Fakatumau e Onoonoaga Faka-Tohi Tapu ke he Leveki Malolō Tino

“Kia fakaalofa atu foki a koe ke he Iki hāu a Atua . . . mo e hāu a manatu katoa mo e hāu a malolo katoa.”—MARE. 12:30.

1. Ko e heigoa e finagalo fakamua he Atua ma e tau tagata?

KO E finagalo fakamua a Iehova ko e Atua ma e tau mena momoui ko e tau tagata ke nakai lauia he gagao mo e mate. Ne tuku a Atamu mo Eva he katene ko Etena, po ke parataiso fiafia, “ke gahua ai mo e leoleo ai,” he nakai ni ke 70 po ke 80 e tau, ka ke tukumalagi. (Kene. 2:8, 15; Sala. 90:10) Kaeke ke tumau e tua fakamooli he hoa fakamua ki a Iehova mo e omaoma fakamakutu ke he pule katoatoa haana, to nakai moua e laua e gagao, lolelole, mo e mate.

2, 3. (a) Fakamaama fēfē e vahā fuakau he tohi ha Fakamatalaaga? (e) Ko hai ne lago ki ai e mate faka-Atamu, mo e to vevete fēfē e tau lauiaaga he mate?

² Ne fakamaama he Fakamatalaaga veveheaga 12 e fakatino maaliali he “tau aho kelea” ne fakalataha ke he vahā fuakau ne tutupu ke he tau tagata nakai mitaki katoatoa. (Totou Fakamatalaaga 12:1-7.) Kua fakatatai e uluhina ke he ‘akau sikati.’ Kua fakatai e tau hui ke he “tau tagata malolo” ne mapelupelu mo e vivivivi mogonei. Ko e tau fifine ne ō ke he fakamaama ke kumi e maama ka kua pouli, ko e fakataiaga latatonu ma e tau mata kua pouli fakahaga. Ha kua mokulu e falu nifo, kua “nakai tuai gahua e tau tagata holo saito he tokogahoa a lautolu.”

³ Ko e tau hui vivivivi, tau mata kua pouli, mo e tau meamea nakai fai nifo ne nakai ko e finagalo fakamua he Atua ma e tau tagata. Mua atu, ko e mate ne moua mai ia Atamu ko e taha he “tau gahua he [T]iapolo” to vevete he Tama he Atua puhala he Kautu faka-Mesia haana. Ne tohia he aposetolo ko Ioane: “Ko e mena ia ne fakakite mai ai e Tama he Atua, kia moumou e ia e tau gahua he [T]iapolo.”—1 Ioa. 3:8.

Lata Pauaki e Manamanatu Fakalatalata

4. Ko e ha kua manamanatu fakalatalata e tau fekafekau ha Iehova hagaao ke he malolō tino ha lautolu, ka ko e heigoa ne mailoga e lautolu?

⁴ He magaaho nei, kua fehagai falu he tau fekafekau ha Iehova mo e tau lekua he gagao mo e fuakau ne aga mau ke he tau tagata agahala. Ko e manamanatu fakalatalata hagaao ke he malolō tino ha tautolu he tau tutūaga pihia ko e aga pauaki mo e aoga lahi foki. Nakai kia manako a tautolu ke fekafekau ki a Iehova ‘mo e ha tautolu a malolo katoa’? (Mare. 12:30) He lali ke tumau e malolō tino, kua lata ia tautolu ke kitia mitaki mo e mailoga kua tote lahi e mena ka taute e tautolu ke fakamanou hifo e fuakau po ke kalo he tau gagao oti kana.

5. Ko e heigoa e fakaakoaga kua moua e tautolu he puhala ne fehagai e tau fekafekau tua fakamooli he Atua mo e gagao?

⁵ Tokologa e tau fekafekau tua fakamooli ha Iehova ne fahia mai he tau lekua malolō tino. Ko Epaferoti e taha ia lautolu nei. (Filipi 2:25-27) Ko Timoteo ko e hoa fakamooli he aposetolo ko Paulo ne fa mamahi e manava ati tomatoma e Paulo ke “inu fakatote ke he uaina.” (1 Timo. 5:23) Ne fehagai a Paulo mo e “mahukihuki ke he tino,” liga ko e gagao e mata po ke falu matulituli ne nakai fai vai tului he magaaho ia. (2 Kori. 12:7; Kala. 4:15; 6:11) Hagaao ke he “mahukihuki ke he tino” a Paulo, ne ole fakamakamaka a ia ki a Iehova. (Totou 2 Korinito 12:8-10.) Ne nakai utakehe fakamana he Atua e “mahukihuki ke he tino” a Paulo. Ka e, fakamalolō he Atua a ia ke fakauka ki ai. Kua kitia mooli e malolō he Atua ke he lolelole ha Paulo. Ha ha i ai nakai he mena nei ne tupu e fakaakoaga ma tautolu?

