Ko e Fakapotopotoaga Kerisiano​—Ko e Punaaga he Lagomatai Fakamafanatia

KO POPI, ko e fifine ne molea la ia e 20 e tau he moui, ne hogohogomanava ha ko e tuaga mamahi he magafaoa he nakai fai matutakiaga mo e hana tau matua.a He mole e liligi hana loto ke he motua Kerisiano mo e hana hoana, ne tohi e ia ki a laua: “Fakaaue lahi mahaki he fakaata e magaaho ke tutala ki a au. Nakai iloa e mua kua uho lahi ki a au ha mua a levekiaga mai ki a au. Fakaaue au ki a Iehova he foaki mai ki a au e tau tagata kua maeke ia au ke falanaki mo e tutala ki ai.”

Ko Toula, kua nakai la leva e takape fifine mo e ua e fanau fuata mui, ne hoko ke he tuaga vihi he tupetupe e manamanatuaga mo e tau mena uka fakatupe. Ne moua tumau e ia mo e hana fanau e tau aahi fakamalolo he hoa mau Kerisiano he fakapotopotoaga. He mole e kautu hana mai he tuaga ia, ne fakafano atu e ia ki a laua e laupepa, talahau: “Manatu tumau e au a mua he tau liogi haku. Ne manatu e au e tau magaaho loga ne lagomatai e mua au mo e ati hake au.”

Fa logona nakai e koe falu magaaho kua “pehia” a koe ha ko e holo ki mua e peehiaga he lalolagi nei? (Mataio 11:28) Kua fakakelea kia he “vaha mo e tau mena ke tutupu” e moui hau aki e tau mena mamahi? (Fakamatalaaga 9:11) Ti nakai ko koe ni tokotaha. Ha kua fita he moua he tau tagata tokoafe ne matematekelea, maeke foki ia koe ke moua e lagomatai fai kakano he fakapotopotoaga Kerisiano he Tau Fakamoli a Iehova. He senetenari fakamua V.N., ne moua he aposetolo ko Paulo ha ha i ai falu matakainaga talitonu ne kua mahomo atu e “fakamafanatia” ki a ia. (Kolose 4:10, 11) Maeke ia koe ke pihia foki.

Atihake mo e Lagomatai

I loto he Tau Tohiaga Tapu Heleni Kerisiano, ko e kupu “ekalesia” ne liliu mai he kupu Heleni ek·kle·siʹa, kua kakano ai ko e matakau he tau tagata ne fakapotopoto fakalataha. Moua mai foki he kupu ia e tau manatu he kaufakalatahaaga mo e featihake.

Kua taofi mau he fakapotopotoaga Kerisiano e kupu moli he Kupu he Atua ti fakapuloa e tala mitaki he Kautu hana. (1 Timoteo 3:15; 1 Peteru 2:9) Pete ia, kua foaki foki he fakapotopotoaga e atihake mo e lagomatai fakaagaga ma lautolu kua fakalataha ai. Kua maeke foki he taha ke kumi e matakau he tau kapitiga fakaalofa mo e manamanatu ne kua mautali mo e makai ke lagomatai mo e fakamafana e falu he tau magaaho tupetupe.​—2 Korinito 7:5-7.

Ko e tau tagata tapuaki a Iehova kua moua tumau e huaga mo e haohao mitaki i loto he fakapotopotoaga hana. Ne fakakite he salamo ne moua e ia e olioli mo e logonaaga he haohao mitaki he fakapotopotoaga he tau tagata he Atua. (Salamo 27:4, 5; 55:14; 122:1) Pihia foki he vaha nei, ko e fakapotopotoaga Kerisiano ko e feoakiaga he tau matakainaga talitonu kua ati hake mo e fakamalolo e falu.​—Tau Fakatai 13:20; Roma 1:11, 12.

Ko e tau tagata he fakapotopotoaga ne fakaako ke ‘mahani mitaki ke he tau tagata oti kana, ka e au atu ke he faoa ne tua.’ (Kalatia 6:10) Ko e fakaakoaga ne fakave ke he Tohi Tapu kua moua e lautolu ne kua omoi a lautolu ke fakakite e fakafeheleaki fakamatakainaga mo e feofanaki ma e falu. (Roma 12:10; 1 Peteru 3:8) Ko e tau matakainaga fakaagaga i loto he fakapotopotoaga ne omoi ke totonu, mafola, mo e fakaalofa hofihofi. (Efeso 4:3) He nakai eke noa ni mo tau tagata tapuaki, kua fakakite e lautolu e manamanatuaga fakaalofa ma e falu.​—Iakopo 1:27.

