Tutuli e Finagalo he Atua he Vahā Nei
“Ne matulei foki a [Keriso] ke hukui aki e tau tagata oti, kia nakai omaoma a lautolu kua momoui kia lautolu ni.”—2 KORINITO 5:15.
1. Talahau e tala he taha misionare ke he kotofaaga haana.
“KO E motokā ha mautolu ne finatu fakamua ke he maaga mamao i Aferika he mole e felakutaki he motu,” he manatu he misionare ne higoa ko Aaron.a “Kua nakai maeke ia mautolu ke matutaki ke he fakapotopotoaga tote i ai, ti kumikumi atu a mautolu ke foaki e lagomatai ke he tau matakainaga. Lafi ke he tau kai, tau mena tui, mo e tau tohi faka-Tohi Tapu, ne uta e mautolu e lagaki he vitiō Jehovah’s Witnesses—The Organization Behind the Name.b Ne tokologa lahi e tagata ne fiafia ne o mai ke kitekite ai he ‘fale kifaga’ he maaga—ko e faleau lahi ti fai VCR mo e televisoni—ati fakakite lagaua ai e mautolu. Ne loga e fakaakoaga Tohi Tapu ne fua mai he tau magaaho takitaha ne fakakite ai. Maaliali ai, ko e tau laliaga oti ha mautolu kua aoga lahi.”
2. (a) Ko e ha ne fifili e tau Kerisiano ke fakaaoga e tau momoui ha lautolu ke he fekafekauaga he Atua? (e) Ko e heigoa e tau hūhū ka fakatutala a tautolu ki ai mogonei?
2 Ko e ha ne taute e Aaron mo e tau kapitiga haana e matafekau uka pihia? Ha kua loto fakaaue ma e lukutoto ha Iesu Keriso, ne tukulele e lautolu e tau momoui ha lautolu ni ke he Atua mo e manako ke fakaaoga ai ke fakatatau atu ke he finagalo Haana. Tuga a lautolu ia, ne fifili he tau Kerisiano tukulele oti ke “nakai omaoma a lautolu kua momoui kia lautolu ni” ka e taute e tau mena ne fahia ki ai ke “eke foki e [lautolu] e mena nai ha ko e vagahau mitaki.” (2 Korinito 5:15; 1 Korinito 9:23) Iloa e lautolu he magaaho ka moumou e fakatokaaga nei, to nakai fai aoga e tau tupe mo e tau tutūaga he lalolagi. Ti he moua e moui mo e malolō tino kua lata, ne manako a lautolu ke fakaaoga e tau momoui ha lautolu ke fakatatau ke he finagalo he Atua. (Fakamatalaaga 12:1) Taute fēfē e tautolu e mena nei? I fe ka moua e tautolu e loto toa mo e malolō kua lata ke taute pihia? Ti ko e heigoa e tau puhala he fekafekauaga kua hafagi ki a tautolu?
Taute e Tau Lakaaga Holo ki Mua mo e Aoga
3. Ko e heigoa e tau matapatu lakaaga ne putoia he taute e finagalo he Atua?
3 Ma e tau Kerisiano mooli, ke taute e finagalo he Atua ko e matagahua tukulagi. Kua mahani ke kamata aki e tau matapatu lakaaga pehēnei tuga he tohi hifo ke hū he Aoga Fekafekau Fakateokarasi, totou e Tohi Tapu he tau aho oti, fakalataha ke he gahua fakamatala, mo e hoko atu ke papatiso. He holo ki mua, kia mauloto e tautolu e tau kupu he aposetolo ko Paulo: “Kia manamanatu a koe ke he tau mena na, kia fakamahani a koe ki ai; kia kitia ai he tau tagata oti hāu a mafiti.” (1 Timoteo 4:15) Ko e holo ki mua ia kua nakai taute ke fakaheke aki e tagata, ka ko e fakakiteaga he fifiliaga ha tautolu ke taute fakamakai e finagalo he Atua. He taute pihia ka fakakite kua fakaatā e tautolu e Atua ke takitaki e tau lakaaga ha tautolu he tau puhala oti he moui, ti kua mua ue atu e mitaki he taute pihia e ia ke he mena ka taute e tautolu.—Salamo 32:8.
