Tau Hūhū Mai he Tau Tagata Totou
Ko e Heigoa e ‘tau he Atua Malolō Ue Atu’ i Amaketo, mo e ko e heigoa e fakahikuaga?—Fakakiteaga 16:14, 16.
Ke talahau fakamukamuka, ko e tau i Amaketo ko e tauaga he lalolagi katoa he vahā i mua ka moumou he Patuiki kotofa ha Iehova, ko Iesu Keriso, e tau fī he Atua. Kua fakamaama mai he Tohi Tapu ko e tau fī nei, ko e ‘tau patuiki he lalolagi oti kana,’ kua mau amanaki ha ko e “tau agaga ia he tau temoni” ti kua fakapotopoto “ke he aho lahi he Atua [“Malolō Ue Atu,” NW] . . . ke he mena kua higoa ke he vagahau Heperu ko Amaketo.”—Fakakiteaga 16:14, 16.
Ko e matakavi ka fakapotopoto e tau matakau ke tau ai kua nakai ko e matakavi mooli. Ko e higoa Amaketo, kua kakano “Mouga ko Mekito.” (Fakakiteaga 16:16, matahui tala NW) Ne nakai fai mouga ne higoa pihia. Mua atu, ko e “tau patuiki he lalolagi, mo e tau kau ha lautolu” to nakai maeke ke fakapotopoto ke he taha e matakavi. (Fakakiteaga 19:19) Ka kua hagaao e “mena,” po ke matakavi, ke he tuaga he tau pule fakapolitika he lalolagi mo e tau tagata ne lalago a lautolu—ko e totoko a ia ki a Iehova mo e ke he “tau kau ha ha he lagi” i lalo hifo he pule he “Patuiki he tau patuiki, mo e Iki he tau iki,” ko Iesu Keriso.—Fakakiteaga 19:14, 16.
Ko e kupu “Amaketo” kua hagaao lahi ke he maaga ha Isaraela i tuai ko Mekito. Ne tu he faahi uta he Mouga ko Karamelu, ko Mekito ko e matapatu halatū he tau fakafuaaga koloa mo e hala he tau kautau he magahala ia. Ko e matakavi foki ne malolō e tau latauaga i ai. Ma e fakatai, ko e matakavi ne “tata age ke he vai i Mekito” ne fakakaumahala ai he Fakafili ko Parako e kau malolō ha Kanana ne pule he Takitaki ko Sisera. (Tau Fakafili 4:12-24; 5:19, 20) He matakavi ia foki, ne fakakaumahala he Fakafili ko Kiteona e tau Mitiana. (Tau Fakafili 7:1-22) He fakatatai a Mekito ke he tauaga hane hau, ne fakamafana mai he Tohi Tapu ki a tautolu to puhala mai he Atua he haana Tama, ke moumou katoatoa e tau kau oti kana ne totoko.
Ko e heigoa e fakahikuaga? To utakehe he tauaga i Amaketo e tau matahavala mo e tau mahani kelea oti kana he lalolagi. To hafagi ai e puhala ma e magaaho mua ue atu e lilifu he tau fakamauaga tuai oti he tagata. (Fakakiteaga 21:1-4) I lalo hifo he takitakiaga fakaalofa he Kautu he Atua, to hiki e lalolagi ke eke mo parataiso ti nonofo muatua ai e tau tagata tututonu.—Salamo 37:29.