Ko e mena ia, ko lautolu ne pehia ne moua e matagi mafanatia tuga e magafaoa i loto he fakapotopotoaga. (Mareko 10:29, 30) Ko e logonaaga he ha ha ai ke he matakau fetataaki mo e fakaalofa kua fakamalolo a lautolu. (Salamo 133:1-3) Puhala he fakapotopotoaga, kua foaki he “fekafekau fakamoli mo e loto matala” e “tau mena kai [fakaagaga kakano] ke he tau magaaho.”​—Mataio 24:45.

Lagomatai Mai he Tau Leveki Fakaalofa

Ko e tau tagata he fakapotopotoaga Kerisiano kua amanaki ke moua i ai e tau leveki fakaalofa, maama, mo e lata he foaki e atihake mo e fakamaloloaga fakaagaga. Ko e tau leveki mo e tau fua pihia kua tuga e “fakamumuliaga mai he matagi, mo e mena ke malu ai ka to e afa.” (Isaia 32:1, 2) Ko e tau motua, po ke tau leveki ne fifili he agaga, kua leveki e tau tagata tuga e tau mamoe, fakamalolo e tau tagata gagao mo e tupetupe, mo e kumi ke liuaki mai a lautolu ne hehe.​—Salamo 100:3; 1 Peteru 5:2, 3.

Moli, ko e kau he tau motua he fakapotopotoaga nakai ko e matakau gahua he tau tagata fakamaulu po ke tau ekekafo fakamalolo tino, kua maeke ke fakamaulu e tau mena vihi he tino po ke manamanatuaga ne fehagai mo e tau matakainaga talitonu. He fakatokaaga he tau mena nei, kua “aoga [agaia] e ekekafo” ke he tagata gagao. (Luka 5:31) Pete ia, ko e tau leveki pihia kua maeke ke lagomatai a lautolu kua manako fakaagaga. (Iakopo 5:14, 15) Ka maeke ai, kua fakatoka foki e tau motua ma e falu lagomatai.​—Iakopo 2:15, 16.

Ko hai i tua he fakatokaaga fakaalofa pihia? Ko ia ni ko Iehova ko e Atua! Kua fakakite he perofeta ko Esekielu a Iehova he fakapuloa: “To kumi e au haku a tau mamoe, to kumi fakamakutu ni e au a lautolu . . . mo e laveaki e au a lautolu mai he tau mena oti ne fakamavehevehe atu ki ai a lautolu . . . To fagai e au haku a tau mamoe, ko au foki ke tatakoto ai a lautolu.” Ne manamanatu foki e Atua ke he tau mamoe mafatifati mo e lolelole.​—Esekielu 34:11, 12, 15, 16.

Lagomatai Moli he Magaaho Hako

Moua kia e lagomatai moli i loto he fakapotopotoaga Kerisiano? E, ti ko e tau fakafifitakiaga na ne mui mai kua fakatata e tau tutuaga kehekehe ne fakamoli aki kua maeke he fakapotopotoaga ke lagomatai.

◆ Mate e fakahele. Ne mate e tane a Anna ha kua leva e gagao. “Tali mai ai, kua moua mau e au e fakaalofa mafanatia mai he tau matakainaga Kerisiano,” he talahau e ia. “Ko e tau kupu totonu tumau he lagomatai mo e fakamalolo mai he tau matakainaga talitonu haku, fakalataha mo e tau kuku mafanatia ha lautolu kua fakatumau e loto haku ke fotufotu nakai maanu, ti fakaaue au ki a Iehova. Ko e fakaalofa ha lautolu ne taute au ke logona e atihake lahi, lagaki fakatokoluga, mo e leveki hofihofi.” Liga na moua foki e koe e mena kelea lahi ia he mate taha fakahele. He tau magaaho pihia, kua foaki he tau tagata he fakapotopotoaga e mafanatia lahi ue atu mo e atihake he manamanatuaga.