4. Tuku kehe fēfē e tautolu e matakutaku teao?
4 Ka e, he tehatehaua po ke manamanatu lahi ni ke he tagata, ka tohotua e holo ki mua ha tautolu he fekafekauaga ke he Atua. (Fakamatalaaga 11:4) Ti, ato moua e tautolu e fiafia mooli he fekafekau ke he Atua mo e falu, liga lata ia tautolu ke kautū fakamua mai he matakutaku ne ha ha ni ia tautolu. Ko Erik, ke fakatai ki ai, ne amaamanaki ke fekafekau he fakapotopotoaga ne vagahau kehe. Ka e tupetupe a ia: ‘To talia nakai e lautolu au? To fiafia nakai au ke he tau matakainaga? To fiafia nakai a lautolu ki a au?’ Ne pehē a ia: “Ne mailoga e au fakamui kua lata au ke manamanatu ke he tau matakainaga nakai ki a au. Ne fifili au ke nakai tupetupe mo e foaki fakamakai e tau mena kua maeke ia au. Ne liogi au ma e lagomatai ti taute ai. Mogonei, kua olioli lahi e au e fekafekauaga haaku i ai.” (Roma 4:20) E, ka fekafekau fakamakai a tautolu ke he Atua mo e falu, to moua e tautolu e fiafia mo e makona.
5. Ko e ha kua lata ke pulega fakamitaki he tutuli e tautolu e finagalo he Atua? Fakamaama.
5 Ke kautū e tutuli he finagalo he Atua kua lata foki ke pulega fakamitaki e tau lakaaga ha tautolu. Kia fakapulotu a tautolu ke kalo kehe he loga e tau kaitalofa ka fakatupa a tautolu ke he fakatokaaga nei mo e fakakaupā e atāina ha tautolu ke taute e gahua he Atua. Ne fakamanatu e Tohi Tapu ki a tautolu: “Ko ia foki ne ogo mena kua eke a ia mo fekafekau kia ia ne ta age hana tau mena kia ia.” (Tau Fakatai 22:7) He falanaki ki a Iehova mo e tuku fakamua e tau mena fakaagaaga ka lagomatai a tautolu ke hagaaki mau ki ai. Ke tuga anei, ko Guoming mo e tau mahakitaga tokoua haana ne nonofo mo e matua fifine ha lautolu he matakavi ne tauuka e tau fale ti kua uka ke moua e gahua tupe. He fakaaoga fakamitaki e tau tupe mo e kaufakalataha ke he tau mena totogi, ne moua e lautolu e tau mena kua lata pete kua nakai gahua tupe oti a lautolu. “Fai magaaho, ne nakai gahua tupe oti a mautolu,” he talahau e Guoming. “Ka e matutaki agaia a mautolu ke he fekafekauaga paionia mo e leveki fakamitaki e matua fifine ha mautolu. Kua loto fakaaue a mautolu he nakai manako a Mami ke tiaki e mautolu e tau tutuliaga fakaagaaga ke maeke ke foaki ki a ia e moui muhukoloa.”—2 Korinito 12:14; Heperu 13:5.
6. Ko e heigoa e tau fakafifitakiaga ne fakakite kua maeke ia tautolu ke fakatatau e tau momoui ke he finagalo he Atua?
6 Kaeke kua putoia lahi a koe ke he tau tutuliaga fakalalolagi—fakatupe po ke falu mena foki—kua liga lata ke taute e tau hikihikiaga lalahi ke tuku fakamua e finagalo he Atua. Kua nakai mafiti e tau hikiaga pihia, ti ka tupetupe he laliaga fakamua haau kua nakai lata ke pehē kua kaumahala tuai. Mailoga a Koichi, ne lahi e magaaho ne fakaaoga ke he fakafiafiaaga. Ne fakaako e Koichi e Tohi Tapu he vahā fuata mui haana, ka e ke he tau tau loga, ne pule he pelē vitiō e moui haana. Taha aho ne pehē a Koichi ki a ia ni: ‘Ko e heigoa haau ne taute? Kua 30 tumā e tau tau moui haau, mo e nakaila fai mena aoga a koe ne taute he haau a moui!’ Ne liu a Koichi fakaako e Tohi Tapu mo e talia e lagomatai mai he fakapotopotoaga. Pete he nakai mafiti e hikiaga haana, ne nakai tiaki e ia. Mo e tau liogi loga mo e lalago fakaalofa mai he falu, ne fakahiku vevehe kehe mai a ia he manako lahi haana. (Luka 11:9) Ko Koichi mogonei kua fiafia he eke mo fekafekau lagomatai.
