Ne Manako a Ia ke Lagomatai

KUA fai tagata gagao lahi nakai a koe ne iloa?— Ne manako nakai a koe ke taute taha mena ke lagomatai a ia?— Ka e kua kaeke ko ia ko e tagata mai he motu kehe po ke he lotu kehe? Liga manako agaia nakai a koe ke lagomatai e tagata ia ke malolō?— Ne taute pihia he tama fifine tote ne nofo i Isaraela he teitei 3,000 e tau tau kua mole. O mai la ke tutala ke he mena ne tupu he vahā ia.

Ne fa latau e motu Isaraela i tuai, ko e matakavi ne nofo ai e tama fifine tote, mo e motu ne tata mai ko Suria. (1 Tau Patuiki 22:1) Ne hoko ke he taha aho ti o mai e tau Suria ki Isaraela ti fofō e tama fifine tote. Ne uta a ia ki Suria, ti eke ai mo fekafekau he hoana ha Naamanu, ko e takitaki kau Suria. Ne matematekelea lahi a Naamanu he gagao lepela, ko e gagao ne lauia e tau vala kakano he tagata ti maeke ke mokulu kehekehe.

Ne tala age e tama fifine fekafekau ke he hoana ha Naamanu e puhala kua maeke e taane haana ke maulu e gagao. Ne pehē a ia: ‘Ane mai kua fakalataha a Naamanu i Samaria mo e perofeta ha Iehova ko Elisaio, po kua fakamalolo e Elisaio hana lepela.’ Ko e puhala ne tutala e tama fifine fekafekau hagaao ki a Elisaio ati omoi a Naamanu ke talitonu kua maeke mooli e perofeta ke fakamalolō a ia. Ti, he moua e fakaatāaga mai ia Penihata, ko e patuiki ha Suria, ne o atu a Naamanu mo e falu fekafekau he fenoga loa ne kavi ke he 150 e kilomita ke kumi ia Elisaio.

Fakamua, ne o atu a lautolu ki a Iehoramo, ko e patuiki ha Isaraela. Ne fakakite age e lautolu e tohi he Patuiki ko Penihata ne ole lagomatai ma Naamanu. Ka kua nakai tua a Iehoramo ki a Iehova po ke perofeta ko Elisaio. Ne piko a Iehoramo ko e fia tau a Penihata mo ia. He magaho ne iloa e Elisaio e mena nei ne tupu, ne tala age a ia ke he Patuiki ko Iehoramo: “Kia hau a ia kia au.” Ne manako a Elisaio ke fakakite ko e malolō he Atua ka fakamalolō a Naamanu he gagao kelea haana.—2 Tau Patuiki 5:1-8.

He magaaho ne hoko a Naamanu ke he fale ha Elisaio mo e tau solofanua mo e haana tau nofoa fakataveli, ne fakafano atu e Elisaio e fekafekau ke tala age ki a ia: ‘Kia fano a a koe, ti koukou lagafitu a koe i Ioritana, ti fakamaulu ai a koe.’ Ne ita a Naamanu. Ne amanaki a ia ke hau a Elisaio ki fafo mo e alo ai haana lima ki luga he lepela ti galo ai. Ka ko e fekafekau nei ni ne kitia e ia! Ti tafilu a Naamanu mo e ita lahi ai ti kamata ke liu ki kaina.—2 Tau Patuiki 5:9-12.

Ko e heigoa haau ka taute ane mai ko koe taha he tau fekafekau ha Naamanu?— Ne ole e tau fekafekau haana ki a ia: ‘Kane vagahau atu e perofeta kia koe ke he mena uka, nakai kia eke ai e koe? Ti nakai kia au atu he eke ai e koe, ha kua pehe atu a ia kia koe—kia koukou a ti mea ai a koe?’ Ne fanogonogo a Naamanu ki a lautolu. Ne “hifo a ia, kua uku lagafitu a ia i Ioritana . . . ti liu mai ai hana tino tuai tuga ne tino he tama tote.”

Ne liu atu a Naamanu ki a Elisaio mo e pehē: “Kitiala, kua iloa nai e au kua nakai fai [A]tua ke he lalolagi oti ni, ka kua ha i ai a ia i Isaraela ni.” Ne mavehe a ia ki a Elisaio to nakai liu a ia ke ‘eke ha poa huhunu po ke taha poa ke he tau atua kehe, ka ko Iehova ni.’—2 Tau Patuiki 5:13-17.

Kua manako nakai a koe ke lagomatai taha tagata ke ako hagaao ki a Iehova mo e hagaao ke he tau mena kua maeke ia ia ke taute, tuga ne taute he tama fifine tote?— He nofo tino tagata a Iesu he lalolagi, ne tua e tagata lepela ki a ia ti pehē: ‘Ka finagalo a koe ke lagomatai au, kua maeke ia koe.’ Iloa nakai e koe e tali ha Iesu?— “Na loto au.” Ti fakamaulu e Iesu a ia, tuga he fakamaulu e Iehova a Naamanu.—Mataio 8:2, 3.

Iloa nakai e koe hagaao ke he lalolagi foou ka taute e Iehova ti nonofo ai e tau tagata oti ka tino malolō mo e maeke ke momoui tukulagi?— (2 Peteru 3:13; Fakakiteaga 21:3, 4) Mooli ni to manako a koe ke tala age ke he falu hagaao ke he tau mena homo ue atu nei!