‘Fakaako Atu ki a Lautolu ke Omaoma ke he Tau Mena Oti ne Tala Atu e Au ki a Mutolu’

‘Hanei, kia o atu a a mutolu mo e taute tutaki, ti fakaako atu ki a lautolu ke omaoma ke he tau mena oti ne tala atu e au ki a mutolu.’​—MATAIO 28:19, 20.

1. Ko e heigoa e fakatutalaaga he vahaloto he tutaki ko Filipo mo e tagata tane mai Aitiope?

KO E tagata tane mai i Aitiope ne fenoga atu ki Ierusalema. I ai ne tapuaki a ia ke he Atua ne fakaalofa a ia ki ai, ko Iehova. Maaliali ai, ne ofania foki e ia e Kupu he Atua ne omoomoi he agaga tapu. He liu atu ki kaina he hana nofoa fakataveli, hane totou a ia ke he lagaki he tohi he perofeta ko Isaia he magaaho ne feleveia a Filipo, ko e tutaki he Keriso, mo ia. Ne huhu a Filipo ke he Aitiope: “Kua maama nakai kia koe e tau mena kua totou ai e koe?” Ne tali e tagata: ‘To maeke fefe e au, ka nakai takitaki mai e taha kia au?’ Ne matutaki a Filipo ke lagomatai e tagata fakaako moli nei ke he Tohiaga Tapu ke eke a ia mo tutaki he Keriso.​—Gahua 8:26-39.

2. (a) Ke he puhala fe ne kakano lahi e tali he tagata Aitiope? (e) Ko e heigoa e tau huhu hagaao ke he poaki he Keriso ke taute tutaki ka fakatutala a tautolu ki ai?

² Ko e tali he tagata Aitiope kua kakano lahi. Ne pehe a ia: ‘To maeke fefe e au, ka nakai takitaki mai e taha kia au.’ E, kua lata moli a ia ke fai tagata takitaki, taha tagata ke takitaki e hala hana. Ke he matakupu nei, kua fakakite e aoga he fakaakoaga fakatonu ne lafi e Iesu ke he hana poakiaga ke taute tutaki. Ko e heigoa e fakaakoaga? Ke moua e tali, o mai la a tautolu ke matutaki ke kitekite ke he tau kupu ha Iesu he Mataio veveheaga 28. Ko e vala tala kua mole ne onoono ke he tau huhu ko e ha? mo e i fe? To fakatutala a tautolu mogonei ke he ua foki e huhu hagaao ke he poaki ha Keriso ke taute tutaki​—ko e heigoa? mo e magaaho fe?

‘Fakaako Atu ki a Lautolu ke Omaoma ke he Tau Mena Oti’

3. (a) Puhala fe kua maeke he taha ke eke mo tutaki ha Iesu Keriso? (e) He taute tutaki ko e heigoa kua putoia e fakaako atu?

³ Ko e heigoa kua latatonu ia tautolu ke fakaako ke lagomatai e falu ke eke mo tau tutaki he Keriso? Ne poaki e Iesu hana tau tutaki: ‘Hanei, kia o atu a a mutolu ke taute e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e agaga tapu, ti fakaako atu ki a lautolu ke omaoma ke he tau mena oti ne tala atu e au kia mutolu.’ (Mataio 28:19, 20) Ti, kua latatonu ke fakaako e tautolu e tau mena ne poaki he Keriso.a Ko e heigoa mogoia, ka lagomatai ke iloa moolioli ko ia ne fakaako ki ai e poakiaga ha Iesu to nakai ni eke mo tutaki, ka e ke tumau foki ki ai? Taha e matapatu uho kua kitia ke he fifiliaga hokulo he tau kupu ha Iesu. Mailoga, ne nakai ui ni hokoia a ia: ‘Fakaako atu ki a lautolu ke he tau mena oti kua tala atu e au kia mutolu.’ Ka e, ne pehe a ia: ‘Fakaako atu ki a lautolu ke omaoma ke he tau mena oti kua tala atu e au kia mutolu.’ (Mataio 19:17) Hagaao ke he heigoa e mena ia?

4. (a) Ko e heigoa e kakano ke omaoma ke he poaki? (e) Fakatai e puhala ka fakaako e tautolu taha ke omaoma e tau poaki he Keriso.

