‘Totoko Atu e Tiapolo’ Tuga ne Taute e Iesu
‘Totoko atu e Tiapolo, ti hola kehe ai a ia ia mutolu.’—IAKO. 4:7.
1. Ko e heigoa e totokoaga ne iloa e Iesu ka fehagai mo ia he lalolagi, ti ko e heigoa e fakahikuaga?
NE ILOA e Iesu Keriso to fehagai a ia mo e totokoaga mai he Tiapolo. Kua kitia maaliali e mena nei ke he talahauaga he Atua ke he gata ne hagaao ai e talahauaga ke he agaaga totoko kelea: “To fakatupu e au e faitaua kia mua mo e fifine [ko e vala he fakatokatokaaga ha Iehova he lagi], ko e hau a [“tega mo e hana tega,” NW]; to tatuki e ia [Iesu Keriso] hau a ulu, ka e tatuki ni e koe hana muihui.” (Kene. 3:14, 15; Fakakite. 12:9) Ko e kakano he tatuki e muihui a Iesu, to lauia fakakū a ia he magaaho ka kelipopo he nofo agaia he lalolagi, ha ko e mena to fakaliu tu mai e Iehova a ia ke he lilifu he lagi. Ka ko e tatuki e gata ke he ulu kua kakano to pakia kelea ai mo e to nakai liu malolō.—Totou Gahua 2:31, 32; Heperu 2:14.
2. Ko e ha ne mauokafua a Iehova to kautū a Iesu he totoko e Tiapolo?
2 Ne mauokafua a Iehova to kautū a Iesu he fakamooli haana a kotofaaga mo e totoko e Tiapolo ke he magaaho ne ha ha ai ke he lalolagi. Ko e ha kua moolioli a Iehova ke he mena nei? Ha kua tufuga fakamua e ia a Iesu he lagi ke he tau tau loga, ne matakite ki a ia, ti iloa ko e [“iki gahua,” NW] nei mo e “uluaki he tau mena oti kana kua eke” ne omaoma mo e tua fakamooli. (Fakatai 8:22-31; Kolo. 1:15) Ti ko e magaaho ne fakafano mai a Iesu ke he lalolagi mo e fakaatā a ia ke kamatamata he Tiapolo ke hoko ke he mate, ne mauokafua e Atua to kautū e Tama fuataha Haana.—Ioane 3:16.
Laveaki e Iehova e Tau Fekafekau Haana
3. Ko e heigoa e aga he Tiapolo ke he tau fekafekau ha Iehova?
3 Ne hagaao a Iesu ke he Tiapolo “ko e pule he lalolagi nei” ti hataki e tau tutaki Haana to favale foki ki a lautolu tuga ne hoko ki a ia. (Ioane 12:31; 15:20) Ko e lalolagi ne ha ha he pule ha Satani ko e Tiapolo, kua vihiatia e tau Kerisiano mooli ha kua fekafekau a lautolu ki a Iehova mo e ko e tau tagata fakamatala he tututonu. (Mata. 24:9; 1 Ioa. 5:19) Kua hagaaki pauaki e Tiapolo ki a lautolu ne fakauku ne toe ka fakahiku ke pule mo Keriso ke he haana Kautu he lagi. Kua hagaaki foki a Satani ke he tokologa he Tau Fakamooli ha Iehova ne ha ha i ai e amaamanakiaga he moui tukulagi ke he lalolagi parataiso. Ne hataki e Kupu he Atua a tautolu: “Ko ia kua eke a mutolu mo tau fi hana, ko e [T]iapolo ia, kua faifano a ia tuga ne leona tagi, kua kumi kia falu ke faiola ai e ia.”—1 Pete. 5:8.
4. Ko e heigoa ne fakakite kua kautū e tau tagata he Atua he totoko e Tiapolo he vahā ha tautolu?
4 Ko e fakatokatokaaga hane olioli e lalago ha Iehova ko e Atua, ati kautū ai a tautolu he totoko e Tiapolo. Manamanatu ke he tau fakamooliaga nei: He 100 tau kua mole, ne lali falu he tau tagata pule kelea muikau he fakamauaga tuai ke utakehe e Tau Fakamoli a Iehova. Ka kua matutaki e numera he Tau Fakamoli ke tupu ti hokotia mogonei ke teitei 7,000,000 ke molea e 100,000 he tau fakapotopotoaga he lalolagi katoa. Ka ko e tau tagata pule kelea ne favale ke he tau tagata a Iehova nukua utakehe katoatoa a lautolu!
