Fakatata Atu ke he Atua
Maama e Ia e Mamahi ha Tautolu
“KO E logonaaga mamahi haau kua ha he loto haaku.” Pihia e puhala ne fakamaama he fuakau misionare he Tau Fakamoli a Iehova e mahani uho nei. Ko Iehova ko e Atua e fakafifitakiaga mua ue atu he fai logonaaga. Ne fai logonaaga a ia ke he mamahi ne matematekelea he tau tagata haana. Iloa fēfē e tautolu e mena ia? Kua moua e talahauaga mitaki katoatoa he logonaaga hofihofi mitaki ue atu ha Iehova ke he tau kupu mo e tau gahua ha Iesu he magaaho ne nofo a ia he lalolagi. (Ioane 5:19) Ma e fakatai, manamanatu ke he mena ne tupu ne fakamaama ia Ioane 11:33-35.
He magaaho ne mate fakalutukia e kapitiga ha Iesu ko Lasalo, ne gutu atu a Iesu ke he maaga ha Lasalo. Maama ai, ne maanu lahi e lafu mahakitaga ha Lasalo, ko Maria mo Mareta. Ne ofania lahi e Iesu e magafaoa nei. (Ioane 11:5) To tali atu fēfē a ia? Ne pehē e tala: “Ti kua fioia e Iesu a [Maria] ha ne tagi, mo e tau tagata Iutaia, ne o mai mo ia, ha ne tagi hake, ati mamahi ai hana finagalo, mo e fakaatukehe. Ati pehe age ai, Ko e fe ne tuku ai e mutolu a ia? Kua pehe age a lautolu kia ia, Ko e Iki na e, haele mai a koe ke kitia. Kua tagi a Iesu.” (Ioane 11:33-35) Ko e ha ne tagi ai a Iesu? Mooli, ko e kapitiga uho haana ko Lasalo kua mate a ia, ka e amanaki a Iesu mogonei ke liu fakatū mai a ia. (Ioane 11:41-44) Fai mena foki kia ne lauia e tau logonaaga a Iesu?
Liu ke onoono foki ke he tau kupu ne fatiaki i luga. Mailoga he magaaho ne kitia e Iesu a Maria mo lautolu hane tagi mo ia, ne “mamahi” mo e “fakaatukehe” a ia. Ko e tau kupu he vagahau fakamua ne fakaaoga he mena nei kua fakakite e tau fatuakiloto hokulo.a Ne lauia hokulo a Iesu mo e mena ne kitia e ia. Ko e tau logonaaga malolō lahi i loto haana ne mailoga ai ha kua puke haana tau mata ke he tau hihina mata. Maaliali ai, ne lauia e loto a Iesu he mamahi he falu. Kua tagi nakai a koe ha kua tagi e tagata ne ofania e koe?—Roma 12:15.
Ko e logonaaga ha Iesu kua foaki ki a tautolu e iloaaga uho ke he tau mahani mo e tau aga he haana Matua, ko Iehova. Mailoga kua fakaata mitaki katoatoa e Iesu e tau mahani he Matua haana ati pehē a ia: “Ko ia kua kitia au, kua kitia foki e ia e Matua.” (Ioane 14:9) Ti ka totou e tautolu “ne tagi a Iesu,” kua iloa tonu e tautolu kua fai logonaaga a Iehova ke he mamahi he tau tagata tapuaki haana. Mooli, ko e falu tagata tohia Tohi Tapu ne fakamooli e mena nei. (Isaia 63:9; Sakaria 2:8) Kua fakaalofa hofihofi mooli e Atua ko Iehova!
Kua futiaki e fai logonaaga. Ka lolelole a tautolu po ke tupetupe, kua fakatata atu a tautolu ke he matakainaga ne maama e tau tuaga ha tautolu mo e logona e mamahi ha tautolu. Ko e mitaki lahi ha ia ha tautolu ke fakatata atu ki a Iehova, ko e Atua fakaalofa hofihofi noa ne logona e mamahi ha tautolu mo e maama e kakano he tau hihina mata ha tautolu!—Salamo 56:8.
[Matahui Tala]
a Ko e kupu Heleni nukua talahau “ne tagi” kua fa hagaao ke he “momoko fakaeneene,” ka e he fakaaoga e tau kupu ke fakamaama aki e momoko ha Maria mo e falu kua liga fakakite “ko e momoko fakaleo lahi, ko e tagitātuki.”