Kia Fakatumau ke Tupu ki Mua Fakaagaga!

Ko e aho papatiso ha tautolu ko e aho kua lata ke feaki mo e manatu tumau. Ha ko e aho ia ne fakakite e tautolu ke he tau tagata oti, kua tukulele tuai a tautolu ke fekafekau ke he Atua.

KA KUA tokologa e tau tagata ne uka lahi ke hokotia ke he kavi nei​—he tiaki e tau aga kelea kua leva, tiaki e lafi hana mo e tau kapitiga kelea, he hikihiki e tau puhala manamanatu mo e aga.

Pete ni ko e magaaho fiafia lahi ke he moui he Kerisiano ka papatiso ai, ka ko e kamataaga agaia ni a ia. Ne tala age e aposetolo ko Paulo ke he tau Kerisiano papatiso i Iuta: “Ko e mena ia kia toka ai e tautolu e tau kupu fakamua a Keriso, kia hohoko atu a tautolu ke he katoatoaaga.” (Heperu 6:1) E, kua lata e tau Kerisiano “oti kana ke he loto fakalataha ke he tua; mo e iloa maliali e Tama he Atua, ato eke mo tau tagata kua katoatoa ai e mahani mitaki, ato hohoko atu foki ke he fafatiaga he loa kua lata mo e puke ha ia Keriso.” (Efeso 4:13) Ko e tupu ki mua ni ke he katoatoaaga ka maeke moli ai a tautolu ke “fakatumau ke he tua.”​—Kolose 2:7.

He tau tau gaogao e ne mole, ne o mai e totou teau he tau tagata tapuaki ne tukulele fou ki loto he fakapotopotoaga Kerisiano. Ko koe foki fakalata ia lautolu ia. Ke tuga e tau matakainaga hau he senetenari fakamua, kua nakai manako a koe ke tuga e tama tote fakaagaga. Ka kua manako a koe ke tupu hake, ke holo ki mua! Ka e taute fefe? Mo e ko e heigoa e falu puhala ne maeke ia koe ke taute e tupu ki mua pihia?

Tupu ki Mua Ha ko e Fakaako Fakatagata

Ne tala age e Paulo ke he tau Kerisiano i Filipi: “Ko e haku a liogi hanai, kia fakatupu lahi ue atu ha mutolu a fakaalofa, mo e maama, katoa mo e loto matala oti kana.” (Filipi 1:9) Ke moui hake ke he “maama” kua aoga mahaki ma e tupu ki mua fakaagaga hau. Ko e fakaholoaga mau a ia ‘ke iloa a Iehova ko e Atua mo Iesu Keriso,’ nakai ko e taha mena ke fakamotuhia ni ka oti e papatiso.​—Ioane 17:3.

Taha e matakainaga fifine ka ui aki e tautolu a Alexandra, ne mailoga e mena nei he mole e hogofulu tau ne papatiso ai a ia he 16 e tau tau he moui. Kua feaki hake a ia he kupu moli ti fa fano tumau ke he tau feleveiaaga Kerisiano mo e fakalataha ke he feua fakamatala. Ne tohia e ia: “He tau mahina gaogao kua mole, ne mailoga e au kua fai mena tuai ne nakai hako. Ati kumikumi fakamoli hifo au ki a au ni, ko e fefe e kupu moli ki a au, mo e ko e ha ne ha ha agaia au i loto he kupu moli.” Ko e heigoa ne moua e ia? Ne fakaholo atu a ia: “Mailoga e au ko e tau kakano ne haia au he kupu moli kua faguna mai ki a au. Liu au manatu e mogo ne lahi hake au, kua peehi mai e tau feleveiaaga mo e fakamatalaaga he fonua. Tuga kua pehe to taute tumau e fakaako fakatagata mo e liogi. Ka e he manamanatu hifo au ke he haku a tuaga, ne kitia moli e au kua nakai pihia.”

Ne tomatoma mai e aposetolo ko Paulo: “Ko e mena kua hoko ki ai a tautolu kia o leva fakalata ke he fakatufono ia.” (Filipi 3:16) Maeke he fakatufono ke taute e puhala ke muitua ki ai. Fakamua to papatiso a koe, moli kua fai fakatufono a koe mo e faiaoga motua fakaagaga ke he fakaakoaga Tohi Tapu. He tupu ai e loto fakaaue hau, ne lafi ai e koe ke he fakatufono nei e tauteute fakamua ma e tau fakaakoaga he tau vaha tapu takitaha, he kumikumi e tau kupu he Tohi Tapu ne tohi ai mo e falu mena foki. Mogonei, kua papatiso tuai a koe, kua fakatumau nakai a koe ke ‘fano he fakatufono ia’?

