Feaki e Tau Amanakiaga Fakalatalata, mo e Kia Olioli

“LIU tuai au kaumahala foki!” Kua lagafiha e talahau e koe e taha mena pihia ha kua nakai hokotia ke taute e mena kua amanaki a koe ki ai? Liga talahau he taha matua fifine Kerisiano e tau manatu pihia ha kua kapaletū a ia he leveki tumau he mukemuke fanau foou haana mo e hogohogo manava he nakai maeke ke hagaaki fakalahi ke he tau mena fakaagaaga. Ko e taha Kerisiano kua liga logona hifo e kaupāaga ha ko e feakiaga haana ti manatu kua nakai lahi e gahua haana ma e fakapotopotoaga. Ko e Fakamoli ne motua ne liga nakai fiafia ha kua nakai maeke ke fakalataha katoatoa ke he tau gahua faka-Kerisiano ne olioli e ia he magaaho ne malolō mo e makaukau ai. “Ko e lauga ke fakamalolō ke taute e gahua paionia ne fa fakamomoko au,” ne talahau e Christiane, ne mataofi a ia ha ko e tuaga magafaoa haana ti nakai maeke ke lahi e gahua ka taute tuga he manako a ia ke taute he fekafekauaga a Iehova.

Maeke fēfē ia tautolu ke fehagai mo e tau logonaaga pihia? Kua maeke fēfē e falu Kerisiano ke feaki e onoonoaga mooli ke he tau tuaga ha lautolu? Ko e heigoa e tau fua mitaki he lagotatai e tau amanakiaga?

Kia Fakalatalata

Kua foaki mai he aposetolo ko Paulo e matapatu kakano ke fakatumau e olioli ha tautolu he pehē a ia: “Kia fiafia a mutolu ke he Iki, aua neke noa; to liu foki tala atu e au, kia fiafia a mutolu. Kia iloa ha mutolu a mahani totonu [po ke fakalatalata] he tau tagata oti kana; kua tata mai tuai e Iki.” (Filipi 4:4, 5) Ke moua e olioli mo e fiafia he fekafekauaga ha tautolu ke he Atua, kua lata ia tautolu ke feaki e tau amanakiaga fakalatalata he manamanatu ke he tau lotomatala mo e tau tuaga ha tautolu ni. Ka fakamakamaka a tautolu ke he tau foliaga lalahi pete he uka e puhala ke moua aki, to mole teao e tau malolō ha tautolu. Ke he taha faahi, kua lata ia tautolu ke fakaeneene neke fakateaga lahi, ti eke e tau mena ne fakakaupā a tautolu mo piu ki ai ha kua lolelole hifo lahi e fekafekauaga faka-Kerisiano.

Ko e heigoa ni e tau tuaga ha tautolu, kua manako a Iehova ke tuku age ki a ia e tau mena mitaki lahi mahaki—ko e fekafekauaga foaki katoa mo e loto katoa ha tautolu. (Kolo. 3:23, 24) Kaeke ke tuku age fakatote e tautolu ki a Iehova e tau mena mitaki lahi ha tautolu, kua nakai fakamooli ke he tukuleleaga ha tautolu ki a ia. (Roma 12:1) Ke lafi ai, to nakai moua e tautolu e fiafia lahi, olioli mooli, mo e falu monuina ke maukoloa ai ne moua he fekafekauaga foaki katoa.—Fakatai 10:22.

Ko e kupu “totonu” i loto he Tohi Tapu kua kakano ke manamanatu. Ko e kakano mooli ko e “fakatokatoka atu.” (Iako. 3:17) Kua kakano foki e kupu ke nakai fakakikili lahi mahaki. Ka fakalatalata mogoia a tautolu, to maeke ke lagotatai e onoonoaga ke he tau tuaga ha tautolu. Uka kia e mena ia ke taute? Ma e falu ē, pete he liga maeke ia lautolu ke manamanatu ke he falu. Ke fakatai, kaeke ke kitia e kapitiga tata kua lolelole fakahaga ha kua fakamakamaka ke he tau mena loga, to nakai kia lali a tautolu ke lagomatai a ia ke kitia e pulotu he taute e falu hikihikiaga he moui haana? Tatai ai, kua lata ia tautolu ke ako ke kitia e tau fakamailoga ne liga tala mai ki a tautolu kua molea tuai e fakamakamaka ha tautolu.—Fakatai 11:17.

