Kua Mautali Nakai a Koe ke he Aho a Iehova?

“Kua tata mai e aho lahi a Iehova, kua tata mai ni, kua fakaave mai ni.”​—SEFANAIA 1:14.

1. Kua fakamaama fefe he tau Tohiaga Tapu e aho a Iehova?

NAKAI leva, to hoko mai e “aho [a Iehova] kua lahi mo e matakutakuina” ki luga he fakatokatokaaga he tau mena kelea nei. Kua fakamaama mai he tau Tohiaga Tapu e aho a Iehova ko e tauaga, pouli, ita lahi, matematekelea, vale, matakutakuina, mo e maanu. Ka e, to fai ai ka hao, ha kua “fakamomoui ai a lautolu oti kana kua ui atu ke he higoa a Iehova.” (Ioelu 2:30-32; Amosa 5:18-20) E, to moumou he Atua he magaaho ia e tau fi hana mo e fakahao ai e hana tau tagata.

2. Ko e ha ne manatu fakamafiti ai a tautolu ke he aho a Iehova?

² Kua fakamatutaki he tau perofeta he Atua e manatu he fakamafitiaga he aho a Iehova. Tuga anei, ne tohi e Sefanaia: “Kua tata mai e aho lahi a Iehova, kua tata mai ni, kua fakaave mai ni.” (Sefanaia 1:14) Ko e tuaga kua mua atu e mafiti he vaha nei kakano ko e Iki Fakafiliaga Lahi he Atua, ko e Patuiki ko Iesu Keriso, kua teitei tuai ke ‘pipi hana a pelu ke he hana a hui mo e heke ai ke he tonu, mo e mahani molu, mo e tututonu.’ (Salamo 45:3, 4) Kua mautali nakai a koe ke he aho ia?

Ha Ha ia Lautolu e Tau Amaamanakiaga Lalahi

3. Ko e heigoa e tau amaamanakiaga he falu he tau Kerisiano Tesalonia, mo e ko e heigoa e tau kakano ua ne kua hehe ai a lautolu?

³ Tokologa ne nakai ha ha ai e tau amaamanakiaga fakamoli ke he aho a Iehova. Ko e falu he tau Kerisiano fakamua i Tesalonia ne talahau: ‘Kua hoko mai e aho a Iehova!’ (2 Tesalonia 2:2) Ka e ha ha ai ua e matapatu kakano ne nakai hohoko. He talahau ai taha he tau mena nei, ne talahau e aposetolo ko Paulo: “Ha ko e mena ka pehe a lautolu, Kua mafola, kua nakai haofia, ti hokotia fakalutukia ai a lautolu he mahaikava.” (1 Tesalonia 5:1-6) He “vaha ke fakahiku ai” a nei, kua fakatali ai foki a tautolu ke he fakamoliaga he tau kupu ia. (Tanielu 12:4) Kua nakai iloa foki he tau Tesalonia e taha fakamoliaga ko e aho lahi ha Iehova ke hoko mai, ha kua tala age a Paulo ki a lautolu: “Ha ko e mena nakai hoko mai e aho ia, ato hoko fakamua mai e liliuaga.” (2 Tesalonia 2:3) He magaaho ne tohi ai e Paulo e tau kupu ia (kavi he 51 V.N.), ko e “liliuaga” mai he faka-Kerisiano moli kua nakai la tupu katoatoa. He vaha nei, kua kitia ai e tautolu kua tupu lahi mahaki i Kerisitenitome. Pete ni e ha lautolu a tau amaamanakiaga nakai fakamoli, ko lautolu e tau fakamoli fakauku i Tesalonia, ne fakatumau ke fekafekau fakamoli ke he Atua ato mamate, to moua ai he magaaho fakamui e palepale ke he lagi. (Fakakiteaga 2:10) To moua foki e tautolu e palepale kaeke ke tumau e tua fakamoli he fakatalitali a tautolu ke he aho a Iehova.

4. (a) Kua matutaki mo e heigoa e aho a Iehova he 2 Tesalonia 2:1, 2? (e) Ko e heigoa e tau onoonoaga ha lautolu ne kua higoa ko e tau Matua Lotu hagaao ke he liu mai he Keriso mo e tau mena ne putoia ai?