5. Kua mauokafua mooli fēfē e Isaia 54:17 ke he mena ne tupu ke he tau fekafekau ha Iehova?
5 He tutala ke he fakapotopotoaga ha Isaraela i tuai ko e haana “fifine,” ne mavehe he Atua: “Ko e tau kanavaakau oti kua taute ke tau kia koe, nakai monuina ia; ko e tau alelo oti ke taufetoko mo koe ke he fakafiliaga to fakahala ai e koe; ko e tufaaga hanā he tau fekafekau a Iehova, ko e ha lautolu a tututonu foki mai ia au haia.” (Isaia 54:1, 17) Kua mauokafua mooli e maveheaga ia ke he mena ne tupu ke he tau tagata he Atua he lalolagi katoa ke he “tau aho fakamui” nei. (2 Timo. 3:1-5, 13) Kua fakatumau a tautolu ke totoko e Tiapolo, ti nakai kautū ha kanavaakau ne lali a ia ke fakaaoga ke moumou aki e tau tagata he Atua, ha ko Iehova he faahi ha tautolu.—Sala. 118:6, 7.
6. Ko e heigoa ne talamai he perofetaaga a Tanielu ki a tautolu hagaao ke he pule he Tiapolo anoiha?
6 He mafiti mai e fakaotiaga he fakatokaaga kelea oti nei, to utakehe katoatoa e tau puhala oti he pule a Satani. He tohi i lalo he agaaga faka-Atua, ne talahau tuai he perofeta ko Tanielu: “Ko e vaha he tau patuiki ia [he vahā ha tautolu] to fakatu ai he Atua he lagi e kautu [ke he lagi] nakai fakaoti tukulagi; ko e kautu foki ia nakai tuku atu ai ke he taha motu, to tuki malipilipi mo e fakaotioti e tau kautu oti ia [mogonei], ka ko ia to tumau tukulagi a ia.” (Tani. 2:44) Ka tupu e mena ia, to galo e pule fakasatani mo e pule he tau tagata nakai mitaki katoatoa. To galo tukumalagi e tau puhala oti he fakatokaaga a Satani, mo e to pule e Kautu he Atua ke he lalolagi katoa mo e nakai fai totokoaga.—Totou 2 Peteru 3:7, 13.
7. Iloa fēfē e tautolu kua maeke e tau fekafekau takitaha ha Iehova ke kautū he totoko e Tiapolo?
7 Nakai fakauaua to puipui mo e to tupu fakaagaaga e fakatokatokaaga a Iehova. (Totou Salamo 125:1, 2.) Ka e kua a tautolu? Ne talamai e Tohi Tapu kua maeke ia tautolu ke kautū he totoko e Tiapolo, tuga ne taute e Iesu. Mooli, ko e perofetaaga ne puhala mai e Keriso he aposetolo ko Ioane kua fakakite pete ne tau totokoaga fakasatani, ko lautolu he “moto tagata tokologa” ne ha ha ai e amaamanakiaga ke he lalolagi ka hao mai he moumouaga he fakatokaaga nei. Hagaao ke he tau Tohiaga Tapu, ne tauui a lautolu: “Ko e fakamouiaga ha he Atua ha tautolu, ko ia kua nofo ke he nofoaiki, katoa mo e Punua mamoe [ko Iesu Keriso].” (Fakakite. 7:9-14) Ne talahau hagaao ki a lautolu ne fakauku kua kautū ki a Satani, mo e tau hoa ha lautolu, ko e ‘tau mamoe kehe,’ kua kautū foki he totoko ki a ia. (Ioane 10:16; Fakakite. 12:10, 11) Ka kua lata e mena nei ke lali fakalahi mo e liogi fakamakai ke ‘laveaki mai ia ia ne kelea.’—Mata. 6:13.
Ko e Fifitakiaga Mitaki Katoatoa he Totoko e Tiapolo
8. Ko e heigoa e kamatamata fakamua ne tohi kua fakaaoga he Tiapolo ke totoko ki a Iesu he tutakale, ti tali atu fēfē a Keriso?