Ke moua e onoonoaga fakalatalata ke he tau kaupāaga ha tautolu kua maeke ke paleko lahi kaeke kua feaki he tau matua fakakikili lahi. Ne manatu falu he tau vahā ikiiki kua lata tumau a lautolu ke lahi po ke mitaki atu e mena ka taute ke fiafia e tau matua ki a lautolu. Kaeke kua pihia a tautolu, liga kua hepe e manatu ha tautolu hagaao ke he onoonoaga ha Iehova ki a tautolu. Kua fakaalofa a Iehova ki a tautolu ha ko e puhala ne fekafekau loto katoa a tautolu ki a ia. Kua fakamalolō mai he Kupu he Atua ki a tautolu ko Iehova kua “fioia e ia e mena ne eke aki a tautolu; kua manatu e ia ko e kelekele ni a tautolu nai.” (Sala. 103:14) Iloa e ia e tau kaupāaga ha tautolu ti ofania a tautolu ka fekafekau fakamakutu ki a ia pete he tau mena ia. He manatu ko e Atua ha tautolu ne nakai ko e iki gahua uliulitonu, ka lagomatai a tautolu ke fakalatalata ke he tau mena kua amanaki mai ia tautolu, he mailoga e tau kaupāaga ha tautolu ni.—Mika 6:8.

Pete ia, kua uka falu ke feaki e aga fakalatalata pihia. Kaeke ke pihia a koe, ko e ha he kumi lagomatai ke he Kerisiano lotomatala ne iloa lahi a koe? (Fakatai 27:9) Ma e fakatai, manako nakai a koe ke gahua ko e paionia tumau? Ko e foliaga mitaki lahi mahaki a ia! Kua uka kia a koe ke hokotia ki ai? Liga lata a koe ke moua e lagomatai ke fakamukamuka e moui haau. Liga tutala atu e kapitiga Kerisiano ne falanaki a koe ki ai po kua lata nakai e foliaga ia mo koe ke paionia tumau mogonei he onoono ke he tau matagahua loga haau he magafaoa. Liga maeke ia ia ke lagomatai a koe ke kitia to fahia nakai a koe ke taute e tau gahua lafi ki luga po ke tau hikihikiaga kua liga maeke ia koe ke taute ke fakaatā a koe ke fakalahi atu e gahua. Kua mitaki foki ma e taane ke lagomatai e hoana haana ke kumi e fakaholoaga ne felauaki mo e hoana. Ke tuga anei, liga pulega a ia ke moua taha okioki ato kamata e mahina foou he tau gahua kua fakalahi atu. Liga maeke e mena nei ke fakalahi e malolō tino he hoana mo e lagomatai a ia ke fakatumau e olioli haana he fekafekauaga.

Kumi e Tau Mena kua Maeke ia Koe ke Taute

Kua liga fakakaupā he motua e tino po ke lolelole e malolō tino a koe mai he taute e tau mena kua manako ki ai he fekafekauaga ha Iehova. Kaeke ko e matua a koe, liga manatu a koe kua tote e fua mitaki ne moua mai e koe he fakaako fakatagata po ke tau feleveiaaga Kerisiano ha kua lahi e magaho mo e malolō haau ne fakaaoga ke he tau fanau ikiiki. Pete ia, kua eke kia e hagaaki katoatoa ke he tau fakakaupāaga haau he falu magaaho ke liga taofi a koe mai he onoono ke he tau mena ne kua maeke agaia ia koe ke taute?