⁴ Kua fakamatutaki he Tohi Tapu “e aho lahi a Iehova” mo e “ko e haele mai he Iki ha tautolu ko Iesu Keriso.” (2 Tesalonia 2:1, 2) Ko lautolu ne kua fakahigoa ko e tau Matua Lotu kua ha ha ai e tau manatu kehekehe hagaao ke he liu mai he Keriso, hana a ha ha hinei, mo e hana Pule Afe Tau. (Fakakiteaga 20:4) He senetenari ke ua aki V.N., kua tokaloto e Papias i Iarapoli e ofoofogia lahi he tau gahuahuaaga he lalolagi he magaaho he Pule Afe Tau he Keriso. Ne vagahau tumau a Justin Martyr hagaao ke he ha ha hinei a Iesu mo e amaamanaki ke liu aki mai a Ierusalema mo fakatuaga he Hana a Kautu. Ne fakaako a Irenæus i Lyons ko e mole atu he moumou he Pule Atu Roma, to hau fakakitia ai a Iesu, lili a Satani, mo e pule ai he lalolagi i Ierusalema.

5. Ko e heigoa ne talahau he falu fakaako tokoluga hagaao ke he “Hauaga ke Ua aki” he Keriso mo e Pule he Afetau hana?

⁵ Ne talahau he tagata fakamau tala tuai ko Philip Schaff ko e “mena tupu mua ue atu” ke he magahala fakamua ato hoko e Tufono ha Nicaea he 325 V.N. ko e “fakaakoaga he pule kua kitia he lilifu a Keriso he lalolagi mo e fakaliu tu mai he tau tagata tapu ke he taha e afe tau, to fakahoko e fakaliu tu mai katoatoa mo e fakafiliaga.” Ne talahau e James Hastings he A Dictionary of the Bible: “Kua kumi agaia a Tertullian, Irenæus, mo Hippolytus ke he Hauaga [ha Iesu Keriso] kua mafiti; ka ke he tau Matua Alexandrine kua huhu atu a mautolu ke he puhala fou he manamanatu. . . . Mo e tau fakaakoaga ha Augustine ke he Afetau mo e magahala he Kautau Lotu, kua fakaholo atu ai e Hauaga ke Ua aki ke he vaha loa anoiha.”

Aho a Iehova mo e Ha ha Hinei a Iesu

6. Ko e ha ne nakai fakahiku ai e tautolu ko e aho a Iehova kua mamao agaia?

⁶ Ko e tau fakaakoaga hehe kua takitaki ke he tau fakaita, ka kia nakai manatu a tautolu ke he aho a Iehova kua mamao agaia. Ko e ha ha hinei nakai kitia a Iesu, fakalataha ki ai e lauiaaga faka-Tohiaga Tapu, kua fita he kamata. Ko e Kolo Toko mo e falu tohi foki he Tau Fakamoli a Iehova kua fa mahani ke foaki e fakamoliaga faka-Tohiaga Tapu kua kamata e ha ha hinei a Keriso he tau 1914.a Ti, ko e mena ia, ko e heigoa ne talahau e Iesu hagaao ke he hana a ha ha hinei?

7. (a) Ko e heigoa falu hagaaoaga he fakamailoga he ha ha hinei a Iesu mo e fakaotiaga he fakatokatokaaga he tau mena? (e) To liga hao fefe a tautolu?

⁷ Ko e ha ha hinei a Iesu kua eke mo mataulu he fakatutalaaga ti nakai leva ato hoko hana a mate. He mole atu e logona e talahau tuai hana ke he moumouaga he faituga a Ierusalema, ne huhu e tau aposetolo hana ko Peteru, Iakopo, Ioane, mo Aneterea: “Po ke hoko a fe e tau mena ia? po ke heigoa foki e fakamailoga hāu a haele mai mo e fakaotiaga he lalolagi?” (Mataio 24:1-3; Mareko 13:3, 4) He tali, kua talahau tuai e Iesu e tau tauaga, tau hoge, tau mafuike, mo e falu mena foki he “fakamailoga” he hana a ha ha hinei mo e fakaotiaga he fakatokaaga he tau mena. Ne pehe foki a ia: “Ka ko ia ke tumau ato hoko ke he fakaotiaga, to fakamoui na ia.” (Mataio 24:13) To fakahao a tautolu kaeke ke fakauka fakamoli a tautolu ke hoko ke he fakaotiaga he moui nei ha tautolu po ke ke he fakaotiaga he fakatokaaga kelea nei.

