Kua ‘Tumau kia Hau a Tau Liogi ke Tuga ne Tau Mena Manogi’?
“Kia tumau haku a liogi ke tuga ne tau mena manogi kua vela ki mua hāu.”—SALAMO 141:2.
1, 2. Ko e heigoa ne fakatino he tugi he tau mena manogi?
NE POAKI age e Iehova ko e Atua ke he hana perofeta ko Mose ke tauteute e tau mena manogi tapu ke fakaaoga he faituga utafano he tapuakiaga a Isaraela. Kua lata ke fa e vai ke laku aki e mena fakamanogi faka-Atua. (Esoto 30:34-38) Ati eke moli ai mo tau mena manogi mitaki.
2 Kua foaki he maveheaga he Fakatufono ma e motu a Isaraela e mena manogi nei he tau aho oti. (Esoto 30:7, 8) Kua fai kakano pauaki kia e fakaaogaaga he tau mena manogi? E, ha kua lologo e salamo: “Kia tumau haku a liogi ke tuga ne tau mena manogi kua vela ki mua hāu [Iehova ko e Atua]; ko e nikiti ki luga he haku tau lima, kia tuga ne poa ia kua eke ke he afiafi.” (Salamo 141:2) He tohi a Fakakiteaga, ne kitia he aposetolo ko Ioane a lautolu ne agaagai he nofoa patuiki he Atua i luga he lagi kua igatia mo e tau kapiniu auro kua puke ke he tau mena manogi ke huhunu. “Ko e tau liogi haia he tau tagata tapu,” he talahau he fakamauaga mai he agaga. (Fakakiteaga 5:8) Ti, kua fakatino ai he tau mena manogi ke huhunu e tau liogi talia mitaki ne poa hake he tau fekafekau ha Iehova he aho mo e po.—1 Tesalonia 3:10; Heperu 5:7.
3. Ko e heigoa ka lagomatai a tautolu ke ‘tumau ha tautolu a tau liogi ke tuga ne tau mena manogi kua vela ki mua he Atua’?
3 Ke talia he Atua e tau liogi ha tautolu, lata ia tautolu ke liogi kia ia ke he higoa a Iesu Keriso. (Ioane 16:23, 24) Ka e maeke fefe ia tautolu ke fakatolomaki e uho he liogi ha tautolu? Kua lata ia tautolu ke kitekite atu ke he falu fakafifitakiaga mai he Tohi Tapu ke lagomatai a tautolu ke tauteute e tau liogi ha tautolu mo tau mena manogi ki mua a Iehova.—Tau Fakatai 15:8.
Kia Liogi mo e Tua
4. Matutaki fefe e tua ke he liogi talia mitaki?
4 Kaeke ke haele e tau liogi ha tautolu ke he Atua mo tau mena manogi ke huhunu, kua lata ia tautolu ke liogi mo e tua. (Heperu 11:6) Ka mailoga he tau motua Kerisiano kua fakateliga e tagata gagao fakaagaga ke he lagomatai faka-Tohiaga Tapu ha lautolu, “to fakamoui e tagata gagao ke he liogi kua eke mo e tua” ha lautolu. (Iakopo 5:15) Kua fiafia e Atua ha tautolu he lagi ke he tau liogi mo e tua, ti pihia foki e fakaakoaga mo e liogi ke he Kupu he Atua. Ne fakakite he salamo e aga mitaki he liogi ai a ia: “To nikiti ki luga foki au haku tau lima ke he hāu a tau poaki, kua manako lahi ki [ai] au; ti manamanatu ni au ke he hāu a tau fakatufono. Kia fakaako e koe au ke he loto matala mitaki mo e pulotu; ha kua talia fakatonu e au hāu a tau poaki.” (Salamo 119:48, 66) Kia o mai a tautolu ke ‘nikiti ha tautolu a tau lima’ he liogi fakatokolalo mo e fakagahuahua e tua he fanogonogo ke he tau poakiaga he Atua.
