Fakatata Atu ke he Atua

Manamanatu a Ia ke he Tau Kaupāaga ha Tautolu

Levitika 5:2-11

“LALI fakalahi au ka e nakaila lahi ia he logona hifo e au.” He talahau he taha fifine hagaao ke he tau laliaga haana ke fakafiafia e Atua. Talia nakai e Iehova ko e Atua e tau laliaga mitaki lahi mahaki he tau tagata tapuaki haana? Manamanatu nakai a ia ke he tau lotomatala mo e tau tuaga ha lautolu? Ke tali e tau hūhū nei, kua aoga ke manamanatu ke he mena ne talahau he Fakatufono faka-Mose hagaao ke he falu poa i loto he Levitika 5:2-11.

I lalo he Fakatufono, ne manako e Atua ke he tau poa kehekehe ke fakafeilo aki e tau agahala. Ke he tau tuaga ne talahau he tau kupu tohi nei, ne agahala e tagata ka e nakai iloa po ke he fakatepetepe. (Tau kupu 2-4) Ka mailoga e ia e agahala haana, kua lata ke talahau e ia e agahala haana ti foaki e poa ha ko e hala—ko e ‘punua mamoe fifine, po ke punua koti fifine.’ (Tau kupu 5, 6) Ka e kua ka mativa a ia ti nakai fai punua mamoe po ke punua koti ke poa? Poaki kia e Fakatufono ko e ole e ia e manu pihia to moui kaitalofa a ia? Lata kia a ia ke gahua ato maeke ke moua e punua manu, ti fakatali e fakafeiloaga ma e tau agahala haana?

He mailoga e manamanatu fakaalofa a Iehova, ne pehē e Fakatufono: “Kaeke ke nakai moua e ia e punua mamoe ti ta mai ai e ia ha ko e hana hehe kua hala ai a ia, ua e kulukulu, po ke ua e punua lupe [“kia Iehova,” NW].” (Kupu 7) Ko e talahauaga “kaeke ke nakai moua e ia” kua maeke ke pehē foki “kaeke ke . . . nakai fahia a ia ke foaki.” Ka mativa lahi mahaki e tagata Isaraela ke moua e mamoe, kua fiafia e Atua ke talia e mena ne fahia a ia ke foaki—ua e kulukulu po ke ua e lupe.

Ka e kua ka nakai maeke a ia ke moua foki ua e manu lele? “Ti ta mai ai e ia mo e hana poa ha ko e hala, ko e veveheaga ne hogofulu aki he efa [valu po ke hiva e kapiniu] he falaoa [“mata,” NW] mitaki ke eke mo poa ha ko e hala,” he poaki he Fakatufono. (Kupu 11) Ma lautolu ne mativa lahi mahaki, ne fifili a Iehova ke taute taha fakatokaaga foki mo e fakaatā e poa ha ko e hala ka e nakai fai toto.a I Isaraela, nakai taofi he mativa ha tagata mai he monuina he fakafeiloaga po ke tuaga ke moua e mafola mo e Atua.

Ko e heigoa kua fakaako e tautolu hagaao ki a Iehova mai he fakatufono ke he tau poa ha ko e hala? Ko ia ko e Atua fakaalofa hofihofi noa mo e maama, ti mailoga e tau kaupāaga he tau tagata tapuaki haana. (Salamo 103:14) Ne manako a ia ke fakatata atu a tautolu ki a ia mo e feaki e fakafetuiaga mitaki mo ia pete ne tau tuaga uka ha tautolu, tuga e fuakau, nakai malolō e tino, tau matagahua fakamagafaoa po ke falu mena foki. Maeke ia tautolu ke moua e mafanatia he iloa kua fiafia a Iehova ko e Atua ka taute e tautolu e tau mena oti kua fahia a tautolu.

[Matahui Tala]