Fakaaue Nakai a Koe ke he Fakatokatokaaga ha Iehova?
“Kua vagahau mai pehe a Iehova, Ko e lagi ko e haku a nofoaiki haia, ko e lalolagi ko e haku a fakatuaga hui haia.”—ISAIA 66:1.
1, 2. (a) Ko e heigoa e fakamoliaga he fakatokatokaaga kitia mata ha Iehova ne kua fioia e koe? (e) Nofo i fe a Iehova?
TALITONU nakai a koe na fai fakatokatokaaga a Iehova? Ka pihia, ko e ha ne tali tonu ai a koe? Liga tali e koe: ‘Haia ia mautolu e Fale he Kautu. Ha ha ia mautolu e fakapotopotoaga ne mitaki e fakaholoaga katoa mo e kau he tau motua. Ha ha ia mautolu e fekafekau leveki he takaiaga ne kotofa ke ahi tumau mai ki a mautolu. O atu a mautolu ke he tau toloaga mo e tau fonoaga fakatokatoka mitaki. Ha ha ia mautolu e la ofisa he Sosaiete he Kolo Toko he motu ha mautolu. Ti moli ni, kua fakamoli he tau mena oti nei mo e mua atu foki ko e fai fakatokatokaaga gahuahua a Iehova.’
2 Kua fakakite he tau mena nei ko e fai fakatokatokaaga moli. Ka e kaeke ko e kuenaia ni e mena ne kitia mo e mailoga e tautolu ke he lalolagi nei, kua nakai tuai maama katoa e tautolu e fakatokatokaaga ha Iehova. Ne talaage a Iehova ki a Isaia ko e lalolagi ko e fakatuaga hui hana haia, ka ko e lagi ko e Hana a nofoaiki haia. (Isaia 66:1) Ko e “lagi” fe ne hagaao a Iehova ki ai? Ke he ha tautolu a takatakaiaga? Ke he pulagi likoliko? Po ke ke he falu a tuaga he moui? Ne vagahau a Isaia ke he “haeleaga tapu mo e fulufuluola” ha Iehova, mo e fakamaama he salamo e lagi nei ko e “mena kua haele ai a ia.” Ti, ko e “lagi” ia Isaia 66:1 kua hagaao ke he kautu fakaagaga nakai kitia mata ne ha ha he tuaga tokoluga, po ke mua ue atu ha Iehova.—Isaia 63:15; Salamo 33:13, 14.
3. Maeke fefe ia tautolu ke kautu mai he fakauaua?
3 Ti ko e mena ia, kaeke ke manako moli a tautolu ke fioia mo e mailoga e fakatokatokaaga ha Iehova, lata ia tautolu ke hahaga ke he lagi. Ti ko e mena haia ne lekua ai e falu. Ha kua nakai kitia mata e fakatokatokaaga ha Iehova he lagi, iloa fefe e tautolu ko e mena moli? Liga hohoko falu ke fakauaua, he manamanatu, ‘Iloa fefe kua moli a tautolu?’ Ka e, maeke fefe he tua ke uta kehe e fakauaua? Ua e puhala uho, ko e hokulo he fakaako fakatagata ke he Kupu he Atua mo e o tumau mo e fai putoiaaga he tau feleveiaaga Kerisiano. Ati kitia ai e tautolu e maama he kupu moli he taha fahi he hala. Kua fai fekafekau foki e Atua ne fakauaua. Kia kikite atu a tautolu ke he mena ne tupu ke he fekafekau ha Elisaio he magaaho ne tau e patuiki a Suria ki Isaraela.—Fakatatai Ioane 20:24-29; Iakopo 1:5-8.
Ko Ia ne Kitia e Tau Kau he Lagi
4, 5. (a) Ko e heigoa e lekua ne moua he fekafekau ha Elisaio? (e) Tali fefe e Iehova e liogi ha Elisaio?
