Kautūaga i Kiliata ke 124 Aki

Kua Fakatatai e Tau Misionare ke he Tau Hē Akerisi

KE HE tau mahina ono oti, ne taute he Aoga Tohi Tapu a Kiliata he Kolo Toko e polokalama he kautūaga ne uiina e magafaoa katoa he Peteli he Faahi Kaufakalataha ki ai. Ia Mati 8, 2008, ne hohoko mai e tau tagata uiina he molea e 30 e motu ke fakalataha mo e magafaoa Peteli ma e fakaholoaga he kautūaga he vahega ke 124 aki he Aoga Kiliata. Ne fiafia a lautolu oti ne toko 6,411 ne fakalataha atu mo e tau tagata fakaako he aho pauaki ha lautolu.

Ko e tagata nofoa he polokalama ko Stephen Lett he Kau Fakatufono, ne hafagi aki e lauga ne mataulu “O Fakalataha mo e Tau Hē Akerisi Fakatai a Iehova.” Kua fakatatai he Fakakiteaga 9:1-4 e matakau tote he tau Kerisiano fakauku ne liu malolō fakaagaaga he 1919 ke he tau hē akerisi ne kamata agataha ke gahua malolō. Ne fakamanatu ke he tau tagata fakaako ko lautolu ko e ‘tau mamoe kehe,’ ne kua fakalataha atu a lautolu ke he tau hē akerisi fakatai nei.—Ioane 10:16.

Ko Lon Schilling, ne mai he La Komiti he Faahi Kaufakalataha, kua taute foki taha lauga “Kia Felagomataiaki.” Ne fakavē ke he fakafifitakiaga he Tohi Tapu ki a Akula mo Pisila, ko e hoa mau he senetenari fakamua. (Roma 16:3, 4) Ne toko 28 e hoa mau he vahega Kiliata. Ne fakamanatu ki a lautolu ke maeke ai ke kautū ko e tau misionare, kua lata ia lautolu ke fakatumau ke fakamalolō e pipiaga he fakamauaga ha lautolu. Ne nakai hagaao e Tohi Tapu ki a Akula tokotaha ka e tohi fakalataha tumau mo e hoana haana ko Pisila. Ko e mena ia, ne onoono e aposetolo ko Paulo mo e fakapotopotoaga ki a laua ko e hoa. Kua lata foki he tau hoa mau ne misionare he vahā nei ke gahua tokoua, tapuaki tokoua, mo e fehagai tokoua ke he tau paleko pauaki he motu kehe ne kotofa ki ai, mo e felagomataiaki.—Kene. 2:18.

Ne mui mai e lauga ne mataulu “Tali Atu ke he Mitaki a Iehova,” ne taute e Guy Pierce mai he Kau Fakatufono. Ne fakamaama he Matakainaga Pierce e kakano he mitaki ke nakai ni kalo kehe mai he taute mena kelea. Kua taute he tagata mitaki e tau mena mitaki ke aoga ai e falu. Ne mua ue atu e mitaki ha Iehova ko e Atua. (Saka. 9:16, 17) Kua fakalagalaga he mitaki mo e fakaalofa he Atua e tau loto ha tautolu ke taute e tau mena mitaki ma e falu. He atihake e tau tagata fakaako, ne fakahiku he Matakainaga Pierce, he pehē: “Hane taute e mutolu e tau mena mitaki. Kua mauokafua a mautolu to matutaki a mutolu ke tali atu ke he mitaki he Atua he taute e tau mena mitaki ke he ha kotofaaga i mua ka atu e Iehova ko e Atua ki a mutolu.”

Matutaki atu, ko Michael Burnett, ko e misionare he magaaho fakamua ne kotofa foou ke eke mo faiaoga i Kiliata, ne taute e lauga ne mataulu “Tui Ai ke Eke mo Foupāpā ke he Vahāloto he Tau Mata ha Mutolu.” Ke tuga kua tui a lautolu he “foupāpā” ke he vahāloto he tau mata ha lautolu, kua lata he tau Isaraela ke manatu e fakahaoaga fakamana mai i Aikupito ne taute e Iehova ma lautolu. (Esoto 13:16) Ne tomatoma ke he tau tagata fakaako ke manatu e tau fakaakoaga loga ne moua e lautolu he Aoga Kiliata ke tuga kua tui e lautolu e foupāpā ke he vahāloto he tau mata ha lautolu. Ne fakamalolō he Matakainaga Burnett e latatonu ke mahani molū mo e fakatokolalo mo e fakagahua e tau matapatu fakaakoaga he Tohi Tapu ka fakatotoka e tau fekehekeheaki he tau matakainaga misionare ni mo e falu.—Mata. 5:23, 24.

