O Fano mo e Atua—Ko e Tau Lakaaga Fakamua
“Kia fakatata atu a mutolu ke he Atua, ti fakatata mai ai a ia kia mutolu.”—IAKOPO 4:8.
1, 2. Ko e ha he talahau e koe ko e monuina lahi a ia ke fekafekau ki a Iehova?
KUA loga e tau tau ne matematekelea ai e tagata he fale puipui. Ato hea a ia ke tu ki mua he pule he motu. Kua mafiti lahi e tau mena tutupu. Amanaki ni, ti fekafekau e tagata pagota ke he pule malolo lahi he lalolagi he mogoia. Kua fakatu ai e tagata pagota fakamua he tuaga ne mua e lavelave mo e lahi ue atu e lilifu. Ko Iosefa—ko e tagata ne lili fakamua e tau hui aki e tau toua lapatoa—hane mogonei kua o fano mo e patuiki!—Kenese 41:14, 39-43; Salamo 105:17, 18.
2 He vaha nei, kua ha ha he tau tagata e monuina ke fekafekau ki a ia ne mua ue atu e lahi mai ia Farao i Aikupito. Kua uiina e Ia ne Mua Ue Atu he lalolagi mo e lagi katoatoa a tautolu oti ke fekafekau ki a ia. Ko e monuina ofogia lahi ha ia ke taute pihia mo e ke feaki e fakafetuiaga tata mo Iehova, ko e Atua mua ue atu! I loto he tau Tohiaga Tapu, kua hagaaki ki a ia e malolo mo e kikila mua ue atu pihia foki e totokaaga, fulufuluola, mo e fiafia lahi. (Esekielu 1:26-28; Fakakiteaga 4:1-3) Kua ha ha ai e fakaalofa he tau fakafetuiaga oti hana. (1 Ioane 4:8) Ne nakai lagataha e pikopiko a ia. (Numera 23:19) Mo e nakai lagataha e fakavaia e Iehova a lautolu ne fakaalofa ki a ia. (Salamo 18:25) He omaoma ke he tau fakatufono tututonu hana, maeke ia tautolu he mogonei ke moua e tau momoui fiafia mo e fai kakano, katoa mo e moui tukulagi i mua. (Ioane 17:3) Nakai fakai ha tagata ke foaki ha mena ke fakatatai ke he tau fakamonuina mo e tau kotofaaga pihia.
3. Kua ‘o fano fefe a Noa mo e Atua moli’?
3 Mai i tuai, ne fakamalolo e tupuna ko Noa ke moui fakatatai atu ke he fioiaaga mo e finagalo he Atua. Ne pehe e Tohi Tapu hagaao ki a ia: “Ko Noa ko e tagata tututonu ia mo e mahani hakohako ke he hana hau; ne o fano ai e Atua mo Noa.” (Kenese 6:9) Ka e nakai o fano moli a Noa mo Iehova, ha kua nakai fai tagata foki ne kua “kitia e Atua.” (Ioane 1:18) Ka kua o fano a Noa mo e Atua he taute e ia e mena ne tala age he Atua ki a ia ke taute. Kakano he fakamoli e Noa hana moui ke taute e finagalo a Iehova, ne olioli e ia e fakafetuiaga mafanatia tata mo e Atua Mua Ue Atu. Ke tuga a Noa, kua totou miliona he vaha nei hane ‘o fano mo e Atua’ he moui fakatatai ke he tau fakatonuaga mo e tau fakaakoaga a Iehova. Maeke fefe e tagata ke kamata e puhala ia?