4 Ne fakafano he patuiki a Suria e tau kautau tokologa he po ki Totana ke tapaki a Elisaio. He mogo ne uhu matike e fekafekau ha Elisaio mo e fano ki fafo, ligaliga ni ke moua e hahau i luga he tuafale lapalapa he fale he Lotouho he Fahi Uta ha laua, ati ofo ai a ia! Ko e kau katoa he tau Suria mo e tau solofanua mo e tau kariota hane agaagai mai ke he maaga, he fakatalitali ke tapaki e perofeta he Atua. Ne pehe mai e fekafekau ki a Elisaio: “Oi te fakaalofa! ko e Iki na e, ko e heigoa kia e mena ke eke ai e tautolu?” Moli ni, ne totoka mo e mauokafua, ne tali age a Elisaio: “Ua matakutaku a koe, ha kua mua he tokologa ha ha ia tautolu, kia lautolu ha ha ia lautolu.” Liga manamanatu e fekafekau, ‘Ko fe a a lautolu ia? Ai kitia ai e au!’ Falu a mogo liga ko e taha lekua foki a ia ha tautolu—ko e mahala ke kitia mo e tau mata he maamaaga, po ke ke fioia, e tau kau he lagi.—2 Tau Patuiki 6:8-16; Efeso 1:18.
5 Ne liogi a Elisaio ke fakaala e tau mata he hana a fekafekau. Ko e heigoa foki ne tupu? “Ti fakaala ai e Iehova e tau mata he fuata, ti kitia e ia, kitiala, kua puke e mouga ke he tau solofanua mo e tau kariota afi, kua agaagai a lautolu kia Elisaio.” (2 Tau Patuiki 6:17) E, kua kitia e ia e tau kau he lagi, tau kau agelu ne fakatalitali ke fakalavetiia e fekafekau he Atua. Mogonei kua maama tuai e ia e mauokafua ha Elisaio.
6. Maeke fefe ia tautolu ke moua e lotomatala ke he fakatokatokaaga ha Iehova i luga he lagi?
6 Kua fai lekua kia a tautolu he falu mogo ke he fioiaaga ke tuga ne moua he fekafekau ha Elisaio? Kua hagahaga kia a tautolu ke kitia hokoia ni e fahi tino he tau tutuaga ne fakalikalika a tautolu po ke gahua faka-Kerisiano he falu motu? Ka pihia, to talifaki kia a tautolu ke he fakakiteaga pauaki ke fakalotomatala a tautolu? Nakai, kakano kua haia ia tautolu taha mena ne nakai moua he fekafekau ha Elisaio—ko e tohi katoa ne toka ai e tau fakakiteaga loga, ko e Tohi Tapu, ka foaki ki a tautolu e lotomatala ke he fakatokatokaaga he lagi. Kua mai foki he Kupu mai he agaga ia e takitakiaga he tau matapatu fakaakoaga ke fakahakohako aki e tau manamanatu ha tautolu mo e tau puhala he moui ha tautolu. Ka e, lata ia tautolu ke lali ke kumi e maamaaga mo e feaki hake e loto fakaaue ke he fakaholoaga a Iehova. Mo e taute pihia ai e tautolu ha ko e fakaako fakatagata, fakalataha mo e liogi mo e manamanatu fakahokulo.—Roma 12:12; Filipi 4:6; 2 Timoteo 3:15-17.
Fakaako ke Iloa
7. (a) Ko e heigoa e lekua ka liga moua he falu ha ko e fakaako Tohi Tapu fakatagata? (e) Ko e ha kua aoga lahi ai ke fakaako fakatagata?
7 Ko e fakaako fakatagata nakai ko e taha mena fiafia ma e tokologa he tau tagata, tuga a lautolu ne nakai manako ke fakaako he aoga po kua nakai hohokotia ke taute pihia. Pete ni ia, kaeke ke manako a tautolu ke fioia mo e mailoga e fakatokatokaaga ha Iehova mo e ha tautolu a tau mata he maamaaga, kua lata ia tautolu ke feaki hake e manako ke fakaako. Maeke nakai ia koe ke olioli e kai mitaki ka e nakai tauteute tuai? To tala atu ni he taha tagata tunu kai ki a koe, ko e gahua lahi ke tauteute tuai e kai lolo. Ka e, liga hafa ni e matahola po ke tote ka kai ai. Ke he taha fahi, ko e tau lagomatai he fakaako fakatagata to mau tukulagi. To maeke e fakaako fakatagata mo mena fou he magaaho ka kitia e tautolu e holo ki mua ka taute e tautolu. Ne tonu e talahauaga he aposetolo ko Paulo ke lata ia tautolu ke tokaga tumau a tautolu ki a tautolu ni katoa mo e ha tautolu a fakaakoaga mo e hagaaki ke totou tohi. Kua lata ni ke lali tumau, ha kua tukulagi e tau lagomataiaga.—1 Timoteo 4:13-16.
