Ko Lautolu ne ‘Tumau ke Mumui Atu ke he Punua Mamoe’
“Ko lautolu ia kua mumui atu ke he Punua [M]amoe ke he tau mena oti kua fano a ia ki ai.”—FAKAKITE. 14:4.
1. Fēfē e logonaaga he tau tutaki mooli ha Iesu he mumui atu ki a ia?
KAVI ke he ua mo e hafa e tau he gahua fakamatala ha Iesu, “kua fakaako a ia ke he sunako i Kapanaumi.” He ofomate ke he tau kupu ha Iesu, ne “kua liliu atu ai e falu he hana tau tutaki tokologa, ti nakai tuai o fano a lautolu mo ia.” Ne hūhū a Iesu ke he tau aposetolo 12 haana po ke liliu atu foki kia a lautolu, ne tali a Simona Peteru: “Ko e Iki na e, ke o kia a mautolu kia hai? Ha ha ia koe e tau kupu he moui tukulagi. Kua talia e mautolu, mo e iloa tuai e mautolu ko koe ko e Keriso, ko e Tama he Atua moui.” (Ioane 6:48, 59, 60, 66-69) Ne nakai oti e mumui atu he tau tutaki mooli ha Iesu ki a ia. He mole e fakauku aki e agaaga tapu, ne matutaki a lautolu ke omaoma ke he takitakiaga ha Iesu.—Gahua 16:7-10.
2. (a) Ko hai e “fekafekau fakamoli mo e loto matala,” po ke “fekafekau pule”? (e) Puhala fe kua fakatū he fekafekau e matohiaga mitaki he “mumui atu ke he Punua [M]amoe”?
2 Ko e heigoa ka maeke ke talahau hagaao ke he tau Kerisiano fakauku he tau vahā foou nei? He perofetaaga haana ke he “fakamailoga he [haana] a haele mai, mo e fakaotiaga he lalolagi,” nukua hagaao a Iesu ke he matakau he tau tutaki fakauku ne nonofo he lalolagi ko e “fekafekau fakamoli mo e loto matala,” po ke “fekafekau pule.” (Mata. 24:3, 45; Luka 12:42) Ko e matakau he vahega fekafekau, ne fakatū e fakamauaga mitaki lahi mahaki he “mumui atu ke he Punua [M]amoe ke he tau mena oti kua fano a ia ki ai.” (Totou Fakakiteaga 14:4, 5.) Ne fakatumau e tau tagata ia ko e tau paretanoi ke he tuaga fakaagaaga he nakai fakakelea e lautolu a lautolu aki e tau taofiaga mo e tau gahua ha ‘Papeloni Lahi,’ ko e kautu he lotu fakavai he lalolagi. (Fakakite. 17:5) Nakai fai fakaakoaga pikopiko ne “moua . . . ke he tau gutu ha lautolu,” ti tumau a lautolu ke “nakai fai tepu [po ke, ilaila]” mai he lalolagi ha Satani. (Ioane 15:19) He vahā anoiha, ko lautolu ne fakauku ne toe he lalolagi ‘ka mumui’ ke he Punua Mamoe he o atu ke he lagi.—Ioane 13:36.
3. Ko e ha ne aoga ma tautolu ke falanaki ke he vahega fekafekau?
3 Ne kotofa e Iesu e fekafekau fakamoli mo e loto matala “ke he hana tau fekafekau,” ko e tau tagata takitokotaha he vahega fekafekau, ke “age kia lautolu e tau mena kai ke he tau magaaho [tonu].” Kua kotofa foki e ia e fekafekau “ke he hana tau mena oti.” (Mata. 24:45-47) Ko e “tau mena” nei kua putoia e “moto tagata tokologa” he ‘tau mamoe kehe.’ (Fakakite. 7:9; Ioane 10:16) Nakai kia lata ia lautolu takitokotaha ne fakauku mo e ‘tau mamoe kehe’ ke falanaki ke he fekafekau ne kotofa ke leveki a lautolu? Loga e kakano ati lata ia tautolu ke falanaki ke he vahega fekafekau. Ua e kakano uho lahi ko e: (1) Falanaki a Iehova ke he vahega fekafekau. (2) Falanaki foki a Iesu ke he vahega fekafekau. Kia kumikumi la tautolu ke he fakamooliaga kua falanaki katoatoa a Iehova ko e Atua mo Iesu Keriso ke he fekafekau fakamoli mo e loto matala.