Ko Mark Noumair, ko e faiaoga kua leva i Kiliata, ne taute e lauga “Ko e Heigoa e Lologo ka Uhu Hagaao ki a Mutolu?” He tau vahā i tuai, ko e aga fakamotu ke fakamanatu e tau kautūaga he felakutaki aki e tau lologo. Taha he tau lologo ia ne fakakite e magafaoa ha Reupena, Tano, mo Asera he gahua fakatevateva, ka e fakaheke ke he magafaoa ha Sepulona he aga foaki noa. (Fakafili 5:16-18) Tuga e tau kupu he lologo, kua iloa fakahaga he falu e tau gahua he tau Kerisiano takitaha. Ko e fakamakutu he tagata ma e gahua he Atua mo e fakauka fakamooli ke he fakatokatokaaga fakateokarasi ka atihake e tuaga mitaki mo Iehova ti eke mo fakafifitakiaga mitaki ke he tau matakainaga haana. He fanogonogo falu i loto he fakapotopotoaga ke he lologo fakatai ne tohi po ke kitia ke he tau mahani ha tautolu, kua fakalagalaga a lautolu ke mumuitua ke he fakafifitakiaga mitaki ia.

Ko e vala he fakamahaniaga ha lautolu i Kiliata, ne fakaoga he vahega ke 124 aki kavi ke he 3,000 tulā he katoa ke he gahua fakamatala. I lalo he matakupu “Muitua e Takitakiaga he Agaaga Tapu,” ne talahau he tau tagata fakaako ki a Sam Roberson he Faahi he Tau Aoga Fakateokarasi e tau mena loga ne tutupu ki a lautolu he gahua he fonua, ti liu fakataitai e falu mena ia. He mole e talahau e tau mena tutupu atihake nei ne hūhū tala a Patrick LaFranca he La Komiti he Faahi Kaufakalataha ki a lautolu kua fitā e kautū mai i Kiliata hane fekafekau mogonei he tau motu kehekehe. Ne loto fakaaue e tau tagata fakaako ke he tau fakatonuaga aoga ne moua mai e lautolu he tau matakainaga nei.

Ko Anthony Morris he Kau Fakatufono ne taute e lauga fakahiku, “Manatu, kua Mole Vave e Tau Mena Hane Kitia.” Kua tomatoma he tau Tohiaga Tapu ki a tautolu ke hagaaki ke he tau monuina anoiha mai ia Iehova ka e nakai ke he tau matematekelea mole vave ne liga moua e tautolu mogonei. (2 Kori. 4:16-18) Ko e hagahaga kelea he nofogati, nakai fakafili tonu, pehiaaga, gagao, mo e mate ko e tau mena tutupu mooli ne kitia e tautolu oti he vahā nei. Liga fehagai e tau misionare mo e falu tuaga matematekelea nei. Ka ko e manatu kua mole vave e tau mena nei ka lagomatai a tautolu ke lagotatai fakaagaaga tumau mo e fai amaamanakiaga.

Ne fakahiku e polokalama he nonofo mai i luga a lautolu oti ne kautū ke fanogonogo ke he tau manatu fakahiku he Matakainaga Lett. Ne fakamafana e ia a lautolu ke tumau ki ai mo e pehē: “Kua nakai fai mena ke moumou aki e mahani fakamooli ha tautolu kaeke ko Iehova he faahi ha tautolu.” Ne fakamalolō e ia e tau misionare foou ke tuga e tau hē akerisi, he eketaha fakamalolō ke he fekafekauaga ha Iehova mo e tumau tukulagi ke fakamakutu, fakamooli, mo e omaoma.

[Puha he lau 30]

TAU NUMERA HE VAHEGA

Numera he tau motu ne fakalataha: 7

Numera he tau motu ne kotofa ki ai: 16

Katoa he numera he tau tagata fakaako: 56

Evalesi he tau tau moui: 33.8

Evalesi he tau tau i loto he kupu mooli: 18.2

Evalesi he tau tau he fekafekauaga mau: 13.8

[Fakatino he lau 31]

Vahega ke 124 aki kua Kautū he Aoga Tohi Tapu a Kiliata he Kolo Toko

Ko e tau higoa i lalo, kua mai he laini i mua ki tua, mo e mai he faahi hema ke he faahi matau he tau laini takitaha.

(1) Nicholson, T.; Main, H.; Senge, Y.; Snape, L.; Vanegas, C.; PouL. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L.(5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Fakatino he lau 32]

Haia e Aoga Kiliata he Watchtower Educational Center