5. Ko e heigoa ha tautolu ka taute ka nakai ha ha ia tautolu e pulotu?
5 Ka e kua la ka nakai moua e tautolu e pulotu kua lata ke fehagai mo e kamatamataaga. Po kua nakai iloa moli e tautolu hane fakamoli he mogonei e perofetaaga he Tohi Tapu. He nakai fakaata e mena nei ke fakalavelave fakaagaga a tautolu, kia liogi ai a tautolu ma e pulotu. (Kalatia 5:7, 8; Iakopo 1:5-8) Ti kua nakai lata ia tautolu ke amanaki ke he Atua ke tali a tautolu he taha puhala kua mua atu. Kua lata ia tautolu ke fakakite e moliaga he tau liogi ha tautolu he taute e mena ne manako a ia ke taute he tau tagata oti hana. Kua lata ia tautolu ke lavelave atu ke he fakaakoaga ati hake e tua he tau Tohiaga Tapu ne lagomatai he tau tohi ne foaki he puhala he “fekafekau fakamoli mo e loto matala.” (Mataio 24:45-47; Iosua 1:7, 8) Kua lata foki a tautolu ke fakatolomaki ke he iloilo he fakalataha tumau ke he tau feleveiaaga he tau tagata he Atua.—Heperu 10:24, 25.
6. (a) Ko e heigoa kua lata ia tautolu oti ke mailoga hagaao ke he vaha ha tautolu mo e fakamoliaga he tau perofetaaga he Tohi Tapu? (e) Ke lafi atu ke he liogi ma e fakatapuaga he higoa a Iehova, ko e heigoa kia taute e tautolu?
6 He vaha nei, kua tutuli he falu Kerisiano e tau fakafiafiaaga mo e tau feua pauaki ati kitia ai kua nakai tuai mailoga e lautolu kua ha ha a tautolu he “vaha ke fakahiku.” (Tanielu 12:4) Kua mitaki ai he tau matakainaga ne talitonu fakalataha ke liogi ke liu moua po ke fakamalolo e lautolu kua pihia e tua ke he fakamoliaga he faka-Tohiaga Tapu, kua kamata e ha ha hinei a Keriso he 1914 he magaaho ne taute e Iehova a ia mo Patuiki he lagi mo e hane pule a ia ke he vahaloto he hana tau fi. (Salamo 110:1, 2; Mataio 24:3) Kia mailoga ai e tautolu oti ko e tau mena tutupu pihia ne talahau tuai tuga e fakatulakiaga he lotu fakavai—ko ‘Papelonia Lahi’—ko e favale faka-Satani ha Koku mo Makoku ke he tau tagata ha Iehova, mo e laveaki he Atua Mua ue Atu a lautolu he felakutaki i Amaketo, to hohoko fakaofo mai mo e matakutakuina mo e to tupu ni ke he magahala ku lahi. (Fakakiteaga 16:14, 16; 18:1-5; Esekielu 38:18-23) Ti kia o mai a tautolu ke liogi ma e lagomatai he Atua ke mataala fakaagaga tumau. Kia liogi fakamoli a tautolu oti ma e fakatapuaga he higoa a Iehova, ma e hana Kautu ke hoko mai, mo e hana finagalo ke eke ke he lalolagi tuga ne eke he lagi. E, kia fakatumau a tautolu ke fakagahuahua e tua mo e fakakite kua moli e tau liogi ha tautolu. (Mataio 6:9, 10) Kua lata moli ai he tau tagata oti ne fakaalofa ki a Iehova ke kumi fakamua e Kautu mo e hana tututonu mo e fakalataha fakamalolo atu ke he fakamatalaaga he tala mitaki ato hoko mai e fakahikuaga.—Mataio 6:33; 24:14.