Falanaki a Iehova ke he Fekafekau
4. Ko e ha kua falanaki a tautolu ke he tau mena kai fakaagaaga ne foaki mai he fekafekau fakamoli mo e loto matala?
4 Manamanatu ke he mena ati maeke he fekafekau fakamoli mo e loto matala ke foaki mai e tau mena kai huhua fakaagaaga he magaaho tonu. “To fakaako e au a koe, mo e fakakite kia koe e puhala ke fano ai a koe,” he talahau e Iehova. Ne lafi e ia: “To fakatonu e au kia koe, mo e kitekite au kia koe.” (Sala. 32:8) E, ne takitaki e Iehova e fekafekau. Kua lata mogoia ia tautolu ke falanaki katoatoa ke he iloilo, maamaaga, mo e takitakiaga faka-Tohi Tapu ne moua e tautolu mai he fekafekau.
5. Ko e heigoa ne fakakite ko e agaaga he Atua ne foaki e malolō ke he vahega fekafekau?
5 Kua fakamonuina foki e Iehova e vahega fekafekau aki e agaaga tapu haana. Pete kua nakai kitia e agaaga ha Iehova, ka kua kitia e gahuahuaaga mai ia lautolu ne moua ai. Manamanatu la ke he mena ati maeke e fekafekau fakamoli mo e loto matala ke taute e gahua fakamatala ke he lalolagi katoa hagaao ki a Iehova ko e Atua, haana Tama, mo e Kautu. Kua gahua malolō e tau tagata tapuaki ha Iehova he fakapuloa e fekau he Kautu ke he molea e 230 e motu mo e tau aelani. Nakai kia fakakite he mena ia e moolioli ko e agaaga he Atua ne foaki e malolō ke he fekafekau? (Totou Gahua 1:8.) He foaki e tau mena kai he tau magaaho tonu ke he tau tagata ha Iehova he lalolagi katoa, kua latatonu e vahega fekafekau ke taute e tau fifiliaga aoga lahi. He taute mo e fakagahua ai, kua fakakite he fekafekau e fakaalofa, mahani molu, mo e falu fua he agaaga.—Kala. 5:22, 23.
6, 7. Lahi fēfē e falanaki ha Iehova ke he fekafekau fakamoli?
6 Ke loto fakaaue ke he lahi he falanaki ha Iehova ke he vahega fekafekau, manamanatu ke he mena ne mavehe e ia ke he tau tagata haana. “To fakatagi ni e pu,” he tohi he aposetolo ko Paulo, “ti fakatu mai ai a lautolu kua mamate ke he moui nakai popo, to faliu foki a tautolu. Ha ko e mena to fakatapulu ni e tino nai ke popo ke he tino nakai tuai popo ke lata ai, to fakatapulu foki e tino nai ke mate ke he tino nakai tuai mate.” (1 Kori. 15:52, 53) Ko e tau tutaki fakauku he Keriso, ne fekafekau fakamoli ke he Atua ti mamate ke he tino kua popo, kua fakatū mai ke he taha mena ne mua atu he tau mena momoui fakaagaaga ne moua e moui tukulagi. Ne age ki a lautolu e tau tino nakai tuai mate—tumau tukulagi mo e nakai maeke ke fakamahaikava. Lafi ki ai, ne moua e lautolu e tino nakai tuai popo kua nakai mate, ka e maeke ke fakafoou ni e ia a ia. Ne fakamaama he Fakakiteaga 4:4 ko lautolu nei ne fakatū mai kua nonofo ke he nofoaiki mo e tau foufou auro he tau ulu ha lautolu. Ko e lilifu he tuaga patuiki kua tatali ma e tau Kerisiano ne fakauku. Ka e fai mena atu foki.
7 “Kua hoko mai e taonaga he Punua [M]amoe, ko e hana hoana foki kua taute tuai e ia a ia. Kua tuku atu kia ia ke tapulu a ia ke he ie mitaki, kua mea mo e kikila; ha ko e ie mitaki ko e tututonu ia he tau tagata tapu,” he talahau he Fakakiteaga 19:7, 8. Ne fifili e Iehova e tau Kerisiano fakauku ke eke mo hoana he Tama haana anoiha. He nakai popo, nakai mamate, ha he tuaga patuiki, ko e “taonaga he Punua [M]amoe,”—ko e tau mena fakaalofa homo ue atu mooli e tau mena nei! Ko e tau fakamooliaga ofoofogia he mauokafua he Atua ki a lautolu ne fakauku, ne “mumui atu ke he Punua [M]amoe ke he tau mena oti kua fano a ia ki ai.”
