Tau Taane, Fifitaki e Fakaalofa he Keriso!

KE HE pō fakahiku he moui haana he lalolagi, ne tala age a Iesu ke he tau aposetolo tua fakamooli haana: “Ko e poaki fou ke tuku atu e au kia mutolu, kia feofanaki a mutolu; tuga he fakaalofa atu au kia mutolu, kia feofanaki foki a mutolu. Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:34, 35) Kua latatonu ni ke he tau Kerisiano mooli ke feofanaki.

He tutala fakamahao ke he tau taane Kerisiano, ne tohi he aposetolo ko Paulo: “Ko mutolu, ko e tau tane, kia fakaalofa a mutolu ke he tau hoana ha mutolu, tuga e fakaalofa a Keriso ke he ekalesia [po ke, fakapotopotoaga], mo e foaki mai e ia a ia ke eke mo hukui māna.” (Efeso 5:25) Maeke fēfē e taane Kerisiano ke fakagahua e tomatomaaga nei he Tohi Tapu he fakamauaga haana, mua atu kaeke ko e hoana haana ko e fekafekau tukulele ha Iehova?

Ofania he Keriso e Fakapotopotoaga

“Kua lata . . . ke he tau tane ke fakaalofa age ke he tau hoana ha lautolu, tuga e tau tino ha lautolu,” he talahau he Tohi Tapu. “Ko ia kua fakaalofa ke he hana hoana, kua fakaalofa a ia kia ia ni. Ha kua nakai fakai taha ke fakavihia hana a tino, ka kua fagai mo e [“ofania,” NW] ai e ia, pihia foki e Iki mo e ekalesia [po ke, fakapotopotoaga].” (Efeso 5:28, 29) Ne fakaalofa hofihofi a Iesu ke he tau tutaki haana mo e fakahele a lautolu. Ne ofania e ia a lautolu. Pete ne nakai mitaki katoatoa a lautolu, ne hofihofi mo e totonu a ia ki a lautolu. He manako ke “tuku atu ai e ia kia ia ni e ekalesia [po ke, fakapotopotoaga] fulufuluola,” ne hagaaki a ia ke he tau mahani mitaki he tau tutaki haana.—Efeso 5:27.

Tuga ni he fakakite he Keriso e fakaalofa ke he fakapotopotoaga, kua latatonu he taane ke fakakite e fakaalofa ke he hoa haana ke he tau kupu mo e tau gahua. Ko e hoana ka moua tumau e tau fakakiteaga fakaalofa he taane haana ne logona hifo e ofania mo e fiafia. He taha faahi, ko e fifine kua moua e tau mena hagahaga mitaki oti he kaina fulufuluola ka e nakai fiafia lahi kaeke kua fakaheu po ke tiaki he hoa mau haana.

Fakakite fēfē he taane kua ofania e ia e hoana haana? He toloaga, kua fakafeleveia e ia e hoana haana ke he falu he puhala lilifu mo e nava fiafia ha ko e haana a lagomatai. Kaeke kua lahi e matagahua he hoana ati kautū ai e magafaoa, kua nakai fakauaua e taane ke tala age ai ke he falu. Hoko laua ni, kua logona hifo e ia e fakaalofa hofihofi he taane. Ko e aamo e lima, ko e mamali, ko e kukukuku, mo e ko e navanava, ne liga ko e tau mena ikiiki ka e uho lahi e tau mena ia ke he loto he fifine.

‘Nakai Mā ke Totoku a Lautolu ko e Tau Matakainaga’

Ko Keriso Iesu ne “nakai mā . . . ke totoku [e tau tutaki fakauku haana] ko e tau matakainaga.” (Hepe. 2:11, 12, 17) Kaeke ko koe e taane Kerisiano, manatu ko e hoana haau ko e matakainaga fifine Kerisiano foki haau. Ko e tukuleleaga haana ki a Iehova kua mua atu ke he haana omonuo he fakamauaga, pete he papatiso a ia fakamua po ke he mole e mau ki a koe. Ka ui ke he hoana haau ke talahau e tali, ko e matakainaga taane ne leveki e feleveiaaga he fakapotopotoaga kua latatonu ke hagaao ki a ia ko e “Matakainaga Fifine.” Ko ia foki ko e matakainaga fifine haau, nakai ni he Fale he Kautu ka e pihia foki i kaina. Kua tatai ni e aoga he mahani totonu mo e mahani mitaki ki a ia i kaina mo e he Fale he Kautu.