⁴ Ke omaoma e poaki kua kakano ke “fakatatau e tau gahua he taha” mo e poaki​—ke omaoma, po ke tumau ki ai. Fakaako fefe mogoia e tautolu e taha ke omaoma, po ke oma, e tau mena ne poaki he Keriso? Kia manamanatu ke he puhala ne fakaako aki he tagata fakaako fakaholo hana tau tagata fakaako ke omaoma ke he tau fakatufono peleoafi. Ko e tagata fakaako fakaholo kua liga fakaako e tau tagata fakaako hagaao ke he tau fakatufono he puhalatu i loto he poko aoga. Ka e, ke fakaako e tau tagata fakaako hana ke omaoma ke he tau fakatufono ia, ko ia ka takitaki e tau tagata fakaako he fakaholo he puhalatu mo e taufetului ke fakagahua e tau mena ne kua ako e lautolu. Tatai ai, ka fakaako e tautolu e Tohi Tapu mo e tau tagata, kua fakaako e tautolu ki a lautolu e tau poakiaga he Keriso. Pete ia, lata foki ia tautolu ke takitaki e tau tagata fakaako he ukufakina a lautolu ke fakagahua e tau fakamaamaaga he Keriso ke he tau momoui ha lautolu he tau aho takitaha mo e ke he fekafekauaga. (Ioane 14:15; 1 Ioane 2:3) Ti, he taute katoatoa e poaki he Keriso ke taute tutaki kua lata ia tautolu ke eke mo tau faiaoga mo e tau takitaki. Ke he puhala ia, kua mumuitua a tautolu ke he fakafifitakiaga ne fakatoka e Iesu mo Iehova.​—Salamo 48:14; Fakakiteaga 7:17.

5. Ko e ha e tagata hane fakaako Tohi Tapu mo tautolu ne kua tehatehaua ke omaoma e poaki he Keriso ke taute tutaki?

⁵ Ko e fakaako falu ke omaoma e tau poaki ha Iesu kua putoia e lagomatai a lautolu ke fanogonogo ke he poaki ke taute tutaki. Ma e falu ne kua fakaako mo tautolu ke he Tohi Tapu, kua liga fakahopoate e mena ia. Pete kaeke ko e tau tagata malolo a lautolu he falu tapu ha Kerisitenitome he magaaho fakamua, kua liga nakai fakaako he tau faiaoga he lotu fakamua ia ha lautolu a lautolu ke o atu mo e taute tutaki. Ne talahau fakamoli he falu takitaki lotu ko e magaaho ka hoko ke fakaako e fuifui ha lautolu ke fakamatala, kua kaumahala katoatoa e tau lotu ha Kerisitenitome. He tutala hagaao ke he poaki ha Iesu ke o atu ke he lalolagi mo e lagomatai e tau tagata kehekehe ke eke mo tutaki, ko e tagata fakaako tokoluga ke he Tohi Tapu ko John R. W. Stott ne mailoga: “Ko e kaumahala ha mautolu ke omaoma ke he kakano he poaki nei ko e lolelole lahi mahaki he tau Kerisiano ke fakamatala he gahua faka-evagelia he vaha nei.” Ne lafi e ia: “Ne hihiga a mautolu ke fakapuloa e fekau ha mautolu mai he matakavi mamao. Falu magaaho kua kitia a mautolu ko e tau tagata kua tauhea mai he pokoahu haohao mitaki e tau fakatonutonuaga ke he tau tagata tane hane tomo. Kua nakai uku atu a mautolu ke fakahao a lautolu. Kua matakutaku a mautolu neke pala.”

6. (a) Ka lagomatai e tagata fakaako Tohi Tapu, maeke fefe ia tautolu ke muitua ke he fakafifitakiaga ha Filipo? (e) Maeke fefe ia tautolu ke fakakite e manamanatu ha tautolu ka kamata e tagata fakaako he Tohi Tapu ke fakalataha ke he gahua fakamatala?

⁶ Kaeke ko e tagata ne fakaako e Tohi Tapu mo tautolu ko e taha vala he lotu ne ha ha a lautolu ne “matakutaku neke pala,” to liga ko e paleko ma hana ke kautu mai he matakutaku hana ke he vai, he vagahau fakatai, mo e omaoma e poaki he Keriso ke taute tutaki. To manako lagomatai a ia. Ti, kua lata ia tautolu ke fakahautoka he age e tau fakamaamaaga mo e tau takitakiaga ke fakaauatu aki e hokulo hana maamaaga mo e omoomoi a ia ke taute, tuga e tau fakaakoaga ha Filipo ne fakamaama ke he Aitiope mo e omoomoi a ia ke papatiso. (Ioane 16:13; Gahua 8:35-38) Ke lafi ki ai, ko e manako ha tautolu ke fakaako e tau tagata fakaako Tohi Tapu ke omaoma e poaki ke taute tutaki ka omoomoi a tautolu ke haia he tapa ha lautolu ke takitaki a lautolu he tau laka fakamua ha lautolu ke fakamatala he Kautu.​—Fakamatalaaga 4:9, 10; Luka 6:40.