Lata Lahi e Iloilo Tonu
4. Fakaako fefe e Iehova hana tau tagata?
4 Ke o fano mo Iehova, kia fakamua a tautolu ke iloa a ia. Ne talahau tuai he perofeta ko Isaia: “To hoko ni ke he tau aho a mui, to fakamau ai e mouga ha i ai e fale a Iehova ke he tapunu mouga ha atu mouga, to fakatokoluga ai foki ki luga he tau matiketike, ti tafe atu ki ai e tau motu oti kana. To o mai foki e tau motu kehe loga, mo e pehe age a lautolu, O mai a, kia o hake a tautolu ke he mouga a Iehova, ko e fale he Atua a Iakopo; to fakaako mai foki e ia a tautolu ke he hana tau puhala, ti o ai a tautolu ke he hana tau puhala; ha ko e mena fina atu ai e fakatufono i Siona, ko e kupu a Iehova foki ke fina atu ai i Ierusalema.” (Isaia 2:2, 3) E, kua mauokafua a tautolu to fakaako e Iehova a lautolu oti ne kumi ke o fano he tau puhala hana. Kua foaki mai e Iehova hana Kupu, ko e Tohi Tapu, mo e lagomatai e ia a tautolu ke maama ai. Kua taute foki e ia e mena nei he puhala mai he “fekafekau fakamoli mo e loto matala.” (Mataio 24:45-47) Ne fakaaoga e Iehova e “fekafekau fakamoli” ke foaki e tau fakaakoaga fakaagaga ha ko e tau tohi fakave ke he Tohi Tapu, tau feleveiaaga Kerisiano, mo e tau fakaholoaga ke fakaako Tohi Tapu he kaina mo e nakai totogi. Ne lagomatai foki he Atua hana tau tagata ke maama hana Kupu ha ko e hana agaga tapu.—1 Korinito 2:10-16.
5. Ko e ha ne uho ai e kupu moli faka-Tohiaga Tapu?
5 Pete ni kua nakai totogi tupe e tautolu e kupu moli he Tohi Tapu, ka kua lahi ni e uho. He fakaako e tautolu e Kupu he Atua, ne ako a tautolu hagaao ke he Atua—hana higoa, hana mahani, hana finagalo, mo e puhala ne fehagai a ia mo e tau tagata. Fakaako foki e tautolu e tau tali ke he tau huhu mahani mau he moui: Ko e ha ne ha ha ai a tautolu hinei? Ko e ha ne fakaata he Atua e matematekelea? Ko e heigoa he vaha anoiha? Ko e ha ne fuakau mo e mamate ai a tautolu? Fai moui nakai ka mole e mate? Ka e mua atu, ne ako e tautolu e finagalo he Atua ma ha tautolu, kakano, ko e puhala ke o fano ai a tautolu ke fakafiafia katoatoa a ia. Ako e tautolu kua lata mitaki e tau fakatufono hana mo e aoga lahi ka momoui a tautolu ki ai. Ka noa mo e fakaakoaga he Atua, to nakai fakai a tautolu ke maama e tau mena ia.
6. Ko e heigoa e tau puhala ne kua maeke ia tautolu ke tutuli ha ko e iloilo tonu he Tohi Tapu?
6 Ko e kupu moli he Tohi Tapu kua lahi e malolo mo e kua omoomoi a tautolu ke taute e tau hikihikiaga he tau momoui ha tautolu. (Heperu 4:12) Fakamua to moua e iloilo he tau Tohiaga Tapu, kua o fano ni a tautolu “ke lata mo e mahani he lalolagi nai.” (Efeso 2:2) Ka e fakamatafeiga mai he Kupu he Atua e puhala kehe ma tautolu ke maeke ia tautolu ‘ke lata mo e Iki, kia fiafia mai a ia ke he tau mena oti.’ (Kolose 1:10) Ko e fiafia ha ia he laka fakamua a tautolu he o fano mo Iehova, ko e Peresona mua ue atu e tokoluga he lalolagi mo e lagi katoatoa!—Luka 11:28.
Ua e Lakaaga Aoga—Tukuleleaga mo e Papatisoaga
7. He kumikumi a tautolu ke he Kupu he Atua, ko e heigoa kua kitia moli hagaao ke he takitakiaga he tagata?
7 Ka tolomaki e maamaaga ha tautolu ke he Tohi Tapu, to kamata a tautolu ke kumikumi e tau matagahua he tau tagata mo e ha tautolu ni a tau momoui ke he maama fakaagaga he Kupu he Atua. Ti kitia maali ai e aoga he kupu moli. Kua leva tuai he tohia he perofeta ko Ieremia e kupu moli ia: “Iehova na e, kua iloa e au, kua nakai ha i ai ke he tagata hana puhala, nakai ha ha he tagata kua fano ke fakatonu e mena ke fano a ia ki ai.” (Ieremia 10:23) Ko e tau tagata—ko tautolu oti—kua lata ke fakatonu mai he Atua.