Ako ke Lagotatai
7. Ko e ha kua lata ia tautolu ke lagotatai he taute e gahua he Atua?
7 He tutuli e finagalo he Atua kua lata mo e laliaga solu katoa ha tautolu. Nakai lata ia tautolu ke fakateaga po ke teva a tautolu he taute e finagalo he Atua. (Heperu 6:11, 12) Pete ia, kua nakai manako a Iehova ke mategūgū a tautolu—fakatino, manamanatuaga, po ke logonaaga. He mailoga kua nakai maeke a tautolu ke taute e gahua he Atua ha ko e malolō ni ha tautolu ka fakaheke atu ki a ia mo e fakakite e lagotatai ha tautolu. (1 Peteru 4:11) Kua mavehe a Iehova ke foaki ki a tautolu e malolō kua lata ke taute aki e finagalo haana, ka e nakai lata ke omoi ne tautolu a tautolu ke molea ue atu e malolō, he lali ke taute e tau mena ne nakai amanaki mai a ia ki a tautolu. (2 Korinito 4:7) Ke fakatumau ke fekafekau ke he Atua mo e nakai mategūgū a tautolu, kua lata mogoia ke fakaaoga fakapulotu e tau malolō ha tautolu.
8. Ko e heigoa ne tupu he lali taha Kerisiano fuata ke foaki katoatoa ki a Iehova mo e ke he lalolagi, ti ko e heigoa e hikiaga ne taute e ia?
8 Ke tuga anei, ne nofo a Ji Hye i Asia Uta, ne ua e tau he gahua ke he gahua ne lahi e peehiaga ka e paionia agaia. “Ne lali au ke foaki katoatoa ki a Iehova mo e ke he lalolagi,” he talahau e ia, “ka kua lima maka ne tulā ne mohe ai au. Fakahiku, ne nakai fai malolō au ne toe ma e kupu mooli, ti temotemoai e fiafia haaku ke he tau mena fakaagaaga.” Ke maeke ke fekafekau ki a Iehova mo e haana ‘loto katoa, agaaga katoa, manatu katoa, mo e malolo katoa,’ ne kumi e Ji Hye e gahua tupe ne tote e peehiaaga. (Mareko 12:30) “Pete he peehi mai e magafaoa haaku ke tutuli e tau tupe loga, ne fakamakamaka au ke tuku fakamua e finagalo he Atua,” he talahau e ia. “Maeke agaia au ke moua e tupe ma e tau mena kua lata, tuga e tau mena tui kua gali. Ti ko e mitaki ha ia ke lahi e mohe! Ne moua e au e fiafia he fekafekauaga haaku, ti hane malolō fakaagaaga au mogonei. Kakano ha kua nakai lahi e matutaki haaku ke he tau mena ne futiaki mo e fakalavelave he lalolagi.”—Fakamatalaaga 4:6; Mataio 6:24, 28-30.
9. Liga lauia fēfē e tau tagata he fonua ha ko e tau laliaga ha tautolu?
9 Nakai maeke he tau tagata oti kana ke fekafekau ke he Atua he eke mo tau tagata fakamatala mau. Kaeke kua lauia a koe ke he vahā fuakau, nakai malolō e tino, po ke falu kukū foki, kia iloa na loto fakaaue mafanatia a Iehova ke he tua fakamooli haau mo e tau fekafekau solu katoa kua maeke ia koe ke foaki. (Luka 21:2, 3) Ko e mena ia, kua nakai lata he taha ia tautolu ke fakateaga ke he fua he tau laliaga ha tautolu ke he falu, pete kua fakakaupā. Ke fakatai ki ai, liga ahiahi a tautolu ke he falu kaina ti nakai fai tagata ne fiafia ke he fekau ha tautolu. He momole a tautolu, to liga loga e tulā po ke tau aho ka tutala e tau tagata he fale ke he ahiahi ha tautolu, pihia foki ka nakai hafagi e gutuhala ki a tautolu! Kua nakai amanaki a tautolu ko e tau tagata oti ne logona e tala mitaki to talia fiafia, ka e to talia he falu. (Mataio 13:19-23) Liga to talia he falu fakamui ka hiki e tau tutūaga he lalolagi po ke he moui ha lautolu. Ke he ha mena ni, he taute e tau mena kua maeke ia tautolu ke he fekafekauaga he fonua, kua taute e tautolu e gahua he Atua. Ko tautolu ko e ‘tau ekegahua he Atua.’—1 Korinito 3:9.