He afe e tau tau kua mole, ne talahau he taha tagata Levi e manako ne nakai maeke ia ia ke taute. Ne moua e ia e kotofaaga pauaki ke fekafekau he faituga ke ua e faahi tapu he tau tau takitaha. Ka kua talahau fakaleo lahi e ia e manako haana ke nofo fakatata tumau ke he fatapoa. (Sala. 84:1-3) Ko e heigoa ne lagomatai e tagata tua fakamooli nei ke fiafia? Ne mailoga e ia, pete ni he taha e aho ka ha ha he lotopā he faituga ko e kotofaaga kua mua ue atu a ia. (Sala. 84:4, 5, 10) Tatai ai, he nakai takele he tau kaupāaga ni ha tautolu, kua lata ke lali ke mailoga mo e loto fakaaue ke he tau kotofaaga ne kua maeke ia tautolu ke taute.

Manamanatu la ke he fakafifitakiaga ha Nerlande, ko e matakainaga fifine Kerisiano i Kanatā. Ne nofo ni a ia he nofoa fakataveli ti logona hifo kua fakakaupā lahi mahaki e mena haana kua maeke ke taute he fekafekauaga. Pete ia, ne hiki e ia e manamanatuaga haana he onoono ke he tau fale koloa ne tata mai ko e matakavi fakamatala fakatagata ma haana. Ne fakamaama e ia: “Ne nofo au he nofoa fakataveli haaku tata ke he nofoa he tau fale koloa. Ne olioli au he fakamatala ke he tau tagata ne o mai nonofo ai ke okioki fakakū.” He taute e fekafekauaga uho nei ke he puhala ia, ne lahi e fiafia ne moua e Nerlande.

Taute e Tau Hikiaga kua Lata

Liga kua holo mafiti e toga taulā he uulo he matagi e tau lā. Pete ia, ka fehagai e ikivaka ne fakaholo e toga mo e matagi malolō, kua latatonu ni a ia ke hikihiki e tau lā he toga. Ne nakai pule a ia ke he matagi malolō, ka e he taute e tau hikihikiaga, to liga fakatumau a ia ke fakahakohako e toga taulā haana. Ke he puhala pihia foki, ne nakai pule a tautolu ke he tau tuaga ne fa tuga e matagi malolō ne feleveia mo tautolu he moui. Ka e maeke ia tautolu ke hagaaki tumau ke he moui ha tautolu he hiki e puhala ne fakaaoga aki e tau malolō, manamanatuaga, mo e tau logonaaga ha tautolu. Kaeke ke manamanatu a tautolu ke he tau tuaga foou ha tautolu, to lagomatai ki a tautolu ke fakatumau e fiafia mo e olioli he fekafekauaga he Atua.—Fakatai 11:2.

Manamanatu ke he falu fakataiaga. Ka tote e malolō ha tautolu, liga hagahaga mitaki ke nakai taute tuai e tau gahua mamafa he kamataaga he aho ke maeke ia tautolu ke malolō ke fina atu he feleveiaaga Kerisiano he magaaho afiafi. To fakaatā he mena nei a tautolu ke aoga katoatoa mai he lafi mo e tau matakainaga Kerisiano ha tautolu. Po ke liga nakai maeke e matua fifine ke fakalataha ke he fekafekauaga he taha fale ke he taha fale ha kua gagao e tama haana, liga mitaki ke uiina e matakainaga fifine Kerisiano ke he kaina haana ke fakamatala he telefoni ka mohe e tama.

Ka e kua ka nakai fakaatā he tau tuaga haau a koe ke fakaako tuai e tau mena oti ka fakatutala he tau feleveiaaga fakapotopotoaga? Maeke ia koe ke fifili e lahi he mena kua maeke ia koe ke tauteute ti fakaako fakamitaki ki ai. He hiki e tau foliaga ha tautolu, kua maeke ai ke tumau e malolō mo e fiafia.