Fakaheke mo e Fakaaue ki a Iehova
7. Ko e heigoa ne nava e koe hagaao ke he liogi a Tavita ne fakamau he 1 Nofoaga he Tau Patuiki 29:10-13?
7 Ko e puhala mitaki lahi ke ‘tumau ha tautolu a tau liogi ke tuga ne tau mena manogi’ ko e fakakite e loto fakaheke mo e loto fakaaue ke he Atua. Ne liogi pihia e Patuiki ko Tavita he magaaho ne kau auloa a ia mo e tau tagata a Isaraela ke he taaga he faituga a Iehova. Ne liogi a Tavita: “Kia fakamonuina atu a koe Iehova na e, ko e Atua a Isaraela, ha mautolu a matua, mai i tuai tigahau to hoko ke he tukulagi. Iehova na e, ko e hau ni e mua ue atu mo e malolo, mo e fulufuluola, mo e lilifu, mo e fakahekeaga; ha ko e mena ha ha ia koe e tau mena oti ke he lagi, mo e lalolagi; Iehova na e, hau ni e kautu, kua tokoluga ue atu a koe kua mua ue atu ni a koe he tau mena oti kana. Mai ia koe e koloa mo e lilifu, ko koe ni kua pule ke he tau mena oti; ha ha he lima hau foki e mana mo e malolo, ha ha ia koe foki ke fakalilifu mo e fakamalolo ai e tau tagata oti kana. Hanai, ha mautolu a Atua na e, kua fakaaue atu a mautolu kia koe, mo e fakaheke atu ke he hau a higoa lilifu.”—1 Nofoaga he Tau Patuiki 29:10-13.
8. (a) Ko e tau kupu fakaheke fe he tau Salamo 148 ke he 150 ne aamotia lahi hau a loto? (e) Kaeke ke tatai e tau manatu ha tautolu ke he Salamo 27:4, ko e heigoa ha tautolu ka taute?
8 Ko e tau kupu fulufuluola ha ia he fakahekeaga mo e fakaaueaga! Pete ni kua nakai fakakupu pihia e tau liogi ha tautolu, ka e lata ke hake mai foki he loto. Kua pukeina e tohi ha Salamo ke he tau liogi fakaaue mo e fakaheke. Kua moua e tau kupu uho he fakahekeaga he tau Salamo 148 ke he 150. Kua fakakite e loto fakaaue ke he Atua i loto he tau salamo loga. “Taha mena ne ole au mai ia Iehova,” he lologo e Tavita. “Ko e mena ia ni ke kumi atu e au ki ai; kia nofo au ke he fale a Iehova ke he tau aho oti he haku a moui, kia kitia ai e au e fulufuluola a Iehova, mo e kumikumi ke he hana faituga.” (Salamo 27:4) Kia fakalautatai atu a tautolu mo e tau liogi pihia he fakamakutu ke he tau gahua oti he tau fakapotopotoaga a Iehova. (Salamo 26:12) He taute e mena nei mo e manamanatu fakahokulo atu ke he Kupu he Atua he tau aho oti ka foaki ki a tautolu e tau kakano loga ke o atu ki a Iehova mo e tau loto fakaheke mo e loto fakaaue.