Ka nakai, ti kua lata ia koe ke liu kikite fakaeneene ke he tau mena ne mua he moui hau, ‘he mailoga e tau mena [“aoga lahi,” NW].’ (Filipi 1:10) He tau moui lavelave ha tautolu, kua lata ke fakauka ke tuku ke he ­mafoa taha magaaho ke totou e Tohi Tapu mo e fakaako fakatagata. Ka ko e tau fua mai ai ati aoga ai e laliaga pihia. Kikite foki la ki a Alexandra. “Ne nofo au he kupu moli ke kavi 20 e tau tau, he fano teao noa ni ke he tau feleveiaaga mo e fakalataha ke he fakamatalaaga he fonua,” he talahau fakamoli e ia. Ka e talahau foki e ia, “ka kua kitia tuai e au, ko e pete ni he aoga e tau mena nei, kua nakai ni maeke ke lagomatai au he mogo ka to lahi e uka. Kua kitia maali e tau mena nei ha kua fa lagataha ni ke taute e fakaako fakatagata haku, mo e tau liogi haku kua nakai tumau mo e nakai hokulo. Mailoga e au he mogonei kua lata tuai au ke hiki e puhala manamanatu haku mo e taute taha polokalama fakaako kakano ke iloa moli e au a Iehova mo e fakaalofa ki a ia mo e fakaaue ke he mena ne foaki he Tama hana ma tautolu.”

Kaeke manako lagomatai a koe ke moua e fakatufono malolo he fakaako fakatagata, to fiafia e tau motua mo e tau Kerisiano momotua he fakapotopotoaga hau ke lagomatai a koe. Mo e haia foki e tau vala tala ke lagomatai he tau fufuta he Ko e Kolo Toko ia Me 1, 1995; Aokuso 15, 1993; mo Me 15, 1986.

Ko e Manako ke Fakatata Atu ke he Atua

Ko e taha vala ne lata foki ia koe ke lali ke tupu ki mua ki ai, ko e hau a fakafetuiaga mo e Atua. Ke he falu a tutuaga liga ha ha i ai e manako lahi ke he mena nei. Kikite la ki a Anthony, ne papatiso he tote agaia. “Ko e tama fakamua au he magafaoa ke papatiso,” he talahau e ia. “He oti e papatiso haku ne kuku fakamafana he matua fifine haku au. Nakala kitia e au a ia he fiafia lahi pihia. Ha ha ai e olioli lahi, mo e logona e au e malolo.” Ka e, fai fahi foki ke he fakatino nei. “Kua fai magaaho ne nakai la papatiso ha fuata tote he fakapotopotoaga ha mautolu,” he talahau mai foki e Anthony. “Ti fiafia lahi au ki au ni. Mo e nava au ke he tau tali mo e tau lauga haku he tau feleveiaaga. Ti mua atu e lali ke fakaheke mai e tau tagata ki a au ke he fakakehe atu ki a Iehova. Kua nakai ha ha moli ia au e fakafetuiaga tata mo ia.”

Tuga a Anthony, kua tokologa ne tukulele ha kua manako ke fakafiafia e falu mai he manako ke fakafiafia a Iehova. Pete ia, ne amanaki e Atua ki a lautolu pihia ke fakamoli ha lautolu a omonuo ke fekafekau ki a ia. (Fakatatai Fakamatalaaga 5:4.) Ti ka nakai fai matutakiaga fakatagata ke he Atua, kua uka lahi ai ki a lautolu ke taute pihia. Ne liu a Anthony manatu: “Kua nakai tu leva e fiafia lahi haku he mogo ne papatiso ai. Nakai la katoa e tau he papatiso au ne taute e au taha mena kelea lahi ati akonaki ai he tau motua he fakapotopotoaga. Ha kua taute tumau e kelea ne tuku au ki tua he fakapotopotoaga. Ono e tau he mole e papatiso au ki a Iehova ne uta au tuku he fale puipui he kelipopo taha tagata.”

Feaki e Fakafetuiaga Uho mo Iehova

Ko e heigoa ni e tuaga hau, kua lata ke oma he tau Kerisiano oti kana e uiina he Tohi Tapu: “Kia fakatata atu a mutolu ke he Atua, ti fakatata mai ai a ia kia mutolu.” (Iakopo 4:8) Moli kua fakatatatata atu a koe ke he Atua he mogo ne fakaako fakapa ai e koe e Tohi Tapu. Kua fakaako ai e koe nakai ko e aga malolo noa e Atua, ne tapuaki ki ai a Kerisitenitome, ka ko e peresona fai higoa, ko Iehova. Ne ako foki e koe na futiaki lahi hana tau mahani, ko ia ko e “Atua fakaalofa hofihofi, mo e fakaalofa noa; kua fakatuai hana ita, to lahi e fakaalofa.”​—Esoto 34:6.