8. Ato fakaoti ai e fakatokatokaaga Iutaia, ko e heigoa ka fakakatoatoa ai, mo e ko e heigoa e mena kua taute hagaao ki ai he vaha nei?

⁸ Ato hoko ke he fakaotiaga, to fakamoli ai e mena aoga ue atu he ha ha hinei a Iesu. Hagaao ki ai, ne pehe a ia: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:14) Ato moumou he tau Roma a Ierusalema mo e fakatokatokaaga he tau mena Iutaia he 70 V.N., kua maeke a Paulo ke talahau ai ko e tala mitaki “ne fakamatala atu ke he tau tagata oti ke he lalolagi.” (Kolose 1:23) Pete ia, he vaha nei, kua lahi atu e gahua fakamatala kua taute he Tau Fakamoli a Iehova “ke he lalolagi oti.” He tau tau gahoa ne mole, kua hafagi he Atua e puhala ma e fakamoliaga lahi ke taute he Fahi Uta a Europa. Ke he tau poko lomi mo e falu mena foki he lalolagi katoa, ko e fakatokatokaaga a Iehova kua mauokafua e gahua fakatolomaki, ti pihia foki ke he ‘tau fahi nakai la taute ia.’ (Roma 15:22, 23) Kua fakaohooho kia he loto hau a koe ke mua ue atu hau a gahua fakamatala ato hoko mai e fakaotiaga? Kaeke ke pihia, to fakamalolo he Atua a koe ke fakalataha ke he gahua monuina ia i mua.​—Filipi 4:13; 2 Timoteo 4:17.

9. Ko e heigoa e mena ne taute e Iesu, ne kua fakamau ia Mataio 24:36?

⁹ Ko e gahua fakamatala ne talahau tuai mai mo e falu foki he fakamailoga he ha ha hinei a Iesu kua fakamoli ai ke he mogonei. Ti, kua tata lahi mai e fakaotiaga ma e fakatokatokaaga kelea nei he tau mena. Moli, kua pehe a Iesu: “Ka e ko e aho ia mo e magaaho ia nakai iloa he taha tagata nakai iloa foki he tau agelu he lagi, ka ko e haku a Matua hokoia ni.” (Mataio 24:4-14, 36) Ka e ko e perofetaaga a Iesu ke lagomatai a tautolu ke mautali ke he “aho ia mo e magaaho ia.”

Ne Mautali a Lautolu

10. Iloa fefe e tautolu kua maeke ke mataala fakaagaga tumau?

¹⁰ Ke hao mai he aho lahi a Iehova, kua lata ia tautolu ke mataala fakaagaga mo e tumau ke he tapuakiaga moli. (1 Korinito 16:13) Iloa e tautolu ko e fakaukaaga pihia kua maeke, he taute pihia he magafaoa mahani Atua mo e hao mai ai he Fakapukeaga ne moumou e tau tagata mahani kelea he 2370 F.V.N. Fakatatai ai e vaha ia mo e ha ha hinei hana, kua pehe a Iesu: “Tuga e vaha kia Noa, to eke pihia foki ka hau e Tama he tagata. Ha ko e mena tuga ne eke ke he vaha ka e nakaila hoko e fakapuke, ne kai a lautolu mo e inu, ti fai hoana a lautolu mo e fakafaitane, kua hoko ni ke he aho ne hu atu ai a Noa ke he vaka, ti nakai iloa e lautolu ato hoko mai e fakapuke, mo e uta kehe a lautolu oti; to pihia foki ka hau e Tama he tagata.”​—Mataio 24:37-39.

11. Ko e heigoa e puhala ne kumi e Noa pete ni kua ha ha ai e favale ke he vaha hana?

¹¹ Tuga a tautolu, ko Noa mo e hana a magafaoa kua nonofo ai ke he lalolagi favale. Ko e “tau tama tane [agelu] he Atua” kua fakafaliu fakatino tagata mo e moua ai e tau hoana mo e kua eke ai a lautolu mo matua tane ke he tau Nefalima talahaua kelea​—ko e tau tagata makimaki ne fakalaulahi atu e tau tuaga favale. (Kenese 6:1, 2, 4; 1 Peteru 3:19, 20) Pete ia, “ne o fano ai e Atua mo Noa” ke he tua. Ko ia “ko e tagata tututonu ia mo e mahani hakohako ke he hana hau”​—ko e hau keukeu he hana a vaha. (Kenese 6:9-11) Mo e falanaki he liogi ke he Atua, kua maeke ia tautolu ke taute e mena taha he lalolagi vale mo e kelea nei he fakatali a tautolu ke he aho a Iehova.

