Kumi Totokaaga Mai he Fakaatukehe he Fuata

Ne talahau e Eusebio Morcillo

Ia Sepetema 1993, ne aahi atu au ke he fale puipui ne tokoluga lahi mahaki e puipuiaga. Ko e magaaho haia ne papatiso e pagotā, ko e mahakitaga tote haaku ko Mariví. Ko e falu pagotā mo e tau tagata gahua ne kitekite fakalilifu he taute e au e papatisoaga. Ato fakamaama e au e kakano ne ha ha i ai a maua, fakaatā au ke fakamaama e vahā ikiiki ha maua.

NE FANAU au i Sepania ia Me 5, 1954, ko e uluaki he tau tama tokovalu. Ko Mariví e tama ke toluaki. Ne feaki he tupuna fifine a mautolu ko e tau Katolika malolō lahi, ti ha ha ia au e tau manamanatuaga fiafia he vahā tote ha ko e logonaaga fakamooli ke he Atua he nofo au mo e tupuna fifine. Ka ko e takatakaiaga he kaina he tau matua haaku kua nakai fai tuaga fakaagaaga. Ne keli tumau he Matua Taane e Matua Fifine mo mautolu ko e tau tama. Ne nonofo matakutaku a mautolu, ti hokulo e mamahi haaku he kitia e Matua Fifine ne matematekelea.

He aoga, ne fehagai foki au mo e tau tuaga fakamomoko. Taha he tau faiaoga, ko e akoako, ne fakaoka e tau ulu ha mautolu ke he kaupā kaeke ke hepe e tali ke he hūhū. Taha akoako ne fakapilo ke he mahani fakataane mo e fifine e tau tama aoga he taute e tau gahua aoga he kaina mo lautolu. Lafi ki ai, ko e tau fakaakoaga Katolika pihia tuga e afi helo ne fakagogoa mo e fakamatakutaku ki a au. Nakai leva ti lolelole e fakamooli haaku ke he Atua.

Putoia he Moui Nakai Fai Kakano

He nakai fai takitakiaga fakaagaaga, ne kamata au ke fio mo e tau tagata mahani feuaki mo e vale ke he tau koliaga. Ne fa tutupu ai e tau latau, ke he tau titipi, tau filifili, tau kalase, mo e tau situlu ne fakaaoga mo tau kanavaakau. Pete he nakai fakalataha katoatoa au ke he latau, he taha magaaho ne pakia kelea au ti nakai ofoofo.

Fakahiku ne fiu au he takatakaiaga ia ti kumi atu foki au ke he taha koliaga nakai miha lahi. Ke he tau matakavi ia foki, ne fakaaoga tumau e tau tulaki. He nakai foaki ki a au e fiafia mo e mafola he manamanatuaga, ka kua fakagoagoa mo e fakaatukehe he tau tulaki au.

Pete he nakai fiafia au, ne fakataki e au taha he tau tehina ikiiki haaku, ko José Luis, mo e kapitiga tata, ko Miguel, ke he puhala moui pihia. Fakalataha mo e falu fuata tokologa i Sepania he magahala ia, ne putoia a mautolu he lalolagi kolokolovao. Ne taute e au ha mena ke moua aki e tau tupe ma e tau tulaki. Ne galo oti e lilifu fakatagata haaku.

Laveaki Mai a Iehova

He magaaho nei, ne loga e magaaho ne tutala au mo e tau kapitiga haaku hagaao ke he fai Atua mo e kakano he moui. Ne kamata au ke kumi e Atua he kumi tagata ke talahau e tau logonaaga haaku ki ai. Ne mailoga e au a Francisco, ko e taha he tau kapitiga gahua haaku, ne kehe mai he falu. Ne tuga ke fiafia, mahani fakamooli, mo e totonu a ia, ti fifili e au ke tala age e tau manatu galo haaku ki a ia. Ko Francisco ko e taha he Tau Fakamoli a Iehova, ti mai e ia e fufuta he The Watchtower ne ha ha i ai e vala tala ke he tau tulaki.

