“Kua Fakapuke e Manako he Loto Haku”
“FAKAAUE au mai he loto haku ke he mena fakaalofa fulufuluola ko e Fakatata Atu ki a Iehova. Kua fakapuke e manako he loto haku—ko e lata ke logona e mokoina mo e ofania e Iehova. Kua logona e au e tata lahi ki a Iehova mo e hana Tama fakahele mogonei. Manako au ke tala age ke he tau tagata oti hagaao ke he tohi nei mo e ke age e lagaki ke he tau fakahele oti haku.” Pihia e logonaaga he taha he Tau Fakamoli a Iehova hagaao ke he tohi fou lau 320 ne fakatoka mai he Fonoaga he Fahimotu “Tau Tagata Fakapuloa Fakamakai he Kautu” he 2002/03. O mai la tautolu ke kumikumi ke he falu vala he tohi fou nei mo e kakano ne lomi fakailoa ai.
Falu Vala he Tohi Fou
Ko e heigoa ne ha ha he tohi fou nei? Ko e tau vala tala oti ne fakakite mai he tau vala tala fakaakoaga ua he fufuta nei—mo e loga atu foki! Ko e 31 e veveheaga he tohi, teitei ne loloa ke tatai mo e vala tala fakaakoaga he Kolo Toko. He mole e talahauaga ku mo e tau veveheaga tolu fakamua, ne vevehe e tohi ke he fa e vala, igatia ai e vala mo e tau matapatu mahani ha Iehova. Igatia e vala mo e hafagi aki e talahauaga he mahani. Ko e tau veveheaga gahoa ne toe kua fakatutala ke he puhala nukua fakakite e Iehova e mahani. Igatia e vala ne ha ha ai e veveheaga ki a Iesu. Ko e ha? Ne pehe a Iesu: “Ko ia kua kitia au, kua kitia foki e ia e Matua.” (Ioane 14:9) Ko e fakaataaga mitaki katoatoa ha Iehova, ne foaki e Iesu ki a tautolu e tau fakafifitakiaga malolo ne gahuahua he tau mahani he Atua. Igatia e vala mo e fakaoti aki e veveheaga kua fakaako ki a tautolu e puhala ke fifitaki a Iehova he fakatata e mahani ke he vala ne fakaako ki ai. He fakatutala ke he tau mahani ha Iehova, kua hagaao e tohi fou nei ke he tau tohi oti he Tohi Tapu.
Ko e tohi Fakatata Atu ki a Iehova kua ha ha ai foki e falu vala pauaki. Kamata ke he veveheaga 2, igatia e veveheaga mo e puha ne mataulu “Tau Huhu ke Manamanatu Fakahokulo Ki Ai.” Ko e tau kupu tohi mo e tau huhu ne tutu ai ne nakai amanaki ke liu fakamanatu ke he veveheaga. Ka e, kua talaga ai ke lagomatai a koe ke fakaaoga e Tohi Tapu ke manamanatu fakahokulo ke he matakupu. Kua fakamalolo atu ke totou fakamitaki e koe e tau vala takitaha he Tohiaga Tapu. Ti manamanatu ke he huhu mo e lali ke fakagahua ke he moui. Ko e manamanatu hokulo pihia kua maeke ke fakalagalaga e loto hau, he lagomatai a koe ke fakatata fakalahi atu ki a Iehova.—Salamo 19:14.
Ko e tau fakatino he tohi Fakatata Atu ki a Iehova ne kumikumi mo e tauteute fakamitaki ke maeke ke fakaako mo e ke fakalagalaga ai. Ko e hogofulu ma fitu la e veveheaga ne toka ai e tau fakatino ai pihia he tau fakatokaaga faka-Tohi Tapu.
Ne Lomi Fakailoa He Ha?
Ko e ha ne lomi fakailoa ai e tohi Fakatata Atu ki a Iehova? Ko e matapatu kakano he tohi fou nei ke lagomatai a tautolu ke o mai ke iloa mitaki a Iehova ke liga maeke ia tautolu ke atihake e fakafetuiaga fakatagata malolo mo e Atua ha tautolu.
Maeke nakai ia koe ke manamanatu ke he taha kua liga aoga mai he tohi Fakatata Atu ki a Iehova, liga ko e tagata fakaako Tohi Tapu po ke ko e matakainaga tane po ke fifine Kerisiano ne lolelole? Ka e kua a koe—kua kamata nakai a koe ke totou e tohi fou nei? Ka nakai, he ha he setulu e magaaho ke kamata fakamafiti? Fakaata e magaaho ke manamanatu ke he mena kua totou a koe ki ai. Kia eke e tohi fou nei ke lagomatai a koe ke fakatata fakalahi atu ki a Iehova ko e Atua, ke maeke ia koe ke fakapuloa hana tala mitaki he Kautu mo e olioli mo e makai lahi!