◆ Gagao. Ko Arthur, ko e leveki faifano mai Polani, ne ahi tumau ke he tau fakapotopotoaga he Lotouho i Asia ke fakamalolo fakaagaga a lautolu. Mai he taha ahi atu nei hana ne gagao lahi a ia ti moua e ia e tau mena uka lalahi. “Manako au ke tala atu e puhala leveki he tau matakainaga [he taone i Kazakhstan] mai ki a au,” he totoku e Arthur mo e fakaaue hokulo. “Ko e tokologa he tau matakainaga ne nakai iloa e au​—ti pihia mo lautolu kua fiafia fou​—ne ta mai e tau tupe, tau mena kai, mo e tau vai ekekafo. . . . Ti taute e lautolu mo e olioli lahi.

“Manamanatu la ke he logonaaga haku he moua e fagatohi ne tuku e tupe fakalataha mo e tohi: ‘Ma Matakainaga, kua fakafano atu e au e tau feleveia mafanatia. Ne mai e Mami e tupe ki a au ma e asikulimi, ka e fifili au ke atu ki a koe ma e tau vai ekekafo. Fakamolemole kia malolo vave. Kua manako a Iehova ke tuleva a tautolu. Tau manatu fakaalofa. Kia tala mai ki a mautolu falu tala mitaki mo e atihake. Vova.’” E, he fakakite he mena nei, maeke he tau fuata mo e tau fuakau he fakapotopotoaga ke foaki lagomatai mafanatia he tau magaaho gagao.​—Filipi 2:25-29.

◆ Fakaagitau. Ne ha ha ia Teri e manako he loto ke fekafekau ko e paionia, po ke tagata fakapuloa mau he Kautu. Ha ko e tau tuaga uka, ne motuhia e paionia hana. “Ne logona lahi mahaki e au e agahala he lali ke fekafekau fakaku, nakai tu e tau,” he talahau e ia. Ne talitonu hehe a Teri ko e taliaaga a Iehova kua fakalago ni ke he lahi he hana fekafekauaga ki a ia. (Kehe mai he Mareko 12:41-44.) He fakaagitau lahi, ne vevehe kehe a ia. Ka e hoko mai e lagomatai hahau he fakapotopotoaga.

Ne totoku e Teri: “Ne lagomatai lahi he paionia fifine motua au ti fanogonogo mai ki a au he liligi age e tau manatu haku. He toka e au e kaina hana, ne logona e au tuga kua lagaki kehe e pehiaaga ia au. Tali mai ai, ko e paionia fifine nei mo e hana tane, ko e motua he fakapotopotoaga ne foaki e lagomatai mitaki. Ne ahi mai tumau a laua ki a au ko e fefe au. . . . Ne fakaata e laua au ke nofo ke he tau fakaakoaga fakamagafaoa ha laua falu magaaho, ne kua nava au ki ai ke he aoga he tau magafaoa ke fakatumau e fetataaki.”

Nakai fa mahani ke he tokologa​—pihia mo e tau Kerisiano tukulele​—ke fakaagitau, fakalolelole, mo e matimati. Ko e loto fakaaue ha ia ha tautolu kua maeke e lagomataiaga fakaalofa nakai lotokai i loto he fakapotopotoaga he Atua!​—1 Tesalonia 5:14.

◆ Tau matematekelea mo e tau pakia totamaki. Tuku e koe a koe he tuaga he magafaoa tokofa ne galo e tau koloa oti ha lautolu he magaaho ne vela e fale ha lautolu. Nakai leva ti moua e lautolu e mena ne fakahigoa “ko e fakamaloloaga ka matala tukulagi ia mautolu ati nava ai a mautolu ke he fakaalofa moli he tau tagata a Iehova.” Kua fakamaama e lautolu: “Ne mafiti ni a mautolu ke he ofoofogia he tau hea fakamoli he atihake mo e levekiaga mai he tau matakainaga fakaagaga ha mautolu. Ne tagi hololoa e telefoni. Ko e manamanatuaga fakamoli mo e fakaalofa he tau tagata oti ne fakalagalaga lahi ne maeke ia mautolu ke tagi he fakaaue.”