“Tau Mena Oti”

7. Ko e fakaako falu ke ‘omaoma ke he tau mena oti’ kua putoia ke fakaako a lautolu ke he tau poaki fe?

⁷ Nakai fakakaupa ni a tautolu mai he fakaako ni he tau tutaki fou ke taute tutaki. Ne fakamaama mai a Iesu ki a tautolu ke fakaako falu ke “omaoma ke he tau mena oti” ne poaki e ia. Kua putoia moli he mena ia e tau poaki ua ne mua atu​—ke fakaalofa ke he Atua mo e ke fakaalofa ke he katofia. (Mataio 22:37-39) Puhala fe ka liga fakaako e tutaki fou ke omaoma e tau poakiaga ia?

8. Fakataitai e puhala ne liga fakaako ke he tutaki fou e poaki ke fakakite e fakaalofa.

⁸ Liu manamanatu ke he fakataiaga ke he tagata fakaako fakaholo. He fakaholo atu e tagata fakaako he puhalatu mo e tagata fakaako fakaholo he tapa hana, ko e tagata fakaako kua hane ako nakai he fanogonogo hokoia ke he tagata fakaako fakaholo hana ka e pihia foki he kitekite ke he falu tagata fakaholo. Ma e fakatai, ko e tagata fakaako fakaholo ka liga tuhi ke he tagata fakaholo ne totonu he fakaata e taha peleoafi ke fano mua ia ia he puhalatu; po ke tagata fakaholo ne totonu he fakatote hifo e tau moli motoka hana ke nakai fakapouli e tau peleoafi ne o mai; po ke tagata fakaholo ne makai ke lagomatai e kapitiga kua malona e peleoafi. Ko e tau fakafifitakiaga pehenei kua fakaako ke he tagata fakaako e tau fakaakoaga uho ke maeke ia ia ke fakagahua ka fakaholo a ia. Pihia foki, ko e tutaki fou ne fakaholo he puhala ke he moui kua ako nakai ni mai he hana faiaoga ka e pihia foki mai he falu fakafifitakiaga mitaki ne kitia e ia he fakapotopotoaga.​—Mataio 7:13, 14.

9. Ako fefe he tutaki fou ko e heigoa e kakano ke omaoma e poaki ke fakakite e fakaalofa?

⁹ Ma e fakatai, ko e tagata fakaako Tohi Tapu to liga kitekite ke he matua tokotaha ne lali fakalahi ke hau ke he Fale he Kautu mo e tau fanau ikiiki hana ne tauluaki he o mai. Liga kitia e ia e solu loto lolelole ne hau tua fakamoli he tau feleveiaaga pete e hana taufetului mo e fakaagitau, ko e takape motua ne fakaholo mai e falu fuakau ke he tau feleveiaaga fakapotopotoaga takitaha, po ke tama fuata mui ne fakalataha ke fakamea e Fale he Kautu. Ko e tagata fakaako Tohi Tapu to liga kitia e motua he fakapotopotoaga ne takitaki tua fakamoli e gahua he fonua pete kua loga hana tau matagahua he fakapotopotoaga. Liga feleveia a ia mo e Fakamoli ne kulikuli mo e nofo kaina ka e ko e punaaga he fakamafanaaga fakaagaga ki a lautolu oti ne ahiahi atu ki a ia. Ko e tagata fakaako to liga kitia e hoa mau hane taute e tau hikihikiaga lalahi he tau momoui ha laua ke maeke ke gahua ko e tau tagata leveki ke he tau mamatua momotua ha laua. He kitekite ke he totonu, lagomatai, mo e falanaki pihia he tau Kerisiano, ko e tau tutaki fou kua ako mai he tau fakafifitakiaga e kakano ke omaoma e poaki he Keriso ke fakaalofa ke he Atua mo e katofia, mua atu ke he tau matakainaga talitonu. (Tau Fakatai 24:32; Ioane 13:35; Kalatia 6:10; 1 Timoteo 5:4, 8; 1 Peteru 5:2, 3) Ke he puhala nei, ko e tau tagata takitaha he fakapotopotoaga Kerisiano kua maeke​—mo e kua lata—​ke eke mo faiaoga mo e takitaki.​—Mataio 5:16.