12. (a) Mai he talaga he vaka, ko e heigoa foki e gahua ne taute e Noa? (e) Fefe e tali he tau tagata ke he fakamatalaaga ha Noa, mo e ko e heigoa e tau fua ma lautolu?

¹² Kua talahaua a Noa ko e kamuta he vaka ma e fakahaoaga he moui mai he Fakapukeaga. Ko ia foki “ko e ogo he tututonu,” ka e ko e hana a tau hau kua “nakai iloa” e hana a ogo ne foaki he Atua. Ne kai mo e inu, fai hoana, feaki e tau magafaoa, mo e taute e tau mena fa mahani he moui a lautolu ato tatafi kehe ai he Fakapukeaga a lautolu oti. (2 Peteru 2:5; Kenese 6:14) Ne nakai fia manako a lautolu ke logona hagaao ke he fakatutalaaga mo e mahani tonu, ti pihia e hau keukeu he vaha nei kua papa e lautolu ha lautolu a tau teliga ka vagahau e Tau Fakamoli a Iehova hagaao ke he “tokihala ke he Atua,” tua ke he Keriso, tututonu, mo e “fakafiliaga ne tatali.” (Gahua 20:20, 21; 24:24, 25) Kua nakai fai fakamauaga kua maeke ke talahau ko e fiha e tagata ne momoui he lalolagi he magaaho ne fakapuloa e Noa e fekau he Atua. Ka e taha e mena kua moli, ko e puke tagata he lalolagi kua to hifo lahi mahaki ki lalo he 2370 F.V.N.! Kua moumou he Fakapukeaga e tau tagata mahani kelea, ka e toka ni a lautolu kua mautali ke he gahua ia he Atua​—ko Noa mo e hana a magafaoa tokofitu.​—Kenese 7:19-23; 2 Peteru 3:5, 6.

13. Ko e heigoa e fakatufono fakafiliaga ne tuku e Noa e mauokafua katoatoa i ai, mo e gahua fefe a ia ke lagotatai mo e mena nei?

¹³ Nakai tala age tuai he Atua ki a Noa e aho mo e magaaho tonu he Fakapukeaga. Pete ia, he 480 e tau tau ha Noa he moui, ne poaki a Iehova: “Nakai taufetoko tukulagi haku Agaga mo e tau tagata, ha ko lautolu foki ko e tau tagata ni; ka ko e tau aho ha lautolu ko e taha teau he tau tau ia, ti uafulu ni e tau.” (Kenese 6:3) Kua tuku e Noa e mauokafua katoatoa ke he fakatufono fakafiliaga faka-Atua nei. He mole atu e 500 he tau moui, “ti fanau [e ia] a Semu, mo Hamo, mo Iafeta,” mo e ke he aga fakamotu he vaha ia kua talahau ai ke molea e 50 ke he 60 e tau he moui to fai hoana e tau tama tane hana. He magaaho ne tala age ki a Noa ke ta e vaka ma e fakahaoaga mai he Fakapukeaga, ko e tau tama tane ia mo e ha lautolu a tau hoana ne lagomatai moli a ia ke he matagahua ia. Ko e talagaaga he vaka kua o fakalataha mo e fekafekauaga ha Noa ko e “ogo he tututonu,” kua fakalavelave tumau a ia ke hokotia ai ke he 40 ke he 50 e tau tau kua mole ato hoko e Fakapukeaga. (Kenese 5:32; 6:13-22) Ke he tau tau oti ia, ko ia mo e hana a magafaoa kua gahua ke he tua. Kia fakatata foki e tautolu e tua he fakamatala e tautolu e tala mitaki mo e tatali ke he aho a Iehova.​—Heperu 11:7.