10. Ko e heigoa e tau puhala kua hafagi ke he tau tagata oti he fakapotopotoaga?
10 Lafi ki ai, lata ia tautolu oti ke lagomatai e tau tagata he magafaoa ha tautolu mo e tau matakainaga fakaagaaga. (Kalatia 6:10) Ko e fakaohoohoaga mitaki ha tautolu ke he falu kua maeke ke atihake mo e tukulagi. (Fakamatalaaga 11:1, 6) He magaaho ka taute fakamakutu he tau motua mo e tau fekafekau lagomatai e tau matagahua ha lautolu, kua lafi atu a lautolu ke he malolō mo e mauokafua fakaagaaga he fakapotopotoaga, ti holo ki mua e gahua faka-Kerisiano. Kua fakamooli ki a tautolu ko e magaaho ka “fakamakai nakai noa ke he gahua he Iki,” to “nakai noa mo e fua” e gahua ha tautolu.—1 Korinito 15:58.
Tutuli e Finagalo he Atua mo Feua
11. He nakai ni gahua mo e fakapotopotoaga he matakavi, ko e heigoa falu puhala ka liga moua e tautolu?
11 Ko e tau Kerisiano, kua olioli e tautolu e moui, ti manako a tautolu ke fakaheke e Atua ke he tau mena oti ne taute e tautolu. (1 Korinito 10:31) He magaaho kua tua fakamooli a tautolu he fakamatala e tala mitaki he Kautu mo e fakaako e falu ke omaoma ke he tau mena oti ne poaki e Iesu, to moua e tautolu e tau puhala fua mitaki he fekafekauaga kua hafagi ki a tautolu. (Mataio 24:14; 28:19, 20) He nakai ni gahua mo e fakapotopotoaga he matakavi, kua liga ha ha ia tautolu e tau puhala ke fekafekau he tau matakavi ne manako lagomatai lahi, ke he taha fonua, vagahau, po ke motu foki. Ko e tau motua mo e tau fekafekau lagomatai kua lata ne nakaila fai hoana ka liga uiina ke o atu ke he Aoga Fakaako Fekafekau, ti fekafekau he magaaho fakamui ke he tau fakapotopotoaga ne manako ma e lagomatai he tau Kerisiano kua motua, ke he tau motu ni ha lautolu po ke taha motu kehe. Ko e tau hoa mau he fekafekauaga mau ka liga moua e fakaakoaga misionare i Kiliata ti fekafekau ke he kotofaaga he motu kehe. Ti kua manako tumau foki ma e tau tagata gahua foaki noa ke taute e tau matagahua kehekehe he Peteli mo e tā po ke leveki e tau fale ma e tau feleveiaaga mo e tau lā ofisa.
12, 13. (a) Maeke fēfē a koe ke fifili ha e fe e tau puhala ke tutuli he fekafekauaga? (e) Talahau e puhala kua maeke he tau mena iloa mai he taha kotofaaga ke fakaaoga ke he taha kotofaaga foki.
12 Ha e fe e tau puhala he fekafekauaga kua lata ia koe ke tutuli? Ko e fekafekau tukulele ha Iehova, kia onoono tumau ki a ia mo e fakatokatokaaga haana ma e takitakiaga. To lagomatai he “[a]gaga mitaki” haana a koe ke taute e fifiliaga kua hako. (Nehemia 9:20) Kua takitaki atu taha kotofaaga ke he taha, ti ko e tau mena iloa mo e makutu ki ai he fekafekauaga fakamua kua liga maeke ke fakaaoga fakamui ke he taha kotofaaga foki.
13 Ke tuga anei, ko Dennis mo e hoana haana, ko Jenny, ne lalago tumau e tau matagahua talaga he Fale he Kautu. He mole e tō e Afā ko Katrina ke he faahi toga he tau Faahi Kaufakalataha, ne foaki noa e laua a laua ke foaki e lagomatai. Ne talahau e Dennis: “He fakaaoga e tau makaka ne moua e maua he talaga e tau Fale he Kautu ke lagomatai aki e tau matakainaga ha tautolu nukua tamai e fiafia lahi ki a maua. Ko e loto fakaaue ne fakakite e lautolu ne lagomatai e maua kua aamotia mooli. Ko e laulahi he falu matakau lagomatai kua nakai kautū he liu talaga e tau fale. Ko e Tau Fakamoli a Iehova kua fitā he fakafoou po ke liu tā e tau kaina ke molea e 5,300 mo e loga foki e tau Fale he Kautu. Ne kitia he tau tagata e mena nei ti fakakite e fiafia lahi ke he fekau ha tautolu.”