Kalo Mai he Molea e Kapaletū he Leveki Malolō Tino

6, 7. Ko e ha kua lata ia tautolu ke kalo mai he molea e kapaletū ke he malolō tino ha tautolu?

⁶ Tuga he iloa e koe, kua talia he Tau Fakamoli a Iehova e lagomatai fakaekekafo mo e tau puhala tului kehekehe. Ne fa fai vala tala foki he senolo Awake! ha tautolu hagaao ke he tau puhala malolō tino. Ti pete ne nakai talia e tautolu ha tuluiaga pauaki, kua loto fakaaue a tautolu ke he lagomatai mo e kaufakalataha he tau tagata pulotu he leveki malolō tino. Mooli, kua mailoga e tautolu kua nakaila moua ia e malolō tino mitaki katoatoa. Ko e mena ia, na iloa e tautolu kua pulotu ke kalo mai he tupetupe lahi po ke manamanatu tumau ke he malolō tino ha tautolu. Kua lata ke kehe e aga ha tautolu mai he tau tagata ne ‘nakai ha ha ai e amaamanakiaga,’ ne manatu ko e moui ni anei mo e to fakaaoga ha tuluiaga he lali ke fakamaulu e tau gagao ha lautolu. (Efeso 2:2, 12) Kua fakamalolō a tautolu ke nakai fakaheu e taliaaga a Iehova he lali ke fakahao e moui ha tautolu mogonei, ha kua talitonu a tautolu kaeke ke tumau a tautolu ke tua fakamooli ke he Atua, to “toto atu [a tautolu] ke he moui tukulagi” he fakatokaaga foou ne mavehe e ia.—1 Timo. 6:12, 19; 2 Pete. 3:13.

⁷ Kua fakamamao a tautolu he molea e kapaletū ke he malolō tino ha tautolu ma e taha kakano foki. He kapaletū lahi ke he malolō tino ha tautolu ka takitaki atu ke manamanatu ni ki a tautolu. Ne hataki e Paulo ke he hagahaga kelea nei he tomatoma e ia e tau Filipi ke “aua neke takitokotaha mo e manamanatu ke he tau mena [ha lautolu], ka e takitokotaha mo e manamanatu ke he tau mena he falu.” (Filipi 2:4) Kua latatonu ke leveki fakamitaki ne tautolu a tautolu, ka ko e fiafia mooli ne fakakite e tautolu ke he tau matakainaga ha tautolu mo e tau tagata ne ta atu e tautolu ki ai e “tala mitaki nai he kautu” ka puipui a tautolu neke manamanatu lahi ke he malolō fakatino ha tautolu.—Mata. 24:14.

8. Ko e heigoa ka takitaki a tautolu ke taute ka liga molea e kapaletū ke he malolō tino ha tautolu?

⁸ Kua tupu mai e hagahaga kelea ka fakaatā he Kerisiano e tau kapaletū he malolō tino ke poka ki tua e tau mena he Kautu. Maeke he molea e manamanatu ke he leveki he malolō tino ke takitaki atu foki a tautolu ke lali ke peehi ke he falu e tau manatu fakatagata ha tautolu hagaao ke he aoga he falu a fuafuaaga kai, tuluiaga, po ke tau vai lagomatai kai. Ke he mena nei, manamanatu ke he matapatu fakaakoaga ne fakakite he tau kupu a Paulo: “Kia mailoga ai e mutolu e tau mena [“ne mua atu e aoga lahi,” NW], kia fakamoli a mutolu mo e nakai totoku fakakelea e taha a mutolu ka hoko ke he aho a Keriso.”—Filipi 1:10.

Ko e Heigoa ne Mua Atu e Aoga Lahi?