Nakai leva, ko e matakau lahi he tau matakainaga tane ne fakatoka he tau motua he fakapotopotoaga, mo e ke he tau aho gahoa, ne ta e lautolu e fale fou ma e magafaoa nei. Ne talahau he katofia: “Kua lata ia mutolu ke kitia! Ko e tau faga tagata kehekehe ne gahua ai​—tau tagata tane, tau fifine, tau tagata uli, tau Hisipania!” Ko e fakamoliaga maali anei he fakaalofa fakamatakainaga.​—Ioane 13:35.

Ne age foki he tau matakainaga Kerisiano ke he magafaoa e tau mena tui, tau mena kai, mo e tau tupe. Ne talahau he matua tane: “Ko e magahala Kerisimasi anei ma e tau tagata oti ke feutaaki e tau hoka, ka e talahau fakamoli a mautolu kua nakai fai tagata foki ne olioli e faga fakamokoi fakamoli mo e ofoofogia ne moua e mautolu.” Mo e lafi e lautolu: “Ko e tau manatu ke he afi kua galo fakahaga ka kua hukui aki e tau manatu uho he tau gahua totonu mo e tau kapitiga mitaki. Ko e fakaaue ha mautolu fina atu ke he Matua fakahele ha tautolu he lagi, ko Iehova, ha kua ha ha ia mautolu e magafaoa kaufakalataha mua ue atu he tau matakainaga he lalolagi, ti fakaaue foki a mautolu ke fai vala i ai!”

Moli, ko e mouaaga ia nakai maeke, po ke amanaki ki ai, he tau matematekelea takitaha pihia. Ka ko e mena nei ne fakatata moli e atihake ne foaki he fakapotopotoaga.

Pulotu Mai i Luga

Tokologa ne moua falu punaaga he lagomatai mo e malolo he fakapotopotoaga Kerisiano. Ko e heigoa a ia? Ko e tau tohi ne tauteute he “fekafekau fakamoli mo e loto matala.” Matapatu he tau mena oti nei ko e tau senolo Ko e Kolo Toko mo e Awake! Ke maeke ke foaki e fakatonuaga maama mo e fakaakoaga aoga, ko e tau tohi nei kua falanaki katoatoa ai ke he pulotu faka-Atua ne moua he Tohi Tapu. (Salamo 119:105) Ko e vala tala faka-Tohiaga Tapu ne lafilafi ha ko e kumikumiaga mauokafua mo e fakaveaga ke he tau mataulu tala tuga e fakaagitau he manamanatuaga, maulu mai he fakakelea, tau mena vihi he tau fakalatahaaga kehekehe mo e fakatupe, tau paleko ne fehagai he tau tagata fuata, mo e tau mena uka ne hagaao ke he tau motu tuaga mitaki. Mua atu ke he tau mena oti ia, ko e tau tohi oti nei kua taofi mau e puhala he Atua ke he puhala kua mitaki lahi he moui.​—Isaia 30:20, 21.

He tau tau takitaha, kua moua he Sosaiete he Kolo Toko e tau tohi afe he loto fakaaue. Hagaao ke he vala tala he Awake! ke he taupega, tuga anei, ko e tagata tane fuata i Rusia ne tohi: “Ha ko e hagahaga atu haku ke he fakaagitau, . . . ne loga lahi e magaaaho ne manamanatu au ke he taupega. Ne fakamalolo he vala tala nei e taofiaga haku to lagomatai he Atua au ke fehagai mo e tau mena vihi haku. Manako a ia ke moui au. Ne fakaaue au ki a ia ma e lagomatai hana mai he vala tala nei.”

Ka matamata vale kaka e tau matematekelea he lalolagi nei ke fehagai ki ai, kua maeke ia koe ke iloa moli na fai matakavi haohao mitaki i loto he fakapotopotoaga Kerisiano. Moli, ka mimiti he tutakale momo he fakatokatokaaga nakai fai fakaalofa nei e malolo hau, moua e koe e huaga fakamalolo he fakatokatokaaga a Iehova. He mole e moua e atihakeaga ia, maeke foki ia koe ke taogo e logonaaga he fifine Kerisiano ne kautu he fehagai mo e tane gagao lahi mahaki hana mo e tohi: “Ha ko e fakaalofa mo e leveki ne fakakite ki a maua, ne logona e au tuga na lagaki e Iehova a maua he matematekelea ke he alolima hana. Ko e fakaaue ha ia haku he fai vala he fakatokatokaaga mua ue atu a Iehova!”

[Matahui Tala]