Ne Falanaki a Iesu ke he Fekafekau
8. Fakakite fēfē e Iesu kua mauokafua a ia ke he tau tutaki haana ne fakauku ke he agaaga?
8 Ko e heigoa e fakamooliaga kua falanaki katoatoa a Iesu ke he haana tau tutaki ne fakauku he agaaga? He pō fakahiku he moui haana he lalolagi, ne taute e Iesu e maveheaga ke he tau aposetolo fakamooli haana ne toko 11. “Ko mutolu nā, ne tumau a mutolu kia au ke he tau mena ne kamatamata ai au,” he tala age e ia ki a lautolu, “tuga ne kotofa mai he haku a Matua e kautu kia au, ke pihia foki he kotofa e au kia mutolu. Kia kai a mutolu mo e inu ke he haku a kaiaga mena ke he kautu haku, kia nonofo foki ke he tau nofoaiki, mo e fakafili e tau faoa a Isaraela ne hogofulu ma ua.” (Luka 22:28-30) Ko e maveheaga ne taute e Iesu mo e toko 11 to hokotia ki a lautolu oti e tau Kerisiano fakauku ne 144,000. (Luka 12:32; Fakakite. 5:9, 10; 14:1) Ane mai nakai falanaki a Iesu ki a lautolu, to taute kia e ia e maveheaga ke pule a lautolu mo ia he Kautu haana?
9. Ko e heigoa ne putoia “ke he [ha Keriso a] tau mena oti”?
9 Lafi ki ai, ne kotofa e Iesu Keriso e fekafekau fakamoli mo e loto matala “ke pule ke he hana tau mena oti”—tau mena oti he Kautu he lalolagi. (Mata. 24:47) Putoia ke he tau mena nei ko e tau fale he matapatu he Tau Fakamoli a Iehova, he tau la ofisa he tau motu kehekehe, mo e he tau Fale Toloaga mo e tau Fale he Kautu he lalolagi katoa. Putoia foki e gahua fakamatala he Kautu mo e taute tutaki. To kotofa kia he taha tagata ne nakai falanaki a ia ki ai ke leveki mo e fakaaoga e tau koloa uho haana?
10. Ko e heigoa ne fakakite kua fakalataha a Iesu Keriso mo e tau tutaki fakauku haana?
10 Nakai leva ti hake a Iesu ke he lagi, ne fina atu a ia ne liu tū mai ke he tau tutaki fakamooli haana ti taute e maveheaga ki a lautolu, he pehē: “Kitiala, to fakalataha au mo mutolu ke he tau aho oti, ato hoko ni ke he fakaotiaga he lalolagi.” (Mata. 28:20) Kua mauokafua nakai e maveheaga nei? He 15 e tau kua mole, ko e numera he tau fakapotopotoaga he Tau Fakamoli a Iehova he lalolagi katoa kua tupu mai he kavi 70,000 ke molea e 100,000—ko e malikiti ne molea e 40 e pasene. Ti tokofiha e tutaki foou ne lafi mai? Teitei 4.5 e miliona tutaki ne papatiso he 15 e tau kua mole—ko e evalesi ne molea e 800 he taha e aho. Ko e tau malikiti ofoofogia nei kua kitia maali kua takitaki he Keriso mo e tau tutaki fakauku haana he tau feleveiaaga fakapotopotoaga ti kua lalago a lautolu he gahua taute tutaki ha lautolu.
Kua Fakamoli mo e Loto Matala e Fekafekau
11, 12. Fakakite fēfē he fekafekau a ia ke fakamoli mo e loto matala?
11 Tali mai he falanaki katoatoa a Iehova ko e Atua mo Iesu Keriso ke he fekafekau fakamoli mo e loto matala, nakai kia lata ia tautolu ke taute pihia foki? Kua fakakite he fekafekau a ia ke fakamoli he taute e matagahua ne kotofa ki a ia. Ma e fakatai, ko e mekasini Watchtower ne kua lomi fakailoa ke he kavi 130 e tau. Kua fakatumau e tau feleveiaaga, tau toloaga, mo e tau fonoaga he Tau Fakamoli a Iehova ke atihake fakaagaaga a tautolu.