9. Ko e heigoa taha he tau mena ne mua atu e aoga lahi ne nakai lata ia tautolu ke fakaheu, ti ko e ha?

⁹ Kaeke kua mailoga e tautolu e tau mena ne mua atu e aoga lahi, to fakalataha fakamakai a tautolu ke he gahua fakamaulu fakaagaaga. Kua taute ai he fakamatala mo e fakaako e Kupu he Atua. Ko e gahua fiafia nei kua aoga ki a tautolu mo lautolu ne fakaako e tautolu. (Fakatai 17:22; 1 Timo. 4:15, 16) Ne fa putoia ke he tau mekasini Kolo Toko mo e Awake! e tau vala tala hagaao ke he tau matakainaga fakaagaaga ha tautolu ne gagao lahi mahaki. Ko e tau tala nei kua fakamaama he falu magaaho e puhala ne fahia e tau tagata takitaha ke he ha lautolu a tau lekua po ke utakehe fakakū e tau manamanatuaga ha lautolu mai he tau gagao he lali ke lagomatai falu ke o mai ke iloa a Iehova mo e tau maveheaga homo ue atu haana.a

10. Ko e ha ne lauia ai e fifiliaga ha tautolu ke he tau tuluiaga?

¹⁰ Ka fehagai mo e lekua he malolō tino, kua lata ke igatia e tau Kerisiano lalahi ke “fua hana ni a kavega” he matagahua he fifili e tuluiaga. (Kala. 6:5) Ka e lata ia tautolu ke manatu kua lauia a Iehova he fifiliaga ha tautolu ke he tuluiaga. Tuga ne omoi he fakalilifu ma e tau matapatu fakaakoaga he Tohi Tapu a tautolu ke ‘fakamamao mo e toto,’ ti ko e fakalilifu hokulo ha tautolu ma e Kupu he Atua kua lata ke fakaohooho a tautolu ke kalo mai he fakaaoga e tau tuluiaga ka fakahagahaga kelea fakaagaaga a tautolu po ke lauia e fakafetuiaga ha tautolu mo Iehova. (Gahua 15:20) Ko e tau puhala he falu fuafuaaga mo e tuluiaga kua liga tuga e tau gahua fakataulatua. Ne nakai talia e Iehova e tau Isaraela tiaki taofiaga ne fakaaoga e “malolo kelea.” Ne pehē a ia: “Ua ta mai foki e mutolu e tau poa nakai aoga, ko e tau mena manogi kua huhunu, kua eke ia mo mena vihiatia kia au; kua pihia foki e mahina pula fou, mo e sapati, mo e kotofaaga he fakapotopotoaga; nakai maeke kia au e [“malolō kelea,” NW] mo e fakapotopotoaga.” (Isaia 1:13) He magaaho ka gagao ai, nakai ko e mogo a ia ke taute taha mena ka liga fakalavelave e tau liogi ha tautolu mo e fakahagahaga kelea e fakafetuiaga ha tautolu mo e Atua.—Aue 3:44.

Aoga Lahi e ‘Manamanatu Fakalatalata’

11, 12. Lauia fēfē e ‘manamanatu fakalatalata’ ka fifili e tautolu e leveki malolō tino?

¹¹ Ka gagao a tautolu, kua nakai lata ke amanaki to fakamaulu fakamana e Iehova a tautolu, ka e maeke ia tautolu ke liogi ma e pulotu he fifili e tuluiaga. Lata ia tautolu ke moua e takitakiaga ke he tau fifiliaga ha tautolu ha ko e tau matapatu fakaakoaga he Tohi Tapu mo e manamanatu fakamitaki. Kaeke kua gagao lahi mahaki, kua liga pulotu ke tutala ke he falu ekekafo foki ka maeke, he fakatatai mo e manatu ne fakakite he Tau Fakatai 15:22, ne pehē: “Kua ulu e tau mena ne manamanatu ki ai kaeke kua nakai fai pulega; ka e fakamau ai ni ke he tau pule tokologa.” Ne tomatoma he aposetolo ko Paulo e tau matakainaga talitonu ke ‘manamanatu fakalatalata mo e tututonu katoa mo e mahani Atua ke he mouiaga nai.’—Tito 2:12.

¹² Tokologa e tagata ne ha ha he tuaga ne tuga he fifine gagao he vahā a Iesu. Ne totou e tautolu ia Mareko 5:25, 26: “Ko e taha fifine foki kua gagao he fakatafea, kua katoa e hogofulu ma ua e tau. Ne loga foki e tau mena ne fakauka ai a ia ke he tau ekekafo ne tokologa; kua oti foki hana tau koloa he uta kia lautolu, ka e nakai aoga taha mena kia ia, ka kua au atu ai hana kafo.” Ne fakamalolō e Iesu e fifine ia mo e fehagai fakaalofa hofihofi noa ki a ia. (Mare. 5:27-34) He manako lahi, ne kamatamata e falu Kerisiano ke fifili e tau puhala he fuafuaaga po ke tuluiaga ne moumou e tau matapatu fakaakoaga he tapuakiaga meā.