14. Ko e heigoa ne tala age e Iehova he magaaho fakamui ki a Noa, mo e ko e ha?

¹⁴ He teitei mau tuai e vaka, kua liga manatu a Noa kua hoko fai e Fakapukeaga, pete ia nakai iloa tonu e ia e magaaho ka hoko ai. Ati tala age ai e Iehova ki a ia fakamui: “Ko e mena toe po fitu to fakato hifo ai e au e uha ke he lalolagi ke he fagofulu e aho ti fagofulu e po.” (Kenese 7:4) Ko e magaaho ku ia ne toka ai ki a Noa ke fakapotopoto ai e tau manu huifa kehekehe ki loto he vaka mo e huhu atu a lautolu ato kamata ai e Fakapukeaga. Nakai lata ia tautolu ke iloa e aho mo e magaaho ma e kamataaga he moumouaga he fakatokatokaaga nei; ko e fakahaoaga he tau manu huifa kua nakai foaki mai ki a tautolu, mo e amaamanakiaga he tau tagata ka hao kua fita he huhu atu ke he vaka fakatai, ko e parataiso fakaagaga he tau tagata he Atua.

“Kia Mataala”

15. (a) He tau kupu ni hau, to fakamaama fefe e koe e tau kupu a Iesu ne moua ia Mataio 24:40-44? (e) He nakai iloa e magaaho tonu he hauaga a Iesu ke fakahoko e tauiaga he Atua kua lauia ai e heigoa?

¹⁵ Hagaao ke he hana ha ha hinei, ne fakamaama e Iesu: “Ko e vaha ia to ha he kaina e tokoua a tagata [hane gahua]; ti uta taha, ka e toka taha. To holo [saito ke he falaoa] fakalataha e tokoua a fifine ke he mena ke holo aki e tau saito; ti uta taha, ka e toka taha. Hanai, kia mataala a mutolu; ha kua nakai iloa e mutolu po ke magaaho fe ke hau ai e Iki ha mutolu. Kia iloa e mutolu e mena nai, ane iloa he patu he fale po ke magapo fe ke hau ai e kaiha, po kua leveki ne ia, ka e nakai toka e ia hana fale kia keli ki ai. Ko e mena ia, kia nonofo tauteute ai a mutolu; ha ko e magaaho nakai ­manatu ai e mutolu, ke hau ai e Tama he Tagata.” (Mataio 24:40-44; Luka 17:34, 35) He nakai iloa ai e magaaho tonu he hauaga a Iesu ke fakahoko e tauiaga he Atua kua lata ke fakatumau a tautolu ke mataala mo e foaki mai ki a tautolu e magaaho takitaha ke fakamoli kua fekafekau a tautolu ki a Iehova mo e tau manatu nakai lotokai.

16. Ko e heigoa e mena ka tupu ki a lautolu ne “toka” hifo mo e ki a lautolu ne “uta”?

¹⁶ Ko lautolu ne “toka” hifo ke he moumouaga fakalataha mo e tau tagata mahani kelea ka putoia ai mo lautolu ne iloa ai ke he taha magaaho ka e kua tafia ai he puhala lotokai he moui. Kia eke a tautolu ke fakalataha mo lautolu ne “uta,” ko lautolu ne fakamoli katoatoa ki a Iehova mo e loto fakaaue moli ma e hana a tau foakiaga fakaagaga ne puhala mai he “fekafekau fakamoli mo e loto matala.” (Mataio 24:45-47) Ke hoko ke he fakaotiaga, kia fekafekau a tautolu ke he Atua mo e “fakaalofa ia mai he loto mea, mo e loto manamanatu hifo mitaki, mo e tua fakamoli.”​—1 Timoteo 1:5.

Aoga Lahi e Tau Gahua Tapu

17. (a) Ko e heigoa kua talahau tuai mai ia 2 Peteru 3:10? (e) Ko e heigoa falu he tau gahua mo e tau tauteaga kua fakamalolo mai he 2 Peteru 3:11?

¹⁷ Ne tohi he aposetolo ko Peteru: “To hau e aho he Iki tuga ne kaiha ke he po, to mole atu e lagi mo e go lahi, ti fakaotioti ai foki e tau mena kua eke aki he vela; ko e lalolagi foki mo e tau gahua ha ha i ai to huhunu ni.” (2 Peteru 3:10) Ko e lagi mo e lalolagi fakatai to nakai hao mai he ita lahi mahaki he Atua. Ti lafi e Peteru: “Ko e hanai, to fakaotioti e tau mena oti ia, po ke fefe ha mutolu a mahani ke lata ai ke he tau mahani mitaki mo e tau mahani Atua.” (2 Peteru 3:11) Ke he tau gahua mo e mahani nei kua kitia tumau ai ke he tau feleveiaaga Kerisiano, taute ai e mitaki ke he falu, mo e fakalataha auloa he gahua aoga lahi ke fakamatala e tala mitaki.​—Mataio 24:14; Heperu 10:24, 25; 13:16.

