Tau Agelu—Ko e “Tau Agaga ke Fekafekau”
“Nakai kia ko e tau agaga ke fekafekau ai a lautolu oti, kua fakafano mai a lautolu ke fekafekau ma lautolu ke moua ai e moui?”—HEPE. 1:14.
1. Ko e heigoa e fakamafanaaga ka moua e tautolu mai ia Mataio 18:10 mo e Heperu 1:14?
NE HATAKI e Iesu Keriso ha tagata ka liga fakalolelole haana tau tutaki: “A mutolu neke fakateaga a mutolu ke he taha ia lautolu nai kua fakateaga; ha ko e mena tala atu e au kia mutolu, ko e tau agelu ha lautolu ha he lagi kua kitekite mau a lautolu ke he fofoga he haku a Matua ha ha he lagi.” (Mata. 18:10) Hagaao ke he tau agelu tututonu, ne tohi he aposetolo ko Paulo: “Nakai kia ko e tau agaga ke fekafekau ai a lautolu oti, kua fakafano mai a lautolu ke fekafekau ma lautolu ke moua ai e moui?” (Hepe. 1:14) Kua fakamafana mooli e tau kupu ia kua fakaaoga he Atua e tau mena momoui nei he lagi ke lagomatai e tau tagata. Ko e heigoa ne talahau he Tohi Tapu ki a tautolu hagaao ke he tau agelu? Lagomatai fēfē e lautolu a tautolu? Ko e heigoa ka fakaako e tautolu mai he tau fakafifitakiaga ha lautolu?
2, 3. Ko e heigoa falu matagahua he tau mena momoui fakaagaaga he lagi?
2 Kua totou miliona e tau agelu tua fakamooli he lagi. Ko lautolu oti kua ‘malolo lahi, kua eke hana tau fekau.’ (Sala. 103:20; totou Fakakiteaga 5:11.) Kua ha ha he tau tama fakaagaaga nei he Atua e aga, tau mahani faka-Atua, mo e fifiliaga atāina. Kua fakatokatoka mitaki ue atu a lautolu mo e moua e tau tuaga tokoluga he fakatokaaga he Atua, ko e agelu ne mua ko Mekaeli (ko e higoa ha Iesu he lagi). (Tani. 10:13; Iuta 9) Ko ia nei e “uluaki he tau mena oti kana kua eke” ko e “Loko,” po ke Gutuvagahau, he Atua ti fakaaoga e Iehova ke eke e tau mena oti kana ne toe.—Kolo. 1:15-17; Ioane 1:1-3.
3 I lalo he agelu ne mua ko e tau sirafi, ne fakapuloa e tapuina a Iehova mo e lagomatai ke fakatumau e tau tagata haana ke meā fakaagaaga. Ha ha ai foki e tau kerupi, ne fekafekau ke lalago e pule katoatoa haana. (Kene. 3:24; Isaia 6:1-3, 6, 7) Falu agelu, po ke tau utafekau, ne taute e tau gahua kehekehe he finagalo he Atua.—Hepe. 12:22, 23.
4. Fēfē e tali he tau agelu ke he fakavēaga he lalolagi, ti ko e heigoa e kakano ke fakagahua fakamitaki he tau tagata e fifiliaga atāina?
4 Fiafia e tau agelu oti ke he ‘fakavēaga he lalolagi’ mo e olioli ke he gahua kotofa ha lautolu he taute e maka uho ofoofogia nei he pulagi ke eke mo kaina he tagata. (Iopu 38:4, 7) Ne tufuga e Iehova e tagata kua “toe tote ti lata mo e tau agelu” ka kua tufuga ai ke he Haana “fakatai,” ati kua maeke he tau tagata ke fakaata e tau mahani lilifu he Tufuga. (Hepe. 2:7; Kene. 1:26) He fakagahua fakamitaki e mena fakaalofa he fifiliaga atāina, kua maeke ia Atamu mo Eva mo e tau hologa ha laua ke olioli e moui he kaina parataiso ko e vala he magafaoa ha Iehova he tau mena momoui iloilo he lagi mo e lalolagi katoatoa.