He mole e totou e vala tala, ne liogi au ke he Atua ma e lagomatai: “Iki na e, iloa e au na moui a koe, ti manako au ke iloa a koe mo e taute e finagalo haau. Fakamolemole lagomatai au!” Ko Francisco mo e falu Fakamoli ne fakaaoga e Tohi Tapu ke fakamalolō au mo e mai ki a au e tau tohi ne fakavē ke he Tohi Tapu ke totou. Ne mailoga e au kua foaki mai ai ki a au e lagomatai ne ole au mai he Atua. Nakai leva ti kamata au ke tutala ke he tau kapitiga haaku mo José Luis ke he tau mena ne ako e au.

Taha aho ne toka e au e konesete roko (rock) mo e tau kapitiga haaku, ne vevehe kehe au mai he matakau. Ne onoono au ki a lautolu tuga ko e tagata tū kehe, ti matala ki a au ko e fakalialia ha ia e mahani ia ha mautolu ki a au ha ko e fakaohoohoaga he tau tulaki. He magaaho ia, ne fifili au ke tiaki e puhala moui ia ti eke mo taha he Tau Fakamoli a Iehova.

Ne ole au ki a Francisco ma e Tohi Tapu, ti taha ne mai e ia ki a au mo e tohi Ko e Kupu Mooli ke Takitaki Atu ai ke he Moui Tukulagi.a He magaaho ne totou au ke he maveheaga he Atua to holoholo kehe e tau hihina mata oti mo e ke utakehe foki e mate, ne nakai fakauaua au kua moua e au e kupu mooli ne maeke ke fakatokanoa e tau tagata. (Ioane 8:32; Fakakiteaga 21:4) Fakamui, ne fano au ke he feleveiaaga he Fale he Kautu he Tau Fakamoli a Iehova. Ko e fakakapitiga mo e mafanatia ne moua e au kua nava lahi au ki ai.

He amaamanaki lahi ke talahau ke he falu e iloaaga haaku he Fale he Kautu, ne fakapotopoto agataha e au a José Luis mo e tau kapitiga haaku mo e tala age ki a lautolu e tau mena oti ne hoko. Fai aho he mole, kua ō oti a mautolu ke he feleveiaaga. Taha e tama fifine ne nofo he atu i mua ia mautolu ne fakahela ki a mautolu. Ne ofomate mooli a ia he kitia e matakau nei ne loloa e tau ulu, ti fakaeneene a ia ke nakai liu haga mai foki. Kua liga ofo lahi a ia he liliu a mautolu ke he Fale he Kautu he tapu hake, kua tui a mautolu mogonei he tau peleue fakataha mo e fihui (suit) mo e tau futiua.

Nakai leva he mole, ne o atu foki au mo Miguel ke he toloaga he takaiaga he Tau Fakamoli a Iehova. Ne nakai la kitia ia e maua ha mena kua pihia fakamua—ko e fakamatakainaga mooli he tau tagata he tau momoui kehekehe. Ti matakehe ai, ne taute e toloaga he fale taha ia ne ō a mautolu ke he konesete roko. Ka ko e takatakaiaga mo e leo kofe he magaaho nei ne logona e maua kua fakamalagaki e tau agaaga ha maua.

Ne kamata e matakau katoa ha mautolu ke fakaako e Tohi Tapu. Kavi ke he valu e mahina fakamui, ia Iulai 26, 1974, ne papatiso au mo Miguel. Ne 20 e tau tau ha maua he moui. Tokofā foki he matakau ha mautolu ne papatiso he tau mahina gahoa fakamui. Ko e fakamahani he Tohi tapu ne moua e au ne fakalagalaga au ke kamata ke lagomatai e matua fifine haaku ne leva e matematekelea ke he tau gahua kaina mo e ke talahau ki a ia e tua foou haaku ne moua. Ne tata lahi a maua. Ne lahi foki e magaaho haaku ne foaki ke lagomatai e lafu ikiiki haaku.

Nakai leva, ti fakaako foki e matua fifine haaku mo e tau lafu haaku e kupu mooli he Tohi Tapu ti papatiso ko e Tau Fakamoli a Iehova, ka e taha ni he lafu ne nakai fakaako. He 1977, ne mau e au a Soledad. Ko e tama fifine tote ne ofomate he magaaho ne kitia e ia a mautolu he aahi atu fakamua ke he Fale he Kautu. Fai mahina gahoa he mole, ne paionia tokoua a maua, ne fakahigoa he Tau Fakamoli a Iehova ko e tau tagata fakamatala mau he tala mitaki.

