoua he tau tama akau ikiiki mo e he fanau ke eke ke moua e fakahekeaga?
◻ Maeke fefe, he tau mamatua ke taute ke tuga e tau kakau fakamahani mitaki?
◻ Ko e heigoa kua maeke ke putoia he tau fakaholoaga fakaako he tau tama ikiiki, mo e ko e heigoa kua lata ke fakaako ki a lautolu ke totoko?
◻ Kua aoga fefe e akonakiaga ke he tama, ke tuga e hio kehe he la he akau?
[Fakatino Credit Line he lau 21]
Courtesy of Green Chimney’s Farm