8. Ko e heigoa e mahani ne tomatoma mai he Tau Fakatai?
8 Ne pehe mai e tagata pulotu i tuai: “Haku tama na e, kaeke ke talia e koe haku a tau kupu, mo e toka ai e koe ke he loto hau haku a tau poaki. Kua fakateliga hāu a tau teliga ke he iloilo, kua haga atu ai hāu a loto ke he manamanatu. Kaeke kua ui atu a koe ke he loto matala, mo e fakaleo lahi atu ke he loto manamanatu. Kaeke ke kumi e koe a ia, tuga he kumi ario; kaeke ke kumi fakamakutu ki ai, tuga he kumi e koloa galo. Ti iloa ai e koe e matakutaku kia Iehova, mo e moua ai e koe e iloilo ke he Atua.”—Tau Fakatai 2:1-5.
9. (a) Fakatatai fefe e aoga he auro ke he “iloilo ke he Atua”? (e) Ko e heigoa e tau lagomataiaga ne lata ia tautolu ke moua e iloilo tonuhia?
9 Fioia nakai e koe ko e toka i fe e laliaga? ‘Kaeke ko koe’ e talahauaga fatiaki tumau. Mo e mailoga e talahauaga, ‘Kaeke ke kumi fakamakutu a koe ke he koloa galo.’ Manamanatu la ke he tau tagata ne keli ario mo e auro ke he tau senetenari i Aferika Toga, Mesiko, Polivia, mo e falu he tau motu. Ne gahua fakamakamaka a lautolu, he fakaaoga e tau metiki mo e tau tuo, ke keli aki e maka ka moua ai e lautolu e tau maka uho. Ne aoga lahi e auro ki a lautolu ti he taha luo i California, T.F.K.A., ne kelikeli atu e lautolu ke 591 e kilomita he tau hala i loto, ke hoko ke kavi 1.5 e kilomita he hokulo—ke moua ai ni e auro. Ka e, maeke nakai a koe ke kai e auro? Inu e auro? To lagomatai nakai a koe he tutakale ane mai ke teitei mate a koe he hoge mo e fia inu? Nakai, ko e hana aoga kua nakai moli mo e ko e mena fakatagata, ne hikihiki he tau aho oti tuga ne fakakite he tau makete fakafua he lalolagi. Ka e pete he pihia, mamate e tau tagata ha ko e mena ia. Haia, ko e aoga fefe a ia ke fakamakamaka ke moua e auro fakaagaga, ‘ko e iloilo ke he Atua’? Manamanatu la ki ai, ko e iloilo ke he Iki Pule Katoatoa he lagi mo e lalolagi, hana fakatokatokaaga, mo e hana tau finagalo! Ke he mena nei, lata ia tautolu ke fakaaoga e tau metiki mo e tau tuo. Ko e tau mena nei ko e tau tohi fakave ke he Tohi Tapu ne lagomatai a tautolu ke kelikeli ki loto he Kupu a Iehova mo e manamanatu ke he tau kakano.—Iopu 28:12-19.