“Ato Hoko Ni ke he Fakaotiaga he Lalolagi”

10. (a) Ke he fiha e leva ka matutaki a tautolu ke taute tutaki? (e) Ko e heigoa e fakafifitakiaga ne fakatoka e Iesu hagaao ke he puhala ke taute aki e tau kotofaaga?

¹⁰ Ato hoko ke he magaaho fe e lata ha tautolu ke matutaki ke taute tutaki? Ke he fakaotiaga he fakatokaaga he lalolagi. (Mataio 28:20) To maeke nakai ia tautolu ke fakamoli e fahi nei he poakiaga ha Iesu? Ko e fakapotopotoaga he lalolagi katoa, kua mauokafua a tautolu ke taute pihia. He tau tau kua mole, kua foaki fakamakai e tautolu ha tautolu a tau magaaho, malolo, mo e tau koloa ke kumi a lautolu “ne kotofa ke he moui tukulagi.” (Gahua 13:48) Ke he mogonei, ko e Tau Fakamoli a Iehova kua fakaaoga ke molea e avelesi he tolu e miliona tula he tau aho takitaha he tau ke fakamatala e Kautu mo e taute tutaki he lalolagi katoa. Kua taute pihia e tautolu kakano kua muitua a tautolu ke he fakafifitakiaga ha Iesu. Ne talahau e ia: “Ko e haku a mena kai hanei, kia eke e au e finagalo hana ne fakafano mai au mo e fakaoti hana gahua.” (Ioane 4:34) Kua pihia foki e manako he tau fatuakiloto ha tautolu. (Ioane 20:21) Kua manako a tautolu ke lahi atu e mena ka taute mai he kamata e gahua kua tuku mai ki a tautolu; kua manako a tautolu ke fakaoti ai.​—Mataio 24:13; Ioane 17:4.

11. Ko e heigoa ne tupu ke he falu he tau matakainaga tane mo e fifine Kerisiano ha tautolu, mo e ko e heigoa kua lata ia tautolu ke huhu ki a tautolu ni?

¹¹ Kua fakamomoko ki a tautolu, mogoia, ke mailoga ko e falu matakainaga talitonu ha tautolu kua hane lolelole fakaagaga fakahaga mo e, ko e fua, kua fakamanou po ke tu nono e taute he poaki ha Keriso ke taute tutaki. Fai puhala foki nakai kua maeke ia tautolu ke lagomatai a lautolu ke fakafou ha lautolu a lafiaga mo e fakapotopotoaga mo e liu a lautolu matutaki ke fakalataha he taute tutaki? (Roma 15:1; Heperu 12:12) Ko e puhala ne lagomatai aki e Iesu e tau tutaki hana he magaaho ne lolelole fakaku a lautolu kua fakakite ki a tautolu e mena kua maeke ke taute e tautolu he vaha nei.

Fakakite e Manamanatu

12. (a) Ato mate a Iesu, ko e heigoa ne taute he tau tutaki hana? (e) Puhala fe ne fehagai a Iesu mo e hana tau aposetolo pete kua fakakite e lautolu e lolelole hagahaga kelea?

¹² Ke he matahiku he fekafekauaga ha Iesu he lalolagi, magaaho kua tata lahi mai e mate hana, ko e tau aposetolo ne “tiaki ai e lautolu oti a ia, ka e fehola.” Ke tuga ni ne talahau tuai e Iesu, “ke mavehevehe ai a mutolu ke takitaha mo e fano ke he hana faoa.” (Mareko 14:50; Ioane 16:32) Puhala fe ne fehagai a Iesu mo e tau hoa lolelole fakaagaga hana? Nakai leva e mole he liu tu mai hana, ne tala age a Iesu ke he falu he tau tutaki hana: “Ua matakutaku a mua, ati o a, ke talahau atu e mua ke he haku a tau matakainaga kia o atu a lautolu ki Kalilaia, kia kitia ai e lautolu au.” (Mataio 28:10) Pete kua fakakite he tau aposetolo e lolelole hagahaga kelea, ne fakahigoa agaia e Iesu a lautolu ko e “haku a tau matakainaga.” (Mataio 12:49) Ne nakai fiu a ia ia lautolu. He puhala nei, ko Iesu kua fakaalofa noa mo e fakamagalo, tuga a Iehova ne fakaalofa noa mo e fakamagalo. (2 Patuiki 13:23) Maeke fefe ia tautolu ke fifitaki a Iesu?