8. (a) Ko e heigoa ne omoi aki e tau tagata ke taute e tukuleleaga ke he Atua? (e) Ko e heigoa e tukuleleaga Kerisiano?
8 Ko e moua e maama ke he mena aoga lahi nei ka fakalagalaga a tautolu ke kumikumi e takitakiaga mai ia Iehova. Mo e omoi he fakaalofa ke he Atua a tautolu ke tukulele e tau momoui ha tautolu ki a ia. Ko e kakano he tukulele ke he Atua, ko e liogi ki a ia mo e omonuo ke fakaaoga e tau momoui ha tautolu ke fekafekau ki a ia mo e ke o fano fakamoli ke he hana tau puhala. He taute e mena nei, kua mumuitua a tautolu ke he fakafifitakiaga a Iesu, ne foaki ni e ia a ia ki a Iehova mo e mauokafua lahi ke taute e finagalo hana.—Heperu 10:7.
9. Ko e ha ne tukulele he tau tagata takitokotaha e tau momoui ha lautolu ki a Iehova?
9 Ne nakai lagataha a Iehova ke peehi po ke toho ha tagata ke taute e tukuleleaga ki a ia. (Fakatatai 2 Korinito 9:7.) Mo e nakai manako e Atua ke tukulele he ha tagata hana moui ki a Ia ha ko e tau logonaaga fehikitaki. Fakamua to papatiso, kua fita e tagata he eke mo tutaki, mo e kua lata ke gahua fakamakamaka ai ke moua e iloilo. (Mataio 28:19, 20) Ne ole a Paulo ki a lautolu ne kua fita e papatiso ke ‘tuku atu e lautolu ha lautolu a tau tino ke he Atua, ko e poa moui, mo e tapu, ke talia mo e fiafia, ko e fekafekauaga haia kua lata kia lautolu ke eke.’ (Roma 12:1) Ko e fakagahuahua pihia he mena kua lata ia tautolu ke eke ne tukulele ai a tautolu ki a Iehova ko e Atua. He mole e iloa e mena ne putoia mo e manamanatu fakaeneene ki ai, ne fakamakai mo e olioli a tautolu he tukulele ha tautolu a tau momoui ke he Atua.—Salamo 110:3.
10. Hagaaki atu fefe e tukuleleaga ke he papatisoaga?
10 He oti e tala age ke he Atua he puhala he liogi e manako malolo ha tautolu ke o fano he hana tau puhala, ne taute e tautolu taha lakaaga foki. Kua fakakite e tautolu ha tautolu a tukuleleaga ke he toloaga tagata he papatiso a tautolu he vai. Ko e fakailoaaga anei ke he toloaga tagata kua omonuo a tautolu ke taute e finagalo he Atua. He kamataaga he hana fekafekau he lalolagi, ne papatiso e Ioane a Iesu, ati fakatoka ai e fifitakiaga ma tautolu. (Mataio 3:13-17) Mogo fakamui, ne poaki e Iesu e tau tutaki hana ke taute tutaki mo e papatiso a lautolu ia. Ti ko e tukuleleaga mo e papatisoaga ko e tau lakaaga lata lahi ma e ha tagata ni ne manako ke o fano mo Iehova.
11, 12. (a) Fakatatai fefe e papatisoaga ke he mauhoana? (e) Ko e heigoa e tataiaga ne kitia he vahaloto he fakafetuiaga ha tautolu mo Iehova mo e he vahaloto he tane mo e hoana?
11 Ke eke mo tutaki tukulele mo e papatiso ha Iesu Keriso, kua fakatatai atu ke he magaaho ka fai hoana ai. He tau motu loga, kua fakamua ke fai lakaaga ato hoko e aho ke mau ai. Ne feleveia e tagata tane mo e fifine, feiloaaki a laua, ti femanakoaki ai. Hoko mai mogoia e toka mama. Kua fakailoa ai he mauhoana ke he tolo tagata e fifiliaga ha laua—ke mau mo e ke nonofo tokoua ko e tane mo e hoana. Ti kua fakakite he mauhoana ke he tolo tagata e kamata he matutakiaga uho ia. Kua fakamailoga he aho ia e kamataaga he fakamauaga. Ke fakatatai ki ai, kua fakamailoga he papatisoaga e kamata he moui ne fakamoli ke o fano ke he fakafetuiaga kua tukulele mo Iehova.