Ka fai kotofaaga foki a koe he fakapotopotoaga, kua liga uka ia koe he falu magaaho ke fakalagotatai e tau matagahua he fakapotopotoaga mo e magafaoa. Ko e kaufakalataha mitaki he tau motua mo e tau fekafekau lagomatai mo e vehevehe fakamitaki he tau kotofaaga ka lagomatai a koe ke fakalahi e magaaho ma e matakainaga fifine ne manako lahi ke he magaaho haau—ko e hoana haau. Manatu, na tokologa e matakainaga taane ne maeke mooli ke taute e tau matagahua he fakapotopotoaga ne kotofa ki a koe, ka ko koe ni hokoia e matakainaga taane ne fakalataha ke he hoana haau he fakamauaga.

Mua atu, ko koe e ulu he hoana haau. Pehē e Tohi Tapu: “Ko e ulu he tau tane oti ko Keriso haia, ko e ulu he hoana ko e tane haia.” (1 Kori. 11:3) Kua lata ke fakagahuahua fēfē e koe e ulu pule nei? Ke he puhala fakaalofa, nakai he fatiaki tumau e kupu tohi i luga mo e poaki ke fakalilifu. Ko e kei ke fakagahua fakamitaki e ulu pule ko e fifitaki ki a Iesu Keriso he puhala ne taute e koe e hoana haau.—1 Pete. 2:21.

“Ko e Haku a Tau Kapitiga a Mutolu”

Ne totoku e Iesu e tau tutaki haana ko e tau kapitiga. Ne tala age a ia ki a lautolu: “Nakai tuai totoku atu e au a mutolu ko e tau fekafekau, ha ko e mena nakai iloa he fekafekau e tau mena kua eke he hana iki; ka e totoku atu e au a mutolu ko e tau kapitiga; ha kua fakailoa atu e au kia mutolu e tau mena oti ne fanogonogo ai au ke he haku a Matua.” (Ioane 15:14, 15) Ne mitaki e matutakiaga ha Iesu mo e tau tutaki haana. Ti taute mena auloa foki a lautolu. Ne uiina a “Iesu mo e hana tau tutaki” ke he taonaga i Kana. (Ioane 2:2) Ne fai matakavi mahuiga a lautolu, tuga e katene i Ketesemane. Pehē e Tohi Tapu ko e ‘mena mahani a Iesu ke fakalataha ai mo e hana tau tutaki.’—Ioane 18:2.

Kua manako mooli e hoana ke logona hifo ko e taane ko e hoa tata lahi mahaki haana. Kua aoga mooli ke olioli tokoua e mutolu ko e tau taane mo e tau hoana e moui! Fekafekau tokoua ke he Atua. Fiafia he fakaako tokoua e Tohi Tapu. Taute mena tokoua—he ō hui tokoua, tutala tokoua, kai tokoua. Kia nakai eke ni mo hoa mau; ka kia eke mo tau kapitiga fakahele.

‘Fakaalofa Ni a Ia ki a Lautolu ke Hoko ke he Fakaotiaga’

Ko Iesu ne ‘fakaalofa ke he tau tutaki haana ke hoko ke he fakaotiaga.’ (Ioane 13:1) Ne mahala falu taane ke fifitaki e Keriso he mena nei. Liga tiaki foki e lautolu e ‘hoana ha lautolu ke he vaha fuata,’ liga ma e taha fifine fuata.—Mala. 2:14, 15.

Ko e falu, tuga a Willi ne fifitaki e Keriso. Ha kua holo ki mua e gagao, ne lata e hoana a Willi ke leveki tumau ke he tau tau loga. Fēfē e logonaaga ha Willi ke he mena nei? Pehē a ia: “Ne manamanatu tumau au ko e mena fakaalofa mai he Atua e hoana haaku ti pihia e loto fakaaue haaku ki a ia. Lafi ki ai, he 60 e tau kua mole ne mavehe au ke leveki a ia ke he tau magaaho mitaki mo e kelea. To nakai nimo e au e maveheaga ia.”

Tau taane Kerisiano, fifitaki e fakaalofa he Keriso. Ofania e hoana matakutaku Atua haau—ko e matakainaga fifine mo e kapitiga haau.

[Fakatino he lau 20]

Ko e hoana haau kia ko e hoa tata lahi haau?

[Fakatino he hau 20]

‘Kia fakaalofa ke he hoana haau’