Tiaki e Ioasa a Iehova ha ko e Lafiaga Kelea

KO E magaaho hagahaga kelea i Ierusalema, ko e maaga ne tu ai e faituga he Atua. Nakaila leva e tamate he Patuiki ko Ahasaia. Ko e mena uka foki ke manamanatu ke he mena ne taute mogoia he matua fifine a Ahasaia, ko Atalia. Ne tamate e ia e tau tama taane a Ahasaia, ko e tau mokopuna ni haana! Iloa nakai e koe ko e ha?—a He manako a ia ke eke mo patuiki ka e nakai ko e taha ia lautolu.

Pete ia, taha he tau mokopuna taane ha Atalia, ko e tama mukemuke ko Ioasa ne hao, ti nakai iloa he tupuna fifine haana. Manako nakai a koe ke iloa e puhala ne hao a ia?— Ha ha he tama mukemuke e anitī ne higoa ko Iosapa, ne fufū a Ioasa he faituga he Atua. Maeke a ia ke taute e mena nei ha ko e taane haana ko Iehoiata ko e Ekepoa ne Mua. Ti kaufakalataha a laua ke puipui mooli a Ioasa.

Ono e tau ne fufū ai a Ioasa he faituga. Ne fakaako a ia i ai ke he tau mena oti hagaao ki a Iehova ko e Atua mo e haana tau fakatufono. Fakahiku, he tū e fitu e tau he moui a Ioasa, ne fai mena ne taute e Iehoiata ke eke a Ioasa mo patuiki. Manako nakai a koe ke logona e puhala ne taute e Iehoiata e mena nei mo e mena ne tupu ke he tupuna fifine a Ioasa, ko e patuiki fifine mahani kelea ko Atalia?—

Ne fakapotopoto fufū e Iehoiata e tau kau leoleo pauaki ne ha ha he tau patuiki i Ierusalema he magahala ia. Ne tala age e ia ki a lautolu e puhala ne fakahao e ia mo e hoana haana e tama taane mukemuke he Patuiki ko Ahasaia. Ti fakakite mogoia e Iehoiata a Ioasa ke he tau kau leoleo ia, ne mailoga ai ko ia ko e patuiki kua lata. Ti taute e lautolu e pulega.

Ne tamai e Iehoiata a Ioasa ki fafo mo e fakafoufou a ia. He mena ia, “ti patipati e lautolu ha lautolu a tau lima mo e pehe age, Kia moui e patuiki.” Ne agaagai e tau kau leoleo ia Ioasa ke puipui a ia. He magaho ne logona e Atalia e tau leo fiafia oti nei, ne poi atu a ia ki fafo mo e totoko atu. Ka e, he poakiaga ha Iehoiata ne tamate he tau kau leoleo a Atalia.—2 Tau Patuiki 11:1-16.

Manatu nakai a koe kua fakatumau a Ioasa ke fanogonogo ki a Iehoiata mo e taute e mena hako?— Ne fanogonogo a ia he magaaho ne moui a Iehoiata. Ne matakite foki a Ioasa kua foaki he tau tagata e tau tupe ke fakafoou e faituga he Atua, nukua tiaki he haana matua taane, ko Ahasaia, mo e haana tupuna taane ko Iehoramo. Ka e kitekite la ke he mena ne tupu he magaaho ne mate a Iehoiata, ko e Ekepoa ne Mua.—2 Tau Patuiki 12:1-16.

Kavi ke he 40 e tau moui ha Ioasa he magaaho ia. He lata a Ioasa ke fakatumau ke lafi mo lautolu ne fekafekau ki a Iehova ne kapitiga a ia mo lautolu ne tapuaki ke he tau atua fakavai. Ko Sakaria, ko e tama taane a Iehoiata ko e ekepoa ha Iehova he magahala ia. Ko e heigoa he manatu e koe ne taute e Sakaria he magaaho ne iloa e ia e tau mena kelea hane taute e Ioasa?—

Ne tala age a Sakaria ki a Ioasa: “Kua tiaki e [koe] a Iehova, ko e mena ia kua tiaki ai e ia a [koe].” Ne ita lahi a Ioasa ha ko e tau kupu ia ti poaki e ia ke pinimaka a Sakaria ke mate. Manamanatu la—ne fakahao a Ioasa mai he tagata kelipopo, ka ko e mogonei kua kelipopo tuai e ia a Sakaria!—2 Nofoaga he Tau Patuiki 24:1-3, 15-22.

Maeke nakai a koe ke kitia e tau fakaakoaga ka ako e tautolu mai he tala nei?— Kua nakai manako a tautolu ke tuga a Atalia ne aga vihiatia mo e favale. Ka kua lata ia tautolu ke fakaalofa ke he tau matakainaga tapuaki mo e tau fī foki ha tautolu, tuga ni ne fakaako e Iesu ki a tautolu ke taute. (Mataio 5:44; Ioane 13:34, 35) Ti manatu, ka taute e tautolu e mena mitaki he kamataaga, tuga ne taute e Ioasa, kua latatonu ia tautolu ke fakatumau ke kapitiga mo lautolu ne fakaalofa ki a Iehova mo lautolu ne fakamalolō a tautolu ke fekafekau ki a ia.