5, 6. Ko e heigoa e totokoaga ne hoko ke he lagi, ti tali atu fēfē e Atua?
5 Kua liga ofoofogia mooli e tau agelu tapu he magaaho ne kitia e lautolu e kamataaga he totokoaga he magafaoa he Atua. Taha mai ia lautolu ne nakai liu fia loto ke fakaheke ki a Iehova ka e manako ke tapuaki age ki a ia. Ne fakafaliu ne ia a ia ko Satani (kakano “Totoko”) he totoko e tonuhia he pule a Iehova mo e he fakatoka e foliaga ke fakatū e pule ne paleko. Mo e pikopiko fakamua ne fakamau hifo, ne fakavaia e Satani e hoa tagata fakamua ke fakalataha mo ia he totoko ke he Tufuga fakaalofa ha laua.—Kene. 3:4, 5; Ioane 8:44.
6 Ne fakafili fakamafiti e Iehova a Satani he talahau he perofetaaga fakamua he Tohi Tapu: “To fakatupu e au e faitaua kia mua mo e fifine, ko e hau a [“tega,” NW] foki mo e hana fanau; to tatuki e ia hau a ulu, ka e tatuki ni e koe hana muihui.” (Kene. 3:15) To faitaua tumau ke he vahāloto ha Satani mo e “fifine” he Atua. E, kua onoono a Iehova ke he fakatokatokaaga he lagi he tau mena momoui fakaagaaga tua fakamooli ko e hoana fakahele ne fakalataha mo ia ko e Taane. Kua foaki he perofetaaga nei e fakavēaga mooli ma e amaamanakiaga, pete ko e tau vala tala he “mena galo” ne toe ke fakakite fakahaga. Ne finagalo e Atua ko e taha mai he vala he fakatokatokaaga haana he lagi ka moumou e tau mena oti ne totoko mo e he puhala ia ia to fakamaopoopo mai “e tau mena ha he lagi katoa mo e tau mena ha he lalolagi.”—Efeso 1:8-10.
7. Ko e heigoa ne taute he falu agelu he vahā a Noa, ti ko e heigoa e fakahikuaga ki a lautolu?
7 He vahā a Noa, ne fai agelu ne toka ha lautolu a “mena ne nonofo ai” ti fakafaliu tino tagata ke maeke ke moua e tau manako lotokai he lalolagi. (Iuta 6; Kene. 6:1-4) Ne tolo e Iehova e tau agelu totoko ia ke he pouligia, ti fakalataha a lautolu mo Satani he eke mo “tau agaga kelea” mo e tau fī kelea lahi he tau fekafekau he Atua.—Efeso 6:11-13; 2 Pete. 2:4.
Lalago Fēfē he Tau Agelu a Tautolu?
8, 9. Fakaaoga fēfē e Iehova e tau agelu ke lagomatai e tau tagata?
8 Ko Aperahamo, Iakopo, Mose, Iosua, Isaia, Tanielu, Iesu, Peteru, Ioane, mo Paulo e falu ia lautolu ne fekafekau atu ki ai e tau agelu. Ne fakahoko he tau agelu e tau fakafiliaga he Atua mo e fakailoa e tau perofetaaga mo e tau takitakiaga, putoia e Fakatufono faka-Mose. (2 Patu. 19:35; Tani. 10:5, 11, 14; Gahua 7:53; Fakakite. 1:1) Ha kua ha ha ia tautolu mogonei e Tohi Tapu katoa, liga nakai lata he tau agelu ke talahau ki a tautolu e tau fekau faka-Atua. (2 Timo. 3:16, 17) Ke he takatakaiaga fakaagaaga mogoia, kua lavelave lahi e tau agelu he taute e finagalo he Atua mo e lagomatai e tau fekafekau haana.