Kia Kumi mo e Loto Fakatokolalo e Lagomatai a Iehova
9. Liogi fefe e Patuiki ko Asa, mo e ko e heigoa ne tupu?
9 Kaeke ke fekafekau mo e loto katoa a tautolu ki a Iehova ko e hana Tau Fakamoli, kua mauokafua a tautolu to logona e ia e tau liogi ha tautolu ma e lagomatai. (Isaia 43:10-12) Kikite la ke he Patuiki ko Asa a Iuta. Ko e tau tau 10 fakamua he hana pule ke he 41 e tau tau (977-937 F.V.N.) kua fakamailoga ai he mafola. Ati patakai ai he kau tagata totou miliona i lalo ia Seraha ko e Aitiope a Iuta. Pete ni kua nakai tokologa, ne o atu a Asa mo e kau hana ke fehagai mo lautolu ne takai mai. Ka e, ato hoko e tau, ne liogi fakamakamaka a Asa. Ne fakailoa e ia e malolo ha Iehova ke laveaki. He ole ma e lagomatai, ne pehe e patuiki: “Kua falanaki a mautolu kia koe, kua o atu ni a mautolu ke he hau a higoa ke tau mo e motu o tagata tokologa na. Iehova na e, ko koe ni ko e Atua ha mautolu; aua neke kautu mai e tau tagata kia koe.” Ko e fua kua kautu ai he kua fakahao e Iehova a Iuta ha ko e higoa mua ue atu hana. (2 Nofoaga he Tau Patuiki 14:1-15) Pete he laveaki he Atua a tautolu mai he kamatamata po ke fakamalolo a tautolu ke fakauka ki ai, kia nakai fakauaua na logona e ia e tau ole ha tautolu ma e hana lagomatai.
10. He magaaho ka nakai iloa e tautolu ke fehagai mo e falu matematekelea, maeke fefe he liogi he Patuiki ko Iehosafata ke lagomatai mai?
10 Ka nakai iloa e tautolu ke fehagai mo e falu matematekelea, lata ia tautolu ke mauokafua to logona e Iehova e tau ole ha tautolu ma e lagomatai. Kua fakakite e mena nei he vaha he Patuiki ko Iehosafata, ne kamata e pule he 936 F.V.N. ke 25 e tau. He magaaho ne fakamatakutaku he tau kau lafilafi a Moapi, Amoni, mo lautolu ne nonofo ke he mouga ko Seira, ne ole a Iehosafata: “Ha mautolu a Atua na e, nakai kia fakafili e koe a lautolu? Ha kua nakai fai malolo a mautolu ke totoko atu ke he motu o tagata tokologa nai, kua o mai ke tau mo mautolu; nakai iloa foki e mautolu e mena ke eke; ka kua hagao atu a mautolu kia koe.” Ne tali e Iehova e liogi fakatokolalo ia, ti tau ma Iuta he fakamavehevehe e matakau fi ati fekeliaki e lautolu ni a lautolu. Ko e mena tupu, ne matakutaku e tau motu ne agaagai mai, mo e holofa ai e mafola i Iuta. (2 Nofoaga he Tau Patuiki 20:1-30) Ka nakai ha ha ia tautolu e pulotu ke fehagai mo e matematekelea, lata a tautolu ke liogi tuga a Iehosafata: ‘Kua nakai iloa e mautolu e mena ke eke, ka kua hagao atu a mautolu kia koe, Iehova.’ To fakamanatu he agaga tapu ki a tautolu e tau manatu faka-Tohiaga Tapu pauaki ke fakamitaki aki e lekua, po ke lagomatai he Atua a tautolu ke he puhala ne nakai fakai ke iloa he tagata.—Roma 8:26, 27.
11. Ko e heigoa ka ako e tautolu hagaao ke he liogi mai he tau gahua a Nehemia ke he kaupa a Ierusalema?
11 Liga to fakauka a tautolu ke he liogi ma e lagomatai he Atua. Ne fai aho a Nehemia ne maanu, tagi, fakakanopogi, mo e liogi hagaao ke he kaupa malona i Ierusalema mo e matematekelea lahi he tau tagata i Iuta. (Nehemia 1:1-11) Kua haele moli e tau liogi hana ke he Atua tuga e tau mena manogi huhunu. Ne huhu age e Patuiki ko Aretaseta he taha aho ki a Nehemia ne loto fakaatukehe: “Ko e heigoa kia e mena kua manako a koe ki ai?” “Ti liogi ai au ke he Atua he lagi,” he talahau e Nehemia. Kua tali ai e liogi ku mo e nakai lea, ha kua fekau a Nehemia ke fakamoli e manako lahi hana he fina atu ki Ierusalema ke fakafou e kaupa malona i ai.—Nehemia 2:1-8.