8 Ne lali e Tiapolo ke moumou e mahani fakamooli ha Iesu. Ne kamatamata e Satani a Iesu he tutakale, he lali ke fakahui e omaoma Haana ki a Iehova. Pete ia, ne fakatoka e Iesu e fakafifitakiaga mitaki katoatoa he totoko a Satani. He mole e fakakanopogi ke 40 e aho mo e 40 e po, ne liga manako lahi a Iesu ke kai. “Kaeke ko e Tama he Atua a koe,” he talahau e Satani, “ati tala age a ke he tau maka ē ke faliu mo tau areto.” Ka e nakai mahala a Iesu ke fakaaoga e malolō haana ne foaki he Atua ke moua e aoga fakatagata. Ka e, pehē a Iesu: “Kua tohi, Nakai ko e tau mena kai hokoia ke moui ai ha tagata, ka ko e tau kupu oti ne to mai he fofoga he Atua.”—Mata. 4:1-4; Teu. 8:3.
9. Ko e ha kua latatonu ia tautolu ke totoko e tau kamatamata he Tiapolo ke fakaaoga hehē e tau manako pauaki he tino ha tautolu?
9 He vahā nei, kua lali e Tiapolo ke fakaaoga hehē e tau manako pauaki he tino he tau fekafekau ha Iehova. Kua latatonu ia tautolu ke mauokafua he totoko e tau kamatamata velagia he mahani fakataane mo e fifine, ne kua holofa lahi ke he lalolagi feuaki nei. Ne peehi malolō he Kupu he Atua: “Nakai kia iloa e mutolu nakai moua e lautolu kua mahani hepehepe e kautu he Atua? Aua neke fakahehe ai a mutolu; ko e tau tagata feuaki, mo lautolu kua hufeilo ke he tau tupua, mo lautolu kua faivao, mo lautolu kua fakakelea e lautolu a lautolu, mo lautolu kua eke e mahani Sotoma, [to] nakai moua e lautolu nā e kautu he Atua.” (1 Kori. 6:9, 10) Kitia maali ai, to nakai fakaatā e tau tagata ne momoui ke he puhala feuaki mo e nakai talia ke hiki, ke nonofo he lalolagi foou he Atua.
10. Hagaao ke he Mataio 4:5, 6, ko e heigoa foki taha kamatamata ne fakaaoga e Satani he lali ke moumou e mahani fakamooli ha Iesu?
10 Hagaao ke he taha he tau kamatamata ne tupu ki a Iesu he tutakale, ne talahau he tau Tohiaga Tapu: “Ati uta ai a ia he [T]iapolo ke he māga tapu, kua fakatu ai e ia a ia ke he tapitapi ki luga he faituga. Kua pehe age a ia kia ia, Kaeke ko e Tama he Atua a koe, ati hopo hifo a a koe he mena nai; ha ko e mena kua tohi, To poaki a ia ke he hana tau agelu kia koe ke uta e lautolu a koe ke he tau lima ha lautolu, neke hakina ha hui he maka.” (Mata. 4:5, 6) Liga manatu a Satani to fakakite he mena nei e tuaga mua ue atu faka-Mesia ha Iesu. Ka ko e mahani nakai tonu mo e fakaikaluga anei ka nakai talia po ke lalago he Atua. Ne liu foki a Iesu fakakite e mahani fakamooli haana ki a Iehova mo e tali atu ki a Satani he fatiaki e kupu tohi. Ne pehē a ia: “Kua tohi foki, Ua kamatamata a koe ke he Iki hau a Atua.”—Mata. 4:7; Teu. 6:16.
11. Liga kamatamata fēfē e Satani a tautolu, ti liga ko e heigoa e fua?
11 Liga lali a Satani he kamatamata a tautolu ke kumi e lilifu ke he tau puhala kehekehe. Liga lali a ia ke fakaohooho a tautolu ke fifitaki e tau fāsone he lalolagi ke he tau mena tui mo e tauteuteaga po ke putoia ke he tau fakafiafiaaga nakai lata. Kaeke ke fakaheu e tautolu e fakatonuaga he Tohi Tapu ti fifitaki e lalolagi, kua amanaki kia a tautolu to puipui he tau agelu a tautolu mai he tau lauiaaga kelea he puhala pihia? Pete he tokihala e Patuiki ko Tavita he tau hala haana ne putoia a Patesepa, ne nakai puipui a ia mai he tau fua he tau gahua haana. (2 Samu. 12:9-12) Kia nakai kamatamata e tautolu a Iehova ke he tau puhala nakai tonu, liga he feaki e tuaga kapitiga mo e lalolagi.—Totou Iakopo 4:4; 1 Ioane 2:15-17.
