Lagomatai e Tama Haau ke Fahia Mai he Maanu

KE HE fale koloa tohi ne apiapi, ne hea atu e matua fifine ne hogohogo manava ke he tagata fakafua koloa: “Ne puke e fale koloa haau he tau tohi ka e ai fai ke lagomatai aki e tama haaku!” Ne kumi takitakiaga e matua fifine ke lagomatai aki e tama taane tote haana ke fehagai mo e mate fakaofo he taha tagata tata he magafaoa.

Kua hako e kakano ne tupetupe e matua fifine nei. Kua fakatupetupe mooli ke he tama tote ke fehagai mo e tuaga he mate! Ne tupu olaola e tau fanau i lalo hifo he levekiaga he magafaoa ha lautolu, ka kua maeke he mate ke utakehe e fakahele ne kua tata e fakafetuiaga mo e tama tote. Ko e matua mogoia, maeke fēfē ia koe ke lagomatai e tama haau he magaaho ka teitei mate po kua mate taha tagata?

Mooli, he fehagai mo e mate he fakahele, kua liga taufetului a koe ke fahia ke he tau logonaaga ni haau; liga hogohogo manava mo e okaoka. Pete ia, kia nakai nimo e koe kua lata foki e tama haau ke moua e lalagoaga. “Ne fa logona valavala he tau tama e tau fakatutalaaga ti ka toka ni ke manamanatu ne lautolu, ne nakai katoatoa po ke nakai hako tumau e tau iloaaga,” he talahau he tohi ne tufa he fale leveki tagata gagao i Minnesota, U.S.A. Ne lafi foki: “Kua lata e tau fanau ke tala age e tau vala tala hako.” Ti kua pulotu ke fakamaama e tau mena hako ke he tau fanau ha mutolu, fakatatau ke he lotomatala ha lautolu. Kua paleko e mena nei, ha kua liga kehekehe lahi e tau lotomatala ha lautolu ke iloa e mena ne tupu.—1 Korinito 13:11.

Puhala ke Fakamaama e Mate

Kua pehē falu tagata kumikumi ka tutala ke he tama tote hagaao ke he mate, kua lata e tau matua ke fakaeneene he fakaaoga e tau kupu tuga e “mohe,” “galo,” po ke “kua fano.” Ko e fakaaoga e tau kupu pihia ka e nakai fakamaama to liga fakagogoa e tama tote. Mooli, ne fakaaoga e Iesu e kupu mohe ke fakatai aki e mate ti kua lautonu ai. Ka e manatu, ne nakai ko e tutala a ia ke he tau fanau. Lafi ai, ne fakamaama e ia e fakataiaga. Ne tala age a Iesu ke he tau tutaki haana: “Kua mohe tuai ha tautolu a kapitiga ko Lasalo.” Ko e tau tutaki, pete ko e tau tagata lalahi a lautolu ne “piko na lautolu ko e mena vagahau a [Iesu] ke he takoto mo e mohe.” Ne fakamaama e Iesu e matakupu: “Kua mate tuai a Lasalo.” (Ioane 11:11-14) Ka lata e tau tagata lalahi ke moua e tau fakamaamaaga maaliali pihia, nakai kia au atu ai ke iloa foki he tau fanau ha tautolu!

“To liga lali e matua ke fakaaoga e tau kupu ne nakai fakaofoofo ka fakamaama e mate ke he tama haana,” he talahau he tagata tohia ko Mary Ann Emswiler mo James P. Emswiler, “he taute pihia, kua liga tō tuai e ia e falu manatu ne nakai iloa he tama he magaaho fakamua ti liga fakamatakutaku po ke fakahagahaga kelea e tau mena ia.” Tuga anei, he tala age hokoia ke he tama tote kua mohe e fakahele ne mate, to fakatupu he mena nei e matakutaku ke he tama he pehē ka fano a ia ke mohe he pō, to liga nakai liu a ia ke ala. Ka tala age hokoia “kua fano,” to logona hifo he tama tote kua liga fakavihia po kua tiaki a ia.