Ke hiki e tau foliaga ha tautolu, kua lata ke eketaha mo e lali ki ai. Ko Serge mo Agnès, ko e hoa mau i Falani, ne lahi e hikiaga ne taute ke he tau fakatokatokaaga ha laua. “He iloa e maua kua fai tama a Agnès, ne galo noa e amaamanakiaga ha maua ke eke mo tau misionare,” he talahau e Serge. Ko Serge mogonei ko e matua taane he ua e tama fifine hakahakau, ne fakamaama e ia e puhala ne fakatokatoka e laua e foliaga ko e hoa mau. Ne pehē a ia: “Ha kua nakai maeke ke fekafekau he falu motu, ne mauokafua a maua ke eke mo ‘tau misionare’ he motu ni ha maua. Ne fakalataha atu a maua ke he matakau vagahau kehe.” Aoga nakai ki a laua he taute e foliaga foou nei? Ne talahau e Serge: “Ne logona e maua e aoga lahi ha maua he fakapotopotoaga.”

Ko Odile, ko e matakainaga fifine Kerisiano i Falani he tau atu tau 70 he moui ne matematekelea he moua he gugu e tau tuli hui, ti nakai maeke ke leva e tū. Ne fakalolelole ki a ia ha ko e tau lekua malolō tino ti mataofi a ia nakai maeke ke fakalataha ke he fekafekauaga he taha fale ke he taha fale. Pete ia, ne nakai tiaki e ia. Ne hiki e ia e tau gahua haana he fakalataha ke he fakamatala he telefoni. Pehē a ia: “Ne mukamuka mo e fiafia lahi au ki ai, nakai tuga he manatu e au!” Ko e puhala fakamatala nei ati liuaki mai e fiafia haana ke he fekafekauaga.

Tamai he Tau Amanakiaga Fakalatalata e Tau Monuina

Ko e feaki e onoonoaga lagotatai ke he tau mena kua fahia a tautolu ke taute ka puipui a tautolu mai he tau tupetupe loga. He fakatokatoka e tau foliaga lagotatai, to moua e tautolu e logonaaga fiafia pete ne tau fakakaupāaga ha tautolu. Ko e mena ia kua olioli a tautolu ke he tau mena kua maeke ia tautolu ke taute, pete he tote e mena ka maeke.—Kala. 6:4.

He feaki e tautolu e aga lagotatai ke he tau mena kua amanaki a tautolu ke taute, to manamanatu fakalahi ke he tau matakainaga Kerisiano ha tautolu. He iloa e tau mena ne fakakaupā a lautolu ki ai, to loto fakaaue tumau a tautolu ke he tau mena kua maeke ia lautolu ke taute ma tautolu. He fakakite e loto fakaaue ma e ha lagomatai kua foaki mai, kua lafi a tautolu ke he agaaga kaufakalataha mo e fetaliaaki. (1 Pete. 3:8) Manatu, ha ko e Matua fakaalofa, ne nakai fakaai a Iehova ke ole ke he mena kua nakai fahia ia tautolu ke foaki. Ka ha ha ia tautolu mogoia e amaamanakiaga lagotatai mo e fakatokatoka e tau foliaga ne maeke ke moua, to tamai he tau gahua fakaagaaga ha tautolu e fiafia mo e olioli ki a tautolu.

[Blurb he lau 29]

Ke olioli mo e fiafia e fekafekauaga ha tautolu ke he Atua, kua lata ke feaki e tau amanakiaga fakalatalata he manamanatu ke he tau lotomatala mo e tau tuaga ha tautolu ni

[Fakatino he lau 30]

Fiafia a Nerlande he taute e mena kua fahia a ia ki ai he fekafekauaga

[Fakatino he lau 31]

Ako ke “hikihiki e tau lā”

[Credit Line]

© Wave Royalty Free/age fotostock

[Fakatino he lau 32]

Ko Serge mo Agnès ne aoga mai he fakatokatoka e tau foliaga foou