Kia Fakaako e Iesu ki a Koe e Puhala Liogi
12. Ke he tau kupu ni hau, maeke fefe ia koe ke talahau e tau manatu ne mua he liogi fakatai a Iesu?
12 Mai he tau liogi oti ne tohi he tau Tohiaga Tapu, kua mahomo atu e fakaako he liogi fakatai ne foaki e Iesu Keriso ke tuga e mena manogi huhunu. Ne talahau he Evagelia ko Luka: “Ti tala age ai kia ia e taha he hana [Iesu] tau tutaki, Ko e Iki na e, kia fakaako mai e koe kia mautolu e liogi; tuga foki a Ioane ne fakaako ke he hana tau tutaki. Kua tala age a ia kia lautolu, Ka liogi a mutolu, ati pehe atu ai, Ha mautolu a Matua na e, ha ha he lagi, kia tapu hau a higoa. Kia hoko mai hau a kautu. Kia eke hau a finagalo ke he lalolagi, tuga ne eke ke he lagi. Kia foaki mai e koe ke he taha aho mo e taha aho ha mautolu a tau mena kai, ke lata ma mautolu. Kia fakamagalo e koe kia mautolu ha mautolu a tau hala; ha ko e mena fakamagalo atu a mautolu kia lautolu oti ne eke fakakelea kia mautolu. Aua neke tuku atu a mautolu ke he kamatamata; ka e laveaki mai a e koe a mautolu he mena kelea.” (Luka 11:1-4; Mataio 6:9-13) Kia mailoga e tautolu e liogi nei, ke nakai fatiaki tumau ka e lata mo takitakiaga.
13. Maeke fefe ia koe ke fakamaama e kakano he tau kupu, ‘Ha mautolu a Matua, kia tapu hau a higoa’?
13 ‘Ha mautolu a Matua na e, kia tapu hau a higoa.’ Ke ui a Iehova ko e Matua ko e mena uho a ia ke he hana tau fekafekau tukulele. Ti ko e fanau kua mautali ke uta ke he matua fakaalofa hofihofi e tau kapeletu, kua lata ia tautolu ke fakaaoga tumau e tau magaaho ke liogi fakalilifu mo e fakaheke ke he Atua. (Salamo 103:13, 14) Kua lata e tau liogi ha tautolu ke fakakite ha tautolu a kapeletu hagaao ke he fakatapu he higoa a Iehova kakano kua manako lahi a tautolu ke kitia ai he fakamea mai he tau ekefakakelea oti ne pehia ai. E, kua manako a tautolu ke tuku kehe mo e fakatapu e higoa a Iehova.—Salamo 5:11; 63:3, 4; 148:12, 13; Esekielu 38:23.
14. Ko e heigoa e kakano ke liogi, “Kia hoko mai hau a kautu”?
14 “Kia hoko mai hau a kautu.” Ko e Kautu ko e pule ha Iehova ne mailoga he puhala he fakatufono faka-Mesia i luga he lagi he tau lima he Tama hana mo “lautolu ne tapu” ha Iesu. (Tanielu 7:13, 14, 18, 27; Fakakiteaga 20:6) Nakai leva to “hoko mai” ai ke he tau tagata oti he lalolagi ne totoko ke he pule katoatoa he Atua mo e tatafi kehe ai a lautolu. (Tanielu 2:44) Mogoia, to taute ai e finagalo a Iehova ke he lalolagi, tuga ne eke ke he lagi. (Mataio 6:10) Ko e fiafia ha ia ka ta mai ke he tau mena momoui oti ne fekafekau fakamoli ke he Pule he Lalolagi mo e Lagi Katoatoa!