12 Kua loto matala foki e fekafekau fakamoli he nakai fakatokoluga he totomua ia Iehova, po ke fakatuai he magaaho ka kitia mitaki e takitakiaga ke he matakupu mai he Atua. Ma e fakatai, pete he talia fakagalogalo po ke nakai talia maaliali he tau takitaki lotu fakavai ke mitaki e lotokai mo e nakai mahani Atua he tau tagata he lalolagi, nukua foaki he fekafekau e tau hatakiaga ke he tau matahele he lalolagi kelea ha Satani. Maeke he fekafekau ke foaki e tau hatakiaga pulotu mo e magaaho tonu ha ko Iehova ko e Atua mo Iesu Keriso hane fakamonuina ai. Ti kua lata e fekafekau ke moua e falanaki katoatoa ha tautolu. Puhala fe mogoia kua maeke ia tautolu ke fakatātā kua falanaki a tautolu ke he fekafekau fakamoli mo e loto matala?
“O” mo Lautolu ne Fakauku he Mumui a Lautolu ke he Punua Mamoe
13. Hagaao ke he perofetaaga ha Sakaria, maeke fēfē ke fakatātā e falanaki ke he fekafekau fakamoli mo e loto matala?
13 Ne tutala e tohi a Sakaria he Tohi Tapu hagaao ke he “tau tagata tokohogofulu” ne o atu ke he “tagata Iuta” mo e pehē: “To o a tautolu mo mutolu.” (Totou Sakaria 8:23.) Ha ko e “tagata Iuta” ne hagaao ki ai “mo mutolu,” ko ia ko e matakau tagata. He vahā ha tautolu, kua hukui e ia e tau Kerisiano ne fakauku ne toe—ko e vala he “Isaraela he Atua.” (Kala. 6:16) Ko e “tau tagata tokohogofulu he tau vagahau oti he tau motu kehe” kua hukui e moto tagata tokologa he tau mamoe kehe. Tuga he mumui atu e tau Kerisiano fakauku ki a Iesu ke he tau mena oti kua fano a ia ki ai, ne ‘o foki,’ po ke hoa, e moto tagata tokologa ke he fekafekau fakamoli mo e loto matala. Ko lautolu he moto tagata tokologa kua nakai lata ke mā ke fakakite a lautolu ko e tau hoa “kua igatia mo e ui mai he lagi.” (Hepe. 3:1) Ne nakai mā a Iesu ke totoku a lautolu ne fakauku ko e “tau matakainaga.”—Hepe. 2:11.
14. Maeke fēfē ke lalago fakamooli e tau matakainaga he Keriso?
14 Kua mailoga e Iesu Keriso ko e lalagoaga fakamooli ne taute ke he tau matakainaga haana kua tuga kua taute age ki a ia. (Totou Mataio 25:40.) Puhala fe mogoia ha lautolu ne amaamanaki ke momoui ke he lalolagi kua maeke ke lalago e tau matakainaga he Keriso ne fakauku he agaaga? Ko e matapatu puhala he lagomatai a lautolu ke he gahua fakamatala he Kautu. (Mata. 24:14; Ioane 14:12) Ha kua tote hifo e numera ha lautolu ne fakauku ne toe he lalolagi he tau hogofulu tau kua mole, kua malikiti e numera he tau mamoe kehe. He fakalataha a lautolu ne amaamanaki ke momoui ke he lalolagi he gahua fakamatala, he fekafekau kaeke kua maeke mo tau tagata gahua mau, kua lalago e lautolu e tau matakainaga ne fakauku he agaaga ke fakamooli e matagahua taute tutaki. (Mata. 28:19, 20) Nakai nimo e tau magaaho ke lalago e gahua nei he taute e tau foakiaga fakatupe ke he tau puhala kehekehe.
15. Kua lata ke tali fēfē e tau Kerisiano takitokotaha ke he tau mena kai fakaagaaga he magaaho tonu mai he fekafekau mo e tau fifiliaga he fakatokatokaaga ne taute he fekafekau?
15 Ko e tau Kerisiano takitokotaha, onoono fēfē a tautolu ke he tau mena kai fakaagaaga he magaaho tonu ne fakatoka mai he fekafekau fakamoli puhala he tau tohi ne fakavē ke he Tohi Tapu mo e tau fakapotopotoaga Kerisiano? Kua fakaaoga fiafia nakai e tautolu mo e mautali ke fakagahua e tau mena ne ako e tautolu? Ko e heigoa e tali ha tautolu ke he tau fifiliaga he fakatokatokaaga ne taute he fekafekau? Ko e omaoma fakamakai ha tautolu ke he takitakiaga ne foaki mai ko e fakakiteaga kua tua a tautolu ke he fakaholoaga ha Iehova.—Iako. 3:17.