13. Puhala fe kua lata ke onoono a tautolu ki a lautolu ne kua lolelole fakaagaga?

¹³ Kua lata ia tautolu ke manamanatu fakahokulo ma lautolu kua fakamanou po ke tu nono nakai fakalataha ke he fekafekauaga. Kua manatu agaia e tautolu e tau gahua he fakaalofa ne kua taute he tau matakainaga talitonu ia he tau vaha kua mole​—ko e falu liga ke he tau hogofulu tau. (Heperu 6:10) Kua galo moli ia tautolu e faihoani ha lautolu. (Luka 15:4-7; 1 Tesalonia 2:17) Puhala fe mogoia, ka liga fakakite e tautolu e manamanatu ha tautolu ma lautolu ia?

14. He muitua ki a Iesu, maeke fefe ia tautolu ke lagomatai e tagata lolelole?

¹⁴ Ne tala age a Iesu ke he tau aposetolo ne loto lolelole kua lata ia lautolu ke o ki Kalilaia mo e to feleveia a ia mo lautolu i ai. Kua kakano, ne uiina e Iesu a lautolu ke o atu ke he feleveiaaga pauaki. (Mataio 28:10) Tatai foki he vaha nei, kua fakamalolo e tautolu a lautolu ia kua lolelole fakaagaga ke o mai he tau feleveiaaga he fakapotopotoaga Kerisiano, ti liga lata ia tautolu ke lagaloga e fakamalolo a lautolu ke taute pihia. He hagaao ke he tau aposetolo, ne fai fua e uiina, he “o atu e tau tutaki tokohogofulu ma taha ki Kalilaia, ke he mouga ne poaki atu ai a Iesu kia lautolu.” (Mataio 28:16) Ko e olioli ha ia ha tautolu ka logona kua tali pihia foki a lautolu ne lolelole ke he tau uiina mafanatia ha tautolu ke liu matutaki ke o mai ke he tau feleveiaaga Kerisiano!​—Luka 15:6.

15. Maeke fefe ia tautolu ke mumuitua ke he fakafifitakiaga ha Iesu he fakafeleveia ki a lautolu ne lolelole ne o mai ke he matakavi he feleveiaaga ha tautolu?

¹⁵ Fefe a tautolu ka hau e Kerisiano ne lolelole ke he Fale he Kautu? Ko e heigoa ne taute e Iesu he magaaho ne kitia e ia hana tau aposetolo, ne kua lolelole fakaku e tua ha lautolu, he matakavi ne kotofa ke feleveia ai? Ne “fina age a Iesu, kua vagahau kia lautolu.” (Mataio 28:18) Ne nakai mataono a ia mai he mena mamao ka e fina age ki a lautolu. Manamanatu la ke he fakatotoka ne logona he tau aposetolo he mogo ne taute mua e Iesu e mena ia! Kia taute mua foki e tautolu mo e fakafeleveia mafanatia a lautolu ne lolelole fakaagaga ne kua lali ke liliu mai ke he fakapotopotoaga Kerisiano.

16. (a) Ko e heigoa kua maeke ia tautolu ke ako mai he puhala ne fehagai a Iesu mo e tau tutaki hana? (e) Puhala fe kua maeke ia tautolu ke fakaata e onoonoaga ha Iesu ki a lautolu ne lolelole? (Kikite matahui tala.)

¹⁶ Ko e heigoa foki ne taute e Iesu? Fakamua, ne taute e ia e fakailoaaga: “Kua tuku mai kia au e pule oti kana.” Uaaki, ne age e ia e kotofaaga: ‘Hanei, kia o atu a a mutolu ke taute tutaki.’ Toluaki, ne taute e ia e maveheaga: “To fakalataha au mo mutolu ke he tau aho oti.” Ka e mailoga nakai e koe ko e heigoa ne nakai taute e Iesu? Ne nakai akonaki e ia e tau aposetolo ha ko e tau kaumahala mo e tau mahalohalo ha lautolu. (Mataio 28:17) Kua lauia mitaki nakai e fakafeleveia hana? E. Nakai leva, kua liu foki e tau aposetolo ‘fakaako atu mo e fakamatala atu e tala mitaki.’ (Gahua 5:42) He mumuitua ke he fakafifitakiaga ha Iesu ke he puhala ke onoono mo e fehagai ki a lautolu ne lolelole, to liga kitia foki e tautolu e tau fua mafanatia he fakapotopotoaga ha tautolu.b​—Gahua 20:35.