15. Ko e heigoa ne fakakite he ole ki a Iehova ma e “ha mautolu a tau mena kai”?
15 “Kia foaki mai e koe ke he taha aho mo e taha aho ha mautolu a tau mena kai, ke lata ma mautolu.” He ole e tau mena kai ki a Iehova ma e “taha aho” kua fakakite ai e nakai ole a tautolu ke he tau foakiaga mamahaki ka e ma e tau mena ni ma e aho. Pete ni kua falanaki a tautolu ke he Atua ke foaki mai, kua gahua foki mo e fakaaoga e tautolu ha puhala kua lata ni ne ha ha ia tautolu ke moua aki e tau mena kai mo e falu a koloa foki. (2 Tesalonia 3:7-10) Kua lata moli a tautolu ke fakaaue ke he ha tautolu a Foakiaga he lagi kakano ko e fakaalofa, pulotu, mo e malolo hana haia i tua he tau foakiaga nei.—Gahua 14:15-17.
16. Maeke fefe ia tautolu ke moua e fakamagaloaga he Atua?
16 “Kia fakamagalo e koe kia mautolu ha mautolu a tau hala; ha ko e mena fakamagalo atu a mautolu kia lautolu oti ne eke fakakelea kia mautolu.” Ha kua nakai mitaki katoatoa mo e agahala a tautolu, kua nakai mafai a tautolu ke fuafua katoatoa atu ke he tau tutuaga mitaki katoatoa a Iehova. Ko e mena ia, kua lata ia tautolu ke liogi ma e hana a fakamagaloaga ne fakave ke he poa lukutoto ha Iesu. Ka e, kaeke ke manako a tautolu ke hagaaki he ‘Logona Liogi’ e aoga he poa ia ke he ha tautolu a tau hala, kua lata ia tautolu ke tokihala mo e fakamakai ke talia e tau akonakiaga ne foaki e ia ki a tautolu. (Salamo 65:2; Roma 5:8; 6:23; Heperu 12:4-11) Taha mena foki, kua lata ni a tautolu ke fakamagalo he Atua ane mai ke “fakamagalo atu a mautolu kia lautolu oti ne eke fakakelea kia mautolu,” ko lautolu ia ne hala ki a tautolu.—Mataio 6:12, 14, 15.
17. Ko e heigoa e kakano he tau kupu, “Aua neke tuku atu a mautolu ke he kamatamata”?
17 “Aua neke tuku atu a mautolu ke he kamatamata.” Ne talahau he Tohi Tapu he falu magaaho na taute e Iehova e tau mena, ka kua fakaata noa ni e ia. (Ruta 1:20, 21) Kua nakai kamatamata he Atua a tautolu ke agahala. (Iakopo 1:13) Nukua tupu mai he Tiapolo, he ha tautolu a tino agahala mo e he lalolagi nei e tau kamatamataaga ke taute e kelea. Ko Satani e Kamatamata ne lali ke fakakeukeu a tautolu ke agahala ke he Atua. (Mataio 4:3; 1 Tesalonia 3:5) He magaaho ne ole a tautolu, “Aua neke tuku atu a mautolu ke he kamatamata,” kua ole a tautolu ke nakai toka he Atua a tautolu ke kaumahala he magaaho ka kamatamata a tautolu ke nakai omaoma ki a ia. Maeke ia ia ke takitaki a tautolu ke nakai mokulu po ke nakai kautu ki a Satani, ko e “mena kelea.”—Mataio 6:13; 1 Korinito 10:13.