16. Ko e ha kua lata e tau Kerisiano oti ke fanogonogo ke he tau matakainaga he Keriso?
16 “Ko e haku a tau mamoe kua fanogonogo mai ke he haku a leo,” he talahau e Iesu, “kua iloa foki e au a lautolu; kua mumui mai foki a lautolu kia au.” (Ioane 10:27) Kua mooli e mena ia ke he tau Kerisiano fakauku. Ka e kua a lautolu ne “o” mo lautolu? Latatonu ia lautolu ia ke fanogonogo ki a Iesu. Kua lata foki ia lautolu ke omaoma ke he tau matakainaga haana. Ha ko e matapatu kotofaaga ke leveki e tuaga fakaagaaga he tau tagata he Atua kua tuku age tuai ki a lautolu. Ko e heigoa kua putoia he fanogonogo ke he leo he tau matakainaga he Keriso?
17. Ko e heigoa kua putoia he fanogonogo ke he vahega fekafekau?
17 Kua hukui he Kau Fakatufono e fekafekau fakamoli mo e loto matala he vahā nei, nukua takitaki mo e fakatokatoka e gahua fakamatala he Kautu ke he lalolagi katoa. Ko lautolu he Kau Fakatufono ko e tau motua kua iloa mitaki ne fakauku he agaaga. Kua lata pauaki a lautolu ke talahau ko e “tau takitaki” ha tautolu. (Hepe. 13:7) He leveki e tau tagata fakailoa he Kautu ne molea e 7,000,000 ke he lalolagi katoa he molea e 100,000 fakapotopotoaga, ko e tau leveki nei ne fakauku kua “fakamakai nakai noa ke he gahua he Iki.” (1 Kori. 15:58) He fanogonogo ke he vahega fekafekau kua kakano ke kaufakalataha katoatoa mo e haana Kau Fakatufono.
Monuina a Lautolu kua Fanogonogo ke he Fekafekau
18, 19. (a) Moua fēfē e lautolu ne fanogonogo ke he fekafekau fakamoli mo e loto matala e monuina? (e) Ko e heigoa e fifiliaga kua lata ia tautolu ke taute?
18 Tali mai he kotofa, ko e fekafekau fakamoli mo e loto matala hane “fakamafoki mai e tau tagata tokologa ke mahani tututonu.” (Tani. 12:3) Putoia he tau tagata nei a lautolu ne amaamanaki ke hao mai he moumouaga he fakatokaaga kelea nei. Ko e monuina mooli anei he moua e tuaga tututonu mo e Atua!
19 He vahā i mua, ka ha ha e ‘māga tapu ko Ierusalema Fou [ne 144,000], kua hifo mai he Atua mai he lagi, kua taute tuga ne kitofaitane kua taute mo e tane hana,’ ko e heigoa ha lautolu ne fanogonogo ke he leo he fekafekau ka iloa? “Ko e ha lautolu a Atua haia,” he talahau he Tohi Tapu. “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.” (Fakakite. 21:2-4) Ko e mena ia, kia fanogonogo a tautolu ke he Keriso mo e tau matakainaga tua fakamoli haana ne fakauku he agaaga.
Ko e Heigoa ne Ako e Koe?
• Ko e heigoa e fakamooliaga kua falanaki a Iehova ke he vahega fekafekau fakamoli mo e loto matala?
• Ko e heigoa ne fakakite kua falanaki katoatoa a Iesu Keriso ke he vahega fekafekau?
• Ko e ha kua lata ia tautolu ke falanaki ke he fekafekau pule?
• Fakatātā fēfē e tautolu kua falanaki a tautolu ke he fekafekau?
[Fakatino he lau 25]
Iloa nakai e koe ko hai kua fifili e Iehova mo hoana anoiha he Tama haana?
[Tau Fakatino he lau 26]
Kua tuku age e Iesu e “tau mena” haana ke he fekafekau fakamoli mo e loto matala
[Fakatino he lau 27]
He fakalataha a tautolu ke he gahua fakamatala, kua lalago e tautolu a lautolu ne fakauku he agaaga