Ka lali ke fakamaama e mate ke he tama tote, kua mailoga he tau matua kua maama he tau tama e tau kupu mukamuka ne talahau fakahako ke he mate ka e nakai ko e tau fakatai po ke tau kupu fehikitaki. (1 Korinito 14:9) Kua fakamalolō he tau tagata kumikumi a koe ke fakamafana e koe e tama haau ke hūhū e tau hūhū mo e tutala hagaao ke he tau tupetupe haana. Ko e tutala tumau ka liga lagomatai a koe ke fakamaama ke he tau mena ne nakai maama mo e maeke ke fakakite falu puhala ke lagomatai e tama haau.

Ko e Punaaga he Takitakiaga Mauokafua

He magahala mauku, to onoono e tama haau ki a koe ma e takitakiaga, lalagoaga, mo e tau tali. Moua e koe mogoia i fe e tau vala tala hako hagaao ke he matakupu he mate? Tokologa e tagata ne mailoga ko e Tohi Tapu e punaaga hako he fakamafanaaga mo e amaamanakiaga. Kua foaki mai e tau vala tala mooli ke he kamataaga he mate, ko e tuaga he tau tagata mamate, mo e amaamanakiaga ma lautolu ne mamate. Ko e tala mooli, “ko lautolu ne mamate nakai iloa e lautolu ha mena,” kua lata ke lagomatai e tama haau ke mailoga kua nakai fakamatematekelea a tau fakahele ne kua mamate. (Fakamatalaaga 9:5) Lafi ki ai, i loto he Tohi Tapu, kua foaki he Atua e amaamanakiaga to liu a tautolu ke kitia e tau fakahele ha tautolu ne mamate ke he lalolagi parataiso.—Ioane 5:28, 29.

He fuluhi ke he tau Tohiaga Tapu, maeke ia koe ke lagomatai e tama haau ke fakaako kua foaki mai he Tohi Tapu e takitakiaga mauokafua mo e mafanatia he tau tuaga fakaatukehe oti. He magaaho taha, to kitia he tama haau ko koe e matua kua falanaki ke he Kupu he Atua ma e takitakiaga he tau matakupu aoga he moui.—Tau Fakatai 22:6; 2 Timoteo 3:15.

Kua Tali e Tau Hūhū Haau

He lagomatai e tama haau ke fehagai mo e mauku, to liga feleveia a koe mo e tau tuaga ne nakai iloa mitaki e koe. Ko e heigoa haau ka taute?a Kia fakatutala a tautolu ke he falu hūhū aga mau ne liga tupu mai.

• Lata nakai au ke ufiufi e maanu haaku mai he tama haaku? Ko e aga pauaki ke manako ke puipui e tama haau. Ka kua hepe kia ke kitia he tama haau a koe hane momoko? Tokologa e matua ne mailoga kua mitaki lahi mahaki ke fakakite fakamooli e momoko ha lautolu, ti fakakite ke he tama ha lautolu na lata ke momoko. Ne fakatutala falu mo e tau fanau ha lautolu ke he tau fakataiaga he Tohi Tapu he tau tagata ne momoko i mua he falu. Ma e fakatai, ne tagi a Iesu he mate e kapitiga fakahele haana ko Lasalo. Ne nakai fufū e Iesu e tau logonaaga haana.—Ioane 11:35.

• Lata nakai e tama tote haaku ke fina atu ke he tau fakalatahaaga he fale mate po ke tanuaga po ke he lauga fakamanatu? Kaeke ke fina atu e tama, liga mitaki ke fakamaama tuai ki a ia e tau mena ka tutupu, putoia e kakano ati taute ai e fakamanatuaga ia. Mooli, he falu tuaga, kua liga fifili e tau matua kua fai kakano mitaki ma e tau fanau ha lautolu ke nakai o atu katoa po ke he taha vala he mauku. Ko e tau fanau ka fakalataha atu ke he fakamanatuaga he mauku ne taute he Tau Fakamoli a Iehova to liga aoga mai he lauga kua fakavē ke he Tohi Tapu. Lafi ki ai, ko e “fakafeheleaki” mo e fakaalofa ne kitia ia lautolu ne fakalataha atu kua eke mo kakano lahi mo e mafanatia, pihia foki ke he tama.—Roma 12:10, 15; Ioane 13:34, 35.