Kia Fakalautatai Atu mo e Tau Liogi Hau
18. Maeke fefe ia tautolu ke fakalautatai atu mo e tau liogi ha tautolu ma e fakamauaga fiafia mo e moui fakamagafaoa?
18 Kua ufitia he liogi fakatai a Iesu e tau matapatu manatu, ka kua maeke ia tautolu ke liogi hagaao ke he ha mena ni. Ke fakatai ki ai, liga liogi a tautolu hagaao ke he manako ha tautolu ke moua e fakamauaga fiafia. Ke tumau e mea ato mau ai, liga to liogi a tautolu ke fakauka. Ti kua lata ia tautolu ke fakalautatai atu mo e ha tautolu a tau liogi he kalo mai he tau tohi mo e tau fakafiafiaaga kiva. Kia fakamalolo foki a tautolu ke ‘mau ni ke lata mo e Iki.’ (1 Korinito 7:39; Teutaronome 7:3, 4) He magaaho ka mau ai, kua lata ia tautolu ke fakalautatai atu mo e tau liogi ha tautolu ma e fiafiaaga he fakagahuahua e fakatonuaga he Tohi Tapu. Mo e ka fai fanau a tautolu, kua nakai koenaia ke liogi to eke a lautolu mo tau fekafekau fakamoli ha Iehova. Kua lata ia tautolu ke taute e tau mena kua fahia a tautolu ki ai, ke fakaako mau e kupu moli he Atua ke he tau loto ha lautolu, he puhala he fakaako Tohi Tapu mo e he fakatauo tumau mo lautolu ke he tau feleveiaaga Kerisiano.—Teutaronome 6:5-9; 31:12; Tau Fakatai 22:6.
19. Ko e heigoa kua lata ke taute e tautolu kaeke ke liogi a tautolu hagaao ke he fekafekauaga?
19 Kua liogi nakai a tautolu ke fai fakamonuinaaga mai he fekafekauaga? Ti, kia o mai a a tautolu ke fakalautatai atu mo e tau liogi pihia he fakalataha fakahokulo atu ke he gahua fakamatala he Kautu. Kaeke ke liogi a tautolu ma e tau magaaho ke lagomatai falu ke o he puhala he moui tukulagi, kua lata ia tautolu ke fakamau fakamitaki hifo a lautolu ne fiafia mai mo e kua lata foki ke tohi hifo he ha tautolu a setulu ke takitaki e tau fakaakoaga Tohi Tapu. Ka e kua ka manako a tautolu ke gahua fakamatala mau ko e paionia? Kia lata ai ia tautolu ke taute e tau lakaaga he fakalautatai atu mo e tau liogi ha tautolu he fakatolomaki e gahua fakamatala ha tautolu mo e he fakalataha ke he fekafekauaga mo e tau paionia. He taute e tau lakaaga ia ka fakakite kua fakalautatai atu a tautolu mo e ha tautolu a tau liogi.
20. To kitekite e vala tala ne mui mai ke he heigoa?
20 Ka fekafekau fakamoli a tautolu ki a Iehova, maeke ia tautolu ke mauokafua to tali e ia e tau liogi ha tautolu ne kua fakalautatai atu mo e hana finagalo. (1 Ioane 5:14, 15) Moli ni, kua moua mai e tau manatu aoga he kumikumi atu ke he falu liogi ne fakamau i loto he Tohi Tapu. To kitekite e vala tala ha tautolu ne mui mai ke he falu takitakiaga faka-Tohiaga Tapu ma lautolu ne ‘tumau e tau liogi ke tuga ne tau mena manogi kua vela ki mua a Iehova.’
To Tali Fefe e Koe?
◻ Ko e ha kua lata ia tautolu ke liogi mo e tua?
◻ Kua putoia fefe e fakaheke mo e fakaaue ke he tau liogi ha tautolu?
◻ Ko e ha kua mauokafua a tautolu ke kumi e lagomatai a Iehova he liogi?
◻ Ko e heigoa e falu manatu aoga he liogi fakatai?
◻ Maeke fefe a tautolu ke fakalautatai atu mo e tau liogi ha tautolu?
[Fakatino he lau 10]
Ke tuga e Patuiki ko Iehosafata, kua lata a tautolu ke liogi he falu magaaho: ‘Kua nakai iloa foki e mautolu e mena ke eke; ka kua hagao atu a mautolu kia koe, Iehova’
[Fakatino he lau 11]
Liogi nakai a koe ke fakalautatai atu mo e liogi fakatai a Iesu?