12 Kia onoono ke he taha tataiaga. He mole e aho mauhoana ha laua, kua lata e fakaalofa he vahaloto he tane mo e hoana ke hokulo mo e motua mitaki. Ke lahi e fetataaki, kua lata he tau hoa mau ke makai ke aaki ke fakatumau mo e fakamalolo ha laua a matutakiaga he fakamauaga. Pete ni kua nakai huhu atu ke he fakamauaga mo e Atua, ka e he mole e papatiso kua lata ia tautolu ke gahua ke fakatumau e fakafetuiaga tata mo Iehova. Ne kitia mo e fakaaue a ia ke he tau gahua ha tautolu ke taute e finagalo hana mo e fakatata mai ai ki a tautolu. “Kia fakatata atu a mutolu ke he Atua,” he tohia he aposetolo ko Iakopo, “ti fakatata mai ai a ia kia mutolu.”—Iakopo 4:8.
O Fano he Tau Tuagahui ha Iesu
13. He o fano mo e Atua, ha hai e fifitakiaga ne kua lata ke mumuitua a tautolu ki ai?
13 Ke o fano mo Iehova, kua lata ia tautolu ke fakatatai ke he tau fifitakiaga ne fakatoka e Iesu Keriso. Ne tohia he aposetolo ko Peteru: “Ko e mena ia ni kua ui ai a mutolu; ha ko e mena ne mamahi a Keriso ni ma mutolu, ti toka ai e ia e fakafifitaki ma mutolu, kia mumui atu a mutolu ke he hana tau tuagahui.” (1 Peteru 2:21) Ha kua mitaki katoatoa a Iesu mo e nakai mitaki katoatoa a tautolu, kua nakai fakai a tautolu ke mumui fakamitaki ke he fifitakiaga ne fakatoka e ia. Pete ia, kua amanaki mai a Iehova ke taute e tautolu e mena kua fahia a tautolu ki ai. Kia onoono atu a tautolu ke he tau vala lima he moui mo e fekafekauaga a Iesu ne kua lata he tau Kerisiano tukulele ke aaki ke fifitaki.
14. Ko e heigoa foki ka moua he iloa e Kupu he Atua?
14 Ha ha ia Iesu e tonu mo e iloilo katoa he Kupu he Atua. He magahala he hana fekafekauaga, ne fa liu a Iesu fatiaki mai he tau Tohiaga Tapu Heperu. (Luka 4:4, 8) Kua moli foki na fa liliu e tau takitaki lotu kelea he tau mogo ia ke futiaki mai he tau Tohiaga Tapu. (Mataio 22:23, 24) Ka kua kehe ai he kua maama e Iesu e kakano he tau Tohiaga Tapu, mo e fakagahuahua ai he moui hana. Nakai ni iloa e ia e kakano moli he Fakatufono ka e pihia foki ke he agaga i ai. He mumuitua a tautolu ke he fifitakiaga a Keriso, kua lata foki ia tautolu ke aaki ke maama e Kupu he Atua, ke maama e kakano, po ke agaga, i ai. He taute pihia ai, liga to eke a tautolu ke talia faka-Atua ko e tau tagata gahua ne kua maeke ke “fakatokatoka fakahako e kupu moli.”—2 Timoteo 2:15.
15. Fakatoka fefe e Iesu e fifitakiaga he vagahau hagaao ke he Atua?
15 Ne vagahau a Iesu ke he falu hagaao ke he Matua hana he lagi. Ne nakai toka e Iesu ki a ia ni e iloilo he Kupu he Atua. Kua ui foki he tau fi hana a ia ko e “Akoako,” ha ko e mena ni ne fano a ia ki ai ne tutala a ia ke he falu hagaao ki a Iehova mo e Hana finagalo. (Mataio 12:38) Ne fakamatala a Iesu ke he tau tagata he faituga, he tau sunako, he tau maaga, mo e i fafo he tau maaga. (Mareko 1:39; Luka 8:1; Ioane 18:20) Ne fakaalofa hohofi mo e totonu e fakaakoaga hana, he fakakite e fakaalofa ki a lautolu ia ne lagomatai e ia. (Mataio 4:23) Ko lautolu ne mumuitua ke he fifitakiaga ha Iesu kua moua foki e tau matakavi mo e tau puhala loga ke fakaako falu hagaao ki a Iehova ko e Atua mo e tau finagalo homo ue atu hana.