12. Ko e heigoa e kamatamata ne totoku ia Mataio 4:8, 9, ti tali atu fēfē e Tama he Atua?
12 Ne fakaaoga agaia foki he Tiapolo e kamatamata he tutakale he foaki e malolō fakapolitika ki a Iesu. Ne fakakite e Satani ki a Iesu e tau kautu oti he lalolagi mo e lilifu i ai ti talahau: “To ta atu e au e tau mena oti nai kia koe, kaeke ke fakaveli mo e hufeilo mai a koe kia au.” (Mata. 4:8, 9) Ko e laliaga kelea lahi ha ia ke moua e tapuakiaga ne lata ni mo Iehova mo e fakaohooho a Iesu ke nakai tua fakamooli ke he Atua! He manamanatu hokulo ke he manako ke tapuaki age ki a ia, ne eke e agelu fakamooli fakamua ia ko Satani ko e Tiapolo mo kamatamata ne agahala, velevelemena, mo e kelea muitui. (Iako. 1:14, 15) Ka kua kehe mamao ai, ne fakamalolō a Iesu ke tumau e tua fakamooli ke he haana Matua he lagi ati fakapuloa ai: “Ati fano kehe a a koe ma Satani; ha ko e mena kua tohi, kia hufeilo atu a koe ke he Iki hau a Atua, ko ia ni hokoia ke fekafekau atu a koe ki ai.” Ne liu foki a Iesu totoko e Tiapolo ke he tau kupu maaliali mo e mauokafua. Ne nakai manako e Tama he Atua ke fai vala he lalolagi ha Satani mo e to nakai tapuaki ki a ia ne kelea!—Mata. 4:10; Teu. 6:13; 10:20.
‘Totoko Atu e Tiapolo, ti Hola Kehe a Ia ia Mutolu’
13, 14. (a) He fakakite ki a Iesu e tau kautu oti he lalolagi, ko e heigoa ne foaki he Tiapolo ki a ia? (e) Lali fēfē a Satani ke fakahehē a tautolu?
13 He fakakite ki a Iesu e tau kautu oti he lalolagi, kua foaki he Tiapolo ki a ia e malolō mua ue atu he tagata. Ne amanaki a Satani to fiafia a Iesu ke he tau mena ne kitia e ia mo e fakaohooho ai ke eke a ia mo takitaki fakapolitika ne mua atu e malolō he lalolagi. He vahā nei, kua nakai foaki mai he Tiapolo e tau kautu ki a tautolu, ka e lali a ia ke fakahehē e tau loto ha tautolu he puhala he tau mata, tau teliga, mo e tau manamanatuaga ha tautolu.
14 Kua pule e Tiapolo ke he lalolagi nei. Ti pule foki a ia ke he tau puhala uta tala i ai. Ko e mena ia, kia nakai ofo ha ko e tau mena kitekite, fanogonogo, mo e totou ne foaki he lalolagi kua pukeina he mahani feuaki mo e favale. Kua lali e tau puhala fakatātāaga he lalolagi nei ke atihake i loto ha tautolu e manako ke fakatau e tau koloa loga ne nakai aoga mooli ki a tautolu. Ke he tau puhala pihia, kua kamatamata tumau he Tiapolo a tautolu aki e tau futiakiaga he tau velevele koloa ka tataki ke he tau mata, tau teliga, mo e tau manamanatuaga ha tautolu. Kaeke ke fakaheu e tautolu ke kitekite, fanogonogo, mo e totou ke he tau mena ne moumou e tau matapatu fakaakoaga he Tohi Tapu, kua pehē tuai a tautolu: “Ati fano kehe a a koe ma Satani.” Kua fifitaki mogoia e tautolu a Iesu he mauokafua mo e fakamalolō he tiaki e lalolagi kelea ha Satani. Ha kua nakai fai vala a tautolu ke he lalolagi ha Satani kua kitia foki ke he puhala ne fakakite fakamalolō e tautolu a tautolu ko e Tau Fakamoli a Iehova mo e tau tutaki he Keriso ke he gahua, aoga, tuutakaina, mo e tau magafaoa ha tautolu.—Totou Mareko 8:38.