13, 14. (a) Fakaaoga fēfē e Satani e fifiliaga ha tautolu ke he tau tuluiaga he malolō tino ke moumou aki e mahani fakamooli ha tautolu? (e) Ko e ha kua lata ia tautolu ke fakamamao mai he ha mena ne lauia foki ke he fakataulatua?

¹³ To fakaaoga e Satani ha puhala ni ke fakatauhele a tautolu mai he tapuakiaga meā. Tuga ni he fakaaoga e ia e aga fakahanoa he mahani fakataane mo e fifine mo e velevele koloa ke fakalolelole falu, ne lali a ia ke moumou e mahani fakamooli he falu, puhala he tau tuluiaga tuahā ne hokotia ke fakaaoga e tau malolō mo e matutakiaga fakataulatua. Ne liogi a tautolu ki a Iehova ke laveaki mai ‘ia ia ne kelea’ mo e mai “he tau holifono oti kana.” Ti nakai lata a tautolu ke o atu ke he faahi a Satani he fakaaoga e tautolu e tau mena ka putoia ke he fakataulatua.—Mata. 6:13; Tito 2:14.

¹⁴ Ne nakai fakaatā e Iehova e tau Isaraela ke taute e tau puhala talahau mena he kitekite ke he aolagi mo e kumi ke he tau fakamailoga po ke, taute mana. (Teu. 18:10-12) Ne tohi fakalataha e Paulo e “eke lagatau he taulaatua” mo e “tau gahua he tino.” (Kala. 5:19, 20) Mua atu foki, ‘ko lautolu kua eke mena he tau taulātua’ to nakai fai vala he fakatokaaga foou a Iehova. (Fakakite. 21:8) Maali ai mogoia, ko e ha mena ne lauia he fakataulatua kua fakavihia e Iehova.

‘Kia Iloa ha Mutolu a Mahani Fakalatalata’

15, 16. Ko e ha kua manako a tautolu ke he pulotu he fifili e leveki malolō tino, ti ko e heigoa e fakatonuaga pulotu ne foaki he kau fakatufono he senetenari fakamua?

¹⁵ Hagaao ke he fakamaamaaga i luga, kaeke ke fakauaua a tautolu hagaao ke he falu puhala he fuafuaaga po ke tuluiaga, kua pulotu a tautolu ke tiaki ai. Mooli, ha kua nakai maeke ia tautolu ke fakamaama e gahuahuaaga he taha puhala tului kua nakai pehē e mena nei kua putoia ai ke he falu a vahega fakataulatua. He fakatumau ke moua e onoonoaga he Tohiaga Tapu hagaao ke he leveki malolō tino kua lata ia tautolu ke moua e pulotu faka-Atua mo e manamanatu fakamitaki. He Tau Fakatai veveheaga 3, ne moua e tautolu e tomatomaaga nei: “Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu. Kia manatu e koe a ia ke he hāu a tau puhala oti, ti fakahakohako ai e ia hāu a tau puhala. . . . Kia omaoma mau [po ke, puipui e] iloilo mo e loto manamanatu, to eke e tau mena ia mo moui ke he hāu a agaga.”—Fakatai 3:5, 6, 21, 22.

¹⁶ He lali ke fakatumau e malolō tino, kua lata mogoia ia tautolu ke mataala neke galo e fiafia he Atua he lali a tautolu ke fahia ke he gagao po ke vahā fuakau. Ko e leveki malolō tino, mo e falu mena foki, kua lata ke ‘iloa ha tautolu a mahani fakalatalata ke he tau tagata oti kana’ he momoui hagaao ke he tau matapatu fakaakoaga he Tohi Tapu. (Filipi 4:5) He tohi aoga lahi, ne hataki he kau fakatufono he senetenari fakamua e tau Kerisiano ke fakamamao mai he tapuaki tupua, toto, mo e feuaki. Ne putoia he tohi ia e fakatonuaga nei: “Kaeke [“ke mataala,” NW] ke fakamamao a mutolu mo e tau mena ia, ti mitaki ai a mutolu.” (Gahua 15:28, 29) He puhala fe?

