Ko e Mena ne Ako e Tautolu Mai ia Iesu

Hagaao ke he Tau Liogi ne Logona he Atua

Ne fa mahani a Iesu ke kumi e matakavi ogoogonoa ke liogi, ti poaki e ia ke taute pihia foki he tau tutaki haana. Ne pehē e Tohi Tapu: “He taha mena a ia, kua liogi; kua oti tuai, ti tala age ai kia ia e taha he hana tau tutaki, Ko e Iki na e, kia fakaako mai e koe kia mautolu e liogi. . . . Kua tala age a ia kia lautolu, Ka liogi a mutolu, ati pehe atu ai, Ha mautolu a Matua na e, . . . kia tapu hau a higoa.” (Luka 5:16; 11:1, 2) Ti fakakite e Iesu kua lata ke liogi hokoia ke he haana Matua, ko Iehova. Ko ia ni ha tautolu a Tufuga mo e ‘Fanogonogo liogi.’—Salamo 65:2.

Fiafia nakai e Atua ke he tau liogi oti?

Ko e tau liogi ako manatu ne pola mau kua nakai fiafia e Atua ki ai. Ne pehē a Iesu: “Ka liogi a mutolu, aua neke pola mau ha mutolu a tau kupu.” (Mataio 6:7) Lata ia tautolu ke vagahau mai he tau loto ke he Matua ha tautolu he lagi. Taha magaaho, ne peehi e Iesu ke he tau tutaki haana ko e tau liogi he tagata agahala ne manako mooli ke hiki kua mua e talia ke he Atua ke he tau liogi he tagata fakaikaluga ne muitua fakatonu ke he tau aga fakalotu. (Luka 18:10-14) Ke maeke he tau liogi ha tautolu ke logona, kua lata ia tautolu ke lali fakatokolalo ke taute e mena ne talamai he Atua ki a tautolu. Ne pehē foki a Iesu: “Ko e mena tuga ne fakaako mai he haku a Matua kia au, ko e tau mena ia ne tala atu ai e au . . . ko e mena eke mau e au e tau mena kua mitaki kia ia.” (Ioane 8:28, 29) Ne liogi pehē a Iesu: “Aua neke eke hoku loto, ka ko e hau a finagalo.”—Luka 22:42.

Ko e heigoa kua lata a tautolu ke liogi ke moua?

Ha kua pikopiko ke he higoa he Atua, ne pehē a Iesu: “Hanai, kia liogi pehe a mutolu, Ha mautolu a Matua na e, ha ha he lagi, kia tapu hau a higoa. Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mataio 6:9, 10) Lata ia tautolu ke liogi ma e Kautu he Atua ke hoko mai ha ko e fakatufono a ia ka fakaaoga he Atua ke fakakatoatoa aki e finagalo haana he lagi mo e he lalolagi. Ne pehē a Iesu, maeke ia tautolu ke liogi ma e ‘tau mena kai ha tautolu ke he taha aho mo e taha aho.’ Maeke foki a tautolu ke ole ki a Iehova ke moua e gahua, fale, tapulu, tau levekiaga malolō tino, mo e falu mena foki. Lafi ki ai, ne pehē a Iesu kua lata ia tautolu ke liogi ma e fakamagaloaga.—Luka 11:3, 4.

Kua lata nakai a tautolu ke liogi ma e falu?

Ne liogi a Iesu ma e falu. Ne talamai e Tohi Tapu ki a tautolu: “Ti ta mai ai kia ia e tau tama ikiiki, kia fakalago hana tau lima kia lautolu, mo e liogi.” (Mataio 19:13) Ne pehē a Iesu ke he aposetolo ko Peteru: “Kua ole au māu, kia nakai mate hau a tua.” (Luka 22:32) Ne fakamalolō e Iesu e tau tutaki haana ke liogi ma e falu, pihia mo lautolu ne favale mai mo lautolu ne tukumale ki a lautolu.—Mataio 5:44; Luka 6:28.

Ko e ha kua lata ia tautolu ke fakamakamaka ke he liogi?

Ne fakatoka pauaki e Iesu e magaaho ke liogi mo e fakamalolō e tau tutaki haana “kia liogi mau ke lata ai, ka e aua neke fakalolelole.” (Luka 18:1) Kua uiina e Iehova a tautolu ke fakakite e mauokafua ki a ia he tutala tumau ki a ia hagaao ke he tau mena ne tupetupe ai a tautolu. “Kia ole atu a mutolu, ti foaki mai ai kia mutolu,” he talahau e Iesu. Ka e nakai kakano e mena nei kua fakaumiumi a Iehova ke tali atu ki a lautolu ne fakaalofa mo e fakalilifu ki a ia ko e Matua. Ka e pehē a Iesu: “Hanai, ko mutolu ne mahani kelea, kaeke kua iloa e mutolu ke uta e tau mena mitaki mo e tau fanau ha mutolu; ka e nakai kia mua e Matua ha mutolu ha ha he lagi ke foaki mai e [a]gaga [t]apu kia lautolu ka ole atu ai kia ia?”—Luka 11:5-13.

Ma e falu vala tala foki, kikite e veveheaga 17 he tohi Ko e Heigoa ne Fakaako Moli he Tohi Tapu?a

[Matahui Tala]