15. Ko e ha e totoko ki a Satani kua kakano ke mataala tumau?
15 He mole e laliaga ke toluaki he Tiapolo ke fakahui e Iesu e mahani fakamooli Haana ke he Atua, ne “toka ai he [T]iapolo a ia.” (Mata. 4:11) Pete ia, ne nakai oti e lali ha Satani ke kamatamata a Iesu, ha kua talamai ki a tautolu: “Kua fakaoti tuai he tau kamatamata oti [he tutakale] he [T]iapolo kia ia, ti fano kehe a ia ia ia, ato hoko ke he taha aho.” (Luka 4:13) Ka kautū a tautolu he totoko e Tiapolo, kua lata ia tautolu ke fakaaue ki a Iehova. Ka kua lata foki ia tautolu ke kumi e lagomatai tumau he Atua, ha ko e mena to liu mai e Tiapolo ke kamatamata a tautolu ke he taha magaaho kua latatonu mo ia—mo e nakai ni he magaaho kua liga amanaki a tautolu ke he kamatamata. Ti kua lata ia tautolu ke mataala tumau he tau magaaho oti, mautali ke fakauka he foaki e fekafekau tapu ki a Iehova pete e tau kamatamata kua fehagai mo tautolu.
16. Ko e heigoa e malolō mua ue atu ne mai e Iehova, ti ko e ha kua lata ia tautolu ke liogi ke moua ai?
16 Ke lagomatai e tau laliaga ha tautolu ke totoko e Tiapolo, kua lata ia tautolu ke liogi ke foaki mai mo e to moua e malolō mua ue atu he lagi mo e lalolagi katoatoa—ko e agaaga tapu he Atua. To lagomatai a tautolu ke taute e tau mena ne nakai maeke ia tautolu ke taute he malolō ni ha tautolu. Ne fakamafana e Iesu e tau tutaki haana ke he mouaaga he agaaga he Atua he pehē: “Ko mutolu [ne nakai mitaki katoatoa ti lahi e] mahani kelea, kaeke kua iloa e mutolu ke uta e tau mena mitaki mo e tau fanau ha mutolu; ka e nakai kia mua e Matua ha mutolu ha ha he lagi ke foaki mai e [a]gaga [t]apu kia lautolu ka ole atu ai kia ia?” (Luka 11:13) Kia fakatumau a tautolu ke liogi ki a Iehova ma e agaaga tapu haana. Mo e malolō mua ue atu nei hane lalago a tautolu ke fakamalolō ke totoko e Tiapolo, to maeke a tautolu ke kautū. Lafi ke he liogi tumau mo e fakamakamaka, kua lata ia tautolu ke fakatapulu ke he tapulu tau fakaagaaga mai he Atua ‘ke maeke ke totoko atu ke he tau lagatau he Tiapolo.’—Efeso 6:11-18.
17. Ko e heigoa e fiafia ne lagomatai a Iesu ke totoko e Tiapolo?
17 Fai mena foki ne lagomatai a Iesu ke totoko e Tiapolo, ti maeke foki ke lagomatai a tautolu. Ne pehē e Tohi Tapu: “Ko [Iesu] ne fakauka ke he [“akau fakakikiveka,” NW] mo e fakateaga a ia ke he ma, ha ko e fiafia kua toka ki mua hana, kua nofo foki a ia ke he fahi matau he nofoaiki he Atua.” (Hepe. 12:2) Maeke ia tautolu ke moua e fiafia pihia he fakatokoluga e pule katoatoa a Iehova, fakalilifu e higoa tapu haana, mo e fakatumau e palepale he moui tukulagi i mua ha tautolu. To moua e tautolu e fiafia he magaaho ka utakehe tukulagi a Satani mo e tau gahua oti kana haana mo e “ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina kua lahi”! (Sala. 37:11) Ko e mena ia, kia totoko e Tiapolo, tuga ne taute e Iesu.—Totou Iakopo 4:7, 8.
To Tali Fēfē e Koe?
• Ko e heigoa e fakamooliaga na laveaki e Iehova e tau tagata haana?
• Fakatoka fēfē e Iesu e fifitakiaga he totoko a Satani?
• Ko e tau puhala fe kua maeke ia koe ke totoko e Tiapolo?
[Fakatino he lau 29]
Kapitiga mo e lalolagi kua eke a tautolu mo faitaua ke he Atua
[Fakatino he lau 31]
Ne tiaki e Iesu e foakiaga a Satani ke he tau kautu oti he lalolagi