16. Tata fefe e fakafetuiaga a Iesu mo lautolu ne tapuaki foki ki a Iehova?
16 Ne logona e Iesu e pipiaga tata mo e falu ne tapuaki ki a Iehova. He vagahau a Iesu ke he moto tagata he taha mogo, ne o mai e matua fifine mo e tau matakainaga hana ke tala ki a ia. Ne talahau mai he Tohi Tapu: “Ti pehe mai ai e taha kia ia, Kitiala, kua tutu mai i fafo hau a matua fifine, mo e hau a tau matakainaga kua fia vagahau mo koe. Ati tala age ai a ia, kua pehe age kia ia ne tala age kia ia, Ko hai kia hoku matua fifine? Ko hai foki haku a tau matakainaga? Ti kua fakaolo ai e ia hana lima ke he hana tau tutaki, kua pehe atu, Kitiala, ko e hoku matua fifine, mo e hoku tau matakainaga. Ha ko ia kua eke e finagalo he haku a Matua ha ha he lagi, ko e haku a matakainaga a ia, mo e haku a mahakitaga, mo e haku a matua fifine.” (Mataio 12:47-50) Nakai kakano e mena nei kua fakaheu e Iesu e magafaoa hana, ha kua fakakite mai he tau mena tutupu fakamui ne nakai taute pihia e ia. (Ioane 19:25-27) Ka kua peehi he fakamauaga nei e fakaalofa a Iesu ma lautolu ne talitonu fakalataha. Tatai ni mo e vaha nei, kua kumikumi ni a lautolu ne o fano mo e Atua ke fakatauo mo e falu fekafekau a Iehova ati tupu e fakahelehele atu ki a lautolu.—1 Peteru 4:8.
17. Fefe e manatu a Iesu ke he taute e finagalo he Matua hana, mo e lata ke lauia fefe a tautolu?
17 He taute e finagalo faka-Atua, ne fakakite e Iesu e fakaalofa ma e hana Matua he lagi. Ne omaoma a Iesu ki a Iehova ke he tau mena oti. Ne talahau e ia: “Ko e haku a mena kai hanei, kia eke e au e finagalo hana ne fakafano mai au, mo e fakaoti hana gahua.” (Ioane 4:34) Ne talahau foki he Keriso: ‘Ne eke mau e au e tau mena kua mitaki ke he Atua.’ (Ioane 8:29) Ne fakaalofa lahi a Iesu ke he Matua hana he lagi ati “fakatokolalo e ia a ia, ne oma e ia kua hoko ke he mate, ko e mate haia he satauro.” (Filipi 2:8) Ko e mena ia ne fakamonuina e Iehova a Iesu, he tuku hake a ia he tuaga pule mo e lilifu ne ua aki ni ki a Iehova. (Filipi 2:9-11) Ke tuga a Iesu, ne fakakite e tautolu e fakaalofa ke he Atua he oma hana tau poakiaga mo e he taute hana finagalo.—1 Ioane 5:3.
18. Ko e puhala fe ne fakatoka e Iesu e fifitakiaga hagaao ke he liogi?
18 Ko e tagata liogi a Iesu. Ne liogi a ia he hana papatisoaga. (Luka 3:21) Ato fifili hana tau aposetolo ne 12, ne liogi a ia ke he po katoa. (Luka 6:12, 13) Ne fakaako e Iesu e tau tutaki hana ke liogi. (Luka 11:1-4) He po ato mate a ia, ne liogi a ia ma e tau tutaki mo e liogi auloa mo lautolu. (Ioane 17:1-26) Ko e liogi e vala ne mua he moui a Iesu, ti lata ke pihia foki he tau momoui ha tautolu, ha ko e tau tutaki hana a tautolu. Ko e lilifu ha ia ke liogi ke he Pule Katoatoa he Lalolagi mo e Lagi! Ne tali foki e Iehova e tau liogi, he tohia mai e Ioane: “Ko e fakamalolo foki hanai kua moua ki mua hana, kaeke ke ole atu ai e tautolu ha mena ke lata mo e hana finagalo, ti fanogonogo mai ai a ia kia tautolu. Kaeke foki kua iloa e tautolu kua fanogongo mai a ia kia tautolu ke he tau mena oti ka ole atu ai, kua iloa e tautolu kua moua e tautolu e tau mena kua ole atu ai a tautolu kia ia.”—1 Ioane 5:14, 15.