Ka ke fakamoli hau a tukuleleaga ke fekafekau ke he Atua, kua lata ia koe ke fakatata lahi atu foki ki a ia! Taute fefe? Ne liogi e salamo: “Iehova na e, kia fakailoa mai kia au hāu a tau puhala; kia fakaako mai e koe au ke he hau a tau hala.” (Salamo 25:4) Ko e fakaako fakatagata ke he Tohi Tapu mo e ke he tau tohi he Sosaiete ka lagomatai a koe ke iloa mitaki a Iehova. Kua aoga lahi foki ke liogi tumau mai he loto. “Kia fakatokanoa e mutolu ha mutolu a tau loto ki mua hana,” he fakamafana mai he salamo. (Salamo 62:8) Ka fioia e koe e tau liogi ne fai tali, to fioia e koe e fiafia he Atua ki a koe hoko koe ni. To lagomatai he mena nei a koe ke fakatata atu ki a ia.

Foaki foki he tau kamatamataaga mo e tau mena vihi e falu puhala ke fakatata atu ke he Atua. Liga kua fehagai a koe mo e tau paleko mo e tau kamatamata he tua, tuga e gagao, tau peehiaga he aoga mo e he tau gahuaaga, po ke tuaga uka he tupe. Po kua tuga uka lahi ki a koe e fakatufono fakateokarasi ke fakalataha ke he fekafekauaga, he fina atu ke he tau fakafeleveiaaga, po ke fakaako e Tohi Tapu mo e hau a fanau. Aua neke fehagai tokotaha ke he tau mena vihi pihia! Kia kumi atu ke he Atua ke lagomatai, kia ole ma e hana a hatakiaga mo e takitakiaga. (Tau Fakatai 3:5, 6) Kia ole fakamakamaka ma e hana agaga tapu! (Luka 11:13) He mailoga ai e koe e lagomatai hohofi noa he Atua, to fakatata lahi atu a koe ki a ia. Tuga ne tala mai he salamo ko Tavita, “kia kamata e mutolu mo e kitekite, kua mitaki a Iehova; uhoaki e tagata kua tua kia ia.”​—Salamo 34:8.

Ka e kua a Anthony? “Ne liu au manatu e magaaho ne loga e foliaga fakaagaga haku ne viko takai he taute e finagalo a Iehova,” he manatu e ia. “Kua mamahi lahi e mena nei. Ka e pete ni ko e tau mamahi oti mo e momoko, ne manatu e au e fakaalofa a Iehova. Ne fai magaaho ato maeke au ke liogi ki a Iehova, ka kua taute ni e au, ne liligi e au e loto haku ki a ia he olelalo ma e hana fakamagalo. Ne liu foki au totou e Tohi Tapu mo e ofo he lahi e mena ne kua nimo e au mo e nakai lahi e mena ne iloa e au hagaao ki a Iehova.” Pete ni he nakai la katoa ia e tau aho hana he fale puipui, kua moua e ia e lagomatai mai he Tau Fakamoli a Iehova he matakavi ia mo e haia he puhala ke maulu fakaagaga. Loto fakaaue lahi, ne pehe a Anthony: “Fakaaue ki a Iehova mo e hana fakatokatokaaga ati maeke au ke aaki kehe e tagata tuai, mo e lali ke tui e mena fou he tau aho takitaha. Ko e haku a fakafetuiaga mo Iehova kua mua atu e aoga ki a au he mogonei.”

Tupu ki Mua Fakaagaga he Fekafekauaga Hau

Ne poaki age a Iesu Keriso ke he tau tutaki hana ke eke mo tau tagata fakamatala he “tala mitaki nai he kautu.” (Mataio 24:14) Ko e tagata fakailoa fou laia he tala mitaki, liga nakai lahi e iloaaga hau ke he fekafekauaga. Ti maeke fefe, mogoia, ia koe ke tupu ki mua ke “fakakatoatoa ni hāu a feua?”​—2 Timoteo 4:5.

Taha puhala ko e feaki e aga mitaki lahi. Lali ke kitia e gahua fakamatala ko e ‘koloa uho,’ ko e kotofaaga. (2 Korinito 4:7) Ko e magaaho haia ke fakatata e tautolu e fakaalofa, mahani fakamoli, mo e mauokafua ki a Iehova. Taute foki he naia a tautolu ke fakatata e fakaalofa ma e katofia ha tautolu. He manako ke foaki noa e tautolu a tautolu ni he fahi nei ka fakatupu mai e fiafia moli.​—Gahua 20:35.