9 Ne fakamafana he Tohi Tapu a tautolu: “Kua fakatu e fale api he agelu a Iehova ke pa takai a lautolu kua matakutaku kia ia, ke laveaki foki e ia a lautolu.” (Sala. 34:7; 91:11) Ha ko e matakupu he mahani fakamooli, ne fakaatā e Iehova a Satani ke fakahoko e tau kamatamata kehekehe ki a tautolu. (Luka 21:16-19) Pete ia, ne iloa he Atua ka lahi e fakauka ha tautolu ke he kamatamata to kitia mooli kua mauokafua e mahani fakamooli ha tautolu ki a ia. (Totou 1 Korinito 10:13.) Hane mataala tumau e tau agelu ke fakalava mai he fakatatau ke he finagalo he Atua. Ne fakahao e lautolu a Sataraka, Mesako, Apetiniko, Tanielu, mo Peteru ka e nakai puipui e mate ha Setefano mo Iakopo ke he tau lima he tau fī. (Tani. 3:17, 18, 28; 6:22; Gahua 7:59, 60; 12:1-3, 7, 11) Kua kehekehe e tau tutūaga mo e tau mena tutupu. Pihia foki, ne tamate ai e falu matakainaga ha tautolu he tau kemuaga pagotā Nasi, ka kua lagomatai e Iehova e laulahi ke momoui.
10. Lafi ke he lagomatai fakaagelu, ko e heigoa e lalagoaga ka moua e tautolu?
10 Kua nakai fakaako he tau Tohiaga Tapu kua igatia e tagata he lalolagi mo e agelu leveki. Kua liogi mauokafua a tautolu “kaeke ke ole atu ai e tautolu ha mena ke lata mo e hana finagalo, ti fanogonogo mai ai [e Atua] kia tautolu.” (1 Ioa. 5:14) Mooli, maeke ia Iehova ke fakafano mai e agelu ke lalago a tautolu, ka e liga moua e lagomatai ke he tau puhala kehekehe. Liga to omoomoi e tau matakainaga Kerisiano ke foaki e lagomatai mo e fakamafana. Maeke he Atua ke foaki ki a tautolu e pulotu mo e loto malolō kua lata ke fahia mo e “mena mahukihuki ke he tino” kua lauia a tautolu ke tuga na tatuki mai he “agelu a Satani.”—2 Kori. 12:7-10; 1 Tesa. 5:14.
Muitua a Iesu
11. Fakaaoga fēfē e tau agelu ke lagomatai a Iesu, ti ko e heigoa ne fakakatoatoa e ia he fakatumau ke tua fakamooli ke he Atua?
11 Manamanatu ke he puhala ne fakaaoga e Iehova e tau agelu ke he mena ne tupu ki a Iesu. Ne fakailoa e lautolu haana a fanauaga mo e liu tu mai mo e lalago a ia he magaaho ne haia a ia he lalolagi. Maeke he tau agelu ke puipui a ia neke tapaki mo e mate mamahi. Ka kua fakafano atu e agelu ke fakamalolō a ia. (Mata. 28:5, 6; Luka 2:8-11; 22:43) Fakatatau ke he finagalo ha Iehova, ne poa e Iesu e moui haana he mate ti fakakite mooli kua maeke he tagata mitaki katoatoa ke fakatumau e mahani fakamooli ke he Atua pete he kamatamata lahi mahaki. Ko e mena ia ne fakaliu tu mai e Iehova a Iesu ke he moui tukulagi he lagi, ti age ki a ia e “pule oti kana” ti taute e tau agelu ke fakatokolalo ki a ia. (Mata. 28:18; Gahua 2:32; 1 Pete. 3:22) Kua eke mooli a Iesu mo matapatu vala he [“tega,” NW] he “fifine” he Atua.—Kene. 3:15; Kala. 3:16.