19. (a) Ko e tau mahani fe ha Iesu kua lata ia tautolu ke fifitaki? (e) Ko e puhala fe ne moua e tautolu e aoga he kumikumi ke he moui mo e fekafekauaga ha Iesu?
19 Kua lahi foki e tau mena ke ako mai he kumikumi fakamakamaka atu ke he moui mo e fekafekauaga ha Iesu Keriso he lalolagi! Kia kikite atu ke he tau mahani ne fakakite e ia: ko e fakaalofa, fakaalofa hofihofi, totonu, malolo, lagotatai, fifiliaga mitaki, fakatokolalo, mafanatia, mo e nakai fulukovi. Ka lahi e iloa e tautolu a Iesu, kua manako lahi ai a tautolu ke eke mo tau tutaki fakamoli hana. Ko e iloilo ki a Iesu ka fakatata atu a tautolu ki a Iehova. Ha ko e fakaata mitaki katoatoa a Iesu ke he hana Matua he lagi. Kua tata lahi a ia ki a Iehova ati maeke ia ia ke talahau: “Ko ia kua kitia au, kua kitia foki e ia e Matua.”—Ioane 14:9.
Falanaki ki a Iehova ke Fakamalolo a Koe
20. Maeke fefe ia tautolu ke moua e mauokafua he o fano mo Iehova?
20 He magaaho ne kamata laia e tau tama ke o fano, kua nakai felautatai e tau lakaaga ha lautolu. Maeke fefe ia lautolu ke ako ke o fano mo e mauokafua? Ha ko e fakamahani mo e fakauka ni hokoia. Ti ko lautolu ne o fano mo Iehova kua aaki ke o mo e lalaka mauokafua mo e felautatai. Kua lata foki e mena nei ke fai magaaho mo e fakauka. Ne fakakite e Paulo e aoga he fakauka he o fano mo e Atua he magaaho ne tohia e ia: “Hanai, ko e tau matakainaga na e, ko e kupu hanai kua toe, kua ole atu a mautolu mo e tomatoma atu kia mutolu ha ko e Iki ko Iesu, tuga he talia mai e mutolu ia mautolu e tonu e puhala kua lata ke o fano ai a mutolu ke fakafiafia atu ai ke he Atua, kia au atu he fakamalolo a mutolu ki ai.”—1 Tesalonia 4:1.
21. He o fano a tautolu mo Iehova, ko e heigoa e tau monuina ne olioli e tautolu?
21 Kaeke ke fakamoli katoatoa a tautolu ke he Atua, to lagomatai e ia a tautolu ke o fano tumau mo ia. (Isaia 40:29-31) Nakai fakai ha mena he lalolagi ke fakatatai ke he tau monuina ne foaki e ia ki a lautolu ne o fano he tau puhala hana. Ko ia ‘kua fakaako kia tautolu ke he tau mena aoga ai, kua takitaki e ia a tautolu ke he puhala ke o fano ai a tautolu. Ti ka hagaao a tautolu ke he hana tau poaki, po kua tuga ne vailele ha tautolu a monuina, mo e tuga ne tau peau he tahi ha tautolu a tututonu.’ (Isaia 48:17, 18) He talia e uiina ke o fano mo e Atua mo e taute fakamoli ai, maeke ia tautolu ke olioli tukulagi e mafola mo ia.
To Tali Fefe a Koe?
◻ Ko e ha ne lilifu ai ke o fano mo e Atua moli?
◻ Ko e ha e fakaakoaga, tukuleleaga, mo e papatisoaga ko e tau lakaaga fakamua he o fano mo Iehova?
◻ Maeke fefe a tautolu ke mumuitua ke he tau tuagahui ha Iesu?
◻ Iloa fefe e tautolu to fakamalolo e Iehova a tautolu he o fano mo ia?
[Tau Fakatino he lau 11]
Ko e fakaakoaga, tukuleleaga, mo e papatisoaga ko e tau lakaaga fakamua he o fano mo e Atua