Kua Magalo Mai Taha Fakahele

Ko e mahakitaga tote haaku ko Mariví ne ekefakakelea ke he mahani fakataane mo e fifine he magaaho ne tote ai, ti ko e feakiaga kelea ia ne lauia lahi haana logonaaga. Ko e fuata mui, ne taute e ia e puhala moui kelea ne putoia e tau tulaki, kaihā, mo e fakataka. He 23 e tau tau moui, ne tuku a ia he fale puipui, nukua matutaki a ia ke he moui mahani kelea haana.

He magahala ia, ne eke au mo leveki takaiaga, ko e fekafekau faifano he Tau Fakamoli a Iehova. He 1989, ne kotofa a Soledad mo au ke he matakavi ne haia a Mariví ke he fale puipui. Ne nakai la leva e uta he tau pule fakatufono e tama taane haana ia ia; nukua fakaatukehe lahi a ia, mo e nakai manako ke moui. Taha aho ne aahi atu au ki a ia mo e fakahāhā ke fakaako a maua ke he Tohi Tapu, ti talia ai e ia. He mole e taha mahina he fakaako, ne oti e fakaaoga tulaki mo e tapaka haana. Ne fiafia lahi au ke kitia kua foaki e Iehova e malolō ki a Mariví ke taute e tau hikihikiaga nei he moui haana.—Heperu 4:12.

Nakai leva he mole e kamata fakaako ha Mariví, ne kamata ai ke talahau e tau kupu mooli he Tohi Tapu ke he tau kapitiga pagotā haana mo e tau tagata gahua he fale puipui. Pete he hiki mai a ia he taha fale puipui ke he taha fale puipui, ne matutaki a ia ke he gahua fakamatala haana. He taha fale puipui ne fakamatala a ia he taha poko ke he taha poko. Fai tau he mole, ne kamata e Mariví e tau fakaakoaga Tohi Tapu mo e tau pagotā tokologa he tau fale puipui kehekehe.

Taha aho ne tala mai a Mariví ki a au hagaao ke he manako haana ke tukulele e moui haana ki a Iehova mo e ke papatiso. Ka e nakai foaki age ki a ia e fakaatāaga ke toka e fale puipui, po ke fakaatā ha tagata ke o atu ki loto ke papatiso a ia. Ne fakauka a ia ke fā foki e tau he takatakaiaga matahavala he fale puipui ia. Ko e heigoa ne lagomatai a ia ke fakatumau e tua haana? He magaaho tonu ne taute he fakapotopotoaga he matakavi e feleveiaaga, ne liu a ia fakamanatu e fakaholoaga taha ia he poko he fale puipui. Ne taute foki e ia e fakaholoaga fakaako fakatagata tumau he Tohi Tapu mo e liogi.

Nakai leva, ne hiki atu a Mariví ke he fale puipui ne tokoluga lahi mahaki e puipuiaga ne fai pa koukou. Ne logona hifo e ia ko e tau tuaga foou nei ne liga maeke a ia ke papatiso. Ti mooli ni, ne foaki e fakaatāaga ki a Mariví. Ti ko e mena ia ne ha ha ai au mo ia ke taute e lauga papatiso haana. Kua fakalataha au mo ia he magaaho uho lahi he moui haana.

Ha ko e fua he moui fakamua haana, ne moua e Mariví e AIDS. Ka e, ko e mahani mitaki haana ne maeke a ia ke fakatoka mai tuai he fale puipui ia Mati 1994. Ne nofo a ia i kaina mo e Matua Fifine ti moui ko e Kerisiano gahuahua ato mate a ia he ua e tau he mole.

Kautū Mai he Tau Logonaaga Moumou

Nakai hao katoatoa foki au he tau fua he moui tuai haaku. Ko e matematekelea he ekefakakelea mai he matua taane haaku ti pihia mo e puhala moui he fuata mui ne lauia e aga haaku. He moui fuata haaku, ne fa lauia e tau logonaaga he agahala mo e tote e lilifu fakatagata haaku. He falu magaaho ne fakaatukehe lahi mahaki au. Ka e, nakai oti e lagomatai he Kupu he Atua ki a au ke totoko atu ke he tau logonaaga kelea nei. He manamanatu fakahokulo tumau ke he tau kupu tohi tuga ia Isaia 1:18 mo Salamo 103:8-13 ke he tau tau loga ne lagomatai au ke tamate e tau logonaaga agahala ne tupu hake ia au.