12. Ke he puhala fe kua maeke ia tautolu ke muitua ke he fakafifitakiaga lagotatai ha Iesu?
12 Ne iloa e Iesu kua hepe a ia ke kamatamata a Iehova he amanaki ke he tau agelu ke laveaki a ia ka taute e ia e mahani fakahanoa. (Totou Mataio 4:5-7.) Ati muitua a tautolu ke he fakafifitakiaga ha Iesu he momoui mo e “nonofo fakalatalata,” he nakai fakahagahaga kelea teao, ka e mauokafua he fehagai mo e favaleaga.—Tito 2:12.
Ko e Mena ne Fakaako e Tautolu Mai he Tau Agelu Tua Fakamooli
13. Ko e heigoa ha tautolu ka fakaako mai he fakafifitakiaga he tau agelu tututonu ne totoku ia 2 Peteru 2:9-11?
13 He fakatonu a lautolu ne “vagahau kelea” ke he tau fekafekau fakauku ha Iehova, ne tuhi atu e aposetolo ko Peteru ke he fakafifitakiaga mitaki he tau agelu tututonu. Pete kua ha ha ia lautolu e malolō lahi, ne kalo fakatokolalo mai e tau agelu he tau fakafiliaga ekefakakelea “mai he fakalilifu ki a Iehova.” (Totou 2 Peteru 2:9-11.a) Kia atāina tumau foki a tautolu he fakafili kelea, ka e fakalilifu a lautolu ne kotofa ki ai e levekiaga he fakapotopotoaga, ti toka atu e tau lekua ki a Iehova, ko e Fakafili Tokoluga Ue Atu.—Roma 12:18, 19; Hepe. 13:17.
14. Ko e heigoa ne foaki he tau fakafifitakiaga he fekafekau fakatokolalo he tau agelu?
14 Ne foaki he tau agelu a Iehova ki a tautolu e tau fakafifitakiaga mitaki he fekafekau fakatokolalo. Ne fakaheu he falu agelu ke talahau e tau higoa ha lautolu ke he tau tagata. (Kene. 32:29; Fakafili 13:17, 18) Pete kua totou miliona e tau mena momoui fakaagaaga he lagi, ko e tau higoa ni ha Mekaeli mo Kaperielu ne fakakite he Tohi Tapu. Kua liga eke e mena nei mo puipuiaga ke nakai foaki e tautolu ke he tau agelu e lilifu kua nakai lata. (Luka 1:26; Fakakite. 12:7) He magaaho ne fakaveli fakafohifo e aposetolo ko Ioane ke tapuaki ki mua he agelu, ne tomatoma ki a ia: “A koe, aua ia; ha ko au ko e hau a matakainaga a fekafekau.” (Fakakite. 22:8, 9) Ko e ha tautolu a tapuakiaga, putoia e tau liogi ha tautolu, kua lata ke puhala atu ni ke he Atua.—Totou Mataio 4:8-10.
15. Fakatoka fēfē he tau agelu e fakafifitakiaga ma tautolu he mahani fakauka?
15 Kua fakatoka foki he tau agelu e fakafifitakiaga he mahani fakauka. Pete kua fiafia lahi mahaki a lautolu he iloa e tau mena galo he Atua, kua nakai iloa oti e lautolu e tau mena ia. “Ko e tau mena ia kua foli ki ai e tau agelu he fia kitekite ki ai,” he talahau he Tohi Tapu. (1 Pete. 1:12) Ti ko e heigoa ne taute e lautolu? Ne fakatali fakatekiteki a lautolu ato hoko e magaaho he Atua ke ‘fakailoa ke he ekalesia e tau pulotu kehekehe’ haana.—Efeso 3:10, 11.