18. Ka hane fa e fakatupu e tautolu e matutakiaga ke he lalolagi, ko e heigoa ha tautolu ka lata ke taute?

¹⁸ Ko e tau “mahani ke lata ai ke he tau mahani mitaki mo e tau mahani Atua” kua manako ke ‘leveki e tautolu a tautolu neke ilaila a tautolu he lalolagi.’ (Iakopo 1:27) Ka e kua kaeke ka hane fa e fakatupu e tautolu e matutakiaga ke he lalolagi nei? Liga kua fakataki a tautolu ke he tuaga hagahagakelea ki mua he Atua he kumi e fakafiafiaaga nakai mea po ke he fanogonogo ke he leo kofe mo e tau lologo kua fakatolomaki e agaga nakai mahani Atua he lalolagi nei. (2 Korinito 6:14-18) Kaeke ko e mena a ia ne tupu, kia kumi atu a tautolu ke he lagomatai he Atua he liogi ke nakai maeke ia tautolu ke mole atu mo e lalolagi ka e ke tumau e taliaaga ki mua he Tama he tagata. (Luka 21:34-36; 1 Ioane 2:15-17) Kaeke ke taute e tautolu e tukuleleaga ke he Atua, to manako moli a tautolu ke taute ha tautolu a mitaki mua ue atu ke ati mo e tumau e fakafetuiaga mafanatia mo ia mo e ke mautali ke he aho lahi mo e matakutakuina a Iehova.

19. Ko e ha e moto tagata tokologa he tau tagata fakapuloa he Kautu kua amaamanaki ke momoui mai he fakaotiaga he fakatokatokaaga kelea he tau mena nei?

¹⁹ Ko Noa mahani Atua mo e hana a magafaoa kua momoui mai he Fakapukeaga ne moumou e lalolagi i tuai. Ko lautolu ne tututonu kua hao mai he fakaotiaga he fakatokatokaaga he tau mena i Iutaia he 70 V.N. Tuga a nei, kua makaukau agaia e aposetolo ko Ioane ke he fekafekauaga he Atua ke he kavi he 96-98 V.N., he magaaho ne tohi e ia e tohi a Fakakiteaga, ko e fakamauaga Evagelia hana, mo e tolu e tohi omoomoi. He totou afe ne kuku mau e tua moli he Penetekoso he 33 V.N., kua liga tokologa ne momoui mai he fakaotiaga he fakatokatokaaga Iutaia. (Gahua 1:15; 2:41, 47; 4:4) He vaha nei ko e moto tagata tokologa he tau tagata ne fakapuloa e Kautu kua maeke ke amaamanaki ke momoui mai he fakaotiaga he fakatokatokaaga kelea he tau mena nei he mogonei!

20. Ko e ha kua lata ai a tautolu ke eke mo tau “ogo he tututonu” kua makaukau?

²⁰ Ma e fakahaoaga ke he lalolagi fou i mua ha tautolu, ki a eke a tautolu mo “tau ogo [fakamakamaka] he tututonu.” Ko e kotofaaga ha a ia ke fekafekau ke he Atua he tau vaha fakahiku nei! Ko e olioli ha a ia ke uta e tau tagata ke he “vaka” he vaha nei, ko e parataiso fakaagaga kua olioli ai he tau tagata he Atua! Kia nonofo mau e tau miliona he magaaho nei i loto mo e fakatumau ke fakamoli, mataala fakaagaga, mo e tatali ke he aho lahi a Iehova. Ka e ko e heigoa ka lagomatai a tautolu ke mataala tumau?

[Matahui Tala]

To Tali Fefe a Koe?

◻ Ko e heigoa e tau amaamanakiaga kua ha ha ai he falu hagaao ke he aho a Iehova mo e ha ha hinei a Keriso?

◻ Ko e ha ne pehe ai a tautolu kua mautali a Noa mo e hana a magafaoa ke he Fakapukeaga?

◻ Ko e heigoa e mena ka tupu ki a “lautolu ne mataala” mo e ki a lautolu ne nakai mataala?

◻ Ko e ha kua aoga lahi e tau gahua tapu, mua atu he tata lahi atu a tautolu ke he aho lahi a Iehova?