Kelikeli ma e Lotomatala
10. Ko e heigoa ne kitia e Tanielu he fakakiteaga?
10 Kia taute ai e tautolu e kelikeli fakaagaga ke iloa ai e iloilo ke he fakatokatokaaga ha Iehova he lagi. Ma e lotomatala ne mua, kia hahaga atu a tautolu ke he fakakiteaga a Tanielu ki a Ia i Tuai Hana Tau Aho he hana a nofoaiki. Kua tohia e Tanielu: “Ne kitekite au ato tuku mai e tau nofoaiki, he nofo ai foki A ia mai i tuai hana tau aho, kua hina hana tapulu tuga ne kiona, mo e hana tau lauulu kua tuga ne tau fulu mamoe mitaki; ko e hana nofoaiki ko e afi puhopuho haia, mo e hana tau veli ko e afi huhunu mena haia. Ne tafe mai e afi ne fina atu ai i mua hana, ko e afe ni e afe ne fekafekau kia ia, ti hogofulu e afe kua taki hogofulu e afe ne tutu ki mua hana; ne eke ai e fakafiliaga, mo e fofola ai e tau tohi.” (Tanielu 7:9, 10) Ko hai e totou afe nei ne fekafekau ki a Iehova? Ko e fakamaamaaga he lotouho he New World Translation, ne fakaaoga e “metiki” mo e “tuo,” kua takitaki atu a tautolu ke he tau fakamaamaaga tuga he Salamo 68:17 mo e Heperu 1:14. E, ko lautolu ne fekafekau ko e tau agelu he lagi!
11. Maeke fefe he fakakiteaga a Tanielu ke lagomatai a tautolu ke maama e tau kupu a Elisaio?
11 Nakai talahau he fakamauaga ha Tanielu kua kitia oti e ia e tau agelu fakamoli ne pule ki ai e Atua. Liga totou miliona atu foki a lautolu. Ka e moli kua maeke ia tautolu he mogonei ke mailoga ko e ha ne pehe mai a Elisaio: “Kua mua he tokologa ha ha ia tautolu, kia lautolu ha ha ia lautolu.” Ko e tau kautau he patuiki ha Suria, pete ni he lagomatai he tau agelu nakai fakamoli, ko e tau temoni, kua tokofiha mai he tau kautau ha Iehova he lagi!—Salamo 34:7; 91:11.
12. Maeke fefe ia koe ke iloa lahi hagaao ke he tau agelu?
12 Fakalata la kua manako a koe ke iloa lahi hagaao ke he tau agelu nei, tuga ke he matagahua ha lautolu he fekafekau ki a Iehova. Mai he kupu Heleni ma e agelu, mailoga e tautolu ko e tau ogo fekau a lautolu ha kua kakano foki ai ko e “uta fekau.” Ka kua lahi atu e tau matagahua ha lautolu. Ka ke iloa ko e heigoa e tau mena ia, lata ia koe ke kelikeli. Kaeke ke moua e koe e Insight on the Scriptures, kia kumikumi ke he vala tala “Tau Agelu,” po ke ke he tau vala tala tuai he Kolo Toko ne hagaao ke he tau agelu. To fakatalaga a koe ke he tau mena loga ka ako e koe hagaao ke he tau fekafekau he lagi nei he Atua mo e hokotia atu ke fakaaue ke he ha lautolu a lagomatai. (Fakakiteaga 14:6, 7) Ka e, he fakatokatokaaga he Atua i luga he lagi, fai fekafekauaga pauaki e falu agelu.
Mena ne Kitia e Isaia
13, 14. Ko e heigoa ne kitia e Isaia he fakakiteaga, mo e lauia fefe a ia ke he mena nei?
13 Mogonei kia kelikeli atu a tautolu ke he fakakiteaga a Isaia. He magaaho ka totou e koe e veveheaga 6, tau kupu 1 ke he 7, to nava ai ni a koe. Ti talahau e Isaia “ne kitia e au e Iki kua nofo ki luga he nofoaiki,” mo e “tutu ai ki luga e tau sirafi.” Kua fakapuloa e lautolu hagaao ke he lilifu a Iehova, he fakatokoluga hana a tapu. Kua lauia ai a koe pete ni he totou e fakamauaga nei. Ko e heigoa e mena ne taute e Isaia? “Ti pehe atu ai au, Oi te fakaalofa kia au! kua malaia ni au [i Seoli]; ha ko au ko e tagata laugutu kelea, ti nofo foki au fakalataha mo e tau tagata laugutu kelea; kua kitia ni haku tau mata e Patuiki ko Iehova Sapaota.” Kua nava ha a ia ke he fakakiteaga ia! Pihia nakai a koe?