16. Maeke fēfē he mahani ha tautolu ke lauia e tau agelu?
16 Kua ha ha he ‘kitekiteaga he tau agelu’ e tau Kerisiano ne kamatamata. (1 Kori. 4:9) He fiafia lahi, kua mailoga he tau agelu e tau gahua tua fakamooli ha tautolu mo e olioli foki ke he fakatokihala he tagata agahala. (Luka 15:10) Kua mailoga he tau agelu e mahani Atua he tau fifine Kerisiano. Ne fakakite he Tohi Tapu “kua lata ai ke he fifine ke ha he ulu hana e fakamailoga he pule, ha ko e tau agelu.” (1 Kori. 11:3, 10) E, kua fiafia e tau agelu ke kitia e tau fifine Kerisiano mo e tau fekafekau oti foki he Atua he lalolagi hane omaoma ke he poakiaga mo e ulu pule fakateokarasi. Ko e omaoma pihia ko e fakamanatuaga kua latatonu ma e tau tama taane he Atua he lagi.
Lalago Fakamakutu he Tau Agelu e Gahua Fakamatala
17, 18. Ko e ha kua maeke ia tautolu ke talahau kua lalago he tau agelu e gahua fakamatala ha tautolu?
17 Kua putoia e tau agelu he falu mena tutupu ofoofogia he “aho he Iki.” Kua putoia he tau mena nei e fanauaga he Kautu he 1914 mo e liti hifo e “Mekaeli mo e hana tau agelu” a Satani mo e haana tau temoni mai he lagi. (Fakakite. 1:10; 11:15; 12:5-9) Ne kitia he aposetolo ko Ioane e “agelu kua lele ke he pulagi, ha ia ia e vagahau mitaki tukulagi ke fakamatala atu kia lautolu kua nonofo ke he lalolagi.” Fakapuloa ai he agelu: “Kia matakutaku a mutolu ke he Atua; mo e ta age kia ia e fakahekeaga, ha kua hoko mai e magaaho he hana fakafiliaga; kia hufeilo foki a mutolu kia ia ne eke e lagi, mo e lalolagi, mo e tahi, mo e tau vai puna.” (Fakakite. 14:6, 7) Ati fakamalolō e tau fekafekau ha Iehova ke he lalagoaga fakaagelu he fakamatala e lautolu e vagahau mitaki he Kautu kua fakatū pete ne totokoaga velagia he Tiapolo.—Fakakite. 12:13, 17.
18 He vahā nei, kua nakai takitaki he tau agelu a tautolu ki a lautolu ne loto fakamooli he vagahau ki a tautolu, tuga e agelu ne vagahau ki a Filipo ti takitaki atu a ia ke he eunuka Aitiope. (Gahua 8:26-29) Ka e, loga e tau mena tutupu he vahā nei ne fakakite ko e tau agelu i tua hane lalago mai e gahua fakamatala ha tautolu he Kautu mo e takitaki atu a tautolu ki a lautolu ne “kotofa ke he moui tukulagi.”b (Gahua 13:48) Ko e aoga mooli ha ia ke fakalataha tumau ke he fekafekauaga ti maeke ia tautolu ke taute e vala ha tautolu he kumi a lautolu ne manako ke ‘tapuaki ke he Matua mo e agaga mo e fakamoli’!—Ioane 4:23, 24.
19, 20. Ko e heigoa e vala he tau agelu ke he tau mena tutupu ne fakamailoga e “fakaotiaga he lalolagi nai”?
19 He hagaao ke he vahā ha tautolu, ne pehē a Iesu to ha ha i ai e tau agelu “ke vevehe kehe e tau tagata mahani kelea mo e tau tagata tututonu” he “fakaotiaga he lalolagi nai.” (Mata. 13:37-43, 49) Ne fai vala e tau agelu ke he fakapotopoto fakahiku mo e fakamau fakamailoga ha lautolu ne fakauku. (Totou Mataio 24:31; Fakakite. 7:1-3) Mua atu, ne fakalataha e tau agelu mo Iesu he magaaho “kua vevehe [e ia] e tau mamoe mo e tau koti.”—Mata. 25:31-33, 46.