14. Ko e heigoa ka taute e koe kaeke kua manako a koe ke tutuli e fekafekauaga mau?
14 Maeke nakai a koe ke tutuli e finagalo he Atua he fifili e fekafekauaga mau ke eke mo feua haau? Kaeke ke pihia, kia mauokafua to moua e koe e tau monuina loga. Kaeke kua nakai maeke he tuaga haau mogonei, liga lata ke taute e hikiaga. Kia liogi tuga ne taute e Nehemia he magaaho ne manako a ia ke taute taha kotofaaga aoga: “Ko e Iki [Iehova] na e, . . . fakamonuina mai a e koe hau a fekafekau.” (Nehemia 1:11) Ti, he falanaki ke he “[F]anogonogo liogi,” kia muitua ke he ole haau he gahua fakatatau ki ai. (Salamo 65:2) Ke fakamonuina e Iehova e tau laliaga haau ke fekafekau katoatoa ki a ia, lata a koe ke taute fakamua e tau laliaga ia. He fifili a koe ke taute e fekafekauaga mau, kia tapiki ke he fifiliaga ia. He fai magaaho he mole, to tupu e iloilo haau, mo e holo ki mua e fiafia haau.
Ko e Moui Fai Kakano Mooli
15. (a) Kua aoga fēfē a tautolu he tutala mo e totou hagaao ke he tau tagata ne kua leva e fekafekau ke he Atua? (e) Talahau e tala mooli he moui ne kua moua e koe ke lahi e atihake.
15 Ko e heigoa e tau fua ne amanaki a koe ki ai he tutuli e finagalo he Atua? Kia tutala ke he tau fekafekau kua leva ha Iehova, mahomo atu ki a lautolu ne loga e tau tau he fekafekau mau. Kua monuina mo e kakano lahi ha e tau momoui ha lautolu! (Tau Fakatai 10:22) To tala atu e lautolu ki a koe kua nakai kaumahala a Iehova ke lagomatai a lautolu ti pihia foki he tau tutūaga uka ke moua e tau mena kua manako mooli e lautolu mo e loga atu foki. (Filipi 4:11-13) Mai he 1955 ke he 1961, ne lomi he The Watchtower e tau tala mooli ha lautolu ne tua fakamooli i lalo he mataulu “Tutuli e Kakano Haaku he Moui.” Tali mai he magaaho ia, kua totou teau foki e falu tala mooli nukua lolomi. Ko e tau tala mooli takitaha ia kua fakaohooho e agaaga makutu mo e fiafia ti fakamanatu ki a tautolu e tau fakamauaga pihia i loto he Tohi Tapu he tohi ha Gahua. He totou e tau tala fiafia pihia ka omoi a tautolu ke talahau, ‘Ko e puhala moui haia ne manako au ki ai!’
16. Ko e heigoa ne taute e moui he Kerisiano ke fai kakano mo e fiafia?
16 Ko Aaron ne totoku i luga, ne liu manatu: “I Aferika, ne fa feleveia au mo e tau tagata fuata nukua o fano he motu ke kumi e kakano he moui. Laulahi ne nakai moua ai. Ka ko tautolu hanei, hane tutuli e finagalo he Atua he fakamatala e tala mitaki he Kautu, mo e olioli e tautolu e moui kua paleko mo e fai kakano. Kua iloa fakamua e tautolu kua mua e monuina ke foaki atu, ke he monuina ke talia mai.”—Gahua 20:35.
17. Ko e ha kua lata a tautolu ke tutuli e finagalo he Atua mogonei?
17 Ka e kua a koe? Ko e amaamanakiaga fe haau ne fa e tutuli? Ka nakai maaliali e foliaga fakaagaaga haau, to tutupu mafiti mai falu a tutuliaga ke fakapuke aki e manako ia. Ko e moumou mohā e moui uho haau ke he lalolagi fakatupua he fakatokaaga ha Satani? Nakai leva anoiha, he magaaho ka hoko mai e ‘matematekelea lahi,’ to nakai aoga e tau koloa he tino mo e tau tutūaga fakalalolagi. Ka e to aoga ni e fakafetuiaga ha tautolu mo Iehova. To fakaaue lahi mahaki a tautolu ha kua fekafekau ke he Atua mo e falu ti tutuli katoatoa e finagalo Haana ke he tau momoui ha tautolu!—Mataio 24:21; Fakakiteaga 7:14, 15.
[Tau Matahui Tala]
a Kua hiki falu higoa.
b Ne taute fakailoa he Tau Fakamoli a Iehova.
Maeke Nakai a Koe ke Fakamaama?
• Fēfē e logonaaga a Iehova hagaao ke he fekafekauaga ha tautolu ki a ia?
• Maeke fēfē he puhala aoga mo e lagotatai ke lagomatai a tautolu ke fekafekau ke he Atua mo e falu?
• Ko e heigoa e tau puhala fekafekau kua hafagi ki a tautolu?
• Maeke fēfē ia tautolu ke takitaki e moui fai kakano mooli mogonei?