Levekiaga Fakalatalata mo e Onoonoaga ke he Malolō Tino Katoatoa ha i Mua

17. Kua aoga fēfē a tautolu fakatino he pipiki atu ke he tau matapatu fakaakoaga he Tohi Tapu?

¹⁷ Lata ke igatia a tautolu mo e hūhū hifo ki a ia ni, ‘Kua loto fakaaue lahi nakai au ke he monuina fakatagata ne moua e au, ha kua pipiki mau ke he tau matapatu fakaakoaga he Tohi Tapu hagaao ke he toto mo e feuaki?’ Kia manamanatu foki ke he tau aoga ne moua e tautolu ha ko e fua he tau laliaga ha tautolu ke “fakamea e tautolu a tautolu ke he tau mena oti ke kelea ai e tino katoa mo e agaga.” (2 Kori. 7:1) He pipiki mau ke he tau tutūaga he Tohi Tapu hagaao ke he mahani meā fakatagata, kua kalo mai a tautolu he loga he tau gagao he tino. Kua monuina a tautolu ha kua tiaki e fakaaoga he tapaka mo e tau tulaki kelea ne fakakelea fakaagaaga mo e fakatino. Mailoga foki e tau aoga he malolō tino ne fua mai he fakalatalata e kai mo e inu. (Totou Tau Fakatai 23:20; Tito 2:2, 3.) Pete ko e tau mena tuga e okioki mo e faofao ka lafi ke he malolō tino ha tautolu, kua mua atu e monuina fakatino mo e fakaagaaga ha tautolu ha kua talia e tautolu e takitakiaga faka-Tohiaga Tapu.

18. Ko e heigoa kua lata ke eke mo matapatu manamanatuaga ha tautolu, mo e ko e fakamooliaga he perofetaaga fe hagaao ke he malolō tino ka amaamanaki atu a tautolu ki ai?

¹⁸ Mua atu ke he tau mena oti, kua lata ke leveki e malolō fakaagaaga ha tautolu mo e fakamalolō e fakafetuiaga uho mo e ha tautolu a Matua he lagi, ko e Punaaga ‘he mouiaga nai mo e kua tatali’ he lalolagi foou haana ne mavehe mai. (1 Timo. 4:8; Sala. 36:9) He lalolagi foou he Atua, to moua katoatoa e fakamauluaga fakaagaaga mo e fakatino puhala he fakamagaloaga he tau hala ne fakavē ke he poa lukutoto ha Iesu. To takitaki e Iesu Keriso, ko e Punua Mamoe he Atua, a tautolu “ke he tau vaipuna he moui,” mo e to holoholo kehe he Atua e tau hihina mata oti mai he tau mata ha tautolu. (Fakakite. 7:14-17; 22:1, 2) To moua foki mogoia e tautolu e fakamooliaga he perofetaaga ofoofogia nei: “Nakai pehe mai foki taha kua nofo ai, Kua gagao au.”—Isaia 33:24.

19. He fakalatalata ha tautolu a leveki malolō tino, ko e heigoa kua mafanatia a tautolu ki ai?

¹⁹ Kua mauokafua a tautolu hane tata mai e laveakiaga ha tautolu, ti fakatalitali fakamakai a tautolu ke he aho ka liliu e Iehova e tuaga gagao mo e mate he tagata. He magaaho nei, kua mafanatia a tautolu to lagomatai he Matua fakaalofa ha tautolu a tautolu ke fakauka ke he kavega he tau mamahi mo e tau matulituli ha tautolu ha kua ‘leveki e ia a tautolu.’ (1 Pete. 5:7) Ko e mena ia, kia leveki e tau malolō tino ha tautolu, ka e fakatatau tumau ke he tau takitakiaga maaliali ne ha ha he Kupu omoomoi he Atua!

[Matahui Tala]

Ko e Puhala he Fakamanatu

• Ko hai ne lago ki ai e gagao, ti ko hai ka fakatokanoa a tautolu mai he tau lauiaaga he hala?

• Pete ko e mahani mau ma tautolu ke manamanatu ke he malolō tino ha tautolu, ko e heigoa kua lata ia tautolu ke kalo mai ai?

• Ko e ha kua lauia a Iehova he fifiliaga ha tautolu ke he tuluiaga?

• Hagaao ke he malolō tino ha tautolu, maeke fēfē a tautolu ke aoga mai he pipiki atu ke he tau matapatu fakaakoaga he Tohi Tapu?

[Fakatino he lau 23]

Kua nakai tufuga e tagata ke gagao mo e fuakau

[Fakatino he lau 25]

Pete ko e tau lekua malolō tino, kua moua he tau tagata ha Iehova e fiafia he fekafekauaga