20 “Ka fakakite mai e Iki ko Iesu mai he lagi, fakalataha mo e tau agelu he hana malolo” to moumou a lautolu oti “kua nakai iloa e Atua, mo lautolu kua nakai omaoma ke he vagahau mitaki he Iki ha tautolu ko Iesu Keriso.” (2 Tesa. 1:6-10) He magaaho ne kitia e Ioane e mena taha ia ne tupu he fakakiteaga, ne fakamaama e ia a Iesu mo e kau fakaagelu he lagi kua ō atu he tau solofanua hina ke matutaki he tauaga tututonu.—Fakakite. 19:11-14.
21. Ko e heigoa ka fakahoko he agelu ne “ha ia ia e kei he pahua nakai gata mai, ha he lima foki hana e toua lapatoa lahi” ka taute ki a Satani mo e tau temoni haana?
21 Ne “kitia foki e [Ioane] e agelu kua hifo mai he lagi, ha ia ia e kei he pahua nakai gata mai, ha he lima foki hana e toua lapatoa lahi.” Ko ia nei ko Mekaeli ko e agelu ne mua, ka līlī e Tiapolo mo e liti hifo a ia—pihia mo e tau temoni—ke he pahua. To fakatoka fakakū mai a lautolu he matahiku he Pule Meleniamu he Keriso ka fakahoko e kamatamata fakahiku ke he tau tagata mitaki katoatoa. Ka mole ia, ko Satani mo e falu ne totoko ka matematekelea he moumouaga. (Fakakite. 20:1-3, 7-10; 1 Ioa. 3:8) Ko e tau totokoaga oti ke he Atua to utakehe ai.
22. Putoia fēfē e tau agelu ke he tau mena kua tata mai i mua, ti lata ke fēfē ha tautolu a logonaaga ke he matagahua ha lautolu?
22 Ko e laveakiaga mua atu mai he fakatokaga kelea ha Satani kua tata lahi i mua. To fai matagahua mooli e tau agelu ke he tau mena tutupu aoga lahi nei ka fakatokoluga e pule katoatoa a Iehova, mo e tamai e fakamooliaga katoatoa ke he finagalo haana ma e lalolagi mo e tau tagata. Kua mooli ni ko e tau agelu tututonu ko e ‘tau agaga ke fekafekau ai a lautolu oti, kua fakafano mai ke fekafekau ma lautolu ke moua ai e moui.’ Kia fakaaue mogoia a tautolu ki a Iehova ko e Atua ma e puhala ne fakaaoga e ia e tau agelu ke lagomatai a tautolu ke taute e finagalo faka-Atua mo e moua e moui tukulagi.
[Tau Matahui Tala]
a 2 Peteru 2:11 (NW): “Pete he loto toa mo e malolō lahi mahaki e tau agelu, ne nakai fakafili fakakelea a lautolu ke he tau kupu kelea, [he nakai taute ai] mai he fakalilifu ki a Iehova.”
b Kikite Jehovah’s Witnesses—Proclaimers of God’s Kingdom, lau 549-551.
To Tali Fēfē e Koe?
• Fakatokatoka fēfē e tau mena momoui fakaagaaga he lagi?
• Ko e heigoa ne taute he falu agelu he vahā a Noa?
• Fakaaoga fēfē he Atua e tau agelu ke lalago a tautolu?
• Ko e heigoa e matagahua kua taute he tau agelu tututonu he vahā ha tautolu?
[Fakatino he lau 21]
Olioli e tau agelu he taute e finagalo he Atua
[Fakatino he lau 23]
Tuga e mena ne tupu ki a Tanielu, hane mataala tumau e tau agelu ke fakalava mai he fakatatau ke he finagalo he Atua
[Tau Fakatino he lau 24]
Kia fakamalolō ha kua lalago he tau agelu e gahua fakamatala he Kautu!
[Credit Line]
Globe: NASA photo