“To Fakalataha Au mo Mutolu ke he Tau Aho Oti”

17, 18. Ko e heigoa e tau manatu fakamalolo ne ha ha ke he tau kupu ha Iesu, “To fakalataha au mo mutolu ke he tau aho oti”?

¹⁷ Ko e tau kupu fakahiku he poakiaga ha Iesu, “To fakalataha au mo mutolu ke he tau aho oti,” kua ha ha e manatu fakamalolo ma e tau tagata oti ne eketaha ke fakamoli e poaki he Keriso ke taute tutaki. Ko e ha totokoaga mai he tau fi ke he gahua ha tautolu he fakamatala he Kautu mo e ha vahega pikopiko ka liga talahau ki a tautolu, kua nakai fai kakano a tautolu ke matakutaku. Nakai pihia he ha? Ko Iesu, ko e Takitaki ha tautolu, ne ha ha e ‘pule katoa he lagi mo e ke he lalolagi,’ kua ha ha mo tautolu ke lalago a tautolu!

¹⁸ Kua mavehe e Iesu “To fakalataha au mo mutolu ke he tau aho oti” ko e punaaga mafanatia lahi mahaki foki. He eketaha a tautolu ke taute e poaki he Keriso ke taute tutaki, ne logona e tautolu nakai ni he tau aho olioli ka e pihia foki he tau aho mamahi. (2 Nofoaga he Tau Patuiki 6:29) Falu ia tautolu kua logona e tau magaaho momoko he fakatutuku he mate e taha ne fakahele. (Kenese 23:2; Ioane 11:33-36) Falu kua fehagai mo e vaha motua, magaaho nukua lolelole fakahaga e malolo tino mo e hakahakau. (Fakamatalaaga 12:1-6) Fai agaia ne fehagai mo e tau aho kua lahi mahaki e fakaagitau. (1 Tesalonia 5:14) Mo e kua hake fakahaga e numera ha tautolu ne taufetului he matematekelea lahi mahaki fakatupe. Moha ia, pete he tau paleko pihia, kua kautu a tautolu he fekafekauaga ha tautolu ha ko Iesu mo tautolu “he tau aho oti,” putoia e tau aho ne mua atu e mamahi he tau momoui ha tautolu.​—Mataio 11:28-30.

19. (a) He poakiaga ha Iesu ke taute tutaki ko e heigoa e tau fakaakoaga kua ha ha ai? (e) Ko e heigoa ka lagomatai a tautolu ke fakamoli e poakiaga he Keriso?

¹⁹ He kitia e tautolu he vala tala nei mo e vala tala fakamua, ko e poakiaga ha Iesu ke taute tutaki kua putoia e tau fahi oti. Ne talahau e Iesu ki a tautolu ko e ha mo e i fe kua lata ia tautolu ke taute e poaki hana. He talahau foki e ia ki a tautolu ko e heigoa kua lata ia tautolu ke fakaako mo e magaaho fe kua lata ia tautolu ke taute ai. Moli, ke fakamoli e poaki mua atu nei ko e paleko. Ka e mo e pule he Keriso ne lalago a tautolu mo e hana ha ha hinei he tapa ha tautolu, maeke ia tautolu ke taute! Nakai kia talia e koe?

[Tau Matahui Tala]

To Tali Fefe e Koe?

• Fakaako fefe e tautolu falu ke omaoma e mena ne poaki e Iesu?

• Ko e heigoa e tau fakaakoaga ka liga ako he tutaki fou mai he falu i loto he fakapotopotoaga?

• Ko e heigoa kua maeke ia tautolu ke taute ke lagomatai a lautolu ne kua lolelole fakaagaga?

• Ko e heigoa e malolo mo e mafanatia ne moua e tautolu mai he maveheaga ha Iesu “To fakalataha au mo mutolu ke he tau aho oti”?

[Tau Fakatino he lau 25]

Lata ia tautolu ke eke mo tau faiaoga mo e tau takitaki

[Tau Fakatino he lau 27]

Ko e tutaki fou kua ako e tau fakaakoaga mitaki mai he tau fakafifitakiaga ne fakatoka he falu