Kua mitaki e kitiaaga ha Iesu ke he gahua fakamatala. Ke fakamatala e tau kupu moli he Tohi Tapu ke he falu kua tuga e “mena kai” ki a ia. (Ioane 4:34) Ko e omoomoiaga hana ke lagomatai atu ke he falu kua fakamaali mai he hana tau kupu, “Na loto au ki ai.” (Mataio 8:3) Ne hofihofi e fakaalofa ha Iesu ma e tau tagata, mua atu ki a lautolu ne ‘fakafita mo e tiaki’ he lalolagi a Satani. (Mataio 9:35, 36) Kua “loto” foki kia a koe ke lagomatai a lautolu ne pouligia fakaagaga mo e lata ke fai fakaakoaga mai he Kupu he Atua? Mogoia ka omoi ai a koe ke tali ke he poakiaga a Iesu: “Kia o atu a a mutolu ke eke e tau motu oti kana mo tutaki.” (Mataio 28:19) E, to omoomoi ai a koe ke fakakatoatoa atu ke he gahua nei ke he mena ne fahia mo e ke he tau tutuaga hau.

Ko e taha kei ke tupu ki mua ko e fakalataha tumau ke he fekafekauaga​—he tau vaha tapu oti kaeke ke lata ai. Ka taute pihia, to lagomatai ai ke uta kehe e fakauaua mo e matakutaku ne liga fakaalaia ki a ia ne fa lavea ke fakamatala he falu a magaaho ni. He fakatumau ke he fekafekau he fonua ka lagomatai foki a koe ke he falu a puhala. To fakatolomaki ai hau a fiafia ke he kupu moli, feaki e fakaalofa hau ma Iehova mo e katofia, mo e lagomatai a koe ke fakamahino atu ke he amaamanakiaga he Kautu.

Ko e heigoa, mogoia, kaeke ke fakakaupa he hau a tuaga he mogonei e hau a fakalatahaaga ke he gahua fakamatala? Kaeke ke nakai maeke ke taute e tau hikiaga, ti kia loto mafanatia he iloa nukua fiafia e Atua ke he mena ne fahia a koe ke taute, ka loto katoa a koe ke he hau a fekafekauaga. (Mataio 13:23) Liga fai puhala foki ke tupu ki mua ai a koe, tuga e fakamatila e makaka hau he fakamatalaaga. I loto he fakapotopotoaga, ne foaki fakalahi mai he Aoga Fekafekau Fakateokarasi mo e he Feleveiaaga Fekafekau e fakaakoaga ke he fahi nei. Ti, ka lahi e mauokafua ha tautolu ke he fekafekauaga, to olioli foki a tautolu ki ai mo e kitia ai e tau fua.

Ti kua kitia maali ai, e nakai lata ke oti e tupu ki mua fakaagaga he aho ne papatiso e tagata. Ne tohia he aposetolo ko Paulo hagaaki ke he amaamanakiaga hana ke he moui nakai ke mate i luga he lagi: “Ko e tau matakainaga na e, nakai manatu au kua moua tuai e au; ka e taha ni e mena kua eke e au, kua fakanimonimo e au e tau mena kua mole atu, ka e oho atu au ke he tau mena ha i mua. Kua poi mau atu au ke he fakamailoga ke moua ai e palepale ne ui mai ai e Atua mai luga kia au ha ia Keriso Iesu. Hanai, ko lautolu kua katoatoa e mitaki ha ia tautolu, kia manamanatu ke he mena nai; kaeke foki kua manamanatu kehe a mutolu ke he taha mena, to fakakite mai foki he Atua e mena ia kia mutolu.”​—Filipi 3:13-15.

E, kua lata e tau Kerisiano oti, pete ko e amaamanaki ke moui nakai ke mate he lagi po ke moui tukulagi he Parataiso he lalolagi, ke ‘ooho atu’​—fakamakamaka, ke moua e palepale he moui! Ko e papatisoaga hau ko e kamataaga mitaki, ko e fakapa la a ia. Kia lali fakalahi ke tupu ki mua fakaagaga. He puhala mai he tau feleveiaaga mo e fakaako fakatagata, “kia eke mo tau tagata lalahi ke he manamanatu.” (1 Korinito 14:20) Kia “iloa tonuhia . . . e laulahi, mo e loa, mo e hokulo, mo e tokoluga” he kupu moli. (Efeso 3:18) To lagomatai he tupu ki mua hau a koe nakai ni ke tumau e olioli mo e fiafia he mogonei ka e lagomatai foki ke moua e nofoaga haohao mitaki he lalolagi fou he Atua, ti he ha i lalo he pule he Kautu hana he lagi, to maeke ia koe ke tupu ki mua tukumalagi!

[Fakatino he lau 31]

Kua lata ke fakauka ke moua e magaaho ke fakaako fakatagata