Ko e liogi taha kanavaaku fakaagaaga ne fakaaoga e au ke fakakautū e tau logonaaga he manamanatu fakateaga. Ne fa puke e tau mata haaku he tau hihina mata ka liogi ki a Iehova. Ka ko e tau kupu ne fakamau ia 1 Ioane 3:19, 20 ne fakamalolō au: “Ko e mena foki ia ke iloa ai e tautolu kua fakamoli a tautolu; to iloa tonuhia foki e tau loto ha tautolu ki mua hana. Ha ko e mena kaeke kua fakahala mai he tau loto ha tautolu kia tautolu, kua mua e Atua ke he tau loto ha tautolu, kua fioia foki e ia e tau mena oti kana.”

Tali mai he ole fakamooli au ke he Atua mo e loto “malipilipi mo e pehia,” ne mailoga e au kua nakai kelea lahi au tuga he manatu ai ke he taha vahā. Kua fakamafana mai he Tohi Tapu ki a lautolu oti ne kumi ki a Iehova kua nakai tiaki e ia a lautolu ne tokihala mooli ke he tau mahani tuai ha lautolu mo e hahaga atu ke taute e finagalo haana.—Salamo 51:17.

Ha magaaho ka tupu hake e tau logonaaga fakauaua haaku, ne lali au ke fakapuke e manamanatuaga aki e tau manatu atihake, ko e tau mena fakaagaaga ne totoku mai ia Filipi 4:8. Kua ako manatu e au e Salamo 23 mo e Lauga he Mouga. Ka tupu mai e tau logonaaga kelea he manamanatuaga haaku, ne fakamanatu e au ki a au e tau faahi kupu nei he Tohi Tapu. Ko e fakameāaga nei he manamanatuaga kua lagomatai lahi ke he tau pō ne mohe alafia.

Ko e taha punaaga lagomatai ko e navaaga ne moua e au mai he hoana haaku mo e falu Kerisiano momotua. Pete he magaaho fakamua ne uka au ke talia e tau kupu atihake ha lautolu, kua lagomatai he Tohi Tapu au ke maama e fakaalofa “kua talia e tau mena oti.” (1 Korinito 13:7) Ti mooli, kua ako fakahaga e au ke talia fakatokolalo e tau lolelole mo e tau kūkū haaku.

Ke he faahi mitaki, ko e tau taufetului haaku ni ke he tau logonaaga kelea kua lagomatai au ke eke mo leveki faifano loto fakaalofa. Kua teitei 30 tuai e tau ne igatia fakaaoga he hoana haaku mo au ko e tau fekafekau gahua mau he tala mitaki. Ko e olioli ne moua e au he lagomatai e falu kua lagomatai au ke tuku ki tua e tau logonaaga mo e tau manamanatuaga kelea he tau mena fakalialia ne tupu ki a au.

Ne liu au mogonei ke haga ki tua mo e fakaata e tau monuina oti a Iehova ne liligi ki luga haaku, kua fakalagalaga au ke talahau tuga e salamo: “Kia fakamonu atu kia Iehova, . . . ko ia kua fakamagalo hāu a tau mahani hepehepe oti, ko ia kua fakamaulu hāu a tau gagao oti kana; ko ia kua laveaki hāu a moui mai he tukuaga; ko ia kua fakafoufou a koe ke he fakaalofa mo e fakaalofa hofihofi.”—Salamo 103:1-4.

[Matahui Tala]

[Blurb he lau 30]

Ne fa lauia au he tau logonaaga he agahala mo e tote e lilifu fakatagata haaku. Ka kua lagomatai lahi mahaki he Kupu he Atua au ke totoko atu ke he tau logonaaga kelea nei

[Tau Fakatino he lau 27]

Ne mumuitua he haaku a tehina ko José Luis mo e kapitiga ko Miguel e fakafifitakiaga mitaki mo e kelea haaku

[Fakatino he lau 28, 29]

Ko e magafaoa ha Morcillo he 1973

[Fakatino he lau 29]

Ko Mariví ko e pagotā he fale puipui

[Fakatino he lau 30]

Mo e hoana haaku, ko Soledad