14 Ti kua maeke fefe a Isaia ke fehagai mo e kitiaaga lilifu ue atu nei? Kua fakamaama mai e ia ne laveaki he serafi a ia mo e tala age: “Kua uta kehe ai hāu a mahani kelea, kua fakamagalo ai hāu a tau hala.” (Isaia 6:7) Kua falanaki a Isaia ke he fakaalofa hofihofi he Atua mo e tokaga atu ke he tau kupu a Iehova. Kua nakai kia manako a koe, he mogonei, ke iloa lahi hagaao ke he tau moui fakaagaga he tuaga tokoluga nei? Ti ko e heigoa kua lata ia koe ke taute? Kia kelikeli atu ma e tau fakailoaaga foki. Taha e lagomataiaga ke fakaaoga ko e Watch Tower Publications Index, he kumikumi ke he tau fakamaamaga he tau matapatu loga ma e fakailoaaga maamatia.
Ko e Heigoa ne Kitia e Esekielu?
15. Fakakite he heigoa ko e molioli e fakakiteaga a Esekielu?
15 Kia hahaga a tautolu he mogonei ke he taha faga he tau tufugatia fakaagaga. Kua monuina a Esekielu ke moua e fakakiteaga mai he agaga he magaaho ne paea a ia i Papelonia. Hafagi e Tohi Tapu hau ke he Esekielu veveheaga 1, tau kupu tolu fakamua. Kamata fefe e fakamauaga? Pehe nakai, ‘He taha vaha, he motu mamao . . .’? Nakai, ha ko e mena nakai ko e tala fakataitai anei he taha vaha noa ni. Ne pehe e kupu 1: “Ko e tau tolugofulu, ke he fa mahina, ke he aho lima he mahina, ne ha i ai au mo e tau tagata he paeaga ne tata age ke he vailele ko Kepara, to maihiua ai e lagi, ti kitia ai e au e tau fakakiteaga mai he Atua.” Ko e heigoa ne fioia e koe he kupu nei? Kua fakakite e aho tonu mo e kavi tonu. Kua tuhi atu e tau talahauaga nei ke he tau ke lima aki he paeaaga he Patuiki ko Iehoakina, ko e tau 613 F.V.N.
16. Ko e heigoa ne kitia e Esekielu?
16 Ne hokotia atu e lima ha Iehova ki a Esekielu, mo e kamata a ia ke kitia e fakakiteaga ofogia ne mai he agaga ha Iehova i luga he nofoaiki he kariota mahaki he lagi ne lalahi e tau veli mo e tau mata ne viko takai he tau veli. Ko e talahauaga ne makai a tautolu ki ai ko e ha i ai fa e mena moui, kua igatia ke takitaha e veli ke tu ai. “Ko e ha lautolu a tino mai hanai, kua fakatai a lautolu ke he tagata. Ko e takitaha foki a lautolu mo e hana tau mata ne fa, takitaha foki mo e hana tau tapakau ne fa. . . . Ko e fakatai foki he tau mata ha lautolu, ha ha ia lautolu ne fa e tau mata po ke tagata, mo e tau mata po ke leona ke he fahi matau; ha ha ia lautolu ne fa foki e tau mata po ke povi ke he fahi hema; ha ha ia lautolu ne fa foki e tau mata po ke aeto.”—Esekielu 1:5, 6, 10.
17. Ko e heigoa ne fakakite he tau mata ne fa he tau kerupi?
17 Ko e heigoa e tau mena momoui tokofa nei? Ne talahau mai ni e Esekielu ko lautolu ko e tau kerupi. (Esekielu 10:1-3, 14) Ko e ha ne fa e tau mata ha lautolu? Ke fakakite aki e tau mahani mua ue atu ne fa he Iki Pule Katoatoa ko Iehova. Ko e mata po ke aeto ko e fakataiaga he pulotu kitia mamao. (Iopu 39:27-29) Ko e heigoa ne fakakite he mata po ke povi? Mo e malolo lahi he hana kakia mo e tau tukeua, ko e povi tane tau kua talahaua ke lagaki e solofanua mo e tagata heke i luga. Moli ni, ko e povi tane ko e fakataiaga he malolo nakai fakakaupa ha Iehova. Ko e leona kua fakaaoga mo fakataiaga he fakafiliaga tonu mo e malolo. Ke fakahiku aki, ko e mata he tagata kua fakakite ai e fakaalofa he Atua, ha ko e tagata hokoia ni he tau mena momoui he lalolagi ne moua e fua lotomatala nei.—Mataio 22:37, 39; 1 Ioane 4:8.
18. Lafi mai fefe he aposetolo ko Ioane ke he ha tautolu a maamaaga ke he fakatokatokaaga he lagi?
18 Ha ha i ai foki falu he tau fakakiteaga ke lagomatai aki a tautolu ke fakakatoatoa e fakatino. Putoia ke he tau mena nei ko e tau fakakiteaga a Ioane ne fakakite mai he tohi Tohi Tapu ia Fakakiteaga. Ko ia, tuga a Esekielu, kua kitia ai a Iehova i luga he nofoaiki lilifu ne fakafaihoani he tau kerupi. Ko e heigoa he tau kerupi ne fa e taute? Ne fakataogo e lautolu e fakailoaaga ia Isaia veveheaga 6, he talahau: “Kua tapu, kua tapu, kua tapu e Iki, ko e Atua hana e malolo oti kana, ko ia ne moui tuai, kua moui nai foki, ko ia foki ka haele mai.” (Fakakiteaga 4:6-8) Kitia foki e Ioane e punua mamoe he tapa nofoaiki. Liga ko hai a ia ne fakakite mai? Ko e Punua Mamoe ni he Atua, ko Iesu Keriso.—Fakakiteaga 5:13, 14.
19. Ha ko e fakaakoaga nei, ko e heigoa ne mailoga e koe hagaao ke he fakatokatokaaga ha Iehova?
19 Ti ha ko e tau fakakiteaga nei, ko e heigoa kua mailoga e tautolu? Ko e haia he fakatokatokaaga he lagi he tapunu mua ue atu a Iehova ko e Atua he nofoaiki hana ne fakafaihoani he Punua Mamoe, ko Iesu Keriso, ko ia ko e Kupu, po ke Loko. Ti kua kitia e tautolu e tau kau agelu he lagi, fakalataha ai e tau serafi mo e tau kerupi. Ko e vala a lautolu he fakatokatokaaga mahaki ne kaufakalataha ke taute e tau finagalo a Iehova. Mo e taha he tau fingalo ia ko e fakamatalaaga he tala mitaki ke he lalolagi katoa he vaha fakahiku nei.—Mareko 13:10; Ioane 1:1-3; Fakakiteaga 14:6, 7.
20. Ko e heigoa e huhu ka tali he vala tala ne mui mai?
20 Ke fakahiku, haia ia tautolu e Tau Fakamoli a Iehova he lalolagi hane feleveia ke he ha lautolu a tau Fale he Kautu ke fakaako e puhala ke taute e finagalo he Iki Pule Katoatoa. Haia he mogonei, kua mailoga tuai e tautolu kua mua he tokologa ha ha ia tautolu, kia lautolu ne ha ha mo Satani mo e tau fi he kupu moli. Ti fai huhu ne huhu mai, Matutaki fefe e fakatokatokaaga he lagi ke he fakamatalaaga he kupu moli he Kautu? To kumikumi he vala tala ka mui mai ki ai mo e falu a lekua foki.
Tau Huhu ke Fakamanatu
◻ Ke fakaaue ke he fakatokatokaaga ha Iehova ko e heigoa kua lata ia tautolu ke mailoga?
◻ Ko e heigoa ne fakafita e fekafekau ha Elisaio ki ai, mo e fakamafana fefe he perofeta a ia?
◻ Puhala fe kia fioia e tautolu e fakaako fakatagata?
◻ Foaki fefe e Tanielu, Isaia, mo Esekielu e tau talahauaga ke he fakatokatokaaga he lagi?
[Fakatino he lau 7]
Ko e tau lagomatai he fakaako fakatagata kua mahomo atu ke he kai lolo ne tauteute tuai
[Fakatino he lau 9]
Ko e fakakiteaga he tau kau he lagi ko e tali haia ha Iehova ke he liogi a Elisaio