• Lata nakai au ke tutala ke he tama haaku hagaao ke he fakahele ne mate? Pehē falu tagata kumikumi ka kalo katoatoa a koe mai he matakupu nei, to liga manatu hehē e tama haau kua fai mena a koe ne fufū hagaao ki a ia ne mate po kua lali a koe ke tatafi kehe katoatoa e tau manatu ki a ia. Ne talahau he tagata tohia ko Julia Rathkey: “Kua aoga lahi ke lagomatai e tau tama ke fakaako ke tumau ke iloa manatu ai ka e nakai matakutaku.” He atāina ke tutala hagaao ke he tagata ne mate, putoia e talahau e tau puhala mitaki he aga mo e moui haana, to liga lagomatai ke fahia mai he maanu. Fakamafana he tau matua Kerisiano e tau tama ha lautolu aki e amaamanakiaga he Tohi Tapu ke he liu tu mai ke he lalolagi parataiso, ka nakai fai gagao mo e mate.—Fakakiteaga 21:4.

• Lagomatai fēfē e au e tama haaku ka momoko a ia? He maanu, kua liga logona he tama haau e tau matematekelea ke he tino, liga kua gagao. Liga ita po ke tupetupe e tama he logonaaga nakai fahia mo e hogohogomanava. Kia nakai ofo kaeke kua lauia e manamanatuaga he tama haau mo e pipiki fakatata tumau ni ki a koe, po ke hopoate ka mule a koe he hau ki kaina po ke ka gagao. Fakatotoka fēfē e koe e fakaatukehe he tama haau? Kua nakai lata e tama haau ke logona hifo kua nakai mailoga e koe kua fai lekua. Ti mitaki ke hagaaki mo e matakaki e tuaga. Ua lali ke manatu hehē po ke fakateaga e lahi he lauiaaga ne kua logona he tama haau ha ko e mate. Fakamafana tumau, mo e fakamalolō ke talahau e tau hūhū mo e hafagi e matutakiaga. Maeke ia koe ke fakamalolō e amaamanakiaga he tama haau—mo e haau foki—‘ha ko e fakamafanatia mai he tau Tohi.’—Roma 15:4.

• Magaaho fe ka lata au ke liu matutaki e tau fakaholoaga fakamagafaoa mo e falu matagahua? Fakatumau ke he loga he tau fakaholoaga, he talahau he tau tagata pulotu. Ko e fakatumau ke taute e tau fakaholoaga atihake kua talahau ko e puhala lauia mitaki ke fehagai mo e maanu. Ke he Tau Fakamoli a Iehova, tokologa e matua ne mailoga ko e fakatumau ke taute e tau fakaholoaga fakaagaaga mitaki, ne putoia e fakaako Tohi Tapu tumau he magafaoa mo e o ke he tau feleveiaaga Kerisiano, kua maeke ke fakalagotatai mo e fakamalolō e magafaoa.—Teutaronome 6:4-9; Heperu 10:24, 25.

Ato hoko e magaaho ke tamai e Iehova ko e Atua e fakaotiaga ke he gagao mo e mate, to tumau ni e tau fanau ke feleveia mo e matematekelea he mate. (Isaia 25:8) Pete ia, ko e fakamafanaaga mo e lalagoaga mitaki, to maeke ke lagomatai e tau tama ke fahia katoatoa mai he mate he fakahele.

[Matahui Tala]

[Blurb he lau 19]

Fakamafana e koe e tama haau ke hūhū e tau hūhū mo e tutala hagaao ke he tau tupetupe haana

[Fakatino he lau 20]

Fakatumau mo e tau fakaholoaga fa mahani, putoia e